ཉེ་བའི་ལོ་ཤས་རིང་། ལྷ་ས་གྲོང་ཁྱེར་ཆུ་ཤུར་རྫོང་བུད་མེད་མཉམ་འབྲེལ་ལྷན་ཚོགས་ཀྱིས“གཅིག་རེ་བཞིའི”བྱེད་ཐབས་ལ་བརྟེན་ནས“མཉམ་འབྲེལ”གྱི་ལེགས་ཆ་འདོན་སྤེལ་གང་ལེགས་ཀྱིས་གཞི་རིམ་བཅོས་སྐྱོང་གི་སྟོབས་ཤུགས་ཆེན་པོ་མངོན་པར་བྱས་ནས། མཉམ་སྐྲུན་མཉམ་སྐྱོང་མཉམ་སྤྱོད་བཅས་ཀྱི་སྤྱི་ཚོགས་བཅོས་སྐྱོང་རྣམ་པ་ཆགས་པར་བུད་མེད་ཀྱི་བློ་གྲོས་དང་སྟོབས་ཤུགས་སྐྱེས་སུ་ཕུལ་ཡོད།

“དར་ཆ”གཅིག་ཡག་པོ་བཙུགས་ཏེ།

གཡུལ་ས་ཆུང་ངུར་བརྟེན་ནས་བཅོས་སྐྱོང་ཆེན་པོར་སྐུལ་འདེད་བཏང་བ།

ཆུ་ཤུར་རྫོང་བུད་མེད་མཉམ་འབྲེལ་ལྷན་ཚོགས་ཀྱིས“ཐོན་ཁུངས་མཉམ་སྤྱོད་དང་། གཡུལ་ས་མཉམ་སྐྲུན། སྟོབས་ཤུགས་མཉམ་སྤྱོད། སྤུས་རྟགས་མཉམ་སྐྲུན”བཅས་ཀྱི་གསར་གཏོད་བསམ་ཕྱོགས་ལ་བརྟེན་ནས། བུད་མེད་བྱེད་སྒོའི་གཡུལ་ས་འཛུགས་སྐྱོང་བྱ་རྒྱུ་དེ་ཏང་འཛུགས་སྐྱོང་གི་ལས་དོན་ནང་བཅུག་ནས་ཏང་ཡོན་བྱེད་སྒོ་ཁང་དང་ཏང་དམངས་ཞབས་ཞུའི་ལྟེ་གནས་སོགས་ཏང་འཛུགས་སྐྱོང་གི་གཡུལ་སར་བརྟེན་ནས་ཡུལ་བབ་དང་མཐུན་པའི་བུད་མེད་མཉམ་འབྲེལ་ལྷན་ཚོགས་ཀྱི་རྩ་འཛུགས་རྣམ་པ་སྣ་མང་བཏོད་དེ། དྲོ་སྐྱིད་ལྡན་པའི“བུད་མེད་ཀྱི་ཁྱིམ་གཞིས”དང་། སྤྱོད་གོ་ཆོད་པའི“བུད་མེད་ཀྱི་མཚན་མོའི་སློབ་གྲྭ” ལས་ཕྱོད་ཆེ་བའི“བུད་མེད་ཀྱི་དོན་གྲོས་ཚོགས་འདུ”སོགས་གཅིག་རྗེས་གཉིས་མཐུད་ངང་ཐོན་ནས་རྒྱ་ཆེའི་བུད་མེད་མང་ཚོགས་ཀྱིས“ཁྱིམ་གཞིས”ཀྱི་དྲོ་སྐྱིད་ཚོར་བ་བྱས་ཏེ་གོང་བུར་འགྲིལ་ཤུགས་ཆེ་རུ་ཕྱིན་ཡོད་པ་རེད།

མིག་སྔར། ཆུ་ཤུར་རྫོང་གི་གྲོང་གསེབ་ཡོངས་སུ“བུད་མེད་ཁྱིམ་གཞིས”ཁྱབ་ནས་བུད་མེད་དུས་ཆེན་དང་བྱིས་པའི་དུས་ཆེན་སོགས་བརྗོད་དོན་གཙོ་བོའི་བྱེད་སྒོ་ཐེངས་69སྤེལ་བར་མང་ཚོགས་ཁྲི་1.3ཞུགས་པ་དང་། “བུད་མེད་ཀྱི་མཚན་མོའི་སློབ་གྲྭ”ཁག་6གཉེར་ནས་སློབ་སྦྱོང་བྱེད་སྒོ་ཐེངས་60ལྷག་ཙམ་སྒྲིག་འཛུགས་བྱས་པར་བུད་མེད་མང་ཚོགས་ཆིག་སྟོང་ལྷག་ཙམ་ལ་ཕན་པ་ཐོབ་ཡོད་པ་རེད།

“སྦྲེལ་ཟམ”ཡག་པོ་གཅིག་བསྐྲུན་ཏེ།

གཅེས་སེམས་ཆུང་ངུར་བརྟེན་ནས་ནུས་ཚད་ཆེན་པོ་བརྒྱུད་སྤྲོད་བྱས་པ།

ཆུ་ཤུར་རྫོང་བུད་མེད་མཉམ་འབྲེལ་ལྷན་ཚོགས་ཀྱིས“བུད་མེད་མཉམ་འབྲེལ་ལྷན་ཚོགས+ལས་ཞུགས”ཀྱི་མཉམ་འགུལ་ནུས་པ་གང་ལེགས་བཏོན་ནས་བུད་མེད་ལས་གཏོད་ལས་ཞུགས་ཀྱི་བྱ་སྤྱོད་སྤེལ་ཏེ་ཆུ་ཤུར་གྲོང་ཚོའི་བུད་མེད་མང་ཚོགས་ལ་སྔོ་ཚལ་འདེབས་འཛུགས་རྩལ་ནུས་གསོ་སྦྱོང་དང་། “དྲི་ཞིམ་སྤོས་ཀྱི་མཉམ་ལས་ཁང”ལ་ཁྲོམ་བཀྱག་རག་པར་བྱ་ཆེད། བུད་མེད་མང་ཚོགས་སྒྲིག་འཛུགས་བྱས་ནས“དཔྱིད་རླུང་བྱ་སྤྱོད”ཀྱི་ལས་མི་བསྡུ་ཚོགས་ལ་ཞུགས་སུ་བཅུག་པ་རེད། གནམ་གྲོང་ཚོའི་ཏང་ཡོན་དངོས་གྲུབ་དབང་མོར་མཛུབ་ཁྲིད་བྱས་ནས་མཉམ་ལས་ཁང་བཙུགས་པའི་ནང་ལས་མི་23བསྡུས་ནས་སྡོང་ཕྲུག་དང་སྔོ་ཚལ་བཏབ་པར་མི་རེར་ལོ་རེར་ཡོང་འབབ་སྒོར་4500མང་དུ་ཕྱིན་ཡོད་པ་རེད།

ཆུ་ཤུར་རྫོང་བུད་མེད་མཉམ་འབྲེལ་ལྷན་ཚོགས་ཀྱིས་དཀའ་ངལ་ཡོད་པའི་ཁྱིམ་ཚང་ལ་རྒྱུན་རྣམ་ཅན་གྱི་འཚམས་འདྲིའི་བྱེད་སྒོ་སྤེལ་ཏེ་དཀའ་ངལ་ཡོད་པའི་བུད་མེད་རྒན་གྲས་དང་དཀའ་ངལ་ཡོད་པའི་བཟའ་ཚང་ཁ་བྲལ་གྱི་བུད་མེད་སོགས་གཙོ་གནད་ཚོགས་སྤྱིར་རིམ་རྩིས་བྱས་ན་རོགས་སྐྱོར་མ་དངུལ་སྒོར་ཁྲི་1.42སྤྲད་དེ་དཀའ་ངལ་ཡོད་པའི་བུད་མེད་དང་བྱིས་པས་དྲོ་སྐྱིད་ཚོར་ཐུབ་པར་བྱས་པ་རེད།

“སྲུང་གདུགས”ཡག་པོ་གཅིག་བརྒྱབ་སྟེ།

ཁྱིམ་ཚང་ཆུང་ངུར་བརྟེན་ནས་ཁྱིམ་ཚང་ཆེན་པོར་སྐུལ་ཁྲིད་བྱས་པ།

ཁྱིམ་སྲོལ་སློབ་གསོ་སྔར་བས་གཏིང་ཟབ་ཏུ་གཏོང་ཆེད། ཆུ་ཤུར་རྫོང་བུད་མེད་མཉམ་འབྲེལ་ལྷན་ཚོགས་ཀྱིས་བུད་མེད་མང་ཚོགས་སྒྲིག་འཛུགས་བྱས་ཏེ་དྲ་ཐོག་ནས་ལེ་ཚན་སྤུས་ལེགས་ལ་ལྟ་བ་དང་། “ཁྱིམ་ཚང་ཁྲི་སྟོང་གི་བདེ་སྐྱིད་ཁྱིམ་ཚང་སློབ་གསོར་ཐུག་པའི”བྱེད་སྒོ་རབ་དང་རིམ་པ་གྲོང་གསེབ་ཏུ་སྤེལ་ནས། དུས་རབས་གསར་པའི་བུད་མེད་ཀྱི་དར་སྲོལ་གསར་པ་སྐྱེད་སྲིང་གིས་སྤྱི་ཚོགས་ཀྱི་ཁོར་ཡུག་བཟང་པོ་བཏོད་ཡོད་པ་རེད།

བུད་མེད་དང་བྱིས་པའི་ཁེ་དབང་ལ་སྲུང་སྐྱོང་ནུས་ལྡན་བྱ་ཆེད། ཆུ་ཤུར་རྫོང་བུད་མེད་མཉམ་འབྲེལ་ལྷན་ཚོགས་ཀྱིས“བུད་མེད་མཉམ་འབྲེལ་ལྷན་ཚོགས+མངགས་གཏོང་ཁང”གི་ཁེ་དབང་སྲུང་སྐྱོང་ལམ་སྲོལ་གསར་གཏོད་བྱས་ཏེ། “ཡཱ་སུང་བུད་མེད་དང་བྱིས་པའི་ཁེ་དབང་སྲུང་སྐྱོང་ལྟེ་གནས”ཏེ“ཁྱིམ་ཚང་གི་གཏུམ་སྤྱོད་ལ་ངོ་རྒོལ་བྱེད་པའི་ཉེན་གཏོང་ཞབས་ཞུའི་ས་ཚིགས”བཙུགས་པ་རེད། ཁེ་དབང་སྲུང་སྐྱོང་ལྟེ་གནས་གཅིག་གི་གཤམ་དུ་ཁྱིམ་ཚང་གི་གཏུམ་སྤྱོད་ལ་ངོ་རྒོལ་བྱེད་པའི་ཉེན་གཏོང་ཞབས་ཞུའི་ས་ཚིགས་6དང་བུད་མེད་དང་བྱིས་པའི་ཁེ་དབང་ལ་སྲུང་སྐྱོང་ལས་གནས་9བཙུགས་ཏེ་ཁྱོན་ཡོངས་ནས་ཁེ་དབང་ལ་སྲུང་སྐྱོང་བྱེད་པའི་ཞབས་ཞུའི་མ་ལག་བཙུགས་པ་རེད།

“སྦྲེལ་ཐག”ཡག་པོ་གཅིག་སྦྲེལ་ཏེ།

མཉམ་ལས་ཆུང་ངུར་བརྟེན་ནས་མཉམ་ཤུགས་ཆེན་པོ་ཆཊ་པར་བྱས་པ།

ཆུ་ཤུར་རྫོང་བུད་མེད་མཉམ་འབྲེལ་ལྷན་ཚོགས་ཀྱིས“བུད་མེད་དམག་དཔུང”གི་དང་བླངས་ཞབས་ཞུའི་སྤུས་རྟགས་ནུས་ཤུགས་ཡོད་རྒུས་བཏོད་པར་གྲོང་ཚོ་ཁག་གིས་དང་ལེན་ཧུར་ཐག་བྱས་ནས་དང་བླངས་ཞབས་ཞུ་རུ་ཁག་བཙུགས་པ་མ་ཟད། ད་དུང་ཟླ་རེའི་ཚེས་5ཉིན་ཞབས་ཞུའི་ཉིན་མོར་གཏན་འཁེལ་བྱས་པ་དང་། བརྗོད་དོན་གཙོ་བོའི་དང་བླངས་ཞབས་ཞུའི་བྱེད་སྒོ་ཐེངས་240ལྷག་ཙམ་སྤེལ་བར་མི་གྲངས་8000ལྷག་ཙམ་ཞུགས་ནས། བུད་མེད་མང་ཚོགས་ཀྱི་དཔེ་སྟོན་སྐུལ་ཁྲིད་ནུས་པ་འདོན་སྤེལ་དང་སྤྱི་ཚོགས་ཡོངས་གཞི་རིམ་བཅོས་སྐྱོང་ནང་ཞུགས་པའི་རྣམ་པ་ཟབ་མོ་ཞིག་བཏོད་པ་རེད།

ཆུ་ཤུར་རྫོང་བུད་མེད་མཉམ་འབྲེལ་ལྷན་ཚོགས་ཀྱིས“གཅིག་རེ་བཞིའི”བྱེད་ཐབས་ལ་བརྟེན་ནས་གཞི་རིམ་བཅོས་སྐྱོང་གི་བུད་མེད་ཀྱི་སྟོབས་ཤུགས་རྒྱུན་ཆད་མེད་པར་འཕེལ་བར་བྱས་ནས། ཆུ་ཤུར་རྫོང་གི་འཕེལ་རྒྱས་དང་ཞི་མཐུན་ལ་རྒྱུན་མཐུད་ཀྱི་གསོན་ཤུགས་དང་དྲོ་སྐྱིད་བསྣན་ཡོད།