ཀྲུང་གོས་ཐོན་སྐྱེད་ནུས་ཤུགས་གསར་མ་འཕེལ་རྒྱས་མགྱོགས་སུ་གཏོང་བ་དེས་ཀྲུང་གོའི་རང་རྒྱལ་ཁབ་ཀྱི་གསར་གཏོད་ནུས་པ་ཆེ་རུ་འགྲོ་བ་དང་ཀྲུང་གོའི་དཔལ་འབྱོར་སྤུས་ཚད་མཐོ་རུ་འགྲོ་བར་རམ་འདེགས་ཐུབ་རྒྱུ་མ་ཟད། གོ་ལ་ཧྲིལ་པོའི་དཔལ་འབྱོར་སླར་གསོ་ཡོང་བར་ཡང་སྒུལ་ནུས་གསར་པ་བསྣན་རྒྱུ་རེད།

2023ལོར་ཀྲུང་གོའི་རྒྱལ་ནང་གི་ཐོན་སྐྱེད་རིན་ཐང་བསྡོམས་འབོར་མི་དམངས་ཤོག་སྒོར་དུང་ཕྱུར་ཁྲི་126ལྷག་ཙམ་ཟིན་པ་དེ་ལོ་གོང་མ་ལས་5.2%འཕར་ཡོད། དཔལ་འབྱོར་འཕར་ཚད་དེ་ནུབ་ཕྱོགས་ཀྱི་དཔལ་འབྱོར་སྡེ་གཞི་གཙོ་བོ་ལས་ཆེས་ཆེར་བརྒལ་བ་དེ་ཐོག་ནས་ཀྲུང་གོའི་དཔལ་འབྱོར་བསྟུད་མར་ལོ་བཅུ་ཕྲག་མགྱོགས་མྱུར་འཕར་རྗེས་སྔར་བཞིན་འཕར་ཚད་ཅུང་མགྱོགས་པོ་རྒྱུན་འཁྱོངས་ཐུབ་པ་གསལ་བཤད་ཐུབ་ཡོད།

འདི་ལོའི་ཀྲུང་གོའི《སྲིད་གཞུང་གི་ལས་དོན་སྙན་སྒྲོན》ནང་དཔལ་འབྱོར་འཕར་བའི་སྔོན་དཔག་དམིགས་ཚད་དེ་5%ཙམ་དུ་གཏན་འཁེལ་བྱས་པ་དེ་ཐོག་ནས་ཀྲུང་གོས་དཔལ་འབྱོར་གྱི་གྲུབ་འབྲས་རྒྱུན་མཐུད་བརྟན་པོའི་ངང་ལེགས་སུ་འགྲོ་རྒྱུ་བརྩོན་ལེན་བྱས་ཏེ་གྲངས་འབོར་ལུགས་མཐུན་ངང་འཕར་ཐུབ་པ་མ་ཟད། སྤུས་ཚད་ཀྱང་ནུས་ལྡན་ངང་མཐོ་རུ་འགྲོ་ཐབས་བྱེད་ཀྱི་ཡོད་པ་མཚོན་ཡོད།

ཀྲུང་གོའི“ལོ་ལྔ་ཚན་བཅུ་བཞི་པའི”འཆར་འགོད་དང་2035ལོའི་རྒྱང་རིང་དམིགས་ཚད་ཀྱི་རྩ་གནད་ལ་གཞིགས་ན། ཀྲུང་གོའི་དཔལ་འབྱོར་ཡུན་རིང་བརྟན་པོའི་ངང་འཕེལ་རྒྱས་རྒྱུན་འཁྱོངས་ཐུབ་པའི་མི་མངོན་པའི་སྟོབས་ཤུགས་ལྡན་པས“ལོ་ལྔ་ཚན་བཅུ་བཞི་པའི”དུས་མཇུག་ཏུ་སླེབས་སྐབས་ད་ལྟ་ལག་ལེན་བསྟར་བཞིན་པའི་ཡོང་འབབ་མཐོ་བའི་རྒྱལ་ཁབ་ཀྱི་ཚད་གཞིར་སླེབས་པ་དང་2035ལོར་སླེབས་སྐབས་དཔལ་འབྱོར་གྱི་སྤྱིའི་བསྡོམས་འབོར་རམ་ཡང་ན་མི་རེའི་ཆ་སྙོམས་ཡོང་འབབ་ལྡབ་གཅིག་འཕར་ཐུབ་བཟོ་རྦད་དེ་ཡོད། ཀྲུང་གོའི་མི་འབོར་གྱིས་གོ་ལ་ཧྲིལ་པོའི་མི་འབོར་བསྡོམས་འབོར་གྱི་18%ཙམ་བཟུང་བ་དང་མིག་སྔར་གོ་ལ་ཧྲིལ་པོའི་ཡོང་འབབ་མཐོ་བའི་དཔལ་འབྱོར་སྡེ་གཞིའི་མི་འབོར་བསྡོམས་འབོར་གྱིས་འཛམ་གླིང་གི་མི་འབོར་བསྡོམས་འབོར་གྱི་16%ཙམ་བཟུང་བ་དང་ཀྲུང་གོ་འདི་ཉིད་ཡོང་འབབ་མཐོ་བའི་དཔལ་འབྱོར་སྡེ་གཞིའི་གྲས་སུ་ཚུད་པ་དེ་ནི་ཧ་ལས་དགོས་པའི་གྲུབ་འབྲས་ཤིག་རེད།

2023ལོར་ཀྲུང་གོ་འདི་ཉིད་གོ་ལ་ཧྲིལ་པོའི་རླངས་འཁོར་ཕྱིར་གཏོང་རྒྱལ་ཁབ་ཆེ་ཤོས་སུ་གྱུར་བ་དང་ཀྲུང་གོ་ནི་གོ་ལ་ཧྲིལ་པོའི་བསྐྱར་སྐྱེས་ཐུབ་པའི་ནུས་རྒྱུའི་ཁྲོམ་ར་དང་སྒྲིག་ཆས་བཟོ་སྐྲུན་རྒྱལ་ཁབ་ཆེ་ཤོས་ཡིན་པ་དེས་སྤུས་ལེགས་ནུས་རྒྱུ་གསར་པའི་ཐོན་རྫས་རྒྱུན་མཐུད་ངང་མཁོ་འདོན་བྱས་ནས་གོ་ལ་ཧྲིལ་པོའི་ལྗང་མདོག་ཐཱན་ཉུང་ཕྱོགས་སྒྱུར་ལ་སྐུལ་འདེད་ནུས་ལྡན་གཏོང་བཞིན་ཡོད།

ཀྲུང་གོས་ཐོན་སྐྱེད་ནུས་ཤུགས་གསར་མ་འཕེལ་རྒྱས་མགྱོགས་སུ་གཏོང་བ་དང་ཆབས་ཅིག ཀྲུང་གོའི་ཐོན་རྫས་གོ་ལ་ཧྲིལ་པོའི་ཐོན་ལས་འཁོར་འབྲེལ་དང་མཁོ་སྤྲོད་འཁོར་འབྲེལ་ནང་དེ་བས་ལེགས་པའི་སྒོ་ནས་མཉམ་འདྲེས་ཐུབ་པ་བྱ་རྒྱུ་དང་ཀྲུང་གོ་དང་རྒྱལ་ཁབ་ཁག་དབར་གྱི་དཔལ་འབྱོར་འབྲེལ་བའང་སྔར་བས་གཏིང་ཟབ་ཏུ་ཕྱིན་ནས་ཀྲུང་གོ་དང་མཉམ་ལས་བྱེད་པའི་གལ་ཆེའི་རང་བཞིན་དེ་བས་མངོན་གསལ་དོད་དུ་འགྲོ་རྒྱུ་རེད།

(རྩོམ་པ་པོ་ནི་ཀྲུང་གོ་མི་དམངས་སློབ་ཆེན་ཁྲུང་དབྱང་དངུལ་རྩ་ཞིབ་འཇུག་ཁང་གི་མཐོ་རིམ་ཞིབ་འཇུག་པ་དང་དབྱིན་ཇིའི་ལོན་ཏོན་གྱི་དཔལ་འབྱོར་དང་ཚོང་ལས་སྲིད་ཇུས་ཧྲུའུ་ཡི་ཧྲུའུ་ཀྲང་ཟུར་པ་ཡིན)