ཟླ་6ཚེས་19ཉིན་ནི་སྤྱིར་བཏང་གི་ལས་སྒྲུབ་ཉིན་ཞིག་ཡིན་མོད། འོན་ཀྱང་ཆིང་ཏའོ་གྲོང་བཙུགས་སྨན་ཁང་གི་སྨན་དོན་མི་སྣ་21གི་ངོས་ནས་བརྗོད་ན། བསྐྱར་འཛོམས་དང་མི་སེམས་འགུལ་བའི་ཉིན་མོ་ཞིག་རེད།

གཞིས་རྩེ་གྲོང་ཁྱེར་གྱི་རྫོང་དང་ཆུས་ཁག་ནས་ཡོང་བའི་མང་ཚོགས་བཅུ་ཕྲག་གིས་རང་འགུལ་ངང་བསམ་གྲུབ་རྩེ་ཆུས་ལྟེ་བའི་སྨན་ཁང་གི་སྒོ་འགྲམ་དུ་ལ་བརྒྱབ་ཀླུང་བརྒལ་ནས་ཡོང་བའི་གཉེན་ཉེར་བསུ་བ་ཞུས་པ་རེད།

“‘སྨན་པ་ལན་བུ་ཅན’སླེབས་འདུག་དངོས་གནས་ཡག་པོ་བྱུང”“ཁྱེད་ཚོའི་བཀའ་དྲིན་གྱིས་ང་རྒྱུན་གཏན་ལྟར་འགྲོ་ཐུབ་སོང”

“དྲག་སྐྱེད་གང་འདྲ་བྱུང་འདུག”“ནང་མི་བདེ་པོ་ཡིན་ནམ”བབ་ཆགས་ཀྱི་འཛུམ་མདངས་དང་། བྱམས་བརྩེའི་མིག་ཟུང་། དམ་པོར་འཇུས་པའི་ལག་པ་བཅས་ནས་མི་སེམས་འགུལ་བའི་རྣམ་པ་མངོན།

ཁོང་ཚོར་དགའ་བསུ་འདི་འདྲ་ཐོབ་དོན་གང་ཡིན་ནམ། ཁོང་ཚོར“སྨན་པ་ལན་བུ་ཅན”ཟེར་དོན་གང་ཡིན་ནམ། དེ་དག་ལོ་བཞིའི་སྔོན་ལ་ཆིང་ཏའོ་བོད་སྐྱོར་ལས་བྱེད་པས་སྒྲིག་འཛུགས་བྱས་པའི་གྲོང་གསེབ་ཏུ་འོས་འགན་སྨན་བཅོས་བྱས་པ་ལས་བརྗོད་དགོས།

སྐབས་དེ་དུས་འོས་འགན་སྨན་བཅོས་བྱེད་མཁན་སྨན་དོན་མི་སྣས་ས་མཐོའི་ས་ཁམས་གནམ་གཤིས་སོགས་ཀྱི་ཤུགས་རྐྱེན་ཐེབས་པའི་དབང་གིས་རུས་ཚིགས་ནད་ནི་ས་གནས་དེ་གར་ཐོན་མང་བའི་ནད་གཞི་ཞིག་ཡིན་པ་ཤེས་རྟོགས་བྱུང་བ་རེད། དུས་ཐོག་ཏུ་སྨན་བཅོས་ནུས་ལྡན་བྱེད་མ་ཐུབ་པའི་དབང་གིས་ནད་པ་འཁར་རྒྱུག་དང་ཁ་འབྲལ་ཐབས་མེད་པས་རྒྱུན་གཏན་གྱི་འཚོ་བར་ཤུགས་རྐྱེན་ཆེན་པོ་ཐེབས་ཡོད།

གནས་ཚུལ་དེར་དམིགས་ཏེ་ཆིང་ཏའོ་བོད་སྐྱོར་ལས་བྱེད་པས་ཕྱོགས་མང་པོའི་ཐད་མཐུན་སྦྱོར་དང་སྐུལ་འདེད་ཧུར་ཐག་བཏང་ནས་2021ལོ་ནས་2023ལོ་བར་སྔ་རྗེས་སུ་ཁག་ཐེངས་བཞི་ལ་དབྱེ་ནས་གཞིས་རྩེའི་རུས་ཚིགས་ནད་ཕོག་པའི་ནད་པ་25སྒྲིག་འཛུགས་བྱས་ཏེ་ཆིང་ཏའོ་གྲོང་ཁྱེར་གྲོང་བཙུགས་སྨན་ཁང་དུ་རིན་མེད་གཤགས་བཅོས་ཀྱི་སྨན་བཅོས་བྱེད་པར་བསྐྱོད་ནས་ཁོང་ཚོ་སླར་ཡང་གོམ་པ་སྤོ་ཐུབ་པ་བྱུང་བ་རེད།

ས་མཐོའི་ཞིང་འབྲོག་མང་ཚོགས་དེ་བས་མང་བར་བདེ་སྐྱིད་བསྐྲུན་ཆེད། 2023ལོའི་ཟླ་9པར། ཆིང་ཏའོ་གྲོང་ཁྱེར་རྒྱ་གྲམ་དམར་རྟགས་ཚོགས་པ་དང་། ཆིང་ཏའོ་གྲོང་ཁྱེར་འཕྲོད་བསྟེན་བདེ་ཐང་ཨུ་ལྷན། ཆིང་ཏའོ་གྲོང་ཁྱེར་གྲོང་བཙུགས་སྨན་ཁང་བཅས་ཀྱིས་མཉམ་འབྲེལ་ཐོག“རི་ཆུ་སྦྲེལ་བའི་བརྩེ་བ་ཟབ། གཅེས་སེམས་བྱ་སྤྱོད་མཉམ་དུ་སྤེལ། ‘ས་མཐོའི་ནད་རིགས’སྐྱོབ་བཅོས་སྤྱི་ཕན་རྣམ་གྲངས”སྤེལ་འགོ་ཚུགས་ནས་ས་མཐོའི་རྒྱུན་མཐོང་ནད་རིགས་འགོག་བཅོས་ལ་གཞོལ་བཞིན་ཡོད། རྣམ་གྲངས་ལག་ལེན་བསྟར་འགོ་ཚུགས་རྗེས་ཆིང་ཏའོ་གྲོང་ཁྱེར་གྲོང་བཙུགས་སྨན་ཁང་གིས་འཕྲལ་དུ་ཁག་དང་པོའི་མི་20ཡི་སྨན་བཅོས་ཚོགས་པ་གཞིས་རྩེ་གྲོང་ཁྱེར་བསམ་གྲུབ་རྩེ་ཆུས་སུ་བཏང་ནས་རུས་ཚིགས་ནད་ཚབས་ཆེན་ཕོག་པའི་ནད་པར་གཤགས་བཅོས་བྱས་པ་རེད།

ཧོང་ཧའེ་རྒྱ་མཚོའི་འགྲམ་ནས་གངས་ལྗོངས་ས་མཐོར་ཡོང་བར་ལས་སླ་པོ་མེད། གཤགས་བཅོས་བྱེད་སྐབས་ཆིང་ཏའོ་ཡི་གཤགས་བཅོས་སྨན་པ་གཙོ་བོས་གསོ་རླུང་རྔུབ་ཀྱིན་གསོ་རླུང་གི་སྦུ་གུ་རིང་པོ་དེ་ངོ་གདོང་མདུན་ནས་ལྟག་རྒྱབ་ཏུ་འཐེན་ཡོད་པ་དེ་ལན་བུ་དང་འདྲ་པོ་ཡོད་པས་ཡུལ་མི་ཚོས་སྙིང་ཉེ་བའི་སྒོ་ནས་ཁོང་ཚོར“སྨན་པ་ལན་བུ་ཅན”ཞེས་འབོད་ཀྱི་ཡོད།

ཆ་རྐྱེན་དེ་ལྟ་བུའི་འོག་ཆིང་ཏའོ་སྨན་བཅོས་ཚོགས་པས་ཉིན་གསུམ་ནང་ནད་པ་20ལ་མིས་བཟོས་པུས་མོ་བརྗེ་བའི་གཤགས་བཅོས་ལེགས་གྲུབ་བྱུང་ནས་གཞིས་རྩེ་གྲོང་ཁྱེར་གྱི་རིགས་གཅིག་པའི་གཤགས་བཅོས་ཀྱི་ལོ་རྒྱུས་ཟིན་ཐོ་བཏོད་ཡོད།

འདི་ལོའི་ཟླ་6ཚེས་19ཉིན། ལོ་གཅིག་ཀྱང་མ་འགོར་བར་ཆིང་ཏའོ་གྲོང་ཁྱེར་གྲོང་བཙུགས་སྨན་ཁང་གི་སྨན་བཅོས་ཚོགས་པ་གཞིས་རྩེ་རུ་ཐེངས་གཉིས་པ་ཡོང་ནས་ན་ནིང་གཤགས་བཅོས་བྱས་པའི་མང་ཚོགས་ལ་བསྐྱར་ཞིབ་དང་བདེ་ཐང་སླར་གསོའི་མཛུབ་ཁྲིད་བྱས་པ་མ་ཟད། རུས་ཚིགས་ནད་ཕོག་པའི་ཁག་གསར་པའི་ནད་པར་གཤགས་བཅོས་ཀྱང་བྱས་པ་རེད།

གཤགས་བཅོས་ཚང་མ་སྤུས་ཚད་མཐོ་ལ་ཕན་འབྲས་ཆེ་བའི་སྒོ་ནས་ལེགས་སྒྲུབ་ཐུབ་པར་འགན་ལེན་བྱ་ཆེད། ཆིང་ཏའོ་གྲོང་ཁྱེར་གྲོང་བཙུགས་སྨན་ཁང་གི་གཉན་ཚད་དོ་དམ་ཁོའོ་ཡི་ཀྲུའུ་རེན་ཐན་ཧྲན་ཅོན་གྱིས་ཟླ་ཕྱེད་སྔ་སྣུར་དུ་བསམ་གྲུབ་རྩེ་ཆུས་ལྟེ་བའི་སྨན་ཁང་གི་གཤགས་བཅོས་ཁང་དང་མཁོ་སྤྲོད་ཁང་དང་འབྲེལ་གཏུགས་བྱས་ནས་གཤགས་བཅོས་བྱ་ཡུལ་གྱི་འབྲེལ་ཡོད་དོ་དམ་དང་བརྒྱུད་རིམ་ལེགས་བཅོས་བྱས་པ་རེད། གཟའ་འཁོར་གཅིག་གི་སྔོན་ལ་རུས་ནད་ཚན་ཁག་གི་རིགས་གཅིག་མཁས་ཅན་ཆིང་ཏའོ་གྲོང་ཁྱེར་གྱི་བོད་སྐྱོར་སྨན་བཅོས་རུ་ཁག་ཁག་དགུ་པའི་རུ་དཔོན་ཝུའེ་ཅན་ཝུའེ་སྔ་སྣུར་དུ་བོད་དུ་མངགས་ནས་ནད་པ་གདམ་གསེས་དང་ནད་ཐོ་ལེགས་སྒྲིག་བྱས་པ་མ་ཟད། རྒྱང་བསྟེན་ལྷན་འཛོམས་ནད་དཔྱད་བྱས་པ་བརྒྱུད་ཚོགས་པ་དང་མཉམ་དུ་གཤགས་བཅོས་ཀྱི་ཇུས་གཞི་དང་དུས་ཚོད་གཏན་འཁེལ་རགས་ཙམ་བྱས་པ་རེད།

བོད་དུ་འབྱོར་རྗེས་ཆིང་ཏའོ་སྨན་བཅོས་ཚོགས་པས་ས་གནས་དེ་གའི་སྨན་དོན་མི་སྣར་འཕྲལ་སྡོམ་སྐྱོབ་བཅོས་ནང་སྦྱོང་བྱས་ཏེ་མྱུར་སྐྱོབ་བརྒྱུད་རིམ་དང་བཀོལ་སྤྱོད་ཚད་ལྡན་དུ་བཏང་བ་དང་འབྲེལ་ཚེས་19ཉིན་ནས་བཟུང་ཆིང་ཏའོ་རུས་ནད་ཚན་ཁག་གི་རིགས་གཅིག་མཁས་ཅན་ཡུས་ཐེང་པོ་དང་། ཏའེ་ཧྲི་ཡེའུ། ཧུའུ་ཀོང་ལེང་བཅས་སོ་སོས་ཚོགས་པའི་སྣེ་ཁྲིད་དེ་གཤགས་བཅོས་ལས་ལ་གཞོལ།

ཉིན་3དང་། ཚོགས་པ་3 གཤགས་བཅོས་ཁང་3བཅས་ནང་ཆིང་ཏའོ་སྨན་བཅོས་ཚོགས་པས་ཕུལ་དུ་བྱུང་བའི་སྨན་བཅོས་ལག་རྩལ་ལ་བརྟེན་ནས་གཞོགས་འདེགས་ཧུར་ཐག་བྱས་ཏེ་དཀའ་ངལ་ཡོད་པའི་ཁྱིམ་ཚང་དང་ནད་གཞི་ཚབས་ཆེན་ཕོག་པའི་ནད་པ་27ལ་གཤགས་བཅོས་ལེགས་གྲུབ་བྱུང་བ་དང་དཔྱི་ཚིགས་བརྗེ་བའི་གཤགས་བཅོས་3ཕུད་དེ་བྱིངས་24ཚང་མ་པུས་ཚིགས་བརྗེ་བའི་གཤགས་བཅོས་ཡིན་པ་རེད།

ད་བར་དེ་གོང་གཞིས་རྩེ་རུ་རུས་ཚིགས་གཤགས་བཅོས་ལེགས་གྲུབ་བྱུང་བའི་ནད་པ་20དང་ཆིང་ཏའོ་རུ་གཤགས་བཅོས་བྱེད་པར་བསྐྱོད་པའི་ནད་པ་25དང་གཞིས་རྩེ་གྲོང་ཁྱེར་དང་ལྷ་ས་གྲོང་ཁྱེར་ནས་ཡོང་བའི་ཞིང་འབྲོག་མང་ཚོགས་72ཀྱི“གོམ་བགྲོད་ཕུགས་འདུན”མངོན་འགྱུར་ཐུབ་ཡོད།

ཆིང་ཏའོ་ཡི“སྨན་པ་ལན་བུ་ཅན”གྱི་བྱས་རྗེས་རིམ་བཞིན་ཡུལ་ཕྱོགས་ཀུན་ཏུ་ཁྱབ། གཤགས་བཅོས་བྱས་པའི་ཉིན་ནས་བཟུང་། བསམ་གྲུབ་རྩེ་ཆུས་དང་དེ་བཞིན་རྫོང་དང་ཆུས་གཞན་དག་གི་ནད་པ་རྣམས་ཀྱིས་ཁོང་ཚོའི་མཚན་སྙན་ཐོས་ཏེ་སྨན་བཅོས་བྱེད་དུ་སླེབས། ཆིང་ཏའོ་སྨན་བཅོས་ཚོགས་པས་དོན་དངོས་གཞིར་བཟུང་དམིགས་སའི་རང་བཞིན་ལྡན་པའི་ངང་སྨན་བཅོས་ཀྱི་ཇུས་གཞི་བཟོས་ཤིང་། དེའི་ནང་ནས་ནད་ཚབས་ལྕི་བ་དང་བསམ་གྲུབ་རྩེ་ཆུས་སུ་གཤགས་བཅོས་བྱེད་ཐབས་མེད་པའི་ནད་པ་ཁ་ཤས་གང་མགྱོགས་ཆིང་ཏའོ་རུ་མངགས་ནས་གཤགས་བཅོས་བྱ་རྒྱུའི་བཀོད་སྒྲིག་བྱས་པ་རེད།

བོད་སྐྱོར་བྱེད་པའི་ལོ་30ཡི་རིང་། ས་མཐོའི་ཡུལ་དུ་བརྩེ་བ་ཟོལ་མེད་བཅངས། ད་ལོ་ནི་བོད་ལ་ཁ་གཏད་རོགས་སྐྱོར་བྱས་ནས་ལོ་30འཁོར་བའི་ལོ་ཡིན་པ་དང་བོད་སྐྱོར་གྱི་བརྒྱུད་རིམ་ལ་ཕྱིར་མིག་ཅིག་བལྟས་ན། ཆིང་ཏའོ་ཡི་བོད་སྐྱོར་ཚོགས་པའི་རྒྱབ་སྐྱོར་འོག་ཆིང་ཏའོ་གྲོང་ཁྱེར་གྲོང་བཙུགས་སྨན་ཁང་གིས་རི་ཀླུང་ཁྲི་ཕྲག་བརྒལ་བའི“བདེ་ཐང་གི་མཁའ་ལམ”ཞིག་བསྐྲུན་ཡོད་པ་རེད། མིག་སྔའི་བར་སྨན་ཁང་དེས་རིམ་རྩིས་བརྒྱབ་ན། སྨན་དོན་མི་སྣ་45མངགས་ནས་བོད་དུ་སྨན་བཅོས་འཕྲོད་བསྟེན་གྱི་རོགས་སྐྱོར་བྱས་ཤིང་། དེ་དག་སྦྲིད་སྨན་དང་། ཞིབ་དཔྱད། འབྱིན་རྔུབ། འཇུ་བྱེད། མོ་ནད། བྱིས་ནད། པགས་ནད་སོགས་ཆེད་ལས་བཅུ་དང་འབྲེལ་བ་ཡོད་པ་དང་། རིམ་རྩིས་བརྒྱབ་ན། ནད་པ་མི་ཐེངས་10000ལྷག་ཙམ་ལ་སྨན་བཅོས་བྱས་པ་མ་ཟད། བསམ་གྲུབ་རྩེ་ཆུས་ལྟེ་བའི་སྨན་ཁང་དང་རྒྱང་བསྟེན་ལྷན་འཛོམས་ནད་དཔྱད་བརྒྱུད་ལམ་བཟོས་ཏེ་རྒྱང་བསྟེན་གྱི་རིག་ཚན་མང་བའིMDTལྷན་འཛོམས་ནད་དཔྱད་ཐུབ་ཡོད། ནད་ཁང་བཤེར་བ་དང་། རིག་གཞུང་འཆད་ཁྲིད། ལག་རྩལ་གསོ་སྦྱོང་སོགས་ཀྱི་སྨན་བཅོས་འཕྲོད་བསྟེན་གྱི་རོགས་སྐྱོར་བྱས་ནས་སྔོན་ཐོན་གྱི་སྨན་བཅོས་ལག་རྩལ་དང་། ཐོན་ཁུངས། ཉམས་མྱོང་། འདུ་ཤེས་བཅས་ས་མཐོའི་ཡུལ་དུ་སྤེལ་ཏེ“ཧྲན་ཏུང་དང་བོད་ལྗོངས་ཁྱིམ་ཚང་གཅིག་ལྟར་བརྩེ། བདེ་ཐང་ཕུགས་འདུན་མཉམ་དུ་འགྲུབ་པར་གཞོལ་བའི”མི་སེམས་འགུལ་བའི་ལེའུ་ཞིག་བརྩམས་པ་རེད།