ཀྲུང་གོ་དང་འཇར་མན་གྱི་རིགས་གཅིག་མཁས་ཅན་གྱིས་དཔལ་འབྱོར་མཉམ་ལས་ཀྱི་གོ་སྐབས་གསར་པར་གྲོས་བསྡུར་བྱེད་པ།
ཤིན་ཧྭ་གསར་འགྱུར་ཁང་འཇར་མན་གྱི་གྲོང་ཁྱེར་མུའུ་ཉི་ཧེ་ནས་གློག་འཕྲིན་འབྱོར་གསལ། ཉིན་ཤས་གོང་། མུའུ་ཉི་ཧེ་རུ་བཅའ་སྡོད་ཀྲུང་གོའི་སྤྱི་ཁྱབ་ཁེ་སྐྱོང་ལས་ཤག་དང་པཱ་ཧྥ་ལི་ཡ་ཀྲོའུ་ཕྱིར་གཏོང་སྐྱིད་སྡུག་མཐུན་ཚོགས་ཀྱིས་འཇར་མན་གྱི་མུའུ་ཉི་ཧེ་རུ“གོ་ལ་ཧྲིལ་པོའི་དཔལ་འབྱོར་ཁྲོད་ཀྱི་ཀྲུང་གོའི་ནུས་པ། འགྲན་སློང་དང་གོ་སྐབས”ཞེས་པ་བརྗོད་དོན་གཙོ་བོར་བྱས་པའི་བགྲོ་གླེང་ཚོགས་འདུ་འཚོགས་པ་རེད། ཀྲུང་གོའི་དཔལ་འབྱོར་འཕེལ་རྒྱས་ཀྱི་མདུན་ལམ་དང་། ནུས་རྒྱུ་གསར་པའི་ཐོན་ལས་ཀྱི་གནས་ཚུལ། ཀྲུང་གོ་དང་ཡོ་རོབ་དབར་གྱི་ལྗང་མདོག་མཉམ་ལས་སོགས་ཀྱི་གླེང་གཞིར་དམིགས་ནས། ཚོགས་འདུར་ཞུགས་མཁན་ཀྲུང་གོ་དང་འཇར་མན་གྱི་རིགས་གཅིག་མཁས་ཅན་གྱིས་དཔལ་འབྱོར་མཉམ་ལས་ཀྱི་གོ་སྐབས་ལ་གྲོས་བསྡུར་གཏིང་ཟབ་བྱས་པ་རེད།
མུའུ་ཉི་ཧེ་རུ་བཅའ་སྡོད་ཀྲུང་གོའི་སྤྱི་ཁྱབ་ཁེ་སྐྱོང་ལས་ཤག་གི་སྤྱི་ཁྱབ་ཁེ་སྐྱོང་བའི་ལས་ཚབ་ལིན་ཁའེ་ཡིས། ཀྲུང་གོ་དང་འཇར་མན་གྱི་འབྲེལ་བའི་ཁྲོད་དཔལ་འབྱོར་ཚོང་དོན་མཉམ་ལས་ཀྱིས་ཐོག་མཐའ་བར་གསུམ་དུ“གྲུ་རྡོ”དང“གྲུ་ཕུར”ལྟ་བུའི་ནུས་པ་ཐོན་གྱི་ཡོད། མིག་སྔའི་གོ་ལ་ཧྲིལ་པོའི་ཉེན་ཁ་དང་འགྲན་སློང་གི་མདུན་དུ་འགལ་རྐྱེན་བསལ་ནས་ལག་གདང་སྦྲེལ་ཏེ་མཉམ་ལས་དང་། མཐུན་པ་ཡོང་ཐབས་དང་མི་མཐུན་པ་སོར་འཇོག ཐུན་མོང་ཐོག་འཕེལ་རྒྱས་དོན་གཉེར་བཅས་བྱེད་དགོས་ཀྱི་ཡོད། ཀྲུང་གོས་བློ་བརྟན་འགྱུར་མེད་ངང་ཆུ་ཚད་མཐོ་བའི་ཕྱི་ཕྱོགས་སྒོ་དབྱེར་སྐུལ་འདེད་གཏོང་བ་དང་པཱ་ཧྥ་ལི་ཡ་ཀྲོའུ་ཚུད་པའི་འཇར་མན་ཡོངས་ཀྱི་ཁེ་ལས་ཀྲུང་གོར་མ་འཇོག་ལས་དར་བྱེད་པར་བསྐྱོད་དེ་ཀྲུང་གོ་དང་འཇར་མན་དང་དེ་བཞིན་ཀྲུང་གོ་དང་པཱ་ཧྥ་ལི་ཡ་ཀྲོའུ་ཡི་དཔལ་འབྱོར་ཚོང་དོན་འགྲོ་འོང་ཆེད་ལེགས་སྐྱེས་འབུལ་རྒྱུར་དགའ་བསུ་ཞུ་རྒྱུ་ཡིན་ཞེས་བརྗོད་པ་རེད།
མུའུ་ཉི་ཧེའི་ཕྱི་འབྲེལ་སྲིད་ཇུས་སློབ་ཚོགས་ཏུང་ཧྲི་ལྷན་ཚོགས་ཀྱི་ཁོངས་མི་ལའེ་ནཱ·ཧྲི་ཏི་ནཱ་ཡིས། འཇར་མན་དང་ཀྲུང་གོའི་ཚོང་དོན་འབྲེལ་བ་ནི་རྒྱལ་ཁབ་གཉིས་པོའི་ངོས་ནས་བརྗོད་ན་གལ་འགངས་ཤིན་ཏུ་ཆེ་བ་ཞིག་རེད། འཇར་མན་གྱི་དཔལ་འབྱོར་ལ་ལོ་མང་རིང་གྲུབ་འབྲས་ཐོབ་པ་དང་དེ་བཞིན་ཀྲུང་གོར་སྒྱུར་བཅོས་སྒོ་དབྱེ་བྱས་ཚུན་འཕེལ་རྒྱས་ཧ་ཅང་ཆེན་པོ་ཕྱིན་པ་ཚང་མ་ཚོང་དོན་དང་ཕྱིར་གཏོང་ལས་བྱུང་བ་ཞིག་རེད། དེར་བརྟེན་རྒྱལ་སྤྱིའི་ཚོང་དོན་གྱི་སྒོ་དབྱེའི་རང་བཞིན་དང་མཉམ་ལས་རང་བཞིན་རྒྱུན་འཁྱོངས་བྱ་རྒྱུ་ནི་རྒྱལ་ཁབ་གཉིས་ཀར་གལ་འགངས་ཤིན་ཏུ་ཆེ་བ་ཞིག་རེད་ཅེས་བརྗོད་པ་རེད།
“ཀྲུང་གོར་མ་འཇོག་བྱེད་པའི”སྲིད་ཇུས་དྲིལ་བསྒྲགས་དང་ངོ་སྤྲོད་བྱེད་ཤུགས་སྔར་བས་ཆེ་རུ་གཏོང་བ་དང་ས་གནས་ཀྱི་ཚོང་འགུགས་མ་འདྲེན་ལ་རམ་འདེགས་བྱ་ཆེད། མུའུ་ཉི་ཧེ་རུ་བཅའ་སྡོད་ཀྲུང་གོའི་སྤྱི་ཁྱབ་ཁེ་སྐྱོང་ལས་ཤག་གིས་ཁེ་སྐྱོང་ལས་ཤག་དེའི་ཁུལ་དུ་ཤུགས་རྐྱེན་ལྡན་པའི་འཇར་མན་གྱི་ཚོང་དོན་མཐུན་ཚོགས་དང་མཉམ་ལས་བྱས་ནས“འཇར་མན་གྱི་ཁེ་ལས་ཁེ་སྐྱོང་ལས་ཤག་ཏུ་བསྐྱོད་དེ་ཀྲུང་གོའི་དཔལ་འབྱོར་ལ་ཉེ་ས་ནས་ལྟ་བའི”བྱེད་སྒོ་རབ་དང་རིམ་པ་སྤེལ་བ་རེད། ད་ཐེངས་ཀྱི་བགྲོ་གླེང་ཚོགས་འདུ་ནི་བྱེད་སྒོ་རབ་དང་རིམ་པའི་གྲས་ཤིག་ཡིན་ཞིང་། པཱ་ཧྥ་ལི་ཡ་ཀྲོའུ་ཕྱིར་གཏོང་སྐྱིད་སྡུག་མཐུན་ཚོགས་ཀྱི་ཚོགས་ཞུགས་ཁེ་ལས་དང་སྒྲིག་གཞི་70ཡི་འཐུས་མི་ཚོགས་འདུར་ཞུགས་པ་རེད།