“འདི་ལོ་དབྱར་ཁ་སྒོ་རའི་ནང་དྲི་ངན་འཚུབ་ནས་སྡོད་དགོས་བྱུང་མ་སོང་། བ་ཚང་ཁེར་རྐྱང་དུ་བསྐྲུན་རྗེས་ཁྱིམ་དུ་ལོག་ཡོང་སྐབས་སྒོ་ར་གཙང་ལ་ཅ་དངོས་གྲལ་འགྲིག་པ་མཐོང་བ་ཙམ་གྱིས་སེམས་པ་དངོས་འབྲེལ་སྐྱིད་པོ་འདུག དེ་དག་ཚང་མ་ནི་ཏང་དང་སྲིད་གཞུང་གི་སྲིད་ཇུས་ཡག་པོའི་བཀའ་དྲིན་རེད། གྲོང་རྡལ་དང་གྲོང་ཚོས་གཅིག་གྱུར་ཐོག་བ་ཚང་དང་རྒྱལ་སྒོ་གསར་པ་བསྐྲུན་པར་ཐུགས་རྗེ་ཆེ་ཞུ་རྒྱུ་ཡིན”ཞེས་ལྷ་ས་གྲོང་ཁྱེར་སྟོད་ལུང་བདེ་ཆེན་ཆུས་བདེ་ཆེན་གྲོང་རྡལ་ངང་དཀར་གྲོང་ཚོའི་ཡུལ་མི་བཀྲ་ཤིས་རྒྱལ་མོས་བཤད།

བཀྲ་ཤིས་རྒྱལ་མོའི་ཁྱིམ་གྱིས་བ་གླང་མགོ་གྲངས་11གསོས་ཡོད། ལོ་ལྟར་དབྱར་ཁ་ཤར་རྗེས་བ་ཚང་ནང་ནས་དྲི་ངན་འཐུལ་ཞིང་། ཡུད་ཙམ་སོང་རྗེས་དྲི་ངན་སྒོ་ར་ཡོངས་སུ་ཁྱབ། དགུན་ཁར་ཁྱིམ་དུ་བ་ཕྱུགས་མང་བ་དང་བ་ཚང་ཆུང་བས་བ་གླང་དུས་གཅིག་ཏུ་11མི་ཤོང་བར་བརྟེན་བཀྲ་ཤིས་རྒྱལ་མོའི་ཁྱིམ་ལ་མི་ཕྱུགས་མཉམ་དུ་སྡོད་དགོས་བྱུང་ཡོད།

མི་ཕྱུགས་མཉམ་སྡོད་ཀྱི་གནད་དོན་ནི་གྲོང་གསེབ་ཀྱི་སྡོད་མལ་ཁོར་ཡུག་ལེགས་སུ་གཏོང་བའི་གནད་འགག་ཅིག་རེད། ཉིན་ཤས་བསྟུད་མར་བདེ་ཆེན་གྲོང་རྡལ་གྱིས་མི་ཕྱུགས་ལོགས་དབྱེའི་ལས་དོན་དེ། གྲོང་གསེབ་འཛུགས་སྐྲུན་ལས་དོན་དང་ཟུང་འབྲེལ་དམ་ཟབ་ཀྱིས་མི་ཕྱུགས་ལོགས་དབྱེའི་རྣམ་གྲངས་ལག་ལེན་ཤུགས་ཆེན་བསྟར་ཏེ། ཞིང་འབྲོག་ཁུལ་གྱི་སྡོད་མལ་ཁོར་ཡུག་ལེགས་སུ་གཏོང་བ་དང་། ཞིང་འབྲོག་པའི་འཚོ་བའི་སྤུས་ཚད་ལེགས་སུ་གཏོང་བ། ནད་ཡམས་འགོ་ཉེན་ཆུང་དུ་གཏོང་བ། མི་ཕྱུགས་ལོགས་དབྱེའི་ལས་དོན་ལ་ནུས་ཤུགས་ཡོད་རྒུས་སྐུལ་འདེད་གཏོང་བ་བཅས་ལ་བརྟེན་ནས་གྲོང་གསེབ་ལྟ་ན་སྡུག་པ་ཞིག་ཡོང་ཆེད་རྨང་གཞི་བརྟན་པོ་བཏིང་ཡོད།

མི་ཕྱུགས་ལོགས་དབྱེའི་ལས་དོན་དོན་ཐོག་ཏུ་འཁྱོལ་ཐུབ་པའི་འགན་ལེན་བྱ་ཆེད། བདེ་ཆེན་གྲོང་རྡལ་གྱིས་སྟོད་ལུང་བདེ་ཆེན་ཆུས་གྲོང་གསེབ་དར་རྒྱས་ཅུས་དང་མཐུན་སྦྱོར་ཧུར་ཐག་བྱས་ཏེ། བདེ་ཆེན་གྲོང་ཚོ་དང་། ཆུ་བཟང་གྲོང་ཚོ། ངང་དཀར་གྲོང་ཚོ། སྡིངས་ཁ་གྲོང་ཚོ། སྦངས་གྲོང་ཚོ་བཅས་གྲོང་ཚོ་ལྔའི་མི་ཕྱུགས་ལོགས་དབྱེའི་གནས་ཚུལ་ལ་དམིགས་ནས་སྔ་རྗེས་སུ་རྩད་བཤེར་དང་མཐིལ་རྟོགས་ཐེངས་བཞི་བྱས་པ་དང་འབྲེལ། ཞིང་འབྲོག་པའི་ཁྱིམ་གྱི་སྒོ་རའི་གྲུབ་ཆ་དངོས་དང་ཕྱུགས་རིགས་ཀྱི་གནས་ཚུལ་དང་ཟུང་འབྲེལ་གྱིས་གནད་སྨིན་ཇུས་གཞི་ཡང་བཀོད་ཅིང་། དེ་ནས་མང་ཚོགས་ཀྱི་ཁྱིམ་གྱི་སྒོ་རར་སྒྱུར་བཀོད་དང་ཨར་སྐྲུན་བྱས་ཏེ་མི་ཕྱུགས་སྡོད་ས་ཁག་ཁག་དང་བགྲོད་ལམ་ཁག་ཁག་ཡོང་བའི་འགན་ལེན་བྱས་ཡོད།

མང་ཚོགས་ཀྱི་བསམ་བློའི་ངོས་འཛིན་མཐོ་རུ་གཏོང་ཆེད། བདེ་ཆེན་གྲོང་རྡལ་གྱིས་ད་དུང་གྲོང་ཚོའི་ཏང་རྩ་འཛུགས་ལ་མཛུབ་ཁྲིད་བྱས་ཤིང་། སྒྲོག་འགྲེལ་ཚོགས་འདུ་ཚོགས་པ་དང་དུད་ཚང་དུ་སྐྱོད་པ་སོགས་རྣམ་པ་སྣ་ཚོགས་བརྒྱུད་དྲིལ་བསྒྲགས་ལས་དོན་སྤེལ་ཏེ། མང་ཚོགས་ལ་མི་ཕྱུགས་ལོགས་དབྱེའི་ལས་དོན་གྱི་གལ་ཆེའི་རང་བཞིན་ངོས་འཛིན་གང་ལེགས་ཐུབ་ཏུ་བཅུག་པ་དང་། མང་ཚོགས་ལ་ལས་དོན་དེའི་ནང་ཧུར་ཐག་ཞུགས་རྒྱུའི་ཁྲིད་སྟོན་བྱས་པ། དེ་བཞིན་མང་ཚོགས་ཀྱི་བྱེད་པོའི་གནས་བབ་མཐའ་འཁྱོངས་དང་མང་ཚོགས་ཀྱི་བསམ་འདུན་ལ་བརྩི་འཇོག་བྱས་པ་བརྒྱུད། གྲོང་ཚོ་དེ་དག་ཏུ་མཉམ་སྐྲུན་མཉམ་སྐྱོང་མཉམ་སྤྱོད་གསུམ་གྱི་རྣམ་པ་ཡག་པོ་ཞིག་ཆགས་ཡོད།

མིག་སྔའི་བར་བདེ་ཆེན་གྲོང་རྡལ་གྱིས་ཁྱིམ་ཚང་200ལྷག་ཙམ་ལ་མི་ཕྱུགས་ལོགས་དབྱེའི་རྣམ་གྲངས་ཀྱི་ཨར་ལས་ལེགས་གྲུབ་ཟིན་པ་དང་སྔོན་དཔག་བྱས་ན་འདི་ལོའི་ཟླ་6པའི་ཟླ་མཇུག་ཏུ་གྲོང་ཚོ་5ཡི་ཁྱིམ་ཚང་399ལ་སྒྱུར་བཀོད་བྱེད་མཇུག་འགྲིལ་རྒྱུ་རེད།

གོམ་སྟབས་རྗེས་མར་བདེ་ཆེན་གྲོང་རྡལ་གྱིས་ད་དུང་མི་ཕྱུགས་ལོགས་དབྱེ་དེ་གྲོང་སྲོལ་དམངས་ཆིངས་ནང་བཅུག་སྟེ། མང་ཚོགས་རྣམས་སྡོད་མལ་ཁོར་ཡུག་ལེགས་སུ་གཏོང་བའི་ནང་ཞུགས་མཁན་དང་ཕན་པ་ཐོབ་མཁན་དུ་འགྱུར་བར་བྱས་ནས་མཛེས་སྡུག་ལྡན་པའི་གྲོང་གསེབ་ཀྱི་རྣམ་པ་གསར་པ་གཏོད་རྒྱུ་རེད།