ལས་བྱེད་པ་དང་མང་ཚོགས་ཀྱི་བསམ་པའི་རིག་གནས་འཚོ་བ་རྒྱུན་ཆད་མེད་པར་ཕུན་སུམ་ཚོགས་སུ་གཏོང་བ་དང་ཕུལ་བྱུང་སྲོལ་རྒྱུན་རིག་གནས་སྔར་བས་དར་སྤེལ་དང་རྒྱུན་འཛིན་བྱ་ཆེད། ཟླ་8ཚེས་10ཉིན། “ཀྲུང་ཧྭའི་རིག་གནས་དར་སྤེལ་གཏོང་། བྱང་ཐང་རྟ་ཕོས་བང་རྩལ་འགྲན”ཞེས་པ་བརྗོད་དོན་གཙོ་བོར་བྱས་པའི་2024ལོའི་ནག་ཆུའི་འཆར་ཅན་རྟ་རྒྱུག་དུས་ཆེན་དང“གྲོང་གསེབ་དར་རྒྱས། ནག་ཆུ་མདུན་སྐྱོད”ཀྱི་བྱེད་སྒོ་སྐབས་གསུམ་པ་ནག་ཆུ་གྲོང་ཁྱེར་གེ་སར་རྟ་རྒྱུག་ཐང་དུ་འགོ་ཚུགས་རྒྱུ་རེད།

ད་ལོའི་རྟ་རྒྱུག་འགྲན་བསྡུར་དུས་ཆེན་ལ“9+3”གྱི་གསར་གཏོད་རང་བཞིན་གྱི་རྣམ་པ་སྤྱོད་རྒྱུ་ཡིན་པར། ཟླ་8ཚེས་1ནས་9ཉིན་བར་ནི་གྲ་སྒྲིག་གི་དུས་མཚམས་དང་ཟླ་8ཚེས་10ནས་12ཉིན་བར་ནི་བྱེད་སྒོ་དངོས་གཞིའི་དུས་མཚམས་རེད། བྱེད་སྒོའི་ནང་དོན་ཕུན་སུམ་ཚོགས་པ་སྟེ། “གྲོང་གསེབ་དར་རྒྱས། ནག་ཆུ་མདུན་སྐྱོད”ཀྱི་བྱེད་སྒོའི་མཐའ་བསྡུར་དང་། རྫོང་དང་ཆུས་ཁག་11གི་རིག་རྩལ་སྐོར་འཁྲབ། “ཡང་རྩེའི་ནག་ཆུའི”སྲོལ་རྒྱུན་རྒྱན་གོས་ངོམ་སྟོན། རྟ་རྒྱུག་འགྲན་བསྡུར་དང་རྟ་རྩལ་འཁྲབ་སྟོན། རྩྭ་ཐང་གི་རོལ་དབྱངས་འདུ་ཚོགས། མེ་ཕུང་སྒོར་གཞས། “འབྲི་གཡག་ཡག་ཤོས”དཔྱད་འདེམས། ཁྱིམ་ཚང་ཁྲིར་རིག་གནས་གཤམ་སྤེལ་གྱི་ཀྲུང་དབྱང་གླུ་གར་ཁང་གི་བྱེད་སྒོ། ཚོང་འགུགས་མ་འདྲེན་རྣམ་གྲངས་ཀྱི་ངོ་འཕྲད་གྲོས་མོལ། ཁྱད་ལྡན་ཞིང་འབྲོག་ཐོན་རྫས་འགྲེམས་སྟོན་འགྲེམས་ཚོང་སོགས་རིག་རྩལ་དང་། ལུས་རྩལ། ཚོང་ལས་རྣམ་གྲངས་བཅས་ཚུད་ཡོད། བྱེད་སྒོ་རབ་དང་རིམ་པ་དག་གིས་ཕྱོགས་ཡོངས་དང་། ཟུར་ཚད་མང་བ། གཏིང་ཟབ་པ་བཅས་ཀྱི་ཐོག་ནས་སྤྱི་ཚོགས་ལས་རིགས་ཁག་ལ་ནག་ཆུ་གྲོང་ཁྱེར་གྱི་བྱ་གཞག་ཁག་ལ་ཐོབ་པའི་ཕྱོགས་ཡོངས་ཀྱི་ཡར་ཐོན་དང་ལོ་རྒྱུས་རང་བཞིན་གྱི་གྲུབ་འབྲས་ངོམ་སྟོན་དང་། བོད་བྱང་ཐང་གི་ཕུལ་དུ་བྱུང་བའི་སྲོལ་རྒྱུན་རིག་གནས་དང་རིག་རྩལ་གྱི་རྣམ་པ་ཟབ་མོ་མངོན་རྒྱུ་རེད།