ཉེ་ཆར། ནག་ཆུ་གྲོང་ཁྱེར་གྱི“གྲོང་གསེབ་དར་རྒྱས། ནག་ཆུ་མདུན་སྐྱོད”བྱེད་སྒོའི་ལས་དོན་ལ་སྐུལ་སྤེལ་གཏོང་བའི་ས་ཡུལ་དངོས་ཀྱི་ཚོགས་འདུ་འབྲི་རུ་རྫོང་དུ་འཚོགས་པ་རེད། ད་ཐེངས་ཀྱི་ཚོགས་འདུ་ནི“གྲོང་གསེབ་དར་རྒྱས། ནག་ཆུ་མདུན་སྐྱོད”བྱེད་སྒོའི་གྲུབ་འབྲས་སྙན་སེང་ཞུ་བའི་དགོང་ཚོགས་དང་། ཉམས་མྱོང་སྤེལ་རེས་ཚོགས་འདུ། ས་ཡུལ་དངོས་སུ་ལྟ་སྐོར་བཅས་ཁག་གསུམ་ལས་གྲུབ་ཡོད་པ་རེད།

ཤེས་རྟོགས་བྱུང་བར་གཞིགས་ན། 2022ལོར་བྱེད་སྒོ་སྤེལ་འགོ་ཚུགས་པ་ནས་བཟུང་། ནག་ཆུ་གྲོང་ཁྱེར་གྱི་རིམ་ཁག་ཏང་རྩ་འཛུགས་ཀྱིས་སྒྲིག་འཛུགས་ཞིབ་ཚགས་བྱས་པ་དང་རྒྱ་ཆེའི་ལས་བྱེད་པ་དང་མང་ཚོགས་ཀྱིས་ཧུར་ཐག་ཞུགས་ཏེ། ཁྱོན་རིགས་ཁག་གི་འགྲན་བསྡུར་ཐེངས་ཁྲི་5.46གཉེར་བར་འགྲན་ཞུགས་མི་ཐེངས་ཁྲི་84.98ལྷག་ཙམ་དང་བྱེད་སྒོར་ཞུགས་མཁན་མི་ཐེངས་ཁྲི་756.18ལྷག་ཙམ་ཟིན་ཡོད་པ་རེད།  བྱེད་སྒོ་སྤེལ་རིང་བྱེད་སྒོ་དེ་2022ལོའི་རྒྱལ་ཡོངས་ཀྱི་རིག་གནས་ཚན་རྩལ་འཕྲོད་བསྟེན“གཤམ་སྐྱོད་གསུམ”གྱི་བྱེད་སྒོའི་དཔེ་སྟོན་རྣམ་གྲངས་གྲས་སུ་བདེ་བླག་ངང་ཚུད་པ་དང་འབྲེལ། ཀྲུང་དབྱང་དྲིལ་བསྒྲགས་པུའི་དྲིལ་བསྒྲགས་དང་བསམ་བློ་རིག་གནས་ལས་དོན་གྱི་དཔེ་མཚོན་གྲས་སུའང་བདམས་པ་རེད།

ལོ་གསུམ་རིང་། བྱེད་སྒོས་ཐོན་ལས་དར་རྒྱས་དང་། ཤེས་ལྡན་པ་འཕེལ་རྒྱས། རིག་གནས་དར་རྒྱས། སྐྱེ་ཁམས་དར་རྒྱས། རྩ་འཛུགས་དར་རྒྱས། “མིའི”ཕྱོགས་ཡོངས་ཀྱི་འཕེལ་རྒྱས་བཅས་ལ་དམིགས་ནས་བྱ་དགའ་ཐོབ་པའི་ཕུལ་བྱུང་བརྩམས་ཆོས་རྫོང་ཁོངས་ཀྱི་ཁྱད་ལྡན་ཐོན་ལས་93ལ་བསྒྱུར་བ་དང་། མང་ཚོགས་2538ལས་ཞུགས་ལས་གཏོད་ལ་སྐུལ་ཁྲིད་བྱས་པ། རིམ་རྩིས་བྱས་ན“གྲོང་གསེབ་དར་རྒྱས། ནག་ཆུ་མདུན་སྐྱོད”ཅེས་པའི་བྱེད་སྒོའི་ཚོང་འདུས་ཐེངས་794གཉེར་ཏེ་མང་ཚོགས་ལ་ཡོང་འབབ་སྒོར་ཁྲི་2452འཕར་བར་སྐུལ་ཁྲིད་བྱས་པ་དང་། རང་ཡུལ་གྱི་ཤེས་ལྡན་པ་སྣ་ཚོགས་ཁྲི་6.4སྔོག་འདོན་དང་། མང་ཚོགས་ཁྲི་6.8ལྷག་ཙམ་ལ་གསོ་སྦྱོང་། ཕུལ་བྱུང་ལས་བྱེད་པ་417འོས་སྦྱོར་དང་གནས་སྤར་བཀོལ་སྤྱོད། མང་ཚོགས་3347ཏང་ཡོན་ལ་འཕེལ་རྒྱས་བཏང་བ། ཧོར་སྒོ་རྩེ་གྲུ་བཞི་དང་། སོག་རྫོང་གི་རྡོ་བརྐོས། སྦྲ་ཆེན་གྱི་ཀོ་ཆས་བཟོ་རྩལ་སོགས་ཁྱད་ལྡན་རིག་གནས་ཐོན་ཁུངས་ཁག་465སྔོག་འདོན་བྱས་ནས་མངོན་མིན་རིག་གནས་ཤུལ་བཞག་གི་ཡོང་འབབ་སྒོར་ཁྲི་402བཏོད་པ། ཏང་འཛུགས་སྐྱོང་ལ་བརྟེན་ནས་མདུན་སྐྱོད་བྱེད་སྒོར་ཁྲིད་སྟོན་བྱས་ཏེ་ཏང་ཡོན་ལས་བྱེད་པ་ཁྲི་2.4དང་དང་བླངས་པ་ཁྲི་10དེའི་ནང་ཞུགས་རྒྱུའི་སྐུལ་སློང་བྱས་ནས་རིམ་རྩིས་བྱས་ན་དང་བླངས་ཞབས་ཞུའི་དཔུང་ཁག་5470བཙུགས་པ་དང་མང་ཚོགས་མི་ཐེངས་ཁྲི་220ལྷག་ཙམ་ལ་ཞབས་འདེགས་ཞུས་པ། སྐྱེ་ཁམས་སྲུང་སྐྱོང་གི་བྱེད་སྒོ་ཐེངས་ཁྲི་1.9སྤེལ་བ་དང་དུས་རབས་གསར་པའི་དང་བླངས་ཞབས་འདེགས་ཐེངས་4260ལྷག་ཙམ་ཞུས་པ་བཅས་རེད།