ཕྱི་འབྲེལ་པུས་བསྟན་དོན།
དབྱི་རན་གྱི་སྲིད་གཞུང་གསར་པ་དང་མཉམ་དུ་ཀྲུང་གོ་དང་དབྱི་རན་གྱི་འབྲེལ་བ་བརྟན་བགྲོད་རྒྱང་འཁྱོལ་ཡོང་བར་སྐུལ་འདེད་གཏོང་འདོད་ཡོད།
ཤིན་ཧྭ་གསར་འགྱུར་ཁང་པེ་ཅིང་ནས་གློག་འཕྲིན་འབྱོར་གསལ། ཉེ་ཆར། དབྱི་རན་གྱི་ཙུང་ཐུང་ལ་བདམས་ཐོན་བྱུང་བའི་ཕེ་ཙེ་ཞི་ཆི་དབྱང་གིས་རྩོམ་ཡིག་སྤེལ་ནས་དབྱི་རན་ཕྱོགས་ཀྱིས་དབྱི་རན་དང་ཀྲུང་གོའི་དབར་གྱི་སྲོལ་རྒྱུན་མཛའ་གྲོགས་ལ་གཙིགས་ཆེན་བྱེད་ཀྱི་ཡོད་ཅེས་བརྗོད་པ་དང་། ཚེས་15ཉིན། ཕྱི་འབྲེལ་པུའི་མགྲིན་ཚབ་པ་ལིན་ཅན་གྱིས། ཀྲུང་གོ་ཕྱོགས་ཀྱིས་དབྱི་རན་གྱི་སྲིད་གཞུང་གསར་པ་དང་མཉམ་དུ་འབད་བརྩོན་བྱས་ཏེ་ཀྲུང་གོ་དང་དབྱི་རན་གྱི་ཕྱོགས་ཡོངས་ཀྱི་འཐབ་ཇུས་རོགས་ཟླའི་འབྲེལ་བ་བརྟན་བགྲོད་རྒྱང་འཁྱོལ་ཡོང་བར་སྐུལ་འདེད་གཏོང་འདོད་ཡོད་ཅེས་བརྗོད།
ཉིན་དེའི་གསར་འགོད་པའི་འཆར་ཅན་ཚོགས་འདུར་གསར་འགོད་པ་ཞིག་གིས། ཉེ་ཆར། དབྱི་རན་གྱི་ཙུང་ཐུང་ལ་བདམས་ཐོན་བྱུང་བའི་ཕེ་ཙེ་ཞི་ཆི་དབྱང་གིས《ཐེ་ཧེ་རན་གྱི་སྐབས་དོན་གསར་འགྱུར》ཐོག་མཚན་བཀོད་རྩོམ་ཡིག་སྤེལ་ནས་ཕྱི་འབྲེལ་སྲིད་ཇུས་རྒྱས་བཤད་བྱས་ཏེ་དབྱི་རན་ཕྱོགས་ཀྱིས་དབྱི་རན་དང་ཀྲུང་གོའི་དབར་གྱི་སྲོལ་རྒྱུན་མཛའ་གྲོགས་ལ་གཙིགས་ཆེན་བྱེད་ལུགས་བསྟན་པ་མ་ཟད། དབྱི་རན་དང་སོ་ཏི་ཨ་རབ་ཀྱི་འབྲེལ་བ་རྒྱུན་གཏན་ཅན་དུ་འགྱུར་བར་སྐུལ་འདེད་གཏོང་བའི་བརྒྱུད་རིམ་ཁྲོད་ཀྲུང་གོས་ནུས་པ་གལ་ཆེན་བཏོན་པར་བསྔགས་བརྗོད་བྱས་ཡོད། ཀྲུང་གོ་ཕྱོགས་ཀྱིས་དེའི་ཐད་དཔྱད་གཏམ་གང་ཞིག་སྤེལ་རྩིས་ཡོད་དམ་ཞེས་དྲིས།
“ཀྲུང་གོ་ཕྱོགས་ཀྱིས་ཙུང་ཐུང་ཕེ་ཙེ་ཞི་ཆི་དབྱང་གིས་ཀྲུང་གོ་དང་དབྱི་རན་དབར་གྱི་འབྲེལ་བའི་སྐོར་ལ་རྣམ་འགྱུར་མཚོན་པའི་གཏམ་བཤད་གནང་བར་བསྔགས་བརྗོད་བྱེད་ཀྱི་ཡིན”ཞེས་ལིན་ཅན་གྱིས་བརྗོད་པ་དང་། ཁོང་གིས་ཀྲུང་གོ་དང་དབྱི་རན་དབར་གྱི་མཛའ་གྲོགས་འགྲོ་འོང་ལ་ལོ་རྒྱུས་ཡུན་རིང་ལྡན་པ་དང་། ཕྱི་འབྲེལ་བཙུགས་ནས་དུས་རབས་ཕྱེད་ཙམ་སོང་ཚུན། ཕྱོགས་གཉིས་པོའི་འབྲེལ་བ་སྐྱོན་བྲལ་དང་བརྟན་པོའི་ངང་འཕེལ་རྒྱས་རྒྱུན་འཁྱོངས་ཐུབ་ཡོད་ཅེས་བརྗོད།
ལིན་ཅན་གྱིས། སྣ་མང་རྙོག་འཛིང་ཆེ་བའི་ས་ཁུལ་དང་རྒྱལ་སྤྱིའི་དུས་བབ་ཀྱི་མདུན་དུ་ཀྲུང་གོ་དང་དབྱི་རན་གྱིས་ཐོག་མཐའ་བར་གསུམ་དུ་ཕན་ཚུན་རྒྱབ་སྐྱོར་དང་ཕྱར་བ་གྲུ་འདེགས་བྱས་ཏེ་འཐབ་ཇུས་ཐད་ཕན་ཚུན་ཡིད་ཆེས་བྱེད་ཤུགས་ཟམ་མི་ཆད་པར་ཆེ་རུ་བཏང་ནས་ཁྱབ་ཁོངས་ཁག་གི་སྤེལ་རེས་མཉམ་ལས་ལ་སྐུལ་འདེད་བརྟན་པོ་བཏང་བ་དང་སྦྲགས། ས་ཁུལ་དང་རྒྱལ་སྤྱིའི་ལས་དོན་ཐད་འབྲེལ་གཏུག་མཐུན་སྦྱོར་ཡག་པོ་རྒྱུན་འཁྱོངས་བྱས་ནས་ཀྲུང་གོ་དང་དབྱི་རན་གྱི་མི་དམངས་ལ་བདེ་སྐྱིད་བསྐྲུན་པ་མ་ཟད། ས་ཁུལ་དང་འཛམ་གླིང་ཞི་བདེ་བརྟན་ལྷིང་ཡོང་བར་སྐུལ་འདེད་གཏོང་ཆེད་དགེ་མཚན་ལྡན་པའི་ལེགས་སྐྱེས་ཀྱང་ཕུལ་ཡོད། “ཀྲུང་གོ་ཕྱོགས་ཀྱིས་ཀྲུང་གོ་དང་དབྱི་རན་དབར་གྱི་འབྲེལ་བ་འཕེལ་རྒྱས་འགྲོ་བར་མཐོང་ཆེན་པོ་བྱས་ནས་དབྱི་རན་གྱི་སྲིད་གཞུང་གསར་པ་དང་མཉམ་དུ་འབད་བརྩོན་བྱས་ཏེ་ཀྲུང་གོ་དང་དབྱི་རན་དབར་གྱི་ཕྱོགས་ཡོངས་ཀྱི་འཐབ་ཇུས་རོགས་ཟླའི་འབྲེལ་བ་བརྟན་བགྲོད་རྒྱང་འཁྱོལ་ཡོང་བར་སྐུལ་འདེད་གཏོང་འདོད་ཡོད”ཅེས་བརྗོད་པ་རེད།