དམིགས་བསལ་གློག་སྒྱུར་གྱི་ལས་དོན་པ་ཐ་ཇིག་སི་ཐན་ཡན་ལག་ཀུང་སིའི་ལས་མི་སུའོ་ཧོ་ལུའོ་པུའུ་དམིགས་བསལ་གློག་ལས་ནང་ཞུགས་ནས་ལོ་17སོང་ཞིང་། ཁོང་གིས་རྒྱ་སྐད་བྱང་ཆུབ་པ་ཞིག་བརྒྱབ་ཀྱི་ཡོད་པས་ཀྲུང་གོའི་ལས་རོགས་ཚོས་ཁོང་ལ་བྱམས་བརྩེའི་ངང“རྒན་སུའོ་ལགས”ཞེས་འབོད་ཀྱི་ཡོད། ཁོང་ཞུགས་པའི་རྣམ་གྲངས་དང་པོ་ནི་དུ་ཤང་པེའི་ཆན་ཕུའུ་500ཡི་གློག་སྒྱུར་ས་ཚིགས་རེད། “འདི་གར་ངས་ལས་ཀ་ལོ་5བྱས་པ་ཡིན། གློག་སྒྱུར་ས་ཚིགས་མེད་པ་ནས་ཡོད་པའི་བར་དཔང་པོ་བྱས་པ་མ་ཟད། དེས་ང་ཚོའི་རྒྱལ་ཁབ་ཀྱི་གློག་དྲའི་ལྷོ་བྱང་སྦྲེལ་མཐུད་མངོན་འགྱུར་བྱེད་པར་ནུས་པ་གལ་ཆེན་བཏོན་པ་ཡང་མཐོང་བྱུང”

ཐ་ཇིག་སི་ཐན་གྱི་གློག་ཤུགས་ཐོན་ཁུངས་གཙོ་བོ་ནི་ཆུ་གློག་ཡིན་མོད། འོན་ཀྱང་དེའི་ཆུ་གློག་ས་ཚིགས་མང་ཆེ་བ་ལྷོ་རྒྱུད་ས་ཁུལ་དུ་གཅིག་སྡུད་བྱས་ཡོད། དེ་གོང་ཐ་ཇིག་སི་ཐན་གྱི་ལྷོ་རྒྱུད་དང་བྱང་རྒྱུད་ཀྱི་གློག་དྲའི་མ་ལག་ཆེ་གྲས་གཉིས་ཕན་ཚུན་ཁ་བྲལ་ནས་གློག་སྤྱོད་ཚད་ཆེ་བའི་དུས་སླེབས་རིམ་བཞིན་གློག་ཤུགས་བཀོད་གཏོང་བྱེད་དཀའ་བར་གྱུར། དམིགས་བསལ་གློག་ལས་བཟོ་པ་ཐ་ཇིག་སི་ཐན་གྱི་ཁྲོམ་རར་ཞུགས་རྗེས་ཆན་ཕུའུ་500ཡི་ལྷོ་བྱང་དམིགས་བསལ་གློག་སྐྱེལ་གློག་སྒྱུར་གློག་སྐུད་དང་ཀྲུང་དབྱང་ཐད་གཏོགས་ཁུལ་གྱི་ཆན་ཕུའུ་500ཡི་གློག་སྐྱེལ་གློག་སྒྱུར་གློག་སྐུད་སོགས་རྣམ་གྲངས་ཆེ་གྲས་ཀྱི་འཛུགས་སྐྲུན་ནང་ཞུགས་ནས་ཐ་ཇིག་སི་ཐན་གྱིས་ལྷོ་བྱང་གློག་དྲ་སྦྲེལ་མཐུད་ཀྱི་ཕུགས་འདུན་མངོན་འགྱུར་ཐུབ་པར་རོགས་རམ་བྱས་པ་དང་སྦྲགས། བྱང་རྒྱུད་ས་ཁུལ་གྱི་གློག་དྲ་བརྟན་པོ་དང་བདེ་འཇགས་ཆེ་རུ་བཏང་ཡོད་པ་རེད། དུ་ཤང་པེའི་ཆན་ཕུའུ་500ཡི་གློག་སྒྱུར་ས་ཚིགས་བསྐྲུན་རྗེས་ཐ་ཇིག་སི་ཐན་ཕྱོགས་ལ་རྩིས་སྤྲད་ཅིང་། རང་ཉིད་ཀྱི་ལས་ཀའི་སྐོར་གླེང་སྐབས། གློག་སྒྱུར་ས་ཚིགས་ཀྱི་ཀྲན་ཀྲང་ཕར་ཝུའེ་ཙིས“གློག་སྒྱུར་ས་ཚིགས་དེ་ནི་ཐ་ཇིག་སི་ཐན་གྱི་གློག་ཤུགས་མ་ལག་གི་སྒྲིག་བཀོད་གལ་ཆེ་ཤོས་གྲས་ཤིག་ཡིན། ཀྲུང་གོས་བསྐྲུན་པའི་གློག་ཤུགས་སྒྲིག་བཀོད་ཧ་ཅང་སྔོན་ཐོན་ཡིན་པ་དང་གཉེར་སྐྱོང་ཐམས་ཅད་བདེ་བླག་ཐུབ་ཡོད”ཅེས་སྤོབས་སེམས་ཆེན་པོས་བརྗོད།

རི་ལམ་བརྒྱུད་ནས་མུ་མཐུད་མདུན་དུ་སྐྱོད་སྐབས། རྒན་སུའོ་ལགས་ཀྱིས་དགའ་སྤྲོ་ཆེན་པོས་གསར་འགོད་པར“ཕ་གིའི་རི་རྩེ་ནས་དུ་ཤང་པེའི་མེ་ཤུགས་གློག་འདོན་དྲོད་སྐྱེལ་བཟོ་གྲྭ་གཉིས་པའི་བརྗིད་ཉམས་ལྡན་པའི་རྣམ་པ་མཐོང་ཐུབ། དུ་ཤང་པེར་མེ་ཤུགས་གློག་འདོན་དྲོད་སྐྱེལ་བཟོ་གྲྭ་གཉིས་པ་དེ་མི་ཤེས་མཁན་ཧ་ལམ་གཅིག་ཀྱང་མེད”ཅེས་ངོ་སྤྲོད་བྱས།

ས་གནས་དེ་གའི་གློག་ཤུགས་ཀྱི་གློག་སྐུད་གཙོ་བོ་བསྐྲུན་རྗེས། དམིགས་བསལ་གློག་ལས་བཟོ་པ་ཐ་ཇིག་སི་ཐན་དུ་གློག་དྲ་རིམ་སྤོར་སྒྱུར་བཀོད་ཀྱི་རྣམ་གྲངས་ནང་མུ་མཐུད་ཞུགས་ནས་གློག་ཤུགས་སྐྱེལ་འདྲེན་གྱི“མཐའ་མའི་འགག་གནད”བསལ་ཞིང་། ཡན་ལག་ཀུང་སིའི་གཞུང་ལས་ཁང་དུ་གསར་འགོད་པར་ལས་བྲེལ་ཆེ་བའི་མུའུ་ཤིས་ཏི་ནུའོ་ཕུའུ་འཕྲད་སྐབས། ཁོང་གློག་ཚད་འཇལ་ཆས་གསར་བརྗེ་རྣམ་གྲངས་ལ་སྐུལ་འདེད་གཏོང་བཞིན་འདུག སློབ་འབྲིང་ཐོན་རྗེས། མུའུ་ཤིས་ཏི་ནུའོ་ཕུའུ་ཡིས་ཀྲུང་གོའི་ཧྭ་བྱང་གློག་ཤུགས་སློབ་ཆེན་དུ་གློག་ཤུགས་ལས་གྲྭའི་ཤེས་བྱ་སློབ་སྦྱོང་བྱས་པ་དང་སློབ་གྲྭ་ཐོན་རྗེས་དམིགས་བསལ་གློག་སྒྱུར་ལས་ལ་གཞོལ། དེ་གར་ཁོང་མི་སྒེར་གྱི་རྩལ་ནུས་ཆེ་རུ་ཕྱིན་པ་མ་ཟད། ཐ་ཇིག་སི་ཐན་གྱི་གློག་ཤུགས་བྱ་གཞག་མགྱོགས་མྱུར་འཕེལ་རྒྱས་འགྲོ་བའི་དཔང་པོ་ཡང་བྱས་པ་རེད།

མུའུ་ཤིས་ཏི་ནུའོ་ཕུའུ་ཡིས་གསར་འགོད་པར་རྣམ་གྲངས་གསར་པ་སྤེལ་ཐེངས་རེར་ཐ་ཇིག་སི་ཐན་གྱི་དོ་བདག་ཕྱོགས་ཀྱིས་ལག་རྩལ་མི་སྣ་ཀྲུང་གོ་ཕྱོགས་ཀྱི་ཚོགས་པ་དང་མཉམ་དུ་སློབ་སྦྱོང་བྱེད་པར་མངགས་པ་དང་། ཐེམ་ཁུངས་ཐ་ཇིག་སི་ཐན་ནས་ཡིན་པའི་ཕུལ་བྱུང་ལས་མིར་ད་དུང་ཀྲུང་གོར་ཆེད་ལས་གསོ་སྦྱོང་བྱེད་པར་སྐྱོད་པའི་གོ་སྐབས་ཡོད། རྣམ་གྲངས་ཐ་ཇིག་སི་ཐན་ཕྱོགས་ལ་རྩིས་སྤྲོད་བྱེད་སྐབས་ཆེད་ལས་ཀྱི་གློག་ཤུགས་ཤེས་ལྡན་པའི་དཔུང་ཁག་ཅིག་གསོ་སྐྱོང་བྱས་ཟིན་ཡོད། མུའུ་ཤིས་ཏི་ནུའོ་ཕུའུ་ཡིས“དམིགས་བསལ་གློག་སྒྱུར་ལས་གྲྭར་ལས་ཀ་བྱེད་མྱོང་བའི་ལག་རྩལ་ཤེས་ལྡན་པར་ཐ་ཇིག་སི་ཐན་གྱི་གློག་ཤུགས་ལས་རིགས་ཧྲིལ་པོར་གདེང་འཇོག་བཟང་པོ་ཡོད། ཀྲུང་གོར་སློབ་སྦྱོང་དུ་བསྐྱོད་པ་དང་དམིགས་བསལ་གློག་སྒྱུར་ལས་གྲྭར་ལས་ཀ་བྱེད་པར་ཡོང་བ་ནི་ངའི་གདམ་ག་ཡག་ཤོས་དེ་ཡིན”ཞེས་བརྗོད།