ཨེ་ཤེ་ཡ་ཤར་མའི་དབུ་ཚོགས་སྐབས་བཅུ་བཞི་པའི་ཕྱི་འབྲེལ་པུའུ་ཀྲང་གི་ཚོགས་འདུ་ཝན་ཐེན་དུ་འཚོགས་པ།
ས་གནས་དེ་གའི་དུས་ཚོད་ཟླ་7ཚེས་27ཉིན་ཨེ་ཤེ་ཡ་ཤར་མའི་དབུ་ཚོགས་སྐབས་བཅུ་བཞི་པའི་ཕྱི་འབྲེལ་པུའུ་ཀྲང་གི་ཚོགས་འདུ་ཝན་ཐེན་དུ་འཚོགས་པ་དང་ཀྲུང་གུང་ཀྲུང་དབྱང་ཆབ་སྲིད་ཅུས་ཀྱི་ཨུ་ཡོན་ཕྱི་འབྲེལ་པུའུ་ཀྲང་ཝང་དབྱི་ཚོགས་འདུར་ཞུགས་ནས་གཏམ་བཤད་སྤེལ་བ་རེད།
ཝང་དབྱིས་བརྗོད་དོན། མིག་སྔའི་རྒྱལ་སྤྱིའི་དུས་བབ་ལ་འགྱུར་ལྡོག་དང་ཟིང་ཆ་མཉམ་དུ་གནས་པ་དང་གླེང་མང་བའི་གནད་དོན་ཚབས་ཆེ་རུ་ཕྱིན་ནས་ཐག་གཅོད་བྱེད་དཀའ་བར་གྱུར་ཡོད། ཨེ་ཤེ་ཡ་ཤར་མའི་དབུ་ཚོགས་ཀྱིས་ཡང་དག་པའི་ཁ་ཕྱོགས་སྟངས་འཛིན་དང་མཐུན་སྒྲིལ་མཉམ་ལས་ཟབ་ཏུ་བཏང་ནས། ས་ཁུལ་ཡུན་རིང་ཞི་བདེ་དར་རྒྱས་ཡོང་བར་སྐུལ་འདེད་གཏོང་བ་དང་རྒྱལ་སྤྱིའི་དྲང་གཞག་དྲང་བདེན་ལ་སྲུང་སྐྱོང་བྱེད་དགོས། དེའི་ཐད་ཀྲུང་གོ་ཕྱོགས་ཀྱིས་འདོད་ཚུལ་ཁག་བཞི་བཏོན་པ་སྟེ།
གཅིག་ནས་སྒོ་དབྱེ་བསྟུན་མཁས་ཀྱི་ས་ཁོངས་སྒྲོམ་གཞིར་ཐུན་མོང་ཐོག་སྲུང་སྐྱོང་བྱེད་དགོས། ཨེ་ཤེ་ཡ་ཤར་ལྷོའི་མནའ་འབྲེལ་གྱིས་གཙོ་ཁྲིད་བྱེད་པའི་ས་ཁོངས་སྒྲོམ་གཞི་ནི་ས་ཁུལ་གྱི་ཞི་བདེ་བརྟན་ལྷིང་སྲུང་སྐྱོང་བྱེད་པའི་རྒྱབ་རྟེན་གལ་ཆེན་ཞིག་ཡིན་པས་ཕྱོགས་ཁག་གིས་མཉམ་ལས་ཀྱི་ཐོན་ཁུངས་དེ་བས་མང་བ“ཁྱིམ་ཚང་ཆེན་མོ”དེའི་ནང་འཇོག་དགོས། འོན་ཀྱང་ས་ཁོངས་ཕྱིའི་རྒྱལ་ཁབ་ཁག་གཅིག་གིས་ས་ཁུལ་དེ་གར་གཞན་འབུད་རང་བཞིན་གྱི“འཁོར་རྒྱ་ཆུང་ཆུང”བཙུགས་ནས་ཨེ་ཤེ་ཡ་ཤར་ལྷོའི་མནའ་འབྲེལ་གྱི་ལྟེ་བའི་གནས་བབ་དང་འཐབ་ཇུས་རང་བརྟེན་ལ་ཕོག་ཐུག་ཚབས་ཆེན་བཟོ་གི་ཡོད་པས་དེར་ཕྱོགས་ཁག་གིས་དོགས་ཟོན་ཆེན་པོ་བྱས་ནས་བཀག་འགོག་ནུས་ལྡན་བྱེད་དགོས།
གཉིས་ནས་ཕྱོགས་ཁག་ཚང་མས་ཁས་ལེན་པའི་ས་ཁུལ་གྱི་སྒྲིག་སྲོལ་ལ་ཐུན་མོང་ཐོག་བརྩི་སྲུང་ཞུ་དགོས། ཞི་བདེ་མཉམ་གནས་ཀྱི་རྩ་དོན་ལྔ་ཚུད་པའི་མཉམ་འབྲེལ་རྒྱལ་ཚོགས་ཀྱི་རྩ་འཛིན་གྱི་དམིགས་ཡུལ་དང་རྩ་དོན་རྨང་གཞིར་བྱས་པའི་རྒྱལ་སྤྱིའི་འབྲེལ་བའི་གཞི་རྩའི་ཚད་གཞིར་ཐུན་མོང་ཐོག་བརྩི་སྲུང་ཞུ་བ་དང《ཨེ་ཤེ་ཡ་ཤར་ལྷོའི་མནའ་འབྲེལ་གྱི་རྩ་འཛིན》དང《ཨེ་ཤེ་ཡ་ཤར་ལྷོའི་མཛའ་གྲོགས་མཉམ་ལས་ཆིངས་ཡིག》གི་དགོངས་དོན་བརྟན་སྲུང་བྱེད་པ་ལས། རྒྱལ་ཁབ་རེ་ཟུང་གིས་ཕྱོགས་རྐྱང་པའི་རང་ཕན“སྒྲིག་སྲོལ”དེ་ཕྱོགས་ཁག་ཚང་མས་ཁས་ལེན་པའི་རྒྱལ་སྤྱིའི་བཅའ་ཁྲིམས་དང་ས་ཁུལ་གྱི་སྒྲིག་སྲོལ་ནང་འཇུག་མི་རུང་།
གསུམ་ནས་ཕན་ཚུན་འབྲེལ་མཐུད་ཀྱི་འགུལ་ཤུགས་གསར་མ་ཐུན་མོང་ཐོག་ཆེ་རུ་གཏོང་དགོས། ཨེ་ཤེ་ཡ་དང་ཞི་བདེ་རྒྱ་མཚོ་ཆེ་མོ་ཁུལ་གྱི་རང་མོས་ཉོ་ཚོང་ཁུལ་འཛུགས་སྐྲུན་ལ་མུ་མཐུད་སྐུལ་འདེད་བཏང་ནས་ཐོན་ལས་འཁོར་འབྲེལ་དང་མཁོ་སྤྲོད་འཁོར་འབྲེལ་བརྟན་པོའི་ངང་ཤར་བགྲོད་ཐུབ་རྒྱུར་སྐུལ་འདེད་གཏོང་དགོས། ལོ་སིས“འབྲེལ་མཐུད་དང་མཉེན་ཤུགས”ཞེས་པའི་བརྗོད་དོན་གཙོ་བོར་དམིགས་ནས་འགོ་ཁྲིད་མི་སྣའི་གསལ་བསྒྲགས་སྤེལ་དགོས་པའི་གྲོས་འགོ་བཏོན་པར་ཀྲུང་གོ་ཕྱོགས་ཀྱིས་རྒྱབ་སྐྱོར་བྱས་ཏེ། ས་ཁུལ་འཕེལ་རྒྱས་ཀྱི་འཕྲལ་མཁོ་དང་མཉམ་ལས་ཀྱི་དགོས་མཁོར་དམིགས་རྒྱུ།
བཞི་ནས་ཐུན་མོང་ཐོག་ཨེ་ཤེ་ཡ་ཤར་མའི་དབུ་ཚོགས་ཀྱི་ཕན་འབྲས་དང་གསོན་ཤུགས་འཕེལ་བར་བྱེད་དགོས། ཆབ་སྲིད་བདེ་འཇགས་དང་དཔལ་འབྱོར་འཕེལ་རྒྱས་ཀྱི“འཁོར་ལོ་གཉིས”དོ་མཉམ་ངང་འགུལ་རྒྱུར་སྐུལ་འདེད་གཏོང་དགོས། ཀྲུང་གོ་ཕྱོགས་ཀྱིས་ཕྱོགས་ཁག་དང་མཉམ་དུ་གོ་ལ་ཧྲིལ་པོའི་འཕེལ་རྒྱས་ཀྱི་གྲོས་འགོ་དང་གོ་ལ་ཧྲིལ་པོའི་བདེ་འཇགས་ཀྱི་གྲོས་འགོ་ཁྲིད་སྟོན་དུ་བྱས་ཏེ་དབུ་ཚོགས་ཀྱི་བྱ་སྤྱོད་འཆར་གཞི་དོན་འཁྱོལ་བྱེད་པ་དང་། མཚོ་རྒྱུད་ཀྱི་དཔལ་འབྱོར་ལ་སྐུལ་འདེད་གཏོང་བ། གནམ་གཤིས་འགྱུར་ལྡོག་ལ་ཁ་གཏད་གཅོག་པ། བདེ་འཇགས་ཀྱི་དཀའ་གནད་ཐུན་མོང་ཐོག་སེལ་བ། འཕེལ་རྒྱས་ཀྱི་འགལ་རྐྱེན་སེལ་བ་བཅས་བྱེད་འདོད་ཡོད།
ཝང་དབྱིས་རྒྱལ་ཁབ་རེ་ཟུང་གིས་ཐའེ་དབན་མཚོ་འགག་གི་བརྟན་ལྷིང་ཐད་དོ་ཁུར་བྱེད་ཚུལ་ལ་དགག་པ་ནན་པོ་བརྒྱབ་ནས་ཐའེ་དབན་གྱི་གནད་དོན་ནི་ཀྲུང་གོའི་ནང་སྲིད་ཡིན། ཕྱི་ཕྱོགས་ཀྱི་ཕྱོགས་གཏོགས་གང་རུང་ཞིག་ལའང་ཐེ་ཇུས་བྱེད་དབང་མེད་པས་རྒྱལ་ཁབ་གཞན་གྱི་ནང་སྲིད་ལ་ཐེ་ཇུས་མི་བྱེད་པའི་རྒྱལ་སྤྱིའི་འབྲེལ་བའི་གཞི་རྩའི་ཚད་གཞི་འདི་ལག་བསྟར་ཏན་ཏིག་བྱེད་པ་དང་ཀྲུང་གོ་གཅིག་གི་རྩ་དོན་གྱི་རྒྱལ་སྤྱིའི་སྤྱི་ཚོགས་ཀྱི་ཡོངས་ཁྱབ་ཀྱི་ཐུན་མོང་ངོས་འཛིན་འདི་བརྩི་སྲུང་ནན་པོ་བྱེད་དགོས་པའི་ནན་བཤད་བྱས་པ་རེད།
ཝང་དབྱིས་ལྷོ་རྒྱ་མཚོའི་གནད་དོན་ཐད་ཀྲུང་གོ་ཕྱོགས་ཀྱི་ལངས་ཕྱོགས་ནན་པོ་གསལ་བཤད་བྱས་པ་རེད།
ཝང་དབྱིས་ད་དུང་ཕ་ལེ་སི་ཐན་གྱི་གནད་དོན་དང་ཡུག་རེན་གྱི་ཉམས་ཉེན་སོགས་ཐད་ཀྲུང་གོ་ཕྱོགས་ཀྱི་རྩ་དོན་དང་ལངས་ཕྱོགས་བསྐྱར་བསྒྲགས་བྱས་པ་རེད།