སྤུས་ཕན་གཉིས་ལྡན། དམངས་འཚོ་ལེགས་གཏོང་གིས་སྐྱིད་སྣང་ཆེ་རུ་བཏང་བ།

“དྲོད་ཚད་དང་། བཞའ་ཚན། གསོ་རླུང་བཅས་བརྟན་པའི་ཁང་པ”བསྐྲུན་པའི་མཐུན་རྐྱེན་ལས་ཡུལ་སྐོར་བ་མང་པོ་མཐོ་གྲང་དང་གསོ་རླུང་དཀོན་པར་སྐྲག་མི་དགོས་པར་ཕུ་མ་གཡུ་མཚོའི་འགྲམ་ངོགས་ཀྱི་སྣ་དཀར་རྩེ་རྫོང་སྟག་ལུང་གྲོང་རྡལ་འཐུས་གྲོང་ཚོར་ཞག་སྡོད་བྱེད་ཐུབ་ལ། གཡུ་མཚོའི་མཛེས་ལྗོངས་ལ་ཡང་རོལ་ཐུབ་པ་རེད། ཨན་ཧུའེ་ཞིང་ཆེན་བོད་སྐྱོར་ལས་དོན་རུ་ཁག་ཁག་བརྒྱད་པས་བརྟག་དཔྱད་ཞིབ་འཇུག་བྱས་པ་བརྒྱུད། ས་བབ་མཐོ་བའི་ས་ཁུལ་གྱི་སྡོད་ཁང་ལ་མཁོ་ཤོས་ནི་དྲོད་ཚད་དང་བཞའ་ཚན་སྲུང་ཐུབ་ལ། གསོ་རླུང་ཕྱིར་མི་ཤོར་བ་དེ་ཡིན་པ་ཤེས། 2023ལོའི་ཟླ་11པར། ཁོང་ཚོས་གཅེས་སེམས་ཁེ་ལས་གདན་དྲངས་ཤིང་མ་དངུལ་སྒོར་ཁྲི་25བཏང་སྟེ་ས་མཐོའི“དྲོད་ཚད་དང་། བཞའ་ཚན། གསོ་རླུང་བཅས་བརྟན་པའི”ཁང་པ་ཚོད་ལྟ་བྱས་ནས་བསྐྲུནཔ་རེད།

མཐའ་མཚམས་ས་ཁུལ་གྱི་དགུན་ཁའི་གྲང་ངར་དང་བཞའ་ཚན་གྱི་གནམ་གཤིས་ལ་ཁ་གཏད་གཅོག་ཆེད། ཨན་ཧུའེ་ཞིང་ཆེན་བོད་སྐྱོར་ལས་དོན་རུ་ཁག་ཁག་བརྒྱད་པས་2023ལོའི་ཟླ་6པའི་ཟླ་མཇུག་ཏུ“ངས་མེས་རྒྱལ་གྱི་མཐའ་སྲུང་ལ་དྲོ་སྐྱིད་སྦྱིན་པའི”དྲོད་འདོན་རྣམ་གྲངས་གཏན་འཁེལ་བྱས་ཤིང་། ཨན་ཧུའེ་ཞིང་ཆེན་གྱི་ཁ་གཏད་རོགས་སྐྱོར་བྱེད་མཁན་ཐུང་ལིང་གྲོང་ཁྱེར་དང་ཞོན་ཁྲེང་གྲོང་ཁྱེར་གྱིས་འཆར་གཞིའི་དངུལ་འབོར་ལས་བརྒལ་ནས་རྣམ་གྲངས་ལ་མཁོ་བའི་མ་དངུལ་སྒོར་ཁྲི་1400བཏོན་ཏེ་རྒྱབ་སྐྱོར་བྱས་པ་དང་། མཐར་སྔོན་ཐོན་གྱི་རྡོ་སྣག་ཞཱིའི་དྲོད་བཟོའི་བཟོ་རྩལ་གྱིས་ཤར་བ་དང་རྡོ་ཐང་སོགས་ས་ཁོངས་ཀྱི་མང་ཚོགས་དུད་ཁྱིམ་600ལྷག་ཙམ་ལ་དྲོ་སྐྱིད་སྦྱིན་པ་རེད།

“ལོ་ལྔ་ཚན་བཅུ་བཞི་པར”རྒྱང་ལྟ་བྱེད་སྐབས། ཨན་ཧུའེ་ཞིང་ཆེན་གྱིས་བོད་སྐྱོར་རྣམ་གྲངས་52བཀོད་སྒྲིག་དང་འཆར་འགོད་བྱས་པའི་ནང་དམངས་འཚོ་འགན་ལེན་དང་ལེཌ་གཏོང་གི་རྣམ་གྲངས་43ཟིན་པར་བསྡོམས་མ་དངུལ་སྒོར་དུང་ཕྱུར་6.602ཙམ་གཏོང་རྩིས་དང་། དེས་བོད་སྐྱོར་མ་དངུལ་གྱི་92.98%བཟུང་ནས“མ་དངུལ་80%ཡན་དམངས་འཚོ་འགན་ལེན་དང་ལེགས་གཏོང་། དེ་བཞིན་རྫོང་དང་རྫོང་མན་གྱི་གཞི་རིམ་ལ་སྤྱོད་པའི”བླང་བྱ་དོན་འཁྱོལ་བྱས་པ་རེད།

ལས་གཏོད་ལས་དར། གཞན་བརྟེན་ནས་རང་བརྟེན་འཕེལ་རྒྱས་སུ་གྱུར་པ།

ཨན་ཧུའེ་ཞིང་ཆེན་བོད་སྐྱོར་ལས་དོན་རུ་ཁག་གིས་རང་འགུལ་ངང་བོད་ལྗོངས་མཚན་འགྲོགས་སྦྲང་སྒྲ་རིག་གནས་ཡུལ་སྐོར་འཕེལ་རྒྱས་ཚད་ཡོད་ཀུང་སི་དང་འབྲེལ་མཐུད་ཧུར་ཐག་བྱས་ཏེ། ས་གནས་དེ་གའི་ཞིང་འབྲོག་པར་གྲོང་གསེབ་དར་རྒྱས་དང་འབབ་འཕར་ཕྱུག་འགྱུར་གྱི་ཐབས་ལམ་གསར་པ་འཚོལ་རོགས་བྱས་ཤིང་། ད་ཆ་ཨན་ཧུའེ་ཡིས་ཁ་གཏད་རོགས་སྐྱོར་བྱེད་པའི་ལྷོ་ཁ་གྲོང་ཁྱེར་མཚོ་སྣ་དང་། མཚོ་སྨད། སྣ་དཀར་རྩེ་བཅས་རྫོང་གསུམ་དུ་སྦྲང་ནོར་བུ་གསོ་ཚགས་ལས་རིགས་འཕེལ་རྒྱས་ཆེན་པོ་འགྲོ་བཞིན་ཡོད་ལ། དེ་དག་ནས་ཐོན་སྐྱེད་བྱས་པའི་སྦྲང་རྩིར་འཚོ་བཅུད་རིན་ཐང་ཆེ་ལ་སྦགས་བཙོག་མེད་པ་དང་། ཞིང་འབྲོག་པ་དུད་ཚང་100ལྷག་ཙམ་ལ་དུད་ཚང་རེར་ཡོང་འབབ་སྒོར་ཁྲི་3ལྷག་ཙམ་འཕར་བར་སྐུལ་ཁྲིད་ཐུབ་ཡོད།

ལོ་མང་རིང་། ཨན་ཧུའེ་བོད་སྐྱོར་ལས་དོན་རུ་ཁག་གིས་ས་ཁོངས་ཀྱི་ཁྱད་ཆོས་དང་འཚམ་པའི་འཕེལ་རྒྱས་ཀྱི་ཐབས་ལམ་གསར་པ་འཚོལ་ཞིབ་ཧུར་ཐག་བྱས་ཏེ་ཐོན་ལས་ལ་དམ་འཛིན་དང་། ཚོང་འགུགས་ལ་སྐུལ་འདེད། ལས་ཞུགས་མང་གཏོང་བཅས་བྱས་ཏེ། གཞན་བརྟེན་དང་རང་བརྟེན། འཕེལ་རྒྱས་བཅས་ཟུང་འབྲེལ་གྱི་བྱ་ཐབས་སྣ་མང་སྤྱད་པས། སྤུས་ལེགས་ཀྱི་རྣམ་གྲངས་ཁག་གཅིག་ལྷོ་ཁར་རྩ་བ་ཚུགས་ཤིང་གྲུབ་འབྲས་ཐོབ་ཡོད་པ་རེད།

ཨན་ཧུའེ་བོད་སྐྱོར་ལས་དོན་རུ་ཁག་གིས་ལས་མི་ཡོངས་ཚོང་འགུགས་ནང་ཞུགས་པའི་ལས་ཀའི་ལམ་སྲོལ་བཟོས་ཤིང་། ཁ་གཏད་རོགས་སྐྱོར་བྱ་ཡུལ་རྫོང་3གྱི་ཤང་དང་གྲོང་རྡལ་24ཡི་གྲོང་ཚོ(སྡེ་ཁུལ)129ལ་བསྐྱོད་དེ་བརྟག་ཞིབ་གཏིང་ཟབ་བྱས་ཏེ་ནུས་རྒྱུ་གཙང་མ་དང་། སྐྱེ་ཁམས་ཁོར་ཡུག དེང་རབས་ཞིང་ལས། ཡུལ་སྐོར་ཐོན་ལས། རིག་གནས་འགྲེམས་འཁྲབ་སོགས་ཕྱོགས་5ལ་དམིགས་ནས་གཙོ་གནད་ཚོང་འགུགས་རྣམ་གྲངས་ལེགས་སྒྲིག་བྱས་ཏེ། ཚོང་དང་མ་རྩ་འདྲེན་འགུགས་ཀྱི་ལས་དོན་གནད་སྨིན་དང་ལེགས་གྲུབ་ཡོང་ཚད་ནུས་ཤུགས་ཡོད་རྒུས་མཐོ་རུ་བཏང་བ་རེད། 2023ལོར་ལས་དོན་རུ་ཁག་གིས་སྔ་རྗེས་སུ་ཧོ་ཧྥེ་དང་། ཧོའེ་པེ། སུའུ་ཀྲོའུ་སོགས་ས་ཁུལ་དུ་ཚོང་འགུགས་འོས་སྦྱོར་བྱེད་སྒོ་ཐེངས་5སྤེལ་བ་དང་། ཨན་ཧུའེ་ཡི་ཕུལ་བྱུང་ཚོང་པ་ལྷོ་ཁར་བསྐྱོད་པའི་བྱ་སྤྱོད་སྤེལ་ཏེ་རྣམ་གྲངས་29ལ་གན་རྒྱ་བཞག་པ་དང་གྲོས་མཐུན་མ་དངུལ་སྒོར་དུང་ཕྱུར་77.33ཟིན་པ་རེད།

བློ་གཏད་སེམས་མཐུན། འབྲེལ་བ་དམ་ཟབ་བྱས་ནས་བློ་སེམས་གཅིག་མཐུན་བྱུང་བ།

ལོ་མང་རིང་། ཨན་ཧུའེ་ཞིང་ཆེན་བོད་སྐྱོར་ལས་དོན་རུ་ཁག་གིས་རོགས་སྐྱོར་བྱ་ཡུལ་དབར་འགྲོ་འོང་དང་། སྤེལ་རེས། མཉམ་འདྲེས་བཅས་ཀྱི་བྱེད་སྒོ་རྒྱུན་མཐུད་ངང་ལག་བསྟར་བྱས་ཤིང་། ལོ་ལྟར་གྲོང་གསེབ་ཀྱི་ལས་བྱེད་པ་དང་། ཕྱུག་འགྱུར་སྣེ་ཁྲིད་པ། མི་རིགས་མཐུན་སྒྲིལ་གྱི་དཔེ་བཟང་། སྤྱི་ཚོགས་ལས་རིགས་ཁག་གི་འཐུས་མི། དགེ་སློབ་ཀྱི་འཐུས་མི་སོགས་ཨན་ཧུའེ་ལ་མངགས་ཏེ“མི་རིགས་མཐུན་སྒྲིལ་ཁྱིམ་ཚང་གཅིག་ལྟར་བརྩེ་བ”དང་མི་རིགས་མཐུན་སྒྲིལ་གྱི་མཐུན་འབྲེལ་ཚོགས་འདུ་སོགས་ཀྱི་བྱེད་སྒོ་རྒྱུན་རྣམ་ཅན་གྱི་སྒོ་ནས་སྤེལ་བ་དང་། ཨན་ཧུའེ་དང་བོད་ལྗོངས་ས་གནས་གཉིས་དབར་འགྲོ་འོང་དང་། སྤེལ་རེས། མཉམ་འདྲེས་བཅས་བྱེད་རྒྱ་དང་བྱེད་ཤུགས། བྱེད་ཚད་བཅས་ཟམ་མི་ཆད་པར་ཆེ་རུ་བཏང་བ་མ་ཟད། ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་ཟམ་མི་ཆད་པར་ཟབ་ཏུ་གཏོང་བ་བཅས་བྱས་ཏེ་མི་རིགས་ཁག་གི་མང་ཚོགས་ཀྱིས་རླབས་ཆེན་མེས་རྒྱལ་དང་། ཀྲུང་ཧྭ་མི་རིགས། ཀྲུང་ཧྭའི་རིག་གནས། ཀྲུང་གོ་གུང་ཁྲན་ཏང་། ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་བཅས་ལ་མོས་སེམས་བྱེད་ཤུགས་ཆེ་རུ་བཏང་བ་རེད།

ལྷོ་ཁ་གྲོང་ཁྱེར་མི་དམངས་སྨན་ཁང་གི་བར་ཁྱམས་སུ་བཀལ་བའི་གོས་དར་ཞིག་ཐོག་ཏུ“སྨན་བཅོས་གནད་སྨིན་སྙིང་ནད་བསལ། སྨན་བཅོས་མཁས་པས་མི་སེམས་དྲོས”ཞེས་བྲིས་པའི་སྐད་ཆ་དེ་དག་ལས་ནད་པ་གྲངས་ལས་འདས་པའི་བསམ་ཚུལ་མངོན་ཞིང་། སྨན་བཅོས་ལ་བྱམས་སྙིང་རྗེ་དགོས་ཤིང་དེ་ལྟར་བྱུང་ན་ནད་གཞི་སྨན་བཅོས་ཐུབ་པ་མ་ཟད། དྲོ་སྐྱིད་བརྒྱུད་སྤྲོད་དང་མི་སེམས་སྐྱིད་པོ་ཡོང་ཐུབ།

མིག་སྔའི་བར་ཨན་ཧུའེ་སྨན་བཅོས་ཆེད་ལས་ལག་རྩལ་ཤེས་ལྡན་མི་སྣ་ཁག་ཐེངས་9ཡི་མི་262ཀྱིས་ལྷོ་ཁ་གྲོང་ཁྱེར་མི་དམངས་སྨན་ཁང་ལ་ཁ་གཏད་རོགས་སྐྱོར་བྱས་ནས“ལག་རྩལ་གསར་པ་དང་། ལས་སྒོ་གསར་པ། བྱ་ཐབས་གསར་པ”བཅས་ཀྱི་རྣམ་གྲངས་690ལྷག་ཙམ་ལག་ལེན་བསྟར་ཞིང་། དགེ་རྒན་གྱིས་སློབ་མ་418ཁྲིད་པ་དང་། ཞིང་ཆེན་ནང་ཁུལ་གྱི་རིགས་གཅིག་མཁས་ཅན་སྒྲིག་འཛུགས་ཀྱིས་ཁྱོན་བྱིས་པ་1582ལ་བརྟག་དཔྱད་དང་བྱིས་པ་35སྐྱོབ་བཅོས་བྱས་པ་རེད།