མཚོ་སྔོན་ཉིན་རེའི་ཚགས་པར་ཐོག་གནས་ཚུལ་སྤེལ་བར་གཞིགས་ན། “ལོ་ཧྲིལ་པོར་འགན་འཁྲི་གཙང་སྒྲུབ་དང་། བྱེད་ཐབས་སྣ་མང་སྤྱད་ནས་འགན་འཁྲི་གཙང་སྒྲུབ། སྟབས་བདེའི་ངང་འགན་འཁྲི་གཙང་སྒྲུབ”བཅས་མངོན་འགྱུར་ཡོང་བ་བྱས་ནས་རྒྱ་ཆེའི་སྤྱི་དམངས་འོས་འགན་ཤིང་འཛུགས་ནང་ཞུགས་པར་སྟབས་བདེ་དེ་བས་མང་བ་མཁོ་འདོན་བྱ་ཆེད། མཚོ་སྔོན་ཞིང་ཆེན་ནགས་ལས་དང་རྩྭ་ཐང་ཅུས་དང་མཚོ་སྔོན་ཞིང་ཆེན་སྔོ་འགྱུར་ཨུ་ལྷན་གཞུང་དོན་ཁང་གིས་འོས་འགན་ཤིང་འཛུགས་ཀྱི་འགན་འཁྲི་གཙང་སྒྲུབ་ཀྱི་རྣམ་པ་གསར་པ་བཏོད་དེ། “དྲ་སྦྲེལ+”ལས་སྟེགས་འཐུས་སྒོ་ཚང་དུ་དང་སྒྲིག་འཛུགས་སྐུལ་སློང་ལ་ཤུགས་སྣོན་བརྒྱབ་ནས་དམངས་ཡོངས་ཀྱི་འོས་འགན་ཤིང་འཛུགས་ཀྱི་དྲ་ཐོག་དྲ་ཕྱི་མཉམ་འདྲེས་ལ་སྐུལ་འདེད་བཏང་བ་རེད། ཟླ་3ཚེས་12ཉིན་བར་མཚོ་སྔོན་གྱི་དམངས་ཡོངས་ཀྱི་འོས་འགན་ཤིང་འཛུགས་དྲ་བའི་ལས་སྟེགས་སུ“དྲ་སྦྲེལ+དམངས་ཡོངས་ཀྱི་འོས་འགན་ཤིང་འཛུགས”ཀྱི་རྣམ་གྲངས་92བཏོད་ནས། འགན་འཁྲི་གཙང་སྒྲུབ་ཀྱི་བྱེད་སྒོ་དེ་ཞིང་ཆེན་ཡོངས་ཀྱི་ས་གནས་ཁག་ཏུ་ཁྱབ་ཡོད་པ་རེད།

ཉེ་བའི་ལོ་ཤས་རིང་། མཚོ་སྔོན་ཞིང་ཆེན་གྱིས་དམངས་ཡོངས་ཀྱི་འོས་འགན་ཤིང་འཛུགས་སྐྱེ་ཁམས་ཁོར་ཡུག་ལེགས་གཏོང་དང་གྲོང་ཁྱེར་དང་གྲོང་གསེབ་སྔོ་འགྱུར་གྱི་ཆུ་ཚད་མཐོ་རུ་གཏོང་བའི་ཐབས་ལམ་གལ་ཆེན་ཞིག་ཏུ་བརྩིས་ནས། འོས་འགན་ཤིང་འཛུགས་ཀྱི་རྣམ་པ་དང་འགན་འཁྲི་སྒྲུབ་ཡུལ་རྒྱུན་ཆད་མེད་པར་ཕུན་སུམ་ཚོགས་སུ་བཏང་བ་དང་། “དྲ་ཐོག་ནས་ཤིང་འཛུགས”སྔོ་འདེབས་སྔོ་སྲུང་གི་རྣམ་པ་གསར་པ་འཚོལ་ཞིབ་དང་ལག་ལེན་ཧུར་ཐག་བྱས་པ། ད་ཡོད་ཀྱི་འོས་འགན་ཤིང་འཛུགས་ཀྱི་འགན་འཁྲི་སྒྲུབ་ཡུལ(དཔེར་ན་སྲོལ་རྒྱུན་གྱི་འོས་འགན་ཤིང་འཛུགས་རྟེན་གཞི་དང་སྣེ་ལེན་ཞུ་ཡུལ)ཡག་པོ་སྤྱོད་པའི་རྨང་གཞིའི་ཐོག་བསྐྲུན་ཟིན་པའི་རིམ་པ་ཁག་དང་རིགས་ཁག་གི“དྲ་སྦྲེལ+དམངས་ཡོངས་ཀྱི་འོས་འགན་ཤིང་འཛུགས”རྟེན་གཞི་33ལ་སྐུལ་འདེད་བརྟན་པོ་བཏང་ནས། དམངས་ཡོངས་ཀྱིས་ཤིང་འཛུགས་འོས་འགན་ལ་མཐུན་རྐྱེན་བསྐྲུན་པ་དང་གཅིག་སྡུད་དང་ཁ་ཐོར་གྱི་འགན་འཁྲི་གཙང་སྒྲུབ་དང་དྲ་ཐོག་དང་དྲ་ཕྱིའི་འགན་འཁྲི་གཙང་སྒྲུབ་ཟུང་འབྲེལ་མཐའ་འཁྱོངས་བྱས་ཏེ་ངལ་རྩོལ་འགན་འཁྲི་གཙང་སྒྲུབ་ཀྱི་བྱེད་སྒོ་སྣ་ཚོགས་སྒྲིག་འཛུགས་བྱས་ནས་སྤེལ་ཡོད། འགན་འཁྲི་གཙང་སྒྲུབ་བྱེད་སྟངས་ནང་ནགས་བཟོ་སྔོ་འགྱུར་དང་། གསོ་སྐྱོང་བདག་སྐྱོང་། རང་བྱུང་སྲུང་སྐྱོང་། ས་བོན་འདེགས་གསོ། སྒྲིག་བཀོད་བཟོ་སྐྲུན། དངུལ་ཟོག་ཞལ་འདེབས། དང་བླངས་ཞབས་ཞུ་སོགས་རྣམ་པ་སྣ་ཚོགས་ཚུད་ཡོད། སྤྱི་ཚོགས་ཀྱི་སྤྱི་དམངས་ཀྱིས་དྲ་རྒྱའི་ལས་སྟེགས་སུ་འཛུལ་ནས“མཐེབ་གཅིག”བསྣན་ཏེ“དྲ་ཐོག”ནས་འགན་འཁྲི་གཙང་སྒྲུབ་བྱེད་ཆོག་གི་ཡོད།

གསར་འགོད་པས་ཤེས་རྟོགས་བྱས་པར་གཞིགས་ན། 2024ལོར་མཚོ་སྔོན་གྱིས་འོས་འགན་ཤིང་འཛུགས་ལས་དོན་དེ“བྱང་གསུམ”སོགས་གཙོ་གནད་སྐྱེ་ཁམས་ལས་གྲྭ་འཛུགས་སྐྲུན་ནང་སྤྱི་འདོམས་ངང་བཅུག་སྟེ། གཞི་གཅིག་ཏུ་བཀོད་སྒྲིག་དང་དོན་འཁྱོལ་ལ་སྐུལ་འདེད་བཏང་ནས་བྱང་གསུམ་ལས་གྲྭའི་འགག་སྒྲོལ་དམག་འཐབ་ལ་འདེགས་སྐྱོར་དང་ཞབས་འདེགས་ཞུས་ཡོད། རྒྱལ་ཁབ་ཀྱི་ས་ཆ་སྔོ་འགྱུར་སྤྱི་ཆིང་ཁྲི་26.67ཡན་ལེགས་སྒྲུབ་བྱེད་པའི་འཆར་གཞི་ཡོད་པ་དང་དམངས་ཡོངས་ཀྱིས་འོས་འགན་ཤིང་འཛུགས་རིགས་བརྒྱད་ཀྱི་འགན་འཁྲི་གཙང་སྒྲུབ་རྣམ་པའི་འོས་འགན་ཤིང་འཛུགས་བྱས་པར་རིམ་རྩིས་བྱས་ན་སྡོང་རྐང་ཁྲི་1500ཡན་ཟིན་ཡོད།