འདི་ནི་སྐབས་དང་པོའི་རྒྱལ་ཡོངས་ཀྱི་དམངས་ཡོངས་ལུས་སྦྱོང་འགྲན་བསྡུར་ཆེ་མོ(ལྷོ་ནུབ་ཁུལ)ཡི་རྐང་རྩེད་སྤོ་ལོའི་འགྲན་བསྡུར་ཡིན་པ།

“ལོ་ལྔ་ཚན་བཅུ་བཞི་པ”ཚུན་དུ། རང་སྐྱོང་ལྗོངས་ཏང་ཨུད་དང་སྲིད་གཞུང་གི་འགྱུར་མེད་སྟོབས་ལྡན་གྱི་འགོ་ཁྲིད་འོག རང་སྐྱོང་ལྗོངས་ལུས་རྩལ་ཅུས་ཀྱིས་མི་དམངས་ལྟེ་བར་འཛིན་པའི་ལུས་རྩལ་འཕེལ་རྒྱས་གཏོང་རྒྱུ་མཐའ་འཁྱོངས་ཀྱིས་ཆུ་ཚད་དེ་བས་མཐོ་བའི་དམངས་ཡོངས་ལུས་སྦྱོང་གི་སྤྱི་པའི་ཞབས་ཞུ་མ་ལག་འཛུགས་པར་དམིགས་ནས་སྲིད་གཞུང་དང་། ཁྲོམ་ར། སྤྱི་ཚོགས་བཅས་ཐུན་མོང་ཐོག་ཞུགས་པའི་དམངས་ཡོངས་ལུས་སྦྱོང་གི་འཕེལ་རྒྱས་ལམ་སྲོལ་རྒྱུན་ཆད་མེད་པར་འཐུས་སྒོ་ཚང་དུ་བཏང་བ་དང་། དམངས་ཡོངས་ལུས་སྦྱོང་གི་སྤྱི་པའི་ཞབས་ཞུའི་མཁོ་སྤྲོད་རྒྱུན་མཐུད་ཕུན་སུམ་ཚོགས་སུ་བཏང་སྟེ་གྲོང་ཁྱེར་དང་གྲོང་གསེབ་ལ་ཁྱབ་པ་དང་། སྒྲིག་འཛུགས་འཐུས་སྒོ་ཚང་བ། སྒྲིག་ཆས་ཆ་ཚང་བ། བྱེད་སྒོ་ཕུན་སུམ་ཚོགས་པ། མཛུབ་ཁྲིད་ནུས་ལྡན་ཡིན་པ་བཅས་ཀྱི་དམངས་ཡོངས་ལུས་སྦྱོང་གི་སྤྱི་པའི་ཞབས་ཞུའི་མ་ལག་བཙུགས་ནས་མང་ཚོགས་ལུས་རྩལ་དུད་ཚང་ཁྲི་སྟོང་མང་པོར་ཁྱབ་པར་བྱས་ཡོད།

ལུས་རྩལ་དམངས་ཕན་ལས་ཕན་འབྲས་ཐོན་པ།

ལྷ་སའི་ལྷོ་རི་བྱང་རིའི་སྔོ་འགྱུར་ལས་གྲྭའི་ཆ་ཤས་ཤིག་ཡིན་པའི་ལྷོ་རིའི་སྤྱི་གླིང་ནི་རང་ལྗོངས་ཀྱི་ལུང་གཞུང་ཁུལ་དུ་གཞི་ཁྱོན་ཅན་གྱི་སྐྱེ་ཁམས་འཛུགས་སྐྲུན་དང་ཉམས་གསོའི་མཚོན་བྱེད་རང་བཞིན་གྱི་ལས་གྲྭ་ཐོག་མ་དེ་ཡིན་ཞིང་། ད་ཆ་ལྷ་སའི་གྲོང་མི་ཚོའི་སྤྲོ་གསེང་སྦྱོང་བརྡར་བྱ་ཡུལ་ཡག་པོ་ཞིག་ཏུ་གྱུར་ཡོད་པ་དང་། དེ་གར་སྐྱེ་ཁམས་མཛེས་ལྗོངས་དང་། ལུས་སྦྱོང་རྐང་ཐང་ལམ། བསིལ་ཁང་སོགས་སྤྲོ་གསེང་གཞི་གཅིག་ཏུ་འདུས་པས་འཆམ་འཆམ་དང་ལུས་སྦྱོང་སོགས་གྲོང་མི་ཚོའི་འཚོ་བའི་དགོས་མཁོ་སྣ་ཚོགས་བསྐངས་ཏེ། ལུས་རྩལ་ལ་བརྟེན་ནས་མི་དམངས་མང་ཚོགས་ཀྱི་ཐོབ་སྣང་དང་སྐྱིད་སྣང་རྒྱུན་ཆད་མེད་པར་ཆེ་རུ་འགྲོ་བཞིན་ཡོད།

རང་སྐྱོང་ལྗོངས་མི་དམངས་སྲིད་གཞུང་གིས《བོད་རང་སྐྱོང་ལྗོངས་ཀྱི་དམངས་ཡོངས་ལུས་སྦྱོང་གི་ལག་བསྟར་འཆར་གཞི(2021ལོ་ནས་2025ལོ་བར)》བཀྲམ་པ་དང་། རང་སྐྱོང་ལྗོངས་ལུས་རྩལ་ཅུས་ཀྱིས་དམངས་ཡོངས་ལུས་སྦྱོང་སྐོར་གྱི་སྲིད་ཇུས་སོགས་ཡིག་ཆ་རབ་དང་རིམ་པ་བཏོན་པས་དམངས་ཡོངས་ལུས་སྦྱོང་ལས་དོན་གྱི་མཉམ་ཞུགས་ལམ་སྲོལ་ཞིག་ཆགས་ཡོད། རང་སྐྱོང་ལྗོངས་ལུས་རྩལ་ཅུས་དང་འབྲེལ་ཡོད་སྡེ་ཚན་གྱིས་མཉམ་འགུལ་ལས་དོན་སྤེལ་ནས་རང་ལྗོངས་ཀྱི་དམངས་ཡོངས་ལུས་སྦྱོང་བྱ་གཞག་གི་སྲིད་ཇུས་ཁག་དོན་འཁྱོལ་མགྱོགས་པོ་བྱས་པས། ལྗོངས་ཡོངས་ཀྱི་སྤྱི་པའི་ལུས་རྩལ་ཞབས་ཞུའི་ནུས་པ་སྔར་བས་ཆེ་རུ་ཕྱིན་ཡོད།

2023ལོའི་ལོ་མཇུག་བར། རང་ལྗོངས་སུ་རིམ་པ་ཁག་དང་རིགས་ཁག་གི་ལུས་རྩལ་ཐང་ཁྱོན་8921ཡོད་ཅིང་། སྤྱིའི་རྒྱ་ཁྱོན་སྨི་ངོས་གྲུ་ཁྲི་711.25ཟིན་པ་དང་མི་རེའི་ཆ་སྙོམས་ལུས་རྩལ་ཐང་གི་རྒྱ་ཁྱོན་སྨི་ངོས་གྲུ་1.95ཟིན་པ་དེ“ལོ་ལྔ་ཚན་བཅུ་གསུམ་པའི”དུས་མཇུག་ལས་23.75%ཆེ་རུ་ཕྱིན་ཡོད། རིམ་པ་གསལ་པོ་དང་། བཀོད་སྒྲིག་ལུགས་མཐུན། ནུས་པ་འཐུས་ཚང་བཅས་ཀྱི་སྤྱི་པའི་ལུས་རྩལ་སྒྲིག་བཀོད་མ་ལག་གཞི་རྩའི་ཆ་ནས་ཆགས་ཏེ་དམངས་ཡོངས་ལུས་སྦྱོང་མངོན་འགྱུར་བྱུང་ཡོད།

ལུས་རྩལ་དམངས་ཕན་འདུ་འགོད་ལ་སྐུལ་འདེད་ཤུགས་ཆེན་བཏང་བ།

ས་ཁྱོན་མུའུ་1057ཟིན་པའི་ཀྲུང་ཧྭ་རིག་གནས་སྤྱི་གླིང་གི་ཤར་སྣེའུ་ཟམ་ཆེན་ནས་ནུབ་ལྷ་གོང་ཟམ་ཆེན་བར་ཡིན་ཞིང་། སྐྱིད་ཆུའི་བྱང་ངོགས་ཀྱི་ཐུན་མོང་རིག་གནས་དང་ཐུན་མོང་སྙིང་སྟོབས་དང་། སྐྱིད་ཆུའི་ལྷོ་ངོགས་ཀྱི་ཐུན་མོང་ལོ་རྒྱུས་དང་ཐུན་མོང་མངའ་ཁོངས་བཅས་ཁག་བཞི་ལས་གྲུབ་པ་མ་ཟད། སྐྱིད་ཆུའི་ཆུ་ཁོངས་མུའུ་3000ལྷག་ཙམ་བཟུང་བར་མ་དངུལ་སྒོར་དུང་ཕྱུར་5.2ལྷག་ཙམ་བཏང་བ་དང་། དེ་ནི་ལྷ་སའི་གྲོང་མིའི་དམངས་སེམས་འདུ་འགོད་ཅིག་ཡིན་ལ་ལུས་རྩལ་དམངས་ཕན་གྱི་འདུ་འགོད་གྲས་ཤིག་ཀྱང་ཡིན་པ་རེད།

ཀྲུང་ཧྭའི་རིག་གནས་སྤྱི་གླིང་གིས་མཚར་སྡུག་འོད་སྟོང་འཕྲོ་ལ་ལོ་རྒྱུས་ཡུན་རིང་ལྡན་པའི་ཀྲུང་ཧྭའི་རིག་གནས་དང་དེང་རབས་ཤེས་དཔལ་གྱི་འདུ་ཤེས་ཕྱོགས་ཡོངས་ནས་མངོན་པ་ཕུད། གཞན་ཡང་ད་དུང་ལན་ཆིའུ་སྤོ་ལོའི་ཐང་དང་རྐང་རྩེད་སྤོ་ལོའི་ཐང་སོགས་ལུས་རྩལ་ཐང་བཙུགས་ནས་རྒྱ་ཆེའི་གྲོང་མི་ཚོར་བདེ་འཇགས་ཆེ་བ་དང་། སྐྱིད་སྣང་དོད་པ། སྟབས་བདེ་བ་བཅས་ཀྱི་སྤྲོ་གསེང་རོལ་རྩེད་ཀྱི་བར་མཐོངས་དང་ལུས་སྦྱོང་བྱ་ཡུལ་མཁོ་འདོན་བྱས་ཡོད།

“ལོ་ལྔ་ཚན་བཅུ་བཞི་པའི”ཚུན་དུ། རང་ལྗོངས་ཀྱིས་རིམ་རྩིས་བརྒྱབ་ན་རིམ་པ་ཁག་དང་རིགས་ཁག་གི་དམངས་ཡོངས་ལུས་སྦྱོང་བྱ་ཡུལ་གྱི་སྒྲིག་བཀོད་ཀྱི་ཁ་གསབ་མ་དངུལ་སྒོར་དུང་ཕྱུར་11.04རེ་ཞུ་གཤམ་སྤྲོད་བྱས་ནས་སྡེ་ཁུལ་དང་ཤང་གྲོང་གནས་ཡུལ་གྱི་སྤྱི་པའི་ལུས་རྩལ་སྒྲིག་བཀོད་འཛུགས་སྐྲུན་ལ་གཙོ་གནད་ཐོག་སྐུལ་འདེད་བཏང་བ་དང་། མཐའ་མཚམས་ཀྱི་འཐབ་ས་དང་པོ་དང་། ས་བབ་མཐོ་བའི་ས་ཁུལ། ཐག་རིང་ཞིང་འབྲོག་ཁུལ་བཅས་ལ་གཟིགས་སྐྱོང་བྱེད་ཤུགས་ཆེ་རུ་བཏང་བས་ལུས་རྩལ་ལུས་སྦྱོང་སྒྲིག་བཀོད་ཀྱི་གྲངས་འབོར་རྒྱུན་མཐུད་མང་དུ་ཕྱིན་ཡོད།

གྲོང་ཁྱེར་ནས་གྲོང་གསེབ་བར་དང་། སྡེ་ཁུལ་ནས་ཐང་ཆེན་བར། ཕྱི་རོལ་ནས་ཁང་པའི་བར་བཅས་སུ་བདེ་ཐང་རྐང་ཐང་ལམ་དང་། སྤྱི་པའི་རྐང་རྩེད་སྤོ་ལོའི་ཐང་། བྱིས་པའི་རོལ་རྩེད་སྒྲིག་ཆས་ཁུལ། སྡེ་ཁུལ་གྱི་ལུས་སྦྱོང་བྱེད་ས་སོགས་གང་དགོས་ཅི་འཛོམས་ཡོད་ཁར་ལུས་རྩལ་རྩེད་མཁན་ཀྱང་གང་སར་མཐོང་རྒྱུ་ཡོད། “གང་སར་ལུས་སྦྱོང་བྱེད་ཐུབ་པ་དང་མི་ཚང་མ་ལུས་སྦྱོང་བྱེད་པར་སྤྲོ་བའི”རྣམ་པ་ཆགས་པ་ནི་བོད་ཀྱིས་ལུས་རྩལ་དམངས་ཕན་གྱི་ལས་གྲྭ་འཛུགས་སྐྲུན་ལ་རྒྱུན་མཐུད་སྐུལ་འདེད་བཏང་བ་དང་དམངས་ཡོངས་ལུས་སྦྱོང་ལུས་རྩལ་གྱི་རྣམ་པ་ཧུར་ཐག་བཏོད་པའི་འབྲས་བུ་ཞིག་རེད།

ས་མཐོའི་ཁྱད་ལྡན་ལུས་རྩལ་འགྲན་བསྡུར་གཉེར་བ།

ཉེ་ཆར། ཉིང་ཁྲི་གྲོང་ཁྱེར་སྤྲེལ་རི་རྒྱལ་ཁབ་ནགས་ཚལ་སྤྱི་གླིང་གི་གནམ་མཐའི་འབྲོག་རར་2024ལོའི་ཀྲུང་གོའི་རི་ཁུལ་རྐང་འཁོར་རིམ་མཚུངས་མཉམ་འགྲན་ས་ཚིགས་གསུམ་པ(བོད་ལྗོངས·ཉིང་ཁྲི)གཉེར་ཞིང་། རྒྱལ་ཡོངས་ས་གནས་ཁག་ནས་ཡོང་བའི་ཆེད་ལས་འཐུས་ཚབ་རུ་ཁག་16དང་ལས་ཞོར་བདམས་ཐོན་པ་དང་དེ་བཞིན་རྐང་འཁོར་ལ་དགའ་པོ་བྱེད་མཁན་ཚོ་མཉམ་དུ་འགྲན་བསྡུར་ལ་ཞུགས་པ་རེད།

ཉེ་བའི་ལོ་ཤས་རིང་། དམངས་ཡོངས་ལུས་སྦྱོང་བྱེད་སྒོའི་མ་ལག་རྒྱུན་ཆད་མེད་པར་ཕུན་སུམ་ཚོགས་སུ་དང་འཐུས་སྒོ་ཚང་དུ་གཏོང་བ་དང་། དམངས་ཡོངས་ལུས་སྦྱོང་གི་ཁྱད་ལྡན་སྤུས་རྟགས་གཏོད་ཆེད། རང་སྐྱོང་ལྗོངས་ལུས་རྩལ་ཅུས་ཀྱིས་ཁྱད་ལྡན་ལུས་རྩལ་ཐོན་ཁུངས་དང་རང་བྱུང་ཐོན་ཁུངས་སྔོག་འདོན་གཏིང་ཟབ་བྱས་ཏེ། ད་ཡོད་ཀྱི་ཐོན་ཁུངས་དང་ཕྱི་རོལ་གྱི་ལུས་རྩལ་འགྲན་བསྡུར་བྱེད་སྒོ་ཟུང་འབྲེལ་གྱིས་མང་ཚོགས་རང་བཞིན་གྱི་འགྲན་བསྡུར་བྱེད་སྒོ་ཁག་གསར་གཏོད་ངང་གཉེར་ནས་ས་མཐོའི་ཁྱད་ལྡན་ལུས་རྩལ་འཕེལ་རྒྱས་ཤུགས་ཆེན་བཏང་བ་རེད།

གངས་ཤུད་དང་། འཕྱོ་གཡེང་། མར་སུན་འགྲན་རྒྱུག རྟ་རྒྱུག སྦེ་ག་སོགས་བོད་དུ་མི་རིགས་ཀྱི་ཁྱད་ཆོས་ལྡན་པའི་སྲོལ་རྒྱུན་ལུས་རྩལ་རྣམ་གྲངས་དང་དེང་རབས་ལུས་རྩལ་གྱི་འགྲན་བསྡུར་ཕུན་སུམ་ཚོགས་པོའི་ངང་གཅིག་ལ་གཅིག་འགྲན་གྱི་ཚུལ་དུ་གཉེར་ཡོད།

ད་ཆ་ལྗོངས(ཀྲུང་དབྱང)ཐད་གཏོགས་ཚན་པའི་དམངས་ཡོངས་ལུས་སྦྱོང་གི་ལུས་རྩལ་འགྲན་ཚོགས་དང་། དམངས་ཡོངས་ལུས་སྦྱོང་གི་ཉམས་ལེན། ལོ་གསར་སྐབས་ཀྱི་རི་འཛེག རྒན་རྒོན་ལུས་སྦྱོང་སྒོར་གཞས་སྤེལ་རེས་ཀྱི་འགྲེམས་སྟོན་ཚོགས་ཆེན། བོད་ཀྱི་ལོ་གསར་ཚེས་གསུམ་གྱི་མི་རིགས་སྲོལ་རྒྱུན་རྟ་རྩལ་འཁྲབ་སྟོན་སོགས་ཀྱི་བྱེད་སྒོ་དག་ས་མཐོའི་ཁྱད་ཆོས་ལྡན་པའི་དམངས་ཡོངས་ལུས་སྦྱོང་བྱེད་སྒོར་གྱུར་ཡོད། གྲོང་ཁྱེར་དང་ས་ཁུལ་ཁག་གིས་རང་ངོས་ཀྱི་ཁྱད་ཆོས་དང་ཟུང་འབྲེལ་བྱས་ཏེ་རྣམ་པ་སྣ་ཚོགས་ཀྱི་དམངས་ཡོངས་ལུས་སྦྱོང་འགྲན་བསྡུར་བྱེད་སྒོ་སྤེལ་བ་སྟེ། དཔེར་ན། མི་རིགས་རྟ་རྒྱུག་དང་། མདའ་འཕེན། རྡོ་འགྱོག གཉའ་ཐག་འཐེན་པ་སོགས་མི་རིགས་ཀྱི་སྲོལ་རྒྱུན་ལུས་རྩལ་བྱེད་སྒོ་དང་། ཞིང་འབྲོག་པའི་ལུས་རྩལ་འགྲན་ཚོགས། སྡེ་ཁུལ་གྱི་ལུས་རྩལ་འགྲན་ཚོགས། དེ་བཞིན་རྐང་རྩེད་སྤོ་ལོ་དང་ལན་ཆིའུ་སྤོ་ལོ་སོགས་འགྲན་བསྡུར་བྱེད་སྒོར་རང་ལྗོངས་ཀྱི་མི་རིགས་ཁག་གི་མང་ཚོགས་ཀྱིས་ཧ་ཅང་དགའ་པོ་བྱེད་ཀྱི་ཡོད།

ཉེ་བའི་ལོ་ཤས་རིང་། རང་ལྗོངས་ཀྱིས་ལྷ་ས་གྲོང་ཁུལ་དུ་ཁྱབ་པའི་དམངས་ཡོངས་ལུས་སྦྱོང་ས་ཚིགས་ལ་ཁྱོན་ཡོངས་ནས་གསེད་བཀྲོལ་བྱས་ཤིང་། མིག་སྔར་ལྷ་ས་གྲོང་ཁྱེར་དུ་དམངས་ཡོངས་ལུས་སྦྱོང་ས་ཚིགས་50ལྷག་ཙམ་ཡོད་པ་དེས་གྲོང་མིར་དེ་བས་ལེགས་པའི་ལུས་སྦྱོང་བྱ་ཡུལ་མཁོ་འདོན་ཐུབ་ནས་མི་དམངས་མང་ཚོགས་ཀྱི་ཐོབ་སྣང་དང་སྐྱིད་སྣང་ཆེ་རུ་སོང་ཡོད།