ཀྲུང་གོ་དང་ལ་ཏིང་མེ་གླིང་གི་གཅིག་མཐུན་ཚོགས་པའི་གླེང་སྟེགས་བཙུགས་ནས་ལོ་10སོང་རིང་། ཀྲུང་གོ་དང་ལ་ཏིང་མེ་གླིང་གི་ཁྱབ་ཁོངས་ཁག་གི་མཛའ་གྲོགས་མཉམ་ལས་དབྱར་མཚོ་རྒྱས་པ་ལྟར་འཕེལ་རྒྱས་ཕྱིན་པ་དང་། ཀྲུང་གོ་དང་ལ་ཏིང་མེ་གླིང་གི་འབྲེལ་བ་འདྲ་མཉམ་དང་། གཉིས་ཕན། གསར་གཏོད། སྒོ་དབྱེ། དམངས་ཕན་བཅས་ཀྱི་དུས་རབས་གསར་པར་སླེབས་ནས་ཀྲུང་གོ་དང་ལ་ཏིང་མེ་གླིང་གི་ལས་དབང་གཅིག་མཐུན་ཚོགས་པ་འཛུགས་པར་སྒུལ་ཤུགས་ཆེན་པོ་བསྣན་ཡོད།

2014ལོའི་ཟླ་7ཚེས་17ཉིན། པར་ཞི་ལི་ཡར་ཀྲུང་གོ་དང་ལ་ཏིང་མེ་གླིང་དང་ཅ་ལེ་པིའི་རྒྱལ་ཁབ་ཀྱི་འགོ་ཁྲིད་པའི་ཞལ་འཛོམས་གནང་བ་དང་།　ཀྲུའུ་ཞི་ཞི་ཅིན་ཕིང་དང་ཚོགས་ཞུགས་རྒྱལ་ཁབ་ཁག་གི་འགོ་ཁྲིད་པས་ཐུན་མོང་ཐོག་ཀྲུང་གོ་དང་ལ་ཏིང་མེ་གླིང་གི་གཅིག་མཐུན་ཚོགས་པའི་གླེང་སྟེགས་འཛུགས་རྒྱུའི་ཁྱབ་བསྒྲགས་གནང་ནས་ཀྲུང་གོ་དང་ལ་ཏིང་མེ་གླིང་སྤྱི་ཡོངས་ཀྱི་མཉམ་ལས་ཀྱི་ལེའུ་གསར་རྐྱང་ཞིག་འགོ་ཚུགས་པ་རེད། ལོ་10ཡི་རིང་། ཀྲུང་གོ་དང་ལ་ཏིང་མེ་གླིང་གི་ཁྱབ་ཁོངས་ཁག་གི་མཛའ་གྲོགས་མཉམ་ལས་དབྱར་མཚོ་རྒྱས་པ་ལྟར་འཕེལ་རྒྱས་ཕྱིན་པ་དང་། ཀྲུང་གོ་དང་ལ་ཏིང་མེ་གླིང་གི་འབྲེལ་བ་འདྲ་མཉམ་དང་། གཉིས་ཕན། གསར་གཏོད། སྒོ་དབྱེ། དམངས་ཕན་བཅས་ཀྱི་དུས་རབས་གསར་པར་སླེབས་ནས་ཀྲུང་གོ་དང་ལ་ཏིང་མེ་གླིང་གི་ལས་དབང་གཅིག་མཐུན་ཚོགས་པ་འཛུགས་པར་སྒུལ་ཤུགས་ཆེན་པོ་བསྣན་ཡོད།

ཀྲུང་གོ་དང་ལ་ཏིང་མེ་གླིང་གི་གླེང་སྟེགས་བཙུགས་པ་དེ་ཞི་བདེ་དང་། འཕེལ་རྒྱས། མཉམ་ལས། གཉིས་ཕན་བཅས་ཀྱི་དུས་རབས་ཀྱི་རླབས་རྒྱུན་དང་མཐུན་པ་དང་། ཀྲུང་གོ་དང་ལ་ཏིང་མེ་གླིང་གི་འབྲེལ་བའི་ལོ་རྒྱུས་ཐོག་གི་གསར་གཏོད་བྱེད་ཐབས་ཤིག་ཡིན་པས། ཀྲུང་གོ་དང་ལ་ཏིང་མེ་གླིང་དབར་སྤྱི་ཡོངས་ཀྱི་མཉམ་ལས་དང་ཕྱོགས་གཉིས་པོའི་མཉམ་ལས་མཉམ་སྒྲུབ་འཕེལ་རྒྱས་དང་ཕན་ཚུན་སྐུལ་འདེད་གཏོང་བའི་རྣམ་པ་གསར་པ་ཞིག་ཆགས་པར་སྐུལ་འདེད་བཏང་ཡོད། ཕྱོགས་གཉིས་པོས་པུའུ་ཀྲང་རིམ་པའི་ཚོགས་འདུ་དང་། ཀྲུང་གོ་དང་ལ་ཏིང་མེ་གླིང་གི་གཅིག་མཐུན་ཚོགས་པའི“བཞི་སྦྲེལ་ཐེར་གེའི”ཕྱི་འབྲེལ་པུའུ་ཀྲང་གི་གླེང་མོལ། རྒྱལ་ཁབ་མཐུན་སྦྱོར་པའི་ཚོགས་འདུ་སོགས་ལམ་སྲོལ་བེད་སྤྱོད་གང་ལེགས་བྱས་ནས། གླེང་སྟེགས་འཛུགས་སྐྱོང་དང་སྤྱི་ཡོངས་ཀྱི་མཉམ་ལས་ཐད་འབྲེལ་གཏུག་མཐུན་སྦྱོར་བྱས་པ་རེད།

ཀྲུང་གོ་དང་ལ་ཏིང་མེ་གླིང་གླེང་སྟེགས་ཀྱིས་ཀྲུང་གོ་དང་ལ་ཏིང་མེ་གླིང་གི་ལས་དབང་གཅིག་མཐུན་ཚོགས་པ་འཛུགས་པར་འདེགས་སྐྱོར་ནུས་ལྡན་བྱས་ཡོད། ཀྲུང་གོ་དང་ལ་ཏིང་མེ་གླིང་གི་གླེང་སྟེགས་བཙུགས་པ་མཚོན་རྟགས་སུ་བྱས་ནས་ཀྲུང་གོ་དང་ལ་ཏིང་མེ་གླིང་སྤྱི་ཡོངས་ཀྱི་མཉམ་ལས་བདེ་བླག་ངང་འགོ་ཚུགས་པ་དང་། ཀྲུང་གོ་དང་ལ་ཏིང་མེ་གླིང་གིས་ལག་གདང་སྦྲེལ་ནས་འདྲ་མཉམ་གཉིས་ཕན་དང་ཐུན་མོང་འཕེལ་རྒྱས་ཀྱི་ཕྱོགས་ཡོངས་མཉམ་ལས་རོགས་ཟླའི་འབྲེལ་བར་སྐུལ་འདེད་བཏང་ནས་ཀྲུང་གོ་དང་ལ་ཏིང་མེ་གླིང་གི་ལས་དབང་གཅིག་མཐུན་ཚོགས་པ་མཉམ་དུ་བཙུགས་ཏེ་ཕྱོགས་གཉིས་པོའི་ཁྱབ་ཁོངས་ཁག་གི་མཉམ་ལས་ལ་ཡངས་ཤིང་རྒྱ་ཆེ་བའི་མདུན་ལམ་བཏོད་ཡོད། མིག་སྔར། ཀྲུང་གོས་ལ་ཏིང་མེ་གླིང་དང་ཅ་ལེ་པིའི་རྒྱལ་ཁབ་22དང“རྒྱུད་གཅིག་ལམ་གཅིག”མཉམ་སྐྲུན་བྱེད་པའི་བསམ་ཤེས་དྲན་ཐོར་མིང་རྟགས་བཀོད་པ་དང་ལ་ཏིང་མེ་གླིང་གི་རྒྱལ་ཁབ་5དང་རང་མོས་ཚོང་དོན་གྱི་གྲོས་ཆོད་ལ་མིང་རྟགས་བཀོད་པ་རེད། བསྡོམས་རྩིས་རགས་ཙམ་བྱས་པར་གཞིགས་ན། 2023ལོའི་ཟླ་9པ་བར། ཀྲུང་གོས་ལ་ཏིང་མེ་གླིང་ས་ཁུལ་དུ་རིམ་རྩིས་བྱས་ན་རྨང་གཞིའི་འཛུགས་སྐྲུན་རྣམ་གྲངས་ཁག་200ལྷག་ཙམ་ལག་བསྟར་བྱས་ནས་ས་གནས་དེ་གར་ལས་ཞུགས་ལས་གནས་ཁྲི་བརྒྱ་ཙམ་མཁོ་འདོན་བྱས་ཡོད།

ཀྲུང་གོ་དང་ལ་ཏིང་མེ་གླིང་གི་གླེང་སྟེགས་ཐོག་འཕེལ་རྒྱས་འགྲོ་བཞིན་པའི་རྒྱལ་ཁབ་ཀྱི་མཐུན་སྒྲིལ་མཉམ་ལས་ཀྱི“ལྷོ་ཕྱོགས་སྟོབས་ཤུགས”གཅིག་ཏུ་བསྡུས་ཡོད། ཀྲུང་གོ་དང་ལ་ཏིང་མེ་གླིང་གི་གླེང་སྟེགས་བཙུགས་པ་དེས་ཀྲུང་གོ་དང་འཕེལ་རྒྱས་འགྲོ་བཞིན་པའི་རྒྱལ་ཁབ་དབར་སྤྱི་ཡོངས་ཀྱི་མཉམ་ལས་ལམ་སྲོལ་ཁྱོན་ཡོངས་ལ་ཁྱབ་པ་དང་ལྷོ་ལྷོ་མཉམ་ལས་ཀྱི་ལས་སྟེགས་གསར་རྐྱང་ཞིག་བཙུགས་ཡོད། ཀྲུང་གོ་དང་ལ་ཏིང་མེ་གླིང་གིས་ཕྱོགས་མང་རིང་ལུགས་ངོ་མ་མཐའ་འཁྱོངས་བྱས་ཏེ། ལྟེ་བའི་ཁེ་ཕན་དང་དོ་ཁུར་ཆེན་པོ་བྱེད་པའི་གནད་དོན་ཐད་ཕན་ཚུན་རྒྱབ་སྐྱོར་བྱེད་པ་དང་། ཐུན་མོང་ཐོག་དོ་ཁུར་བྱེད་པའི་རྒྱལ་སྤྱི་དང་ས་ཁུལ་གྱི་ལས་དོན་ཐད་སྐད་ཆ་ཤོད་རེས་ལ་ཤུགས་སྣོན་རྒྱག་པ། གོ་ལ་ཧྲིལ་པོའི་རང་བཞིན་གྱི་གྲོས་དོན་གལ་ཆེན་ཐད་འབྲེལ་གཏུག་གཞོགས་འདེགས་རྒྱུན་འཁྱོངས་བྱེད་པ། ལག་གདང་སྦྲེལ་ནས་གོ་ལ་ཧྲིལ་པོའི་བཅོས་སྐྱོང་མ་ལག་དེ་བས་དྲང་གཞག་དང་ལུགས་མཐུན་གྱི་ཕྱོགས་སུ་འཕེལ་རྒྱས་འགྲོ་རྒྱུར་སྐུལ་འདེད་གཏོང་བ་བཅས་བྱས་ནས་ཕྱོགས་གཉིས་པོ་དང་རྒྱ་ཆེའི་འཕེལ་རྒྱས་འགྲོ་བཞིན་པའི་རྒྱལ་ཁབ་ཀྱི་ཐུན་མོང་ཁེ་ཕན་སྲུང་སྐྱོང་ནུས་ལྡན་བྱེད་ཀྱི་ཡོད། ཝེ་ནེ་ཙུའེ་ལའི་འཕེལ་རྒྱས་དང་གསར་དར་དཔལ་འབྱོར་གྱི་མཐོ་རིམ་ཞིབ་འཇུག་ལྟེ་གནས་ཀྱི་ཀྲུའུ་རེན་ཨན་ཏེ་ལི་ན·ཐ་ལ་སེན་གྱིས“ལ་ཏིང་མེ་གླིང་དང་ཀྲུང་གོའི་གླེང་སྟེགས་ཀྱིས་ལ་ཏིང་མེ་གླིང་དང་ཀྲུང་གོའི་དཔལ་འབྱོར་འཕེལ་རྒྱས་ལ་སྐུལ་མ་ཐེབས་པ་མ་ཟད། དམངས་གཙོའི་གོ་ལ་ཧྲིལ་པོའི་བཅོས་སྐྱོང་མ་ལག་འཛུགས་རྒྱུར་དེ་བས་ཕན་ཐོགས་ཡོད”ཅེས་བརྗོད་པ་རེད།

ཀྲུང་གོ་ཕྱོགས་ཀྱིས་ལ་ཏིང་མེ་གླིང་ཕྱོགས་དང་མཉམ་དུ་ཀྲུང་གོ་དང་ལ་ཏིང་མེ་གླིང་གི་གླེང་སྟེགས་བཙུགས་ནས་ལོ་10འཁོར་བ་གོ་སྐབས་སུ་བྱས་ཏེ་མུ་མཐུད་ལྟ་རེས་སྐྱོང་རེས་དང་ལག་གདང་སྦྲེལ་ནས་མཉམ་དུ་མདུན་སྐྱོད་བྱས་ཏེ། འཛམ་གླིང་ཞི་བདེ་དང་འཕེལ་རྒྱས་ལ་སྐུལ་འདེད་དང་མིའི་རིགས་ཀྱི་ལས་དབང་གཅིག་མཐུན་ཚོགས་པ་སྐྲུན་པར་སྐུལ་འདེད་བཏང་སྟེ་དེ་བས་མཛེས་སྡུག་ལྡན་པའི་འབྱུང་འགྱུར་ཐུན་མོང་ཐོག་གཏོད་འདོད་ཡོད་པ་རེད།