ལྷོ་ཁར་དཔྱིད་ཀྱི་དཔལ་ཡོན་རབ་ཏུ་བཞད་ནས་མེ་ཏོག་རྣམ་པར་བཀྲ་བའི་དུས་ཚིགས་སུ། “སྦྲང་གསོ་བ”ཚོ་ལས་བྲེལ་གྱིས་ཁེངས། ཁོང་ཚོས་སྦྲང་གསོའི་བྱ་གཞག་ཆེད་དུ་དཀའ་སྤྱད་འབད་བརྩོན་བྱེད་བཞིན་མཆིས། ཁོང་ཚོ་ནི་ལྷོ་ཁའི་སྦྲང་ནོར་བུ་གསོ་མཁན་རེད།

སྦྲང་གསོའི་ལས་ལ་བརྟེན་ནས་སྦྲང་རྩིའི་ཐོན་ལས་སྐྱེད་སྲིང་བྱས་པ།

ལྷོ་ཁའི་སྦྲང་རྩིར་རྒུན་འབྲུམ་མངར་ཆ་དང་། ཤིང་ཏོག་མངར་ཆ། འཚོ་བཅུད་སྣ་ཚོགས། གཏེར་རྒྱུ་སོགས་འཚོ་བཅུད་ཀྱི་གྲུབ་ཆ་མང་པོ་འདུས་པས། རིམས་འགོག་གི་ནུས་པ་ཆེ་རུ་གཏོང་བ་དང་འཇུ་བྱེད་མ་ལག་ཡག་ཏུ་འགྲོ་བ་སོགས་ཀྱི་ལུས་ཁམས་བདེ་སྲུང་གི་ནུས་པ་ཆེན་པོ་ཡོད། ཉེ་བའི་ལོ་ཤས་རིང་། ལྷོ་ཁ་གྲོང་ཁྱེར་གྱི་སྦྲང་གསོའི་ལས་རིཊ་འཕེལ་རྒྱས་མགྱོགས་མྱུར་འགྲོ་བའི་རྫོགས་ལྡན་དུས་སུ་སླེབས་པ་དང་བོད་ལྗོངས་ཡེ་པན་ཧྥུང་ཧྲེང་རིག་གནས་ཡུལ་སྐོར་འཕེལ་རྒྱས་ཚད་ཡོད་ཀུང་སི(གཤམ་དུ“ཡེ་པན་ཧྥུང་ཧྲེང་ཀུང་སི”ཞེས་བསྡུ་རྒྱུ)འཛུགས་མཁན་ཀྲང་ལེང་ཧྥུའུ་ནི་བྱ་གཞག་དེའི་ཕུལ་བྱུང་མི་སྣ་ཞིག་རེད། ཁོང་གིས་ལྷོ་ཁའི་སྦྲང་གསོའི་ལས་རིགས་ལ་མངོན་མེད་སྟོབས་ཤུགས་ཆེན་པོ་ལྡན་པ་མཐོང་སྐབས་གོ་སྐབས་དམ་འཛིན་གྱིས་ལྷོ་ཁའི་སྦྲང་རྩི་རྒྱལ་ཡོངས་ས་གནས་ཁག་ཏུ་ཁྱབ་གདལ་བཏང་བ་རེད། ལྷོ་ཁའི་སྐད་གྲགས་ཆོད་པའི་སྦྲང་རྩིའི་ཐོན་རྫས་ཐོན་སྐྱེད་བྱེད་མཁན་ཁེ་ལས་ཤིག་ཡིན་པའི་ཡེ་པན་ཧྥུང་ཧྲེང་ཀུང་སིའི་ཁོངས་སུ་གཏོགས་པའི་ལྷོ་ཁའི་སྦྲང་རྩིར་འཛད་སྤྱོད་པའི་ཁས་ལེན་ཐོབ་ནས་ཅིང་ཏུང་དང་ཐའོ་པའོ་སོགས་དྲ་ཐོག་ཚོང་དོན་ལས་སྟེགས་ཆེ་གྲས་སུ་བྲིན་ཁ་ཤིན་ཏུ་རྒྱུག

སྦྲང་རྩིའི་བྱ་གཞག་གིས་གྲོང་གསེབ་དར་རྒྱས་ལ་རམ་འདེགས་བྱས་པ།

2012ལོ་ནས་བཟུང་། ས་གནས་དེ་གའི་སྲིད་གཞུང་གི་རོགས་སྐྱོར་འོག ལྷོ་ཁའི་སྦྲང་གསོའི་ལས་རིགས་འཕེལ་རྒྱས་མྱུར་པོ་ཕྱིན་ཡོད། སྲིད་གཞུང་གིས་གཟིགས་སྐྱོང་སྲིད་ཇུས་རབ་དང་རིམ་པ་བཏོན་ནས་ཞིང་པར་སྦྲང་གསོའི་ལས་རིགས་འཕེལ་རྒྱས་དང་སྦྲང་གསོའི་ལག་རྩལ་དང་དོ་དམ་ཆུ་ཚད་མཐོར་གཏོང་ཐད་སྐུལ་ལྕག་ནུས་ལྡན་བཏང་ཡོད། དེ་དང་ཆབས་ཅིག ཁེ་ལས་ཀྱིས་ཀྱང་མ་དངུལ་དང་ལག་རྩལ་སྟོབས་ཤུགས་ལ་བརྟེན་ནས་རྒྱབ་སྐྱོར་བྱས་ཏེ། ལྷོ་ཁའི་སྦྲང་རྩིའི་ཐོན་ལས་ཕྱོགས་སྒྱུར་རིམ་སྤོར་ལ་སྐུལ་འདེད་བཏང་ཡོད། དེའི་ནང་2015ལོར་བཙུགས་པའི་ཡེ་པན་ཧྥུང་ཧྲེང་ནི་དཔེ་མཚོན་ཞིག་རེད།

2018ལོར་ཡེ་པན་ཧྥུང་ཧྲེང་ཀུང་སི་གདན་ཞུས་ཐོབ་པའི་ཀྲུང་གོའི་ཁེ་ལས་འབའ་ཞིག་གི་ངོས་ནས“འཇར་མན་དུ་འཚོགས་པའི་ཆེད་ལས་སྦྲང་ནོར་བུ་གསོ་མཁན་འདུ་ཚོགས་སྐབས་48པའི”ཐོག་གཏམ་བཤད་སྤེལ་ཡོད། 2021ལོར་ལྷོ་ཁའི་སྦྲང་རྩི་ལྗོངས་ཡོངས་སུ་ཕྱིར་ཚོང་བྱེད་འགོ་ཚུགས་པ་དང་ལོ་དེ་རང་དུ་ཡེ་པན་ཧྥུང་ཧྲེང་ཀུང་སིས་སྦྲང་སྒམ་5000ལྷག་ཙམ་གསོ་ཚགས་བྱས་པས་ས་གནས་དེ་གའི་མང་ཚོགས་དུད་ཚང་4600ལྷག་ཙམ་ཕྱུག་འགྱུར་ལམ་བུར་སྐྱོད་པར་སྐུལ་ཁྲིད་བྱས་ཡོད།

2023ལོར་ཡེ་པན་ཧྥུང་ཧྲེང་ཀུང་སིས་ལྷོ་ཁ་གྲོང་ཁྱེར་གྱི་རྫོང་ཆུས་7(སྣེ་གདོང་ཆུས་དང་། མཚོ་སྣ་གྲོང་ཁྱེར། མཚོ་སྨད་རྫོང་། སྣ་དཀར་རྩེ་རྫོང་། འཕྱོངས་རྒྱས་རྫོང་། ཟངས་རི་རྫོང་། གྲ་ནང་རྫོང་བཅས)དང་གཞིས་རྩེ་གྲོང་ཁྱེར་གྱི་ལྷ་རྩེ་རྫོང་། ལྷ་ས་གྲོང་ཁྱེར་གྱི་སྟོད་ལུང་བདེ་ཆེན་ཆུས་བདེ་ཆེན་གྲོང་རྡལ(ཚོད་ལྟ)བཅས་ཀྱི་མང་ཚོགས་དུད་ཚང་4791ལ་སྐུལ་ཁྲིད་བྱས་པར་དུད་ཚང་རེར་ཆ་སྙོམས་འབབ་འཕར་སྒོར་1265.82བྱུང་བ་དང་། སྦྲང་ནོར་བུ་གསོ་ཚགས་བྱེད་མཁན་དམའ་རིམ་ལག་རྩལ་པ་52དང་། མཐོ་རིམ་ལག་རྩལ་པ་28 དམིགས་བསལ་ལག་རྩལ་པ་2བཅས་གསོ་སྐྱོང་བྱས་པ་རེད།

“བོད་ཀྱི་རི་སྐྱེས་མེ་ཏོག་གི་སྦྲང་རྩིའི་ཕ་ཡུལ”མཉམ་དུ་བསྐྲུན་པ།

ལྷོ་ཁ་གྲོང་ཁྱེར་སྣེ་གདོང་ཆུས་ལ་ཐུན་མོང་མ་ཡིན་པའི་ཐོན་ཁུངས་ཕུན་སུམ་ཚོགས་པོ་ཡོད་པ་དང་ཐོན་ལས་ཀྱི་རྨང་གཞི་བཟང་པོར་བརྟེན་ནས། 2024ལོའི་ཟླ་5ཚེས་20ཉིན། ཀྲུང་གོའི་སྦྲང་རྩིའི་ཐོན་རྫས་མཐུན་ཚོགས་དང་སྣེ་གདོང་ཆུས་མི་དམངས་སྲིད་གཞུང་དབར“བོད་ཀྱི་རི་སྐྱེས་མེ་ཏོག་གི་སྦྲང་རྩིའི་ཕ་ཡུལ”གྱི་མཉམ་ལས་གྲོས་མཐུན་ལ་མིང་རྟགས་བཀོད་པ་རེད། ཕྱོགས་གཉིས་པོས་རྟེན་གཞི་འཛུགས་སྐྲུན་དང་། ལག་རྩལ་ཞབས་ཞུ། ཚད་གཞི་གཏན་འབེབས། སྤུས་ཚད་ཚོད་འཛིན། སྤུས་རྟགས་ཁྱབ་གདལ་སོགས་ཐད་ཀྱི་མཉམ་ལས་ལ་ཤུགས་སྣོན་བརྒྱབ་སྟེ། རི་སྐྱེས་མེ་ཏོག་གི་སྦྲང་རྩིའི་ཐོན་ལས་ལྷོ་ཁ་གྲོང་ཁྱེར་གྱི་ཞིང་ལས་ཐོན་ལས་ཀྱི་གྲུབ་ཆ་ལེགས་སྒྲིག་དང་། གྲོང་གསེབ་ཀྱི་དཔལ་འབྱོར་འཕེལ་རྒྱས། གྲོང་གསེབ་དར་རྒྱས་ལ་སྐུལ་འདེད་གཏོང་བ་བཅས་ཀྱི་དམ་འཛིན་བྱ་གཞི་གལ་ཆེན་ཞིག་ཏུ་བརྩིས་ནས་ལྷོ་ཁའི་རི་སྐྱེས་མེ་ཏོག་གི་སྦྲང་རྩིའི་སྤུས་རྟགས་མཉམ་དུ་གཏོད་རྒྱུ་རེད།

སྦྲང་རྩིའི་ཐོན་ལས་ལྷོ་ཁའི་གྲོང་གསེབ་དར་རྒྱས་དང་མང་ཚོགས་འབབ་འཕར་ཡོང་བའི་ཐབས་ལམ་གལ་ཆེན་ཞིག་ཏུ་གྱུར་ཡོད། ཤེས་རྟོགས་བྱུང་བར་གཞིགས་ན། མིག་སྔར། ལྷོ་ཁ་གྲོང་ཁྱེར་གྱི་སྦྲང་ནོར་བུའི་གྲངས་འབོར་གྱིས་ལྗོངས་ཡོངས་ཀྱི་70%ལྷག་ཙམ་ཟིན་ནས་ཐོན་སྐྱེད་དང་ཕྱིར་ཚོང་གཞི་གཅིག་ཅན་གྱི་ཐོན་ལས་འཁོར་འབྲེལ་ཞིག་ཆགས་ཏེ། སྤུས་ལེགས་སྦྲང་རྩིའི་ལོའི་ཐོན་འབོར་ཏུན་300ལྷག་ཙམ་ཟིན་པ་དང་ཐོན་རྫས་རིན་ཐང་སྒོར་དུང་ཕྱུར་1ལྷག་ཙམ་ཟིན་ནས་མི་ཁྲི་1.8ལྷག་ཙམ་གྱི་འབབ་འཕར་ལ་སྐུལ་ཁྲིད་ཐུབ་སྟེ་སྦྲང་གསོའི་ལས་རིགས་དང་། སྐྱེ་ཁམས། ཚན་རྩལ་བཅས་མཉམ་འདྲེས་ཀྱི་དམངས་ཕྱུག་ལམ་བུར་བསྐྱོད་ཡོད།