“ཧྲང་ཧའེ་མཉམ་ལས་རྩ་འཛུགས་ཀྱི་རྒྱལ་ཁབ་དབར་མཉམ་ལས་ དེ་བས་ཟབ་ཏུ་འགྲོ་བར་སྐུལ་འདེད་གཏོང་དགོས”
“ཧྲང་ཧའེ་མཉམ་ལས་རྩ་འཛུགས་དེ་ས་ཁུལ་གྱི་ཞི་བདེ་བརྟན་ལྷིང་དང་དར་རྒྱས་གོང་འཕེལ་ལ་སྐུལ་འདེད་གཏོང་བའི་སྟོབས་ཤུགས་གལ་ཆེན་ཞིག་ཏུ་འགྱུར་བཞིན་ཡོད” ཉེ་ཆར། ཕ་ཁི་སི་ཐན་གྱི་དབྱི་སི་ལམ་པོའི་ཞི་བདེ་དང་ཕྱི་འབྲེལ་ཞིབ་འཇུག་སུའོ་ཡི་ཀྲུའུ་རེན་མུའུ་ཧན་མོ་ཏེ·ཨ་ཤིས་ཧྥུའུ·ནུར་གྱིས་འདི་ག་ཚགས་པར་གྱི་གསར་འགོད་པའི་བཅར་འདྲི་དང་ལེན་བྱེད་སྐབས། ཧྲང་ཧའེ་མཉམ་ལས་རྩ་འཛུགས་ཀྱི་ཨ་སི་ཐ་ན་དབུ་ཚོགས་ཐོག་ཕྱོགས་ཁག་གིས་ས་ཁུལ་གྱི་བདེ་འཇགས་བརྟན་ལྷིང་སྲུང་སྐྱོང་དང་། རྨང་གཞིའི་སྒྲིག་བཀོད་ཕན་ཚུན་སྦྲེལ་མཐུད་ལ་སྐུལ་འདེད། དཔལ་འབྱོར་ཚོང་དོན་མཉམ་ལས་ལ་ཤུགས་སྣོན་སོགས་ཁྱབ་ཁོངས་མང་པོའི་གྲོས་གཞིར་གྲོས་བསྡུར་བྱས་ནས་དེ་བས་མཛེས་སྡུག་ལྡན་པའི་ཧྲང་ཧའེ་མཉམ་ལས་རྩ་འཛུགས་ཀྱི་ཁྱིམ་གཞིས་ཐུན་མོང་ཐོག་སྐྲུན་ཆེད་སྒུལ་ཤུགས་གསར་པ་བསྣན་ཡོད་ཅེས་བརྗོད་པ་རེད།
“མིག་སྔར་རྒྱལ་སྤྱིའི་དུས་བབ་ཡོ་ལང་ཟང་ཟིང་ཆེ་བ་དང་གོ་ལ་ཧྲིལ་པོར་འགྲན་སློང་མང་པོ་འཕྲད་ནས་ཧྲང་ཧའེ་མཉམ་ལས་རྩ་འཛུགས་ཀྱི་གལ་ཆེའི་རང་བཞིན་སྔར་བས་མངོན་གསལ་དོད་དུ་སོང་ཡོད”ནུར་གྱིས་ས་ཁོངས་རང་བཞིན་གྱི་ཕྱོགས་མང་མཉམ་ལས་ཀྱི་ལས་སྟེགས་ཤིག་ཡིན་པའི་ཧྲང་ཧའེ་མཉམ་ལས་རྩ་འཛུགས་ཀྱིས་བདེ་འཇགས་ཀྱི་ཉེན་ཁ་དང་འགྲན་སློང་ལ་ཁ་གཏད་གཅོག་པའི་ལམ་སྲོལ་འཐུས་སྒོ་ཚང་དུ་བཏང་བ་དང“ངན་ཤུགས་གསུམ”ལ་རྡུང་རྡེག་ཚ་ནན་བཏང་བ་དེས་ས་ཁུལ་གྱི་ཞི་བདེ་དང་། བདེ་འཇགས། བརྟན་ལྷིང་བཅས་སྲུང་སྐྱོང་ཡག་པོ་བྱེད་པར་ཕན་ཐོགས་ཡོད་པ་མ་ཟད། ས་ཁུལ་དང་རྒྱལ་ཁབ་ཀྱིས་དཔལ་འབྱོར་ཚོང་དོན་མཉམ་ལས་བྱེད་པ་སོགས་ལ་ཡང་རྨང་གཞི་བརྟན་པོ་ཞིག་བཏིང་ཡོད་ཅེས་བརྗོད། ནུར་གྱིས་ཉེ་བའི་ལོ་ཤས་རིང་། ཀྲུང་གོ་དང་ཡོ་རོབ་དབར་གྱི་དུས་གཏན་མེ་འཁོར་གཏོང་ཐེངས་རྒྱུན་ཆད་མེད་པར་མང་དུ་ཕྱིན་པ་དང་ཆབས་ཅིག ཨེ་ཤེ་ཡ་དབུས་མའི་ས་ཁུལ་དེ་དག་ཨེ་ཤེ་ཡ་དང་ཡོ་རོབ་སྐམ་ས་ཆེ་མོའི་ཚོང་དོན་བགྲོད་ལམ་གལ་ཆེན་ལ་རིམ་བཞིན་གྱུར་ཡོད། “ཀྲུང་གོ་དང་ཨེ་ཤེ་ཡ་དབུས་མའི་དབར་ཕན་ཚུན་སྦྲེལ་མཐུད་བྱེད་པའི་འཐབ་ཇུས་རང་བཞིན་གྱི་རྣམ་གྲངས་ཤིག་ཡིན་པའི་ངོས་ནས་ཀྲུང་གོ་དང་། ཁེར་གྷི་སི་ཐན། ཨུ་ཟ་བྷེ་ཁི་སི་ཐན་བཅས་དབར་གྱི་ལྕགས་ལམ་མགྱོགས་མྱུར་བསྐྲུན་ནས་རྒྱལ་ཁབ་གསུམ་པོ་དང་རྒྱལ་ཁབ་གསུམ་པོའི་མི་དམངས་ལ་ཕན་པ་འདོགས་རྒྱུ་མ་ཟད། ས་ཁུལ་གྱི་དཔལ་འབྱོར་དང་སྤྱི་ཚོགས་འཕེལ་རྒྱས་ལ་རམ་འདེགས་ཀྱང་བྱ་རྒྱུ་རེད”ཅེས་བརྗོད་པ་དང་། ཁོང་གིས་ཧྲང་ཧའེ་མཉམ་ལས་རྩ་འཛུགས་ཀྱི་རྒྱལ་ཁབ་དབར་གྱི་མཉམ་ལས་རྣམ་གྲངས་གལ་ཆེན་ཞིག་ཡིན་པའི་ཀྲུང་གོ་དང་། ཁེར་གྷི་སི་ཐན། ཨུ་ཟ་བྷེ་ཁི་སི་ཐན་བཅས་དབར་གྱི་ལྕགས་ལམ་གྱིས་ས་ཁུལ་དང་རྒྱལ་ཁབ་ཀྱི་ཁྲོམ་ར་དང་ཐོན་ཁུངས་སོགས་དེ་བས་ལེགས་པའི་ངང་སྦྲེལ་མཐུད་བྱས་ཏེ། མི་སྣ་དང་དངོས་ཟོག་འཁོར་རྒྱུག་བྱེད་པར་གོ་སྐབས་གསར་པ་བཏོད་ནས། ཨེ་ཤེ་ཡ་དང་ཡོ་རོབ་སྐམ་ས་ཆེ་མོའི་དཔལ་འབྱོར་ཚོང་དོན་མཉམ་ལས་དང་འཕེལ་རྒྱས་ལ་སྔར་བས་སྐུལ་འདེད་གཏོང་རྒྱུ་ཡིན་པའི་ངོས་འཛིན་བྱས་པ་རེད།
ཉེ་བའི་ལོ་ཤས་རིང་། ཧྲང་ཧའེ་མཉམ་ལས་རྩ་འཛུགས་ཀྱི་ཁོངས་མིའི་རྒྱལ་ཁབ་ཀྱིས་མི་ཆོས་རིག་གནས་སྤེལ་རེས་ལ་སྐུལ་འདེད་ཧུར་ཐག་བཏང་ནས་དམངས་སེམས་གཅིག་སྒྲིལ་ཡོང་བར་སྐུལ་འདེད་བཏང་ཡོད། ནུར་གྱིས་མི་ཆོས་རིག་གནས་ཁྱབ་ཁོངས་ཀྱི་སྤེལ་རེས་མཉམ་ལས་ཀྱིས་ས་ཁུལ་གྱི་ཞི་བདེ་དང་འཕེལ་རྒྱས་ལ་གཞན་གྱིས་ཚབ་བྱེད་ཐབས་བྲལ་བའི་ནུས་པ་ཐོན་ཡོད། ཀྲུང་གོས་གོ་ལ་ཧྲིལ་པོའི་ཤེས་དཔལ་གྱི་གྲོས་འགོ་བཏོན་ནས་ཧྲང་ཧའེ་མཉམ་ལས་རྩ་འཛུགས་ཀྱི་རྒྱལ་ཁབ་དབར་གྱི་མི་སྣ་འགྲོ་འོང་ལ་སྐུལ་འདེད་ཧུར་ཐག་བཏང་སྟེ་ཤེས་དཔལ་མི་འདྲ་བ་ཕན་ཚུན་སློབ་སྦྱོང་དང་དཔྱད་གཞིར་འཛིན་པ་དང་། ཐུན་མོང་འཕེལ་རྒྱས། མཉམ་ལས་གཉིས་ཕན་བཅས་ཡོང་བར་སྐུལ་འདེད་བཏང་ཡོད་ཅེས་བརྗོད་པ་རེད།
“ཧྲང་ཧའེ་མཉམ་ལས་རྩ་འཛུགས་ཀྱིས་རྒྱལ་སྤྱིའི་འབྲེལ་བ་གསར་པ་དང་ས་ཁོངས་མཉམ་ལས་གསར་པའི་དཔེ་མཚོན་བཙུགས་ནས་འཕེལ་རྒྱས་ཀྱི་མི་མངོན་པའི་སྟོབས་ཤུགས་ཧ་ཅང་ཆེན་པོ་ཡོད”ནུར་གྱིས་ཧྲང་ཧའེ་མཉམ་ལས་རྩ་འཛུགས་ཀྱིས་ཕན་ཚུན་ཡིད་ཆེས་དང་། གཉིས་ཕན། འདྲ་མཉམ། གྲོས་མོལ། སྣ་མང་ཤེས་དཔལ་ལ་བརྩི་འཇོག ཐུན་མོང་འཕེལ་རྒྱས་དོན་གཉེར་བཅས་ཀྱི“ཧྲང་ཧའེ་ཡི་སྙིང་སྟོབས”རྒྱུན་འཁྱོངས་བྱས་ནས། ས་ཁུལ་གྱི་བདེ་འཇགས་བརྟན་ལྷིང་དང་དར་རྒྱས་གོང་འཕེལ་ལ་སྐུལ་འདེད་བཏང་སྟེ། འཛམ་གླིང་ཡུན་རིང་ཞི་བདེ་དང་འཕེལ་རྒྱས་ལ་གཏན་འཁེལ་རང་བཞིན་དང་དྲང་ནུས་དེ་བས་མང་བ་བསྣན་རྒྱུ་རེད་ཅེས་བརྗོད།