ཧི་མ་ལ་ཡའི་བྱང་འདབས་སུ་ཆགས་པའི་ས་སྐྱ་རྫོང་དུ“ཀྲུང་གོ་ཉིང་རྡུལ་ས་སྐྱའི་ཆན་ཝ་ཁྲི་30ཟིན་པའི་རླུང་གློག་གསོག་འཇོག་གཞི་གཅིག་ཅན་གྱི་རྣམ་གྲངས”དེ་རླུང་གློག་གི་ལྷུ་ལག་གཙོ་བོ་སྐྱེལ་འདྲེན་དང་སྒྲིག་སྦྱོར་གྱི་མཐོ་རླབས་འཕྱུར་བའི་དུས་སྐབས་སུ་སླེབས་ཡོད་ཅིང་། ཉིན་ཤས་བསྟུད་མར་རིང་ཚད་ལ་སྨི་90.5དང་ལྗིད་ཚད་ལ་ཏུན་23.6ཡོད་པའི་ཤར་ཕྱོགས་གློག་ཤུགས་རླུང་གློག་གི་ལྷུ་ལག་རེ་རེ་རླངས་འཁོར་ནང་བླུགས་ནས་རྣམ་གྲངས་ཀྱི་ས་བབ་མཐོ་ཤོས་སྨི་5193ཟིན་པའི་སྒྲིག་སྦྱོར་བྱ་ཡུལ་དུ་དབོར་བ་རེད།

རྣམ་གྲངས་ཀྱི་ཅིང་ལི་ཚའེ་ཝུན་ཐའོ་ཡིས“རྣམ་གྲངས་ཀྱི་རླུང་ཤུགས་གློག་ཐང་ལ་ཆ་སྙོམས་ས་བབ་མཐོ་ཚད་སྨི་4600ཙམ་ཡོད་པ་དང་། ཤར་ཕྱོགས་གློག་ཤུགས་རླུང་གློག་མ་རྐང་ཚད་ཡོད་ཀུང་སིས་རང་བརྟེན་ཞིབ་བཟོ་བྱས་པའི་ཀྲའོ་ཝ་5.0ཟིན་པའི་ཁབ་ལེན་འཕྲུལ་ཆས་ཉིས་ཅན་གྱི་རླུང་གློག་འཕྲུལ་ཚན་40འདེམས་སྤྱོད་བྱས་ཡོད”ཅེས་བཤད་པ་དང་། ཁོང་གིས། འཕྲུལ་ཚན་དེས་གློག་གཏོང་ཚད་མཐོ་ཤོས་ཀྱི་ཐོག་ནས་གློག་གཏོང་སྐབས་ཆུ་ཚོད་གཅིག་རང་ལ་ཁྱིམ་ཚང་དཀྱུས་མ་4ཡི་ལོ་གཅིག་གི་གློག་སྤྱོད་དགོས་མཁོ་སྐོང་ཐུབ་ཀྱི་ཡོད་ཅེས་བཤད་པ་རེད།

མཚོ་བོད་ས་མཐོར་ས་བབ་མཐོ་བའི་རླུང་ནུས་ཐོན་ཁུངས་ཕུན་སུམ་ཚོགས་པོ་ཡོད་པས་རླུང་གློག་འཕེལ་རྒྱས་གཏོང་བའི་ལྷན་སྐྱེས་ཀྱི་ལེགས་ཆ་ཡོད། ཉེ་བའི་ལོ་ཤས་རིང་། ཀྲུང་དབྱང་གི་ཁེ་ལས་མང་པོ་ཞིག་གིས་བོད་ཀྱི་རླུང་གློག་ཁྲོམ་ར་གསར་འབྱེད་བྱ་རྒྱུར་གཞོལ་ཏེ་བོད་ཀྱི་ནུས་རྒྱུ་གསར་པ་ཇུས་འགོད་ནས་འཛུགས་སྐྲུན་བར་དང་དེ་ནས་དྲ་སྦྲེལ་གློག་གཏོང་བར་གྱི“ས་མཐོའི་མྱུར་ཚད”ལ་སྐུལ་འདེད་གཏོང་བཞིན་ཡོད།

ས་སྐྱ་རྫོང་ནས་ཧི་མ་ལ་ཡའི་རི་རྒྱུད་དེད་དེ་ཤར་ཕྱོགས་སུ་སྤྱི་ལེ་560ཙམ་བསྐྱོད་ན་ས་བབ་མཐོ་ཚད་སྨི་5050ཟིན་པའི་བོད་ལྗོངས་ལྷོ་ཁ་གྲོང་ཁྱེར་མཚོ་སྨད་རྫོང་གི་གྲི་གུ་རླུང་གློག་ཐང་དུ་སླེབས་ཤིང་། ད་ཆ་དེ་བསྐྲུན་ནས་སྤྱོད་འགོ་ཚུགས་ཡོད་པ་རེད། བོད་ཀྱི་དྲ་སྦྲེལ་རླུང་གློག་རྣམ་གྲངས་ཐོག་མ་ཡིན་པའི་མཚོ་སྨད་གྲི་གུ་རླུང་གློག་རྣམ་གྲངས་ཀྱིས་འདི་ལོའི་ཟླ་5པའི་ཟླ་མཇུག་བར་གློག་གཏོང་ཚད་ཆུ་ཚོད་རེར་ཆན་ཝ་དུང་ཕྱུར་2.35ལྷག་ཙམ་ཟིན་པ་དེས་མཐའ་འཁོར་གྱི་ཁྱིམ་ཚང་ཁྲི་བཅུ་གྲངས་ཙམ་གྱི་ལོ་གཅིག་གི་གློག་སྤྱོད་དགོས་མཁོ་བསྐངས་ནས་བོད་ཀྱི་གློག་ཤུགས་མི་འདང་བའི་ཞན་ཆ་ངེས་ཅན་བསལ་ཡོད་པ་རེད།

རྒྱལ་ཁབ་ཀྱི་ཚན་རྩལ་གསར་གཏོད་ཆུ་ཚད་དང་ལས་གྲྭ་འཛུགས་སྐྲུན་ཆུ་ཚད་མཐོ་རུ་ཕྱིན་པ་ལས། ཉེ་བའི་ལོ་ཤས་རིང་བོད་ཀྱི་ནུས་རྒྱུའི་གྲུབ་ཆར་མཆོང་སྐྱོད་ལྟ་བུའི་འཕེལ་རྒྱས་བྱུང་ཞིང་། གསར་འགོད་པས་རྒྱལ་ཁབ་གློག་དྲ་བོད་ལྗོངས་གློག་ཤུགས་ཚད་ཡོད་ཀུང་སི་ནས་ཤེས་རྟོགས་བྱས་པར། བོད་ཀྱི་ཆུ་གློག་དང་། འོད་གློག རླུང་གློག་བཅས་ཀྱི་གློག་འདོན་འཕྲུལ་འཁོར་ནས་གློག་གཏོང་ཚད་ཆན་ཝ་ཁྲི་500ལྷག་ཙམ་ཟིན་པ་དང་ནུས་རྒྱུ་གཙང་མའི་གློག་འདོན་འཕྲུལ་འཁོར་ནས་གློག་གཏོང་ཚད་ཀྱིས་གློག་འདོན་འཕྲུལ་འཁོར་སྤྱིའི་གློག་གཏོང་ཚད་ནང་བཟུང་བའི་བསྡུར་ཚད་90%ལྷག་ཙམ་ཟིན་གྱི་ཡོད་པ་རེད།