2007ལོར་ཉིང་ཁྲི་མཐའ་མཚམས་དོ་དམ་ཉིང་ལག་རུ་ཁག་སྐྱེམས་སྟོང་མངགས་གཏོང་ཁང་བཙུགས་པ་ནས་བཟུང་། ཉི་མ་ཞུས་སྔ་ཞིང་། ལྷག་པས་རྡོ་ཡང་ཁྱེར་འོང་ཞེས་བརྗོད་སྲོལ་གྲགས། བྱེ་རླུང་དང་འབབ་རྡོ་འགོག་ཆེད་སྐབས་དང་པོའི་དཔོན་དམག་ཚོས་སྒར་ཁུལ་དུ་འགོག་སྲུང་ཤིང་ནགས་བཙུགས་ཤིང་། ལོ་17རིང་། འགོག་སྲུང་དཔོན་དམག་དང་མཐའ་སྲུང་བ་མི་རབས་དང་མི་རབས་ཀྱིས་ལྷག་བསམ་རྣམ་དག་དང་ཐེག་པ་ཁུར་ལེན་གྱིས་དོ་དམ་ཁུལ་གྱི་དུས་བདེ་ཞི་འཇགས་བསྲུངས་ཤིང་། སྐྱེམས་སྟོང་ཤང་གི་བརྟན་རྡོ་ལྟ་བུར་གྱུར་ཡོད།

མང་ཚོགས་ཀྱི་ཁྲོད་དུ་རྩ་བ་ཚུགས་ནས།

འགལ་བ་དང་རྩོད་གཞི་གྲོང་ཚོ་ནས་སེལ་བ།

ལོ་ལྟར་གྱི་ཟླ་4པ་ནས་6པ་བར། སྐྱེམས་སྟོང་ཤང་གི་མང་ཚོགས་གཅིག་རྗེས་གཉིས་མཐུད་ངང་དབྱར་རྩྭ་དགུན་འབུ་འཐུ་བར་བསྐྱོད་ཅིང་། མང་ཚོགས་དང་མཉམ་དུ་སྐྱོད་མཁན་གྱི་གྲས་སུ་དབྱར་རྩྭ་དགུན་འབུ་སྔོག་འཐུ་ས་ཚིགས་ཀྱི་ཉེན་རྟོག་ལས་དོན་ཁང་གི་མི་དམངས་ཉེན་རྟོག་པ་ཝང་ཧྥེང་ཡང་ཡོད། མང་ཚོགས་གང་དུ་ཡོད་སར་ཝང་ཧྥེང་གི་གཞུང་ལས་སྒྲུབས་དེ་གར་ཡིན་ཞིང་། ཝང་ཧྥེང་གིས་ས་བབ་མཐོ་ཚད་སྨི་4600སར་ཡོད་པའི་དབྱར་རྩྭ་དགུན་འབུ་འཐུ་ཡུལ་དུ་སྐོར་གཡེང་གྲལ་བཤེར་བྱེད་པར་བསྐྱོད་དེ། མང་ཚོགས་དང་ཁ་བརྡ་གློད་པའི་ཞོར་ལ་ཐོན་འབབ་སྐོར་གླེང་བ་དང་། མང་ཚོགས་ཀྱི་བསམ་འཆར་དང་གྲོས་འགོ་བསྡུ་རུབ་བྱེད་པ། བཅའ་ཁྲིམས་ཁྲིམས་སྲོལ་དང་གྲོང་སྲོལ་དམངས་ཆིངས་འགྲེལ་བཤད་རྒྱག་པ། མང་ཚོགས་ལ་ཁྲིམས་ལྟར་སྔོག་འཐུ་བྱེད་དགོས་པའི་ཁྲིད་སྟོན་བྱེད་པ་མ་ཟད། ད་དུང་འགལ་བ་དང་གདོང་ཐུག་བྱུང་སྐབས་འཕྲལ་མར་མི་དམངས་ཉེན་རྟོག་པ་བཙལ་ནས་ཐག་གཅོད་བྱེད་དགོས་ལུགས་ཀྱང་ཤོད་ཀྱི་ཡོད། ལོ་མང་རིང་ཝང་ཧྥེང་དང་ལས་རོགས་ཚོའི་འབད་བརྩོན་འོག སྐྱེམས་སྟོང་ཤང་དུ་དབྱར་རྩྭ་དགུན་འབུ་འཐུ་བའི་ཐད་ཀྱི་དོན་རྐྱེན་གཅིག་ཀྱང་བྱུང་མྱོང་མེད།

སྔ་ཙམ་ཤེས་རྟོགས་དང་སྔ་ཙམ་ཐེ་གཏོགས་བྱ་རྒྱུ་ནི་འགལ་བ་དང་རྩོད་གཞི་འགོག་སེལ་གྱི་འགག་རྩ་རེད། སྐྱེམས་སྟོང་མཐའ་མཚམས་མངགས་གཏོང་ཁང་བཙུགས་པ་ནས་བཟུང་། གྲོང་ཚོར་བཅའ་སྡོད་བྱེད་པ་དང་དྲ་མིག་ཉེན་རྟོག་ཁང་འཛུགས་པ་སོགས་ཀྱི་རྣམ་པའི་ཐོག་ནས་ཉེན་རྟོག་པ་སྒྲིག་འཛུགས་ཀྱིས་གྲོང་ཚོ་ཁག་ཏུ་ཡུན་རིང་བཅའ་སྡོད་བྱས་ཏེ། གྲོང་ཚོ་ཁག་གི་གནས་ཚུལ་དུས་ཐོག་ཏུ་ཤེས་རྟོགས་བྱས་ནས་ཉེན་རྟོག་པ་ས་གནས་ས་ཐོག་ལ་དུས་ཐོག་ཏུ་འབྱོར་བའི་འགན་ལེན་བྱས་ཡོད།

ཞབས་འདེགས་ཞུ་སྟངས་ལེགས་སུ་བཏང་ནས།

ལག་ཁྱེར་གཉེར་བར་ཡོང་མཁན་མང་ཚོགས་ལ་སྟབས་བདེ་བསྐྲུན་པ།

སྐྱེམས་སྟོང་མཐའ་མཚམས་མངགས་གཏོང་ཁང་གིས་ཁོངས་གཏོགས་ཁུལ་གྱི་མང་ཚོགས་ཀྱི་དགོས་མཁོ་དངོས་ལ་གཞི་ཚུགས་ཏེ་ཞབས་འདེགས་ཞུ་སྟངས་རྒྱུན་ཆད་མེད་པར་ལེགས་སུ་བཏང་ཞིང་། ལས་བྲེལ་ཆེ་བ་དང་། སློབ་སྦྱོང་གི་ཁུར་པོ་ལྕི་བ། ལམ་ཐག་རིང་བ་སོགས་མང་ཚོགས་ཀྱི་གནས་ཚུལ་དངོས་ལ་དམིགས་ཏེ། ཉིན་མཚན་བལྟོས་མེད་ལག་ཁྱེར་གཉེར་བའི་ལས་རེས་ལམ་ལུགས་དོན་འཁྱོལ་བྱས་ནས་དུས་ཐོག་ཏུ་ལག་ཁྱེར་གཉེར་ཐུབ་པའི་འགན་ལེན་བྱས་ཡོད། “གནད་འཁེལ་གསུམ་དང་སྟོང་ལོག་མི་གཏོང་བ་གཅིག”གི་ལམ་ལུགས་དོན་འཁྱོལ་ནན་པོ་བྱེད་པ་སྟེ། ལག་ཁྱེར་གཉེར་མཁན་མི་དམངས་ཉེན་རྟོག་པས་ལས་རིམ་འགྲེལ་བཤད་གནད་ལ་འཁེལ་པོ་རྒྱག་པ་དང་། ཁ་གསབ་དཔྱད་གཞིའི་སྐོར་ལ་མཛུབ་ཁྲིད་གནད་ལ་འཁེལ་པོ་བྱེད་པ། མང་ཚོགས་ལ་སྣེ་ལེན་དང་ཞབས་འདེགས་ཞུ་སྐབས་གནད་ལ་འཁེལ་པོ་དགོས་པ། མང་ཚོགས་སྟོང་ལོག་མི་གཏོང་བ་བཅས་བྱེད་དགོས་པའི་བླང་བྱ་བཏོན་ཡོད། “གྲོང་ཚོ་གཅིག་ལ་ལས་རོགས་ཉེན་རྟོག་པ་གཅིག”དང་དྲ་མིག་ཉེན་རྟོག་ཁང་གི་ལས་ཀའི་ལེགས་ཆ་འདོན་སྤེལ་གང་ལེགས་བྱས་ཏེ་ལག་ཁྱེར་གཉེར་རིང་ཞབས་འདེགས་ཞུ་རྒྱ་ཆེ་རུ་བཏང་ཞིང་། ལག་ཁྱེར་གཉེར་བར་ཡོང་དུས་སྔོན་ལ་མངགས་པ་དང་། གྲོང་ཚོར་ངོ་ཐུག་གདོང་འཕྲད་ཀྱིས་བློ་འདྲི་དང་ལེན་བྱེད་པ། ལག་ཁྱེར་སྒོ་རྩར་སྐྱེལ་བ་སོགས་ཀྱི་ཞབས་ཞུའི་བྱ་ཐབས་གཏིང་ཟབ་ཏུ་བཏང་སྟེ། རྒན་རྒོན་དང་དབང་པོ་སྐྱོན་ཅན་སོགས་འགུལ་སྐྱོད་མི་བདེ་བའི་མང་ཚོགས་ལ་སྒོ་རྩར་ལག་ཁྱེར་གཉེར་བར་བསྐྱོད་ཡོད།

ཞབས་ཞུ་ལེགས་གཏོང་གི་བྱེད་སྒོ་སྤེལ་ཚུན། སྐྱེམས་སྟོང་མཐའ་མཚམས་མངགས་གཏོང་ཁང་གིས་རྒྱུན་གཏན་གྱི་ལས་ཀའི་དུས་ཚོད་ཕུད་རིམ་རྩིས་བྱས་ན་ལག་ཁྱེར་དང་དཔང་ཡིག་སྣ་ཚོགས་320ལྷག་ཙམ་གཉེར་བ་དང་འབྲེལ། སྒོ་རྩར་ལག་ཁྱེར་གཉེར་བ་དང་ལག་ཁྱེར་སྒོ་རྩར་སྐྱེལ་བའི་ཞབས་འདེགས་ཐེངས་28ཞུས་ཏེ། མང་ཚོགས་ཀྱི་ཐོན་སྐྱེད་དང་འཚོ་བར་སྟབས་བདེ་བསྐྲུན་པ་མ་ཟད། ཁོངས་གཏོགས་ཁུལ་གྱི་དཔལ་འབྱོར་དང་སྤྱི་ཚོགས་རྒྱུན་མཐུད་ངང་འཕེལ་རྒྱས་འགྲོ་བར་སྐུལ་འདེད་ཀྱང་བཏང་བ་རེད།

བརྩེ་བ་ཟབ་མོས་སྲུང་སྐྱོང་བྱས་ཏེ།

མང་ཚོགས་ཀྱི་བདེ་འཇགས་ལ་འགན་ལེན་བྱས་པ།

2022ལོའི་ཟླ་དང་པོར། མང་ཚོགས་ཤིག་གིས་སྒེར་འཁོར་བཏང་ནས་སྐྱེམས་སྟོང་ཤང་གི་ས་བབ་མཐོ་ཚད་སྨི་4700ཟིན་པའི་སྦུད་པ་ལ་བརྒྱུད་སྐབས་ལམ་ངོས་སུ་གངས་གསོག་ཐེབས་པའི་ཁྲོད་དུ་རླངས་འཁོར་ལུས་ཡོད། རང་སྐྱོབ་བྱེད་རིང་སྟབས་མ་ལེགས་པར་ལག་གཅིག་འཁོར་ལོའི་འོག་ཏུ་ཚུད་པའི་མཚམས་འདིར། མི་དེས་ལག་ཐོགས་ཁ་པར་བརྒྱབ་ནས་ཉེན་རྟོག་པར་སྐྱོབ་རོགས་ཞུས་པ་རེད། སྐྱེམས་སྟོང་མཐའ་མཚམས་མངགས་གཏོང་ཁང་གི་མི་དམངས་ཉེན་རྟོག་པས་གནས་ཚུལ་ཤེས་རྟོགས་བྱུང་མ་ཐག་ལམ་བར་དུ་འདྲེད་བརྡར་ཤོར་སླ་བ་སོགས་ཀྱི་དཀའ་ངལ་སྣ་ཚོགས་ཁྱད་བསད་བྱས་ཏེ། འཕྲལ་མར་ས་གནས་ས་ཐོག་ཏུ་བསྐྱོད་ནས་ཉེན་གྱར་མང་ཚོགས་དུས་ཐོག་ཏུ་སྨན་བཅོས་བྱེད་པར་བསྐྱལ་བ་རེད།

2020ལོར་རྒྱལ་ལམ་219ཡི་སྐྱེམས་སྟོང་ལམ་དུམ་བསྐྲུན་ཚུན། སྐྱེམས་སྟོང་མཐའ་མཚམས་མངགས་གཏོང་ཁང་གིས་འགྲོ་ལམ་གྱི་རོགས་སྐྱོབ་སྣ་ཚོགས་བསྡོམས་ཐེངས་67བྱས་པ་དང་། རོགས་སྐྱོབ་རླངས་འཁོར་103དང་མི་སྣ་324བཏང་ནས་མི་དམངས་མང་ཚོགས་ཀྱི་ཚེ་སྲོག་དང་རྒྱུ་ནོར་གྱི་བདེ་འཇགས་འགན་ལེན་ཏན་ཏིག་བྱས་པ་རེད།

རོགས་སྐྱོར་དང་གཅེས་སྐྱོང་གིས།

ཕྲུ་གུ་བདེ་ཐང་ངང་འཚར་ལོངས་ཡོང་བར་བྱས་པ།

སྐྱེམས་སྟོང་ཤང་དུ་སྐྲ་བཞར་ཁང་མེད་པས་ཁོངས་གཏོགས་ཁུལ་གྱི་དཀའ་ངལ་ཡོད་པའི་བྱིས་པ་ཚོར་འཚོ་བ་དང་སློབ་སྦྱོང་ཐད་དཀའ་ངལ་འཕྲད་པ་མ་ཟད། སྐྲ་བཞར་དཀའ་བའི་དཀའ་ངལ་ཡང་འཕྲད་ཀྱི་ཡོད། དེ་སྔོན་སྐྱེམས་སྟོང་ཤང་མཐའ་མཚམས་མངགས་གཏོང་ཁང་གི་སི་ཝུའུ་ཀྲང་གི་འགན་འཁུར་མྱོང་ཡོད་པའི་ཉེན་རྟོག་པ་ལུའི་ཡན་ཧུང་གིས་མ་བསྐུལ་དང་ལེན་བྱས་ཏེ། ཁོངས་གཏོགས་ཁུལ་གྱི་དཀའ་ངལ་ཡོད་པའི་བྱིས་པའི་སྐྲ་བཞར་བའི་ལས་འགན་ཕྲག་ཏུ་ཁུར་ཡོད།

དུས་ཡུན་རིང་པོའི་ནང་། སྐྱེམས་སྟོང་མཐའ་མཚམས་མངགས་གཏོང་ཁང་གིས་ཐོག་མཐའ་བར་གསུམ་དུ་དཀའ་ངལ་ཡོད་པའི་བྱིས་པའི་ལུས་སེམས་བདེ་ཐང་ལ་སེམས་ཁུར་དང་གཅེས་སྐྱོང་བྱས་ཡོད་ལ། འབྲེལ་ཡོད་སྡེ་ཚན་ཁག་དང་མཉམ་འབྲེལ་ཧུར་ཐག་བྱས་ནས། ན་སོ་དར་ལ་མ་བབས་པའི་མི་འཚར་ལོངས་ཀྱི“གཅེས་སེམས་ས་ཚིགས”ཀྱང་བཙུགས་ནས་དཀའ་ངལ་ཡོད་པའི་བྱིས་པར་གྱོན་ཆས་དང་སློབ་ཆས་སོགས་སྤྲད་ཡོད། ཁྱིམ་དུ་བསྐྱོད་ནས་འཚམས་འདྲི་དང་ཉེན་རྟོག་སྒར་དུ་ཡོང་ནས་ཉམས་ལེན་སོགས་ཀྱི་བྱེད་སྒོ་གཞི་རྟེན་དུ་བྱས་པ་བརྒྱུད། སེམས་ཁམས་བློ་འདྲི་བའི་ལག་ཁྱེར་ཡོད་པའི་མི་དམངས་ཉེན་རྟོག་པ་སྒྲིག་འཛུགས་བྱས་ནས་སེམས་ཁམས་སློབ་གསོ་བརྒྱབ་སྟེ། དཀའ་ངལ་ཡོད་པའི་བྱིས་པར་སློབ་སྦྱོང་ཧུར་ཐག་དང་བེ་ཐང་ངང་འཚོ་བ་སྐྱེལ་བར་རོགས་རམ་བྱས་ཡོད།