“རང་རེའི་འགལ་ཟླ་དང་རྩོད་གཞི་འདུམ་འགྲིག་ལྟེ་གནས་ཀྱི་ལས་དོན་པར་ཐུགས་རྗེ་ཆེ་ཞུ་རྒྱུ་ཡིན། ང་ཚོས་གཏུག་བཤེར་དང་ཡར་རྒྱུག་མར་རྒྱུག་བྱེད་མི་དགོས་པར་ཀུང་སིས་འགྱངས་ཆད་བྱས་པའི་ང་ཚོའི་གླ་ཆ་ལེན་ཐུབ་སོང”ཞེས་ད་ལོའི་ཟླ་2པའི་ཟླ་དཀྱིལ་དུ་ཕྱི་ནས་ཡོང་བའི་གླ་པ་རྒྱུག་མཁན་ཝང་ཆེ་གེ་མོ་ལྷ་ས་གྲོང་ཁྱེར་ཁྲེང་ཀོན་ཆུས་དོག་སྡེ་ཁྲོམ་གཞུང་གི“གཅིག་འཐུས་རྣམ་པའི”འགལ་ཟླ་དང་རྩོད་གཞི་འདུམ་འགྲིག་ལྟེ་གནས་སུ་ཡོང་ནས་ལས་དོན་པར་ཐུགས་རྗེ་ཆེ་ཞུས་པ་རེད།

ད་ལོའི་ཟླ་1ཚེས་24ཉིན་ཝང་ཆེ་མོ་དང་ལས་མི་འགའ་དོག་སྡེ་ཁྲོམ་གཞུང་གི“གཅིག་འཐུས་རྣམ་པའི”འགལ་ཟླ་དང་རྩོད་གཞི་འདུམ་འགྲིག་ལྟེ་གནས་སུ་ཡོང་ནས་སྙན་སེང་ཞུས་པ་ལྟར་ན། ཁོང་ཚོས་2021ལོའི་ཟླ་4པ་ནས་2023ལོའི་ཟླ་5པའི་བར་དོག་སྡེ་ཁྲོམ་གཞུང་གི་ཕྱི་རོལ་ལུས་རྩལ་རྟེན་གཞིར་མཛེས་བཟོ་དང་། ལམ་བུ་ཉམས་བཟོ། ལམ་སྒྲོན་བསྒར་བ་བཅས་ཀྱི་ལས་ཀ་བྱས། འོན་ཀྱང་ཀུང་སི་ག་གེ་མོས་ལས་མི་50ཡི་གླ་ཆ་སྒོར་786830འགྱངས་ཆད་བྱས་པར་བརྟེན། ལས་བཟོ་བ་ཚོས་ཀུང་སིའི་འགན་འཁུར་བ་ཐེངས་མང་བཙལ་རུང་འབྲས་བུ་མེད་པར་གྱུར། དོག་སྡེ་ཁྲོམ་གཞུང་གི“གཅིག་འཐུས་རྣམ་པའི”འགལ་ཟླ་དང་རྩོད་གཞི་འདུམ་འགྲིག་ལྟེ་གནས་ཀྱིས་འཕྲལ་མར་རྩོད་གཞི་དེར་བདག་སྤྲོད་བྱས་ཏེ“1+3+N”སྣ་མང་འདུམ་འགྲིག་བྱེད་སྟངས་སྤྱད་ནས“སྒྲོལ་མ་འདུམ་འགྲིག་ཁང”གི་འདུམ་འགྲིག་ཁོངས་མིར་འདུམ་འགྲིག་བྱེད་དུ་བཅུག་ཡོད། གྲོས་མོལ་དང་འདུམ་འགྲིག་བྱས་པ་བརྒྱུད། ཕྱོགས་གཉིས་དབར་ལམ་སེང་འདུམ་འགྲིག་བྱུང་སྟེ་ལས་མི་50ལ་གླ་ཆ་རག་པ་རེད།

ཉེ་བའི་ལོ་ཤས་རིང་། དོག་སྡེ་ཁྲོམ་གཞུང་གིས་དུས་རབས་གསར་པའི“ཧྥེང་ཆའོ་ཡི་ཉམས་མྱོང”མཐའ་འཁྱོངས་དང་འཕེལ་རྒྱས་བཏང་བ་དང་། རྒྱལ་ཡོངས་ཀྱི་དུས་རབས་གསར་པའི“ཧྥེང་ཆའོ་རྣམ་པའི་ཁྲིམས་འཛིན་སུའོ”དང་བོད་རང་སྐྱོང་ལྗོངས་རིམ་པའི“ཧྥེང་ཆའོ་རྣམ་པའི་ཁྲིམས་འཛིན་སུའོ”གཏོད་རྒྱུ་གོ་སྐབས་སུ་བྱས་ཏེ་ཕྱོགས་བསྡུས་བཅོས་སྐྱོང་ལྟེ་གནས་དང་། འགལ་ཟླ་དང་རྩོད་གཞི་འདུམ་འགྲིག་ལྟེ་གནས། དྲ་མིག་ཅན་གྱི་ཞབས་ཞུ་དོ་དམ་ལྟེ་གནས་སོགས་གཞི་གཅིག་ཅན་གྱི་ལས་སྟེགས་འཛུགས་སྐྱོང་ལ་སྐུལ་འདེད་ཧུར་ཐག་བཏང་ཞིང་། “1141”ལས་ཀ་བྱེད་སྟངས(“གཅིག་འཐུས་རྣམ་པའི”འགལ་ཟླ་དང་རྩོད་གཞི་འདུམ་འགྲིག་ལྟེ་གནས་ཀྱི་ལས་སྟེགས་1སྐྲུན་པ་དང་། སྣ་མང་འདུམ་འགྲིག་གཉེར་སྟངས་1ཁྱབ་གདལ་གཏོང་བ། འདུམ་འགྲིག་ཚོགས་པ་4འཛུགས་པ། མི་རིགས་ཀྱི་ཁྱད་ལྡན་འདུམ་འགྲིག་སྤུས་རྟགས་1གཏོད་པ)འཚོལ་ཞིབ་བྱས་ཏེ་འགལ་ཟླ་དང་རྩོད་གཞི་འབྱུང་རྩ་ནས་སྔོན་འགོག་དང་ཐོན་མ་ཐག་ནས་སེལ་བར་ཤུགས་སྣོན་བརྒྱབ་ནས་ཞི་མཐུན་བརྟན་ལྷིང་གི་སྤྱི་ཚོགས་ཁོར་ཡུག་ཅིག་བཏོད་ཡོད་པ་རེད།

དོག་སྡེ་ཁྲོམ་གཞུང་གི“གཅིག་འཐུས་རྣམ་པའི”འགལ་ཟླ་དང་རྩོད་གཞི་འདུམ་འགྲིག་ལྟེ་གནས་སུ་བསྐྱོད་པ་ན། དཀར་ཆ་དོད་ལ་བཀོད་པ་གཙང་བའི་གཞུང་ལས་ཁོར་ཡུག་ཉམས་དགའ་བ་དང་།“དམངས་དོན་འགྱང་མི་རུང་། དོན་ཀུན་ནན་ཏན་སྒྲུབ”ཅེས་པའི་སྦྱར་ཡིག་མངོན་གསལ་དོད་ཅིང་། བཅའ་ཁྲིམས་བློ་འདྲི་དང་། ཕྱོགས་བསྡུས་སྐར་ཁུང་། འགལ་ཟླ་དང་རྩོད་གཞི་བདག་སྤྲོད(ཡིག་འབུལ་ཞུ་བཅར་བདག་སྤྲོད)སོགས་ཞབས་ཞུའི་སྐར་ཁུང་བཙུགས་པ་མ་ཟད། འགལ་ཟླ་དང་རྩོད་གཞི་འདུམ་འགྲིག་ཁང་དང་། སེམས་ཁམས་བློ་འདྲི་ཁང་། བཅའ་ཁྲིམས་རོགས་སྐྱོར་ཁང་། གཅིག་སྡུད་སློབ་གསོ་ཁང་། ལྟ་སྐུལ་ཚོད་འཛིན་ཞིབ་གཅོད་ཁང་སོགས་ཚང་མ་ཡོད་ཅིང་། ལས་དོན་པས་བྲེལ་བརྩོན་ཆེ་ལ་གོ་རིམ་ལྡན་པའི་སྒོ་ནས་ལས་ཀ་སྒྲུབ་བཞིན་ཡོད་པ་རེད།

དོག་སྡེ་ཁྲོམ་གཞུང་ཏང་དོན་ཨུ་ལྷན་གྱི་ཧྲུའུ་ཅི་ལི་ཧྲི་ཁུན་གྱིས། དོག་སྡེ་ཁྲོམ་གཞུང་གི“གཅིག་འཐུས་རྣམ་པའི”འགལ་ཟླ་དང་རྩོད་གཞི་འདུམ་འགྲིག་ལྟེ་གནས་ན་ནིང་གི་ཟླ་11པར་དངོས་སུ་གཉེར་སྐྱོང་བྱས་པ་དང་། ཕྱོགས་ཁག་གི་སྟོབས་ཤུགས་མཐུན་སྦྱོར་བྱས་ནས“1+3+N”སྣ་མང་འདུམ་འགྲིག་བྱེད་སྟངས་འཚོལ་ཞིབ་བྱས་པ་མ་ཟད། འགལ་ཟླ་དང་རྩོད་གཞི་འདུམ་འགྲིག་ལྟེ་གནས་ཀྱིས་གཙོ་ཁྲིད་དང་། གྲོང་ཚོ་ཁག་གི་འདུམ་འགྲིག་ཨུ་ལྷན་གྱིས་རྨང་གཞི། དྲ་མིག་པ་ཁག་གིས་གཙོ་བོ་བཅས་བྱེད་པའི་འགལ་ཟླ་དང་རྩོད་གཞི་འདུམ་འགྲིག་ཐག་གཅོད་ཀྱི་དྲ་རྒྱ་ཆེན་པོ་བཟོས་པ་དང་། ཆེད་བསྐོས་མི་དམངས་འདུམ་འགྲིག་པ་7དང་། ཞོར་འགན་མི་དམངས་འདུམ་འགྲིག་པ་6 ཁྲོམ་གཞུང་དང་གྲོང་ཚོའི་བཅའ་ཁྲིམས་ཀྱི་བློ་འདྲི་བ་4 བཅའ་ཁྲིམས་གསལ་ཤེས་པ་13 འགལ་ཟླ་དང་རྩོད་གཞི་བདག་སྤྲོད་པ་3བཅས་བཀོད་སྒྲིག་བྱས་ནས་རེས་མོས་ལས་རེས་བྱས་ཤིང་། ཆེད་ལས་འདུམ་འགྲིག་ལས་དོན་ཁང་2ཆེད་དུ་བཀོད་སྒྲིག་བྱས་ནས་གཅིག་སྡུད་ལས་སྒྲུབ་དང་། ལེགས་བསྡུས་ཞིབ་གཉེར་དོ་དམ། འདུས་སྡོད་ཞབས་འདེགས་བཅས་ཞུ་བཅར་དུ་ཡོང་མཁན་མང་ཚོགས་ལ་བཅའ་ཁྲིམས་བློ་འདྲི་དང་། གོ་སྐོན་སློབ་གསོ། འགལ་ཟླ་སེལ་བ་སོགས་ཀྱི་ཞབས་འདེགས་ཞུས་པས། སྒོ་གཅིག་རང་ནས་དཀའ་ངལ་མང་པོ་ཐག་ཆོད་ཀྱི་ཡོད་ཅེས་ངོ་སྤྲོད་བྱས་པ་རེད།

དོག་སྡེ་ཁྲོམ་གཞུང་འོད་པ་གྲོང་ཚོའི་ཏང་ཀྲི་པུའི་རྩ་འཛུགས་ཨུ་ཡོན་ཟླ་བ་ཆོས་སྒྲོན་ནི་ཁྲོམ་གཞུང་ནས་རིམ་པ་རེ་རེ་བཞིན་བདམས་པ་བརྒྱུད་ཆེད་བསྐོས་འདུམ་འགྲིག་པ་ཞིག་ཏུ་གྱུར་པ་དང་། ཁོང་ནི་དོག་སྡེ་ཁྲོམ་གཞུང་གི“གཅིག་འཐུས་རྣམ་པའི”འགལ་ཟླ་དང་རྩོད་གཞི་འདུམ་འགྲིག་ལྟེ་གནས་ཀྱི་ཚོགས་པ་བཞིའི་ཁོངས་མི་ཞིག་རེད། “ཆེད་བསྐོས་འདུམ་འགྲིག་པར་གྱུར་པ་ནས་བཟུང་ངས་འགལ་ཟླ་དང་རྩོད་གཞི་ཁག་20འདུམ་འགྲིག་བྱས་པ་ཡིན”ཞེས་གཞོན་ནུ་མ་དེས་འཛུམ་དམུལ་དམུལ་ངང་གསར་འགོད་པར་བཤད།

ཟླ་བ་ཆོས་སྒྲོན་ལ་བག་ཆགས་ཟབ་ཤོས་ནི་ཡུལ་དེ་གའི་བཟའ་ཟླ་གཉིས་ཀྱིས་གླིང་ཁའི་ཚོང་ལ་མ་རྩ་མང་དུ་གཏོང་བའི་ཐད་འགལ་ཟླ་དང་རྩོད་གཞི་བྱུང་བར་འདུམ་འགྲིག་བྱས་པ་དེ་རེད། ཁྱོ་གས་རང་ཁྱིམ་གྱི་གླིང་ཁའི་ཚོང་ལས་ཀྱི་མདུན་ལམ་ཡག་པའི་རྐྱེན་གྱིས་མུ་མཐུད་མ་རྩ་སྒོར་ཁྲི་30བཏང་ནས་གཞི་ཁྱོན་ཆེ་རུ་གཏོང་རྒྱུ་བྱས། འོན་ཀྱང་བཟའ་ཟླས་མ་དངུལ་མང་དྲགས་ན་ཉེན་ཁ་ཡོད་པར་སེམས་ཁྲལ་བྱས་ནས་མོས་མཐུན་མ་བྱས་པས། འགལ་ཟླ་ཉིན་བཞིན་ཛ་དྲག་ཏུ་སོང་ནས་ཐ་ན་བཟའ་ཚང་ཁ་བྲལ་ལ་ཉེ་བའི་གནས་སུ་གྱར། ཟླ་བ་ཆོས་སྒྲོན་གྱིས་ཁོང་ཚོའི་ཁྱིམ་དུ་འདུམ་འགྲིག་བྱེད་པར་ཐེངས་མང་བསྐྱོད་དེ་བཟའ་ཚོ་གཉིས་ལ་ཁ་ཏ་ཡང་ཡང་བྱས་པ་རེད། ཁོང་གིས་འདུམ་འགྲིག་དང་ཁ་ཏ་བསླབ་བྱ་བྱས་མཐར་བཟའ་ཚོ་གཉིས་སླར་ཡང་འཆམ་ནས་མ་རྩ་སྒོར་ཁྲི་20བཏང་སྟེ་གླིང་ཁའི་ཚོང་ལས་ཀྱི་གཞི་ཁྱོན་ཆེ་རུ་གཏོང་རྒྱུའི་ཐག་བཅད་པ་རེད།

“འགལ་ཟླ་དང་རྩོད་གཞི་ཁག་གཅིག་ཧ་ཅང་རྙོག་འཛིང་ཆེ་བས། འདུམ་འགྲིག་བྱེད་ཁག་པོ་འདུག འོན་ཀྱང་འདུམ་འགྲིག་ཐུབ་ན་སེམས་པ་སྐྱིད་པོ་འདུག་ལ། ལས་ཀ་དེར་རིན་ཐང་ཆེན་པོ་ལྡན་པའི་སྣང་བའང་འདུག”ཅེས་ཟླ་བ་ཆོས་སྒྲོན་གྱིས་གསར་འགོད་པར་བཤད།

དོག་སྡེ་ཁྲོམ་གཞུང་གི“གཅིག་འཐུས་རྣམ་པའི”འགལ་ཟླ་དང་རྩོད་གཞི་འདུམ་འགྲིག་ལྟེ་གནས་བཙུགས་པ་ནས་བཟུང་། ཐོག་མཐའ་བར་གསུམ་དུ“དམངས་ཀྱི་རེ་འབོད་ལ་ང་ཡིས་བརྡ་ལན་ཞུ་བ”མཐའ་འཁྱོངས་བྱས་ནས་མང་ཚོགས་མི་ཐེངས་500ལྷག་ཙམ་ལ་སྣེ་ལེན་ཞུས་པ་དང་། འགལ་ཟླ་དང་རྩོད་གཞི་110ཐག་གཅོད་བྱས་པར་འདུམ་འགྲིག་ཐུབ་ཚད་99%ཟིན་ཞིང་། “དོན་ཆུང་དྲ་མིག་ནས་སྒྲུབ་ཐུབ་པ་དང་། དོན་ཆེན་ཁྲོམ་གཞུང་ནས་སྒྲུབ་ཐུབ་པ། འགལ་ཟླ་གོང་དུ་ཞུ་མི་དགོས་པ”བཅས་དངོས་འབྲེལ་ཐུབ་ནས་འཆམ་མཐུན་གྱི་ཉམས་བཟང་ཞིག་བཏོད་ཡོད་པ་རེད།