འདི་ནི་སྒེར་རྩེ་རྫོང་དུང་མཚོ་ཤང་ཚེ་རིང་མགོ་ལེབ་གྲོང་ཚོའི་གྲོང་མིས་སྐར་གསོག་བརྗེ་རེས་སྒོ་རྩིས་ཚོང་ཁང་ནས་འཚོ་བའི་མཁོ་ཆས་བརྗེ་བཞིན་པ།

འདི་ལོ་ཚུན། སྒེར་རྩེ་རྫོང་དུང་མཚོ་ཤང་ཚེ་རིང་མགོ་ལེབ་གྲོང་ཚོས་གཞི་རིམ་ཏང་རྩ་འཛུགས་ཀྱི་སྣེ་ཁྲིད་ནུས་པ་གང་ལེགས་བཏོན་ནས། གྲོང་གསེབ་བཅོས་སྐྱོང་གི་སྐར་གསོག་ལམ་ལུགས་ཁྱབ་གདལ་དང་བེད་སྤྱོད་ཧུར་ཐག་བཏང་བས་ཞིང་འབྲོག་མང་ཚོགས་སྤྱི་ཚོགས་བཅོས་སྐྱོང་ནང་ཞུགས་པའི་ཧུར་བརྩོན་རང་བཞིན་སྐུལ་སློང་ནུས་ལྡན་ཐུབ་ཡོད།

སྐར་གསོག་ཆུང་ངུར་བརྟེན་ནས་ནང་སྐྱེས་སྒུལ་ཤུཌ་འཕེལ་བར་བྱས་པ།

ཤེས་རྟོགས་བྱུང་བར་གཞིགས་ན། ཚེ་རིང་མགོ་ལེབ་གྲོང་ཚོས“རྒྱལ་གཅེས་ཏང་གཅེས་དང་། སྒྲིག་བཀུར་ཁྲིམས་སྲུང་། དྲིལ་བསྒྲགས་སློབ་གསོ། མཉམ་སྐྱོང་མཉམ་སྐྲུན། བསམ་བློ་ཀུན་སྤྱོད། སྤྱི་ཕན་བྱ་སྤྱོད། ལས་བརྩོན་ཕྱུག་འགྱུར། ཁོར་ཡུག་བཅོས་སྒྲིག”བཅས་ཀྱི་ནང་དོན་ཆེན་པོ་བརྒྱད་ལ་དམིགས་ནས་གྲོང་མིའི་རྒྱུན་གཏན་གྱི་བྱེད་ལུགས་བྱེད་སྟངས་ལ་སྐར་མ་རྒྱག་པ་མ་ཟད། བསགས་པའི་སྐར་མ་སྤྱད་དེ་སྐར་གསོག་བརྗེ་རེས་སྒོ་རྩིས་ཚོང་ཁང་ནས་འཚོ་བའི་མཁོ་ཆས་སྣ་ཚོགས་བརྗེ་ཆོག་གི་ཡོད།

“སྐར་གསོག་ལམ་ལུགས་ཁྱབ་གདལ་གཏོང་རིང་ང་ཚོས་གྲོང་མིའི་སྐར་གསོག་གི་འགྱུར་ལྡོག་དང་རིམ་རྩིས་སྐར་གསོག་སོགས་དུས་ཚིགས་རེར་ཡོངས་བསྒྲགས་རེ་བྱེད་པ་མ་ཟད། མང་ཚོགས་ཀྱི་ལྟ་སྐུལ་ཡང་དང་ལེན་བྱེད་ཀྱི་ཡོད། གལ་ཏེ་གྲོང་མིས་སྐར་གསོག་ཐད་བསམ་འཆར་ཡོད་ཚེ་གྲོང་མི་ཨུ་ལྷན་དུ་བསམ་འཆར་འདོན་པར་བསྐྱོད་ཆོག་ལ། གྲོང་ཚོའི་སྐར་གསོག་ཞིབ་བཤེར་དོ་དམ་ལས་དོན་ཚོགས་ཆུང་གིས་བརྟག་ཞིབ་བྱས་རྗེས་བརྟག་དཔྱད་བྱེད་ཚུལ་ལ་གཞིགས་ནས་དུས་ཐོག་ཏུ་དག་བཅོས་བྱེད་ཀྱི་ཡོད། གྲོང་མིར་ཐོབ་པའི་སྐར་གསོག་དག་ཟླ་རེར་བརྗེ་ཆོག་ལ་ལོ་མཇུག་ཏུ་སྡེབ་གཅིག་ལ་བརྗེས་ནའང་ཆོག བརྗེ་རྒྱུའི་དངོས་ཟོག་གཙོ་བོ་ཐོན་སྐྱེད་དང་འཚོ་བའི་དངོས་ཟོག་དང་འཛད་སྤྱོད་རོགས་སྐྱོར་ཐོན་རྫས་རེད། དེ་དང་ཆབས་ཅིག་སྐར་གསོག་བརྗེ་རེས་སྒོ་རྩིས་ཚོང་ཁང་གི་དངོས་ཟོག་གྲབས་གསོག་དང་བརྗེ་རེས་སོགས་ཀྱི་གནས་ཚུལ་དུས་ཚིགས་རེར་ཁྱབ་བསྒྲགས་ཐེངས་རེ་བྱས་ནས་མང་ཚོགས་ཀྱི་ལྟ་སྐུལ་དང་ལེན་བྱེད་ཀྱི་ཡོད། གཞན་ཡང་དུད་ཚང་རེས་ལོ་འཁོར་གྱི་སྤྱིའི་སྐར་གསོག་ལ་བརྟེན་ནས་ལོ་མཇུག་གི་སྤྱིའི་དཔྱད་བསྡུར་ལ་ཞུགས་ཆོག་པ་མ་ཟད། ཨང་དང་པོར་བྱ་དགའ་སྒོར་4000སྤྲོད་ཀྱི་ཡོད”ཅེས་ཚེ་རིང་མགོ་ལེབ་གྲོང་ཚོའི་ཏང་ཀྲི་པུའི་ཧྲུའུ་ཅི་ཕུན་ཚོགས་རྣམ་རྒྱལ་གྱིས་ངོ་སྤྲོད་བྱས།

ཚེ་རིང་མགོ་ལེབ་གྲོང་ཚོས་སྐར་གསོག་ལམ་ལུགས་ཁྱབ་གདལ་གཏོང་རིང་། གྲོང་གསེབ་བཅོས་སྐྱོང་གི་ནུས་ཕྱོད་སྔར་བས་ཆེ་རུ་གཏོང་བ་ནི་མངའ་རིས་ས་ཁུལ་གྱིས་གཞི་རིམ་ཏང་འཛུགས་སྐྱོང་ལ་དམ་འཛིན་ཏན་ཏིག་བྱས་ནས་གྲོང་གསེབ་དར་རྒྱས་ལ་སྐུལ་འདེད་གཏོང་བའི་ལས་དོན་གྱི་བསྡུས་རིས་ཤིག་རེད།

ཟླ་6པའི་ཟླ་མཇུག་བར། མངའ་རིས་ས་ཁུལ་གྱིས་གྲོང་ཚོ(གྲོང་ལྷན)87དུ“སྐར་གསོག་ལམ་ལུགས”ཁྱབ་གདལ་དང་བེད་སྤྱོད་བྱས་པ་མ་ཟད། སྐར་གསོག་བརྗེ་རེས་སྒོ་རྩིས་ཚོང་ཁང་ཡང་བཙུགས་ནས“རྣམ་འགྱུར་ལ་བརྟེན་ནས་སྐར་མ་གསོག་པ་དང་། སྐར་གསོག་ལ་བརྟེན་ནས་ཚོང་ཟོག་བརྗེ་བ”སོགས་ཀྱི་རྣམ་པ་བརྒྱུད། ཞིང་འབྲོག་ཁུལ་དུ་གྲོང་གསེབ་བཅོས་སྐྱོང་གི“འགྲན་སློབ་སྙེག་བརྒལ”གྱི་རྣམ་པ་ཟབ་མོ་ཞིག་རིམ་བཞིན་ཆགས་པར་བྱས་ཏེ་མང་ཚོགས་ཀྱི་ཧུར་སྐྱེད་ཡར་བརྩོན་དང་མཉམ་སྐྲུན་མཉམ་སྐྱོང་གི་ནང་སྐྱེས་སྒུལ་ཤུགས་ཟམ་མི་ཆད་པར་འཕེལ་བར་བྱས་ཡོད།

དམངས་ཡོངས་མཛེས་མཐུན་གྲོང་གསེབ་འཛུགས་སྐྲུན་ལ་ཞུགས་པ།

འདི་ལོ་ཚུན། མངའ་རིས་ས་ཁུལ་གྱིས་གནས་འཕྲོད་ལས་འཚམ་ཡོང་བར་དམིགས་ནས་ས་མཐོའི་མཛེས་མཐུན་གྲོང་གསེབ་འཛུགས་སྐྲུན་ཁྲོད་ཚད་གཞི་རྒྱུན་ཆད་མེད་པར་འཛུགས་པ་དང་། མ་དངུལ་སྒོར་དུང་ཕྱུར་1.95བཏང་སྟེ་གནས་འཕྲོད་ལས་འཚམ་གྱི་ས་མཐོའི་མཛེས་མཐུན་གྲོང་གསེབ་10བསྐྲུན་རྩིས་ཡོད་ཅིང་། མིག་སྔར་འཛུགས་སྐྲུན་རྣམ་གྲངས་ཀྱི་ལག་བསྟར་ཇུས་གཞི་རང་སྐྱོང་ལྗོངས་ཀྱི་སྲོལ་མཐུན་རང་བཞིན་གྱི་ཞིབ་བཤེར་ཚད་གཞི་ལོན་ནས་རྣམ་གྲངས་10འཛུགས་སྐྲུན་བྱེད་འགོ་ཚུགས་པའི་ནང་རྣམ་གྲངས་1ལེགས་གྲུབ་ཟིན་པ་དང་མ་དངུལ་སྒོར་ཁྲི་9009.78བཏང་ཡོད། “སྲོལ་མང་གཅིག་སྒྲིལ”གྱི་བླང་བྱ་གཞིར་བཟུང་། ས་ཁུལ་རང་བྱུང་ཐོན་ཁུངས་ཅུས་ཀྱིས་གནས་འཕྲོད་ལས་འཚམ་མཛེས་མཐུན་གསུམ་ལྡན་གྱི་གྲོང་གསེབ་འཛུགས་སྐྲུན་གྱི་འཆར་འགོད་10ལོ་འཁོར་གྱི་ལས་འགན་ནང་བཅུག་ཡོད་པ་དང་། མིག་སྔར་ཕྱོགས་གསུམ་པའི་ཀུང་སིར་སྒྲིག་བཟོའི་ལས་དོན་སྤེལ་རྒྱུའི་མངགས་བཅོལ་བྱས་ཡོད།

གཞན་ཡང་མངའ་རིས་ས་ཁུལ་གྱིས་འདི་ལོ་ད་དུང་སྡོད་མལ་ཁོར་ཡུག་བཅོས་སྒྲིག་རྣམ་གྲངས་19བཀོད་སྒྲིག་བྱས་པར་མ་དངུལ་སྒོར་དུང་ཕྱུར་1.57དང་འབྲེལ་བ་ཡོད་པ་དང་མིག་སྔར་ཚང་མ་འཛུགས་སྐྲུན་བྱེད་འགོ་ཚུགས་ཡོད།

འདི་ལོ་ཚུན་དུ། ས་ཁུལ་ཡོངས་ཀྱིས་གནམ་ལོ་གསར་ཚེས་དང་། དཔྱིད་གསར་དུས་ཆེན། བོད་ཀྱི་ལོ་གསར་སོགས་དུས་ཆེན་གལ་ཆེན་སྐབས་སུ་གྲོང་ཚོར་གཙང་སྦྲའི་བྱ་སྤྱོད་ཐེངས་530ལྷག་ཙམ་སྤེལ་བ་དང་། རྒྱུན་རྣམ་ཅན་གྱི་གཙང་སྦྲའི་བྱ་སྤྱོད་ཐེངས་1850ལྷག་ཙམ་སྤེལ་བར་མང་ཚོགས་མི་ཐེངས་ཁྲི་5ལྷག་ཙམ་ཞུགས་ཡོད། དེ་དང་ཆབས་ཅིག་རྫོང་ཁག་ལ་རྒྱུན་གཏན་ནས་གྲོང་ཚོར་གཙང་སྦྲའི་བྱ་སྤྱོད་ལམ་སྲོལ་འཛུགས་པར་མཛུབ་ཁྲིད་བྱས་ཏེ་གྲོང་ཚོར་གཙང་སྦྲ་བྱེད་པ་དེ་སྐབས་འཕྲལ་ནས་རྟག་ཏུ་གཙང་མ་ཡོང་བའི་ཕྱོགས་སུ་འགྱུར་ལྡོག་འགྲོ་བར་སྐུལ་འདེད་བཏང་ཡོད།

སྤྱི་ཚོགས་ཀྱི་སྟོབས་ཤུགས་ལ་བརྟེན་ནས་གྲོང་གསེབ་དར་རྒྱས་ལ་རམ་འདེགས་བྱས་པ།

འདི་ལོ་ཚུན་དུ་མངའ་རིས་ས་ཁུལ་གྱིས“ཁེ་ལས་བརྒྱ་ཡིས་གྲོང་ཚོ་བརྒྱ་དར་རྒྱས་གཏོང་བའི”བྱ་སྤྱོད་ལ་སྐུལ་འདེད་ཤུགས་ཆེན་བཏང་སྟེ“གདན་འདྲེན་ཞུ་བ་དང་ཕྱིར་སྐྱོད་པ”དམ་འཛིན་བྱ་གཞིར་བྱས་ཏེ། ཧོ་པེ་ཞིང་ཆེན་ཀྲུང་དབྱི་གྲོང་གསེབ་དར་རྒྱས་ཐེབས་རྩ་ལྷན་ཚོགས་དང་མཉམ་དུ་ཀྲེ་ཅང་སློབ་ཆེན་ལ་དུས་ཡུན་ཉིན་དགུའི་རིང་མངའ་རིས་ས་ཁུལ་གྱི་དམངས་གཉེར་དཔལ་འབྱོར་སྤུས་ཚད་མཐོ་བའི་འཕེལ་རྒྱས་དང་མི་རིགས་མཐུན་སྒྲིལ་ཡར་ཐོན་འཛུགས་གཏོད་དང་གྲོང་གསེབ་དར་རྒྱས་ཀྱི་ཕྱོགས་བསྡུས་འཇོན་ཐང་ཆེ་རུ་གཏོང་བའི་གསོ་སྦྱོང་འཛིན་གྲྭ་གཉེར་བ་རེད། ཧོ་པེ་དང་མངའ་རིས་ས་ཁུལ་གཉིས་ཀྱི་ལས་བྱེད་པ་དང་དམངས་གཉེར་ཁེ་ལས་མཁས་ཅན་24གསོ་སྦྱོང་ལ་ཞུགས་ཡོད། གསོ་སྦྱོང་དེ“རིགས་པའི་གཞུང་ལུགས་དང་ལག་ལེན་ཟུང་འབྲེལ”གྱི་ཐབས་ཤེས་སྤྱད་དེ་དམངས་གཉེར་ཁེ་ལས་མཁས་ཅན་གྱི་བསམ་བློར་བཅིངས་འགྲོལ་གཏོང་བ་དང་། མཐོང་རྒྱ་ཡངས་སུ་གཏོང་བ། འཇོན་ཐང་ཆེ་རུ་གཏོང་བ་བཅས་ལ་རམ་འདེགས་བྱས་ཡོད།

འདི་ལོའི་ཟླ་དང་པོ་ནས་ལྔ་པའི་བར་ལྗོངས་ཕྱི་ནང་གི་དམངས་གཉེར་ཁེ་ལས་ཀྱིས་ཁེ་ལས་མཁས་ཅན་གྱི་སྙིང་སྟོབས་དར་སྤེལ་ཧུར་ཐག་བཏང་སྟེ་འབྲེལ་མཐུད་རོགས་སྐྱོར་གྱི་ལས་དོན་རང་འགུལ་ངང་སྤེལ་ནས་མངའ་རིས་ཀྱི་ཞིང་འབྲོག་མང་ཚོགས་འབབ་འཕར་ཕྱུག་འགྱུར་ཡོང་བར་རམ་འདེགས་བྱས་པ་དང་ཁྱོན་བསྡོམས་རོགས་སྐྱོར་མ་དངུལ་སྒོར་ཁྲི་78.1བཏང་ཡོད།

“གོམ་སྟབས་རྗེས་མར་ང་ཚོས་རོགས་སྐྱོར་གྱི་དཔེ་མཚོན་ཉམས་མྱོང་དང་བྱེད་སྟངས་དུས་ཐོག་ཏུ་ཕྱོགས་སྡོམ་དང་དྲིལ་བསྒྲགས་བྱས་ཏེ‘ཁེ་ལས་བརྒྱ་ཡིས་གྲོང་ཚོ་བརྒྱ་དར་རྒྱས་གཏོང་བའི’ལས་དོན་གྱི་སྤྱི་ཚོགས་ཀྱི་ཤུགས་རྐྱེན་ཐེབས་ནུས་སྔར་བས་ཆེ་རུ་བཏང་ནས། སྤྱི་ཚོགས་ཀྱི་ཐོན་ཁུངས་གང་མང་མང་བརྩོན་ལེན་བྱེད་པ་དང་དེ་བས་མང་བའི་སྤྱི་ཚོགས་ཀྱི་སྟོབས་ཤུགས་དང་མཐུན་སྒྲིལ་བྱས་ཏེ་གྲོང་གསེབ་དར་རྒྱས་ཀྱི་ལས་དོན་ཁྲོད་ཞུགས་ཀྱི་ཡིན”ཞེས་མངའ་རིས་ས་ཁུལ་ཞིང་ལས་དང་གྲོང་གསེབ་ཅུས་ཀྱི་འབྲེལ་ཡོད་འགན་འཁུར་བས་དེ་ལྟར་བརྗོད།