ཉེ་ཆར། གསར་འགོད་པས་2024ལོའི་ལོ་སྟོད་ཀྱི་ལྗོངས་ཡོངས་ཀྱི་དངུལ་རྩ་འཁོར་རྒྱུག་བྱེད་ཚུལ་སྐོར་གྱི་གསར་འགྱུར་ཡོངས་བསྒྲགས་ཚོགས་འདུའི་ཐོག་ནས་ཤེས་རྟོགས་བྱས་པར་གཞིགས་ན། ལོ་སྟོད་དུ་ལྗོངས་ཡོངས་ཀྱི་དངུལ་རྩའི་ཁོངས་གཏོགས་ཀྱིས་བརྟན་ཐོག་ཡར་འཕེལ་གྱི་ལས་ཀའི་རྩ་བའི་དགོངས་གཞི་མཐའ་འཁྱོངས་བྱས་པ་དང་། བརྟན་འཁྱོངས་ཀྱི་དངུལ་ལོར་སྲིད་ཇུས་དང་ཀྲུང་དབྱང་གིས་བོད་ལ་གནང་བའི་དམིགས་བསལ་གཟིགས་སྐྱོང་གི་དངུལ་རྩའི་སྲིད་ཇུས་གནད་འཁེལ་ནུས་ལྡན་ངང་དོན་འཁྱོལ་བྱས་པ། དངུལ་རྩས་དངོས་ཚན་དཔལ་འབྱོར་ལ་ཞབས་འདེགས་ཞུ་བའི་སྤུས་འབྲས་མཐོ་རུ་ཧུར་ཐག་བཏང་བས། ལྗོངས་ཡོངས་ཀྱི་དངུལ་རྩ་འཁོར་རྒྱུག་བྱེད་ཚུལ་ཡག་པོ་བྱུང་ནས་སྤྱི་འབོར་འཕར་ཚད་མགྱོགས་སུ་ཕྱིན་པ་དང་། ཡིད་རྟོན་དངུལ་བུན་གྱི་གྲུབ་ཆ་ལེགས་སུ་ཕྱིན་པ། མ་དངུལ་བསྡུ་སྒྲིལ་གྱི་མ་གནས་ཆག་པ། དངུལ་རྩའི་ཉེན་ཁ་ཆུང་དུ་ཕྱིན་ཏེ་བོད་ཀྱི་དཔལ་འབྱོར་དང་སྤྱི་ཚོགས་སྤུས་ཚད་མཐོ་བའི་འཕེལ་རྒྱས་ལ་དངུལ་རྩས་རྒྱབ་སྐྱོར་ཆེན་པོ་བྱས་ཡོད།

དངུལ་རྩའི་སྤྱི་འབོར་འཕར་ཚད་མངོན་གསལ་དོད་པོ་བྱུང་ནས་དངོས་ཚན་དཔལ་འབྱོར་བསྐྱར་འཕར་དང་ལེགས་འཕེལ་འགྲོ་བར་རྒྱབ་སྐྱོར་ནུས་ལྡན་བྱས་ཡོད། ཟླ་6པའི་ཟླ་མཇུག་ཏུ་ལྗོངས་ཡོངས་ཀྱི་སྤྱི་ཚོགས་ཀྱི་མ་དངུལ་བསྡུ་སྒྲིལ་གཞི་ཁྱོན་གསོག་ཚད་སྒོར་དུང་ཕྱུར་8900.72ཟིན་པ་དེ་དུས་མཚུངས་ལས་17.49%འཕར་བ་དང་། ལོ་སྟོད་དུ་སྤྱི་ཚོགས་ཀྱི་མ་དངུལ་བསྡུ་སྒྲིལ་གཞི་ཁྱོན་འཕར་ཚད་སྒོར་དུང་ཕྱུར་957.71ཟིན་པ་དེ་དུས་མཚུངས་ལས་སྒོར་དུང་ཕྱུར་490.74མང་དུ་ཕྱིན་ཡོད།

ཡིད་རྟོན་དངུལ་བུན་གྱི་གྲུབ་ཆ་རྒྱུན་མཐུད་ལེགས་སུ་ཕྱིན་ནས་འཐབ་ཇུས་གལ་ཆེན་དང་། གཙོ་གནད་ཁྱབ་ཁོངས། ཉམས་ཞན་ལྷུ་ཚིགས་བཅས་ལ་དངུལ་རྩས་འགན་སྲུང་ནུས་ལྡན་བྱས་ཡོད། ངོ་སྤྲོད་བྱས་པར་གཞིགས་ན། ཟླ་6པའི་ཟླ་མཇུག་ཏུ་ལྗོངས་ཡོངས་ཀྱི་དམངས་གཉེར་དཔལ་འབྱོར་གྱི་དངུལ་བུན་ལྷག་གྲངས་སྒོར་དུང་ཕྱུར་1307.22ཟིན་པ་དེ་དུས་མཚུངས་ལས་13.67%འཕར་བ་དང་། ལྗོངས་ཡོངས་ཀྱི་ཕྲན་ཚེགས་ཁེ་ལས་ཀྱི་དངུལ་བུན་ལྷག་གྲངས་སྒོར་དུང་ཕྱུར་1464.10ཟིན་པ་དེ་དུས་མཚུངས་ལས་32.27%འཕར་ནས་དངུལ་བུན་ཁག་གི་ཆ་སྙོམས་འཕར་ཚད་ལས་བརྒྱ་ཆའི་གྲངས་19.51མཐོ་བ་ཡོད། ལྗོངས་ཡོངས་ཀྱི་ཞིང་ལས་དང་འབྲེལ་བའི་དངུལ་བུན་ལྷག་གྲངས་སྒོར་དུང་ཕྱུར་1626.01ཟིན་པས་ལྗོངས་ཡོངས་ཀྱི་དངུལ་བུན་ལྷག་གྲངས་ཁག་གི་24.76%བཟུང་ཡོད།

རྒྱལ་མཚམས་སྒྲོལ་བའི་མི་དམངས་ཤོག་སྒོར་གྱི་ལས་སྒོ་དབྱར་མཚོ་རྒྱས་པ་ལྟར་འཕེལ་རྒྱས་ཕྱིན་ནས་རྒྱལ་མཚམས་སྒྲོལ་བའི་ཉོ་ཚོང་དེ་བས་མངོན་གསལ་དོད་པོས་བྱུང་བ་དང་སྤུས་ཚད་མཐོ་རུ་ཕྱིན་ཡོད། གཙོ་གནད་ཁེ་ལས་དང་། གཙོ་གནད་ཁྱབ་ཁོངས། གཙོ་གནད་ས་ཁོངས་བཅས་ལ་དམིགས་ཏེ་རྒྱལ་མཚམས་སྒྲོལ་བའི་མི་དམངས་ཤོག་སྒོར་གྱི་ལས་སྒོའི་སྤུས་ཚད་དང་ཕན་འབྲས་ལེགས་སུ་ཕྱིན་ཡོད། ལོ་སྟོད་དུ་ལྗོངས་ཡོངས་ཀྱི་རྒྱལ་མཚམས་སྒྲོལ་བའི་མི་དམངས་ཤོག་སྒོར་གྱི་ལས་སྒོའི་སྤྲོད་ལེན་དངུལ་གྲངས་སྒོར་དུང་ཕྱུར་6ལྷག་ཙམ་ཟིན་ཡོད།