སྤྱི་ཚོགས་རིང་ལུགས་ཀྱི་ལྟེ་བའི་རིན་ཐང་ལྟ་བ་ནུས་ཤུགས་ཡོད་རྒུས་སྐྱེད་སྲིང་དང་ལག་བསྟར་བྱེད་དགོས།
སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་དྲིལ་བསྒྲགས་དང་བསམ་བློ་རིག་གནས་ཀྱི་ལས་དོན་ལ“ཤུགས་རྒྱག་དགོས་པ་བདུན”གྱི་མཛུབ་སྟོན་གལ་ཆེན་གནང་ནས“སྤྱི་ཚོགས་རིང་ལུགས་ཀྱི་ལྟེ་བའི་རིན་ཐང་ལྟ་བ་ནུས་ཤུགས་ཡོད་རྒུས་སྐྱེད་སྲིང་དང་ལག་བསྟར་བྱེད་དགོས”ཞེས་ནན་བཤད་གནང་ཡོད། ལྟེ་བའི་རིན་ཐང་ལྟ་བ་ནི་རྒྱལ་ཁབ་ཅིག་བརྟན་ལྷིང་ཡོང་གཞི་གལ་ཆེན་ཡིན་པས། བློ་སེམས་འགུགས་ཤུགས་ཆེན་པོ་ལྡན་པའི་ལྟེ་བའི་རིན་ཐང་ལྟ་བ་ཞིག་འཛུགས་ཐུབ་མིན་ནི་སྤྱི་ཚོགས་ཞི་མཐུན་བརྟན་ལྷིང་དང་རྒྱལ་ཁབ་ཡུན་རིང་བདེ་འཁོད་དང་འབྲེལ་བ་ཡོད། རང་རྒྱལ་ནི་མི་རིགས་མང་ཞིང་མི་འབོར་གྱི་གཞི་ཁྱོན་ཧ་ཅང་ཆེ་བའི་རྒྱལ་ཁབ་ཅིག་ཡིན། ཀྲུང་གོའི་ལུགས་ཀྱི་དེང་རབས་ཅན་ལ་སྐུལ་འདེད་བཏང་ནས་ཀྲུང་ཧྭ་མི་རིགས་བསྐྱར་དར་རླབས་པོ་ཆེའི་བརྗིད་ཆེའི་དམིགས་ཚད་མངོན་འགྱུར་བྱེད་དགོས་ན། ངེས་པར་དུ་གཅིག་གྱུར་གྱི་རིན་ཐང་དམིགས་ཚད་དང་རིན་ཐང་ཚད་ལྡན་ཞིག་དགོས་པ་དང་། སྤྱི་ཚོགས་རིང་ལུགས་ཀྱི་ལྟེ་བའི་རིན་ཐང་ལྟ་བས་དེ་ལྟ་བུའི་དགེ་མཚན་ལྡན་པའི་སྣེ་ཁྲིད་ཀྱི་ནུས་པ་འདོན་བཞིན་ཡོད། “འབྱོར་ཕྱུག་དང་། དམངས་གཙོ། ཤེས་དཔལ། ཞི་མཐུན། རང་དབང་། འདྲ་མཉམ། དྲང་གཞག ཁྲིམས་སྐྱོང་། རྒྱལ་གཅེས། ལས་བཀུར། ཡིད་རྟོན། མཛའ་མཐུན”བཅས་ཀྱི་ཡིག་འབྲུ་ཉེར་བཞིའི་བླང་བྱས། སྤྱི་ཚོགས་རིང་ལུགས་ཀྱི་ལྟེ་བའི་རིན་ཐང་ལྟ་བའི་གཞི་རྩའི་ནང་དོན་ཁ་གསལ་བསྟན་ནས་དེང་རབས་ཀྲུང་གོའི་རིན་ཐང་གི་སྤྱིའི་བགོ་གྲངས་སུ་གྱུར་ཞིང་། ང་ཚོས་རྒྱལ་ཁབ་གང་འདྲ་ཞིག་འཛུགས་སྐྲུན་བྱེད་པ་དང་། སྤྱི་ཚོགས་གང་འདྲ་ཞིག་བསྐྲུན་དགོས་པ། སྤྱི་དམངས་གང་འདྲ་ཞིག་སྐྱེད་སྲིང་བྱེད་དགོས་པ་བཅས་ཀྱི་གནད་དོན་གལ་ཆེན་ལ་ལན་བཏབ་པ་རེད།
སྤྱི་ཚོགས་རིང་ལུགས་ཀྱི་ལྟེ་བའི་རིན་ཐང་ལྟ་བ་སྐྱེད་སྲིང་དང་ལག་ལེན་བསྟར་བ་ནི་སྲོལ་བཟང་དར་སྤེལ་གཏོང་བ་དང་། བྱ་སྤྱོད་ཚད་ལྡན་དུ་གཏོང་བ། མི་སེམས་གཅིག་ཏུ་སྒྲིལ་བ་བཅས་ཀྱི་གཞི་རྩའི་འདུ་འགོད་ཅིག་ཡིན། རྒྱལ་ཁབ་ཀྱི་ངོས་ནས་ཁྲིམས་འཛུགས་ཀྱི་འགན་སྲུང་བྱེད་ཤུགས་སྔར་བས་ཆེ་རུ་བཏང་སྟེ་སྤྱི་ཚོགས་རིང་ལུགས་ཀྱི་ལྟེ་བའི་རིན་ཐང་ལྟ་བ་བཅའ་ཁྲིམས་ཁྲིམས་སྲོལ་ནང་མཉམ་འདྲེས་ཐུབ་པར་བྱས་ནས་སློབ་གསོའི་ཁྲིད་སྟོན་དང་། གླེང་ཕྱོགས་ཀྱི་དྲིལ་བསྒྲགས། རིག་གནས་ཀྱིས་བག་ཆགས་འཇོག་པ། ལག་ལེན་བརྒྱུད་ནས་གོམས་གཤིས་འཇགས་པ། ལམ་ལུགས་ཀྱིས་འགན་སྲུང་སོགས་བྱས་ཏེ། དེ་ཉིད་རྒྱལ་ཡོངས་མི་རིགས་ཁག་གི་མི་དམངས་ཀྱི་བཅའ་ཁྲིམས་ཚད་ལྡན་དང་བྱ་སྤྱོད་ཀྱི་ཚད་གཞིར་འགྱུར་བར་བྱས་ཏེ་སྤྱི་ཚོགས་རིང་ལུགས་ཀྱི་ལྟེ་བའི་རིན་ཐང་ལྟ་བ་དཔལ་འབྱོར་དང་སྤྱི་ཚོགས་འཕེལ་རྒྱས་ཁྲོད་ལག་ལེན་མཐར་ཕྱིན་ཡོང་བར་སྐུལ་འདེད་གཏོང་དགོས། སྤྱི་ཚོགས་ཀྱི་ངོས་ནས་མི་རིགས་བསྐྱར་དར་གྱི་ལས་འགན་ཆེན་པོ་འཁུར་མཁན་དུས་རབས་ཀྱི་མི་གསར་སྐྱེད་སྲིང་བྱ་རྒྱུ་དམིགས་སར་བྱས་ཏེ་རིག་གནས་ལ་བརྟེན་ནས་མི་སྣ་ལེགས་སྐྱོང་མཐའ་འཁྱོངས་ཀྱིས་རྒྱལ་དམངས་སློབ་གསོ་དང་། བསམ་པའི་དཔལ་ཡོན་སྲོལ་གཏོད། བསམ་པའི་རིག་གནས་ཐོན་རྫས་གསར་རྩོམ་དང་། ཐོན་སྐྱེད། བརྒྱུད་བསྒྲགས་བཅས་ཁྲོད་ཀྱི་སྤྱི་ཚོགས་རིང་ལུགས་ཀྱི་ལྟེ་བའི་རིན་ཐང་ལྟ་བའི་སྣེ་ཁྲིད་ཀྱི་ནུས་པ་བཏོན་ཏེ་ཀྲུང་ཧྭའི་ཕུལ་བྱུང་སྲོལ་རྒྱུན་རིག་གནས་དང་། གསར་བརྗེའི་རིག་གནས། སྤྱི་ཚོགས་རིང་ལུགས་ཀྱི་སྔོན་ཐོན་རིག་གནས་བཅས་ལ་བརྟེན་ནས་རྩ་བ་གསོ་ཞིང་བློ་སྦྱོང་བ་དང་བློ་སྐྱེད་སེམས་སྦྱོང་གིས་མིའི་ཕྱོགས་ཡོངས་འཕེལ་རྒྱས་དང་སྤྱི་ཚོགས་ཕྱོགས་ཡོངས་ཡར་རྒྱས་ཡོང་བར་སྐུལ་འདེད་ཟམ་མི་ཆད་པར་གཏོང་དགོས། མི་སྒེར་གྱི་ངོས་ནས་དམངས་ཡོངས་ཀྱིས་བྱ་སྤྱོད་སྤེལ་བ་དང་ལས་བྱེད་པས་སྣེ་འཁྲིད་རྒྱུ་མཐའ་འཁྱོངས་ཀྱིས་ཁྱིམ་ཚང་དང་ཕྲུ་གུ་ནས་འགོ་བཙུགས་ཏེ་སྤྱི་དམངས་ཀྱི་རང་ངོས་སློབ་གསོ་དང་བྱ་སྤྱོད་བཟང་པོ་འཇགས་རྒྱུར་ཤུགས་སྣོན་ཟམ་མི་ཆད་པར་བརྒྱབ་སྟེ། བྱ་སྤྱོད་ཀྱི་གོམས་གཤིས་བཟང་པོ་སྐྱེད་སྲིང་ལ་མཐོང་ཆེན་བྱས་ནས་སྤྱི་ཚོགས་རིང་ལུགས་ཀྱི་ལྟེ་བའི་རིན་ཐང་ལྟ་བ་རྒྱུན་རྣམ་ཅན་དང་འཚོ་བ་ཅན་དུ་འགྱུར་བ་བྱས་ནས། མི་ཚང་མས་དེ་ཤེས་ཚོར་ཐུབ་པ་དང་གོ་བ་ལོན་པར་བྱས་ཏེ་ནང་བསམ་པའི་དོན་གཉེར་བྱ་གཞི་དང་ཕྱི་དོན་དངོས་ཀྱི་བྱ་སྤྱོད་ཐོག་འཁྱོལ་བ་བྱས་ནས་བཟང་སྤྱོད་རྟོགས་པ་དང་། སྤྱི་སྤྱོད་སྲུང་བ། རང་སྤྱོད་ནན་པ་བཅས་ཡོང་བར་བྱེད་དགོས།