ཏིང་དཀར་སྲོལ་རྒྱུན་མཐའ་མཚམས་ཚོང་དོན་བགྲོད་ལམ་སླར་གསོ་ཤར་གཏོང་ཐུབ་པ།
ཉེ་ཆར། མངའ་རིས་ས་ཁུལ་སྤུ་ཧྲེང་རྫོང་དུ་གནས་པའི་ཏིང་དཀར་སྲོལ་རྒྱུན་མཐའ་མཚམས་ཚོང་དོན་བགྲོད་ལམ་དངོས་སུ་སླར་གསོ་ཤར་གཏོང་ཐུབ་པ་དང་། མངའ་རིས་མཐའ་མཚམས་དོ་དམ་ཉིང་ལག་རུ་ཁག་སྤུ་ཧྲེང་མཐའ་མཚམས་མངགས་གཏོང་ཁང་གི་ཏིང་དཀར་མཐའ་མཚམས་ཚོང་དོན་སྤེལ་རེས་ལས་སྒྲུབ་ས་ཚིགས་ལའང་འདི་ལོའི་རྒྱལ་ཁོངས་ནེ་པ་ལ་ནས་ཡིན་པའི་མཐའ་མཚམས་ཚོང་འབྲེལ་མི་སྣ་ཁག་དང་པོ་འབྱོར་ཡོད་པ་རེད།
ཤེས་རྟོགས་བྱུང་བར་གཞིགས་ན། ཏིང་དཀར་སྲོལ་རྒྱུན་མཐའ་མཚམས་ཚོང་དོན་བགྲོད་ལམ་གྱི་ས་བབ་མཐོ་ཚད་སྨི་4900ཟིན་ཞིང་། རི་ལམ་ཀྱག་ཀྱོག་གི་གཡང་གཟར་དང་གནམ་གཤིས་འགྱུར་ལྡོག་ཆེ་བ་དང་། རང་ལྗོངས་ཀྱི་སྲོལ་རྒྱུན་གྱི་ནེ་པ་ལར་ཕྱོགས་པའི་ཚོང་དོན་བགྲོད་ལམ་ཞིག་རེད།
ཏིང་དཀར་མཐའ་མཚམས་ཚོང་དོན་སྤེལ་རེས་ལས་སྒྲུབ་ས་ཚིགས་ཀྱིས་གཙོ་བོ་རྒྱལ་མཚམས་འཛུལ་སྒྲོལ་མི་སྣའི་རྡོག་ཁྲེས་དང་དངོས་རྫས་ལ་ཞིབ་བཤེར་བྱས་པ་སོགས་བརྒྱུད། འགག་སྒོ་ནས་མགྱོགས་མྱུར་འཛུལ་སྒྲོལ་ཐུབ་པ་དང་ཆུ་ཚ་པོ་མཁོ་འདོན་སོགས་ཀྱི་ཞབས་འདེགས་ཞུས་པ་དང་། མི་སྣ་རྒྱལ་མཚམས་འཛུལ་སྒྲོལ་དང་མཐའ་མཚམས་ཚོང་དོན་ས་ཚིགས་སུ་སྡོད་རིང་ལྟ་འདོམས་བྱེད་ཤུཊ་ཆེ་རུ་བཏང་སྟེ། རྒྱལ་མཚམས་འཛུལ་སྒྲོལ་གྱི་སྒྲིག་ལམ་སྲུང་སྐྱོང་བྱེད་ཀྱི་ཡོད་པ་རེད།
ནེ་པ་ལའི་མཐའ་མཚམས་ནས་ཏིང་དཀར་སྲོལ་རྒྱུན་མཐའ་མཚམས་ཚོང་དོན་བགྲོད་ལམ་བར་སྤྱི་ལེ་27ལྷག་ཙམ་ཡོད། དེ་ཉིན་ཏིང་དཀར་སྲོལ་རྒྱུན་མཐའ་མཚམས་ཚོང་དོན་བགྲོད་ལམ་ནས་རྒྱལ་མཚམས་སུ་འཛུལ་མཁན་ཐེམ་ཁུངས་ནེ་པ་ལ་ཡིན་པའི་མཐའ་མཚམས་ཚོང་དོན་སྤེལ་རེས་མི་སྣ་ཁྱོན་27ཡོད་པ་དང་། ཁོང་ཚོ་སྤྱིར་བཏང་ས་ཆ་དེ་བརྒྱུད་སྤུ་ཧྲེང་གྲོང་རྡལ་ཐང་དཀར་མཐའ་མཚམས་ཚོང་དོན་ཁྲོམ་རར་སྐྱོད་ཀྱི་ཡོད་པ་རེད།
སྲོལ་རྒྱུན་གྱི་མཐའ་མཚམས་ཚོང་དོན་བྱེད་སྒོ་དེ་མཐའ་མཚམས་ས་ཁུལ་ལ་དམིགས་བསལ་དུ་ཡོད་པའི་ཚོང་དོན་བྱ་ཐབས་ཤིག་ཡིན་པ་དེ་ནི་ཀྲུང་གོ་དང་ནེ་པ་ལ་ཕྱོགས་གཉིས་པོའི་མཐའ་མཚམས་མང་ཚོགས་ཀྱི་ཐོན་སྐྱེད་དང་འཚོ་བའི་དངོས་ཟོག་མཁོ་སྤྲོད་འགན་ལེན་དང་། མཐའ་མཚམས་ས་ཁུལ་དར་རྒྱས་གོང་འཕེལ་ལ་སྐུལ་འདེད་གཏོང་བའི་ཐབས་ལམ་གལ་ཆེན་ཞིག་རེད། ཏིང་དཀར་མཐའ་མཚམས་ཚོང་དོན་བགྲོད་ལམ་དེ་ལོ་རྒྱུས་ཐོག་ཀྲུང་གོ་དང་ནེ་པ་ལའི་ཚྭ་འབྲུ་དང་། སྨན་རྫས། ཤིང་ཕོར་སོགས་དངོས་རྫས་ཉོ་ཚོང་བྱ་ཡུལ་ཞིག་ཡིན་ཞིང་། ཀྲུང་གོ་དང་ནེ་པ་ལའི་མཐའ་མཚམས་མང་ཚོགས་ཀྱིས་དུས་ཚོད་འོས་འཚམ་བདམས་ནས་སྲོལ་རྒྱུན་གྱི་ཚོང་དོན་དེ་ཉིད་སྤེལ་རེས་བྱེད་ཀྱི་ཡོད་པ་རེད།
ཏིང་དཀར་སྲོལ་རྒྱུན་མཐའ་མཚམས་ཚོང་དོན་བགྲོད་ལམ་སླར་གསོ་ཤར་གཏོང་ཐུབ་པ་དེས། ཀྲུང་ནེ་རྒྱལ་ཁབ་གཉིས་པོའི་ཚོང་དོན་དང་མི་སྣ་འགྲོ་འོང་བྱེད་པར་དེ་བས་སྟབས་བདེའི་ཆ་རྐྱེན་བསྐྲུན་ནས། ཀྲུང་ནེ་རྒྱལ་ཁབ་གཉིས་པོའི་དཔལ་འབྱོར་ཚོང་དོན་མཉམ་ལས་ལ་དེ་བས་ཡངས་ཤིང་རྒྱ་ཆེ་བའི་བར་མཐོངས་མཁོ་འདོན་བྱ་རྒྱུ་རེད།