ཉེ་བའི་ལོ་ཤས་རིང་། སྒར་རྫོང་བཀྲ་ཤིས་སྒང་ཤང་གླང་དམར་གྲོང་ཚོས་རྨང་གཞིའི་སྒྲིག་བཀོད་འཛུགས་སྐྲུན་ལ་ཤུགས་སྣོན་ཟམ་མི་ཆད་པར་བརྒྱབ་པ་དང་། དམངས་ལ་ཕན་པའི་དོན་དངོས་བསྒྲུབས་པ། གྲོང་ཚོའི་མཉམ་སྡེབ་དཔལ་འབྱོར་འཕེལ་རྒྱས་དང་སྟོབས་ཆེར་བཏང་བ། གྲོང་གསེབ་དར་རྒྱས་གཏོང་བའི་ཐབས་ལམ་གསར་པ་འཚོལ་ཞིབ་ཧུར་ཐག་བྱས་པས་གྲོང་གསེབ་འཕེལ་རྒྱས་གཏོང་བར་གསོན་ཤུགས་ལྡན་པ་དང་འཚོ་བ་སྔར་ལས་སྐྱིད་སྣང་དོད་དུ་སོང་ཡོད།

འཆི་མེད་ཟླ་བ། འབད་འབུངས་ཡར་བརྩོན་ཕྱུག་འགྱུར་ལམ་དུ་སྐྱོད།

གླང་དམར་གྲོང་ཚོ་ནས་ཐོན་ཏེ་གཙང་སྦྲ་དོད་པའི་གྲོང་གསེབ་གཞུང་ལམ་དེད་ནས་ཤར་ཕྱོགས་སུ་སྤྱི་ལེ་10ལྷག་ཙམ་བསྐྱོད་ཚེ། གླང་དམར་གྲོང་ཚོའི་ཞིང་འབྲོག་པའི་ཆེད་ལས་མཉམ་ལས་ཁང་གི་སྡོང་ཕྲུག་རྟེན་གཞིར་སླེབས། རྟེན་གཞིའི་ནང་དུ་གྲལ་སྟར་འགྲིག་པའི་འོམ་བུ་ཤིང་སོགས་ཤིང་སྣ་སྐྱེ་འཚར་བཟང་། སྡོང་ཕྲུག་རྟེན་གཞིའི་འགན་འཁུར་བ་འཆི་མེད་ཟླ་བ་སྡོང་ཕྲུག་ཁྲོད་དུ་ཕར་འགྲོ་ཚུར་འོང་བྱས་ནས་ཡལ་བཞུར་རྒྱག་བཞིན་མཆིས།

ཕྱུག་འགྱུར་སྣེ་ཁྲིད་པ་འཆི་མེད་ཟླ་བའི་ཁྱིམ་ནི་དེ་སྔ་གྲོང་ཚོའི་དུད་ཚང་དབུལ་པོའི་གྲས་ཤིག་ཡིན་པ་གཞན་གྱི་བསམ་ཡུལ་ལས་འདས། འཆི་མེད་ཟླ་བ་ལོ་15ལ་སླེབས་སྐབས་ཕ་མ་གཉིས་པོ་ཚེ་ལས་འདས། ཁྱིམ་དུ་ཕྱུགས་རིགས་མེད་ལ་ཁང་མིག་ངོ་དྲག་པ་ཞིག་ཀྱང་མེད། “སྐབས་དེར་ང་རང་གཅིག་པུ་སྨི་ངོས་གྲུ་15ལས་མེད་པའི་ཁང་པ་ཞིག་ནང་སྡོད་ཀྱི་ཡོད། དཔལ་འབྱོར་གྱི་ཡོང་ཁུངས་མེད་པས་འཚོ་བར་དཀའ་ངལ་ཧ་ཅང་ཆེན་པོ་འཕྲད་བྱུང” དཀའ་ངལ་མདུན་དུ་འཆི་མེད་ཟླ་བས་མགོ་བོ་བསྒུར་ནས་མ་བསྡད་པར། རང་གི་ལས་ལ་བརྩོན་པའི་ལག་གཉིས་ལ་བརྟེན་ནས་དཀའ་ལས་ཚད་མེད་བརྒྱབ་པས་འཚོ་བ་ཇི་ཙམ་བསྐྱལ་བ་དེ་ཙམ་གྱིས་ལེགས་སུ་སོང་།

2002ལོར་འཆི་མེད་ཟླ་བ་དང་བཀྲ་ཤིས་སྒྲོལ་མ་གཉེན་སྒྲིག་བྱས། སྐབས་དེར་བཀྲ་ཤིས་སྒྲོལ་མར་རང་ཁྱིམ་ནས་ལུག་50ལྷག་ཙམ་སྐལ་བར་བསྐུར། དུས་དེ་ནས་བཟུང་འཆི་མེད་ཟླ་བ་བཟའ་ཚོས་བལ་དང་། ལུག་གི་འོ་མ། ལུག་ཤ་སོགས་བཙོངས་ནས་འཚོ་བ་བསྐྱལ། 2007ལོར་འཆི་མེད་ཟླ་བའི་ཁྱིམ་བདེ་སྡོད་ཁང་པའི་ནང་སྤོས། ཁང་པ་ཡག་པོ་དེ་འདྲ་ཞིག་གི་ནང་དུ་སྤོ་རྒྱུ་བྱུང་བ་ཁོ་པའི་བསམ་པའི་ཡུལ་ལས་འདས།

“ཏང་དང་སྲིད་གཞུང་ལ་ཐུགས་རྗེ་ཆེ་ཞུ་གི་ཡིན། དངོས་གནས་སྲིད་ཇུས་བཟང་པོ་འདུག ཡིན་ནའང་ངས་ཏང་དང་སྲིད་གཞུང་ཁོ་ནར་བརྟེན་ནས་བསྡད་ན་ག་ལ་འགྲིག འཚོ་བ་སྔར་བས་ཡག་པོ་ཞིག་སྐྱེལ་འདོད་ན་དང་ཐོག་རང་ཉིད་ཀྱིས་ཧུར་ཐག་འབད་ཐག་བྱེད་དགོས”ཅེས་འཆི་མེད་ཟླ་བས་བཤད།

2018ལོར་གྲོང་ཚོར་ལམ་སྐྲུན་སྐབས་ཁོ་པས་མ་སྐུལ་དང་ལངས་ངང་ཞུགས། ལམ་ཤར་གཏོང་ཐུབ་རྗེས་ཁོ་པས་ལོ་མང་བསགས་པའི་དངུལ་བཏང་སྟེ་བཟའ་ཟླ་དང་མཉམ་དུ་ཇ་ཁང་ཞིག་བཙུགས་པས་ཚོང་ཡག་པོ་བྱུང་།

“2019ལོར་རྒྱལ་ཁབ་ཀྱིས་གླང་དམར་གྲོང་ཚོར་སྡོང་ཕྲུག་རྟེན་གཞི་ཚུད་པའི་དབུལ་སྐྱོར་རྣམ་གྲངས་འབོར་ཆེན་ལག་ལེན་བསྟར་འགོ་བཙུགས། རྟེན་གཞི་བསྐྲུན་རྗེས་ལས་ལ་བརྩོན་པའི་འཆི་མེད་ཟླ་བ་ལས་བྱེད་པ་དང་མང་ཚོགས་ཀྱིས་མགྲིན་གཅིག་ཏུ་འགན་འཁུར་བར་བདམས། རྒྱུན་དུ་དོ་དམ་བདག་སྐྱོང་བྱེད་པ་ཕུད། ཁོ་པས་ད་དུང་ལག་རྩལ་མི་སྣའི་ས་ནས་སྡོང་ཕྲུག་གསོ་སྟངས་སྦྱངས།

“སྡོང་ཕྲུག་རྟེན་གཞིར་ང་ལ་ཟླ་ཕོགས་སྒོར་3000ཡོད། དགུན་དུས་སྡོང་ཕྲུག་རྟེན་གཞིར་ལས་ཀ་མེད་པའི་སྐབས་སུ་ང་རང་ལས་གྲྭར་གླ་པ་རྒྱུགས་པར་འགྲོ་གི་ཡོད། ད་ཆ་ལོ་ལྟར་མཉམ་ལས་ཁང་གི་བགོ་འགྲེམས་དང་ཇ་ཁང་གི་ཡོང་འབབ་བསྣན་ཚེ། ཁྱིམ་ཚང་གི་ལོ་རེའི་ཡོང་འབབ་སྒོར་ཁྲི་10ཙམ་ཟིན་གྱི་འདུག འཚོ་བ་ཉིན་རེ་ལས་ཉིན་རེ་མ་འདས་པར་ཡག་ཏུ་ཕྱིན་སོང”ཞེས་འཆི་མེད་ཟླ་བས་བཤད། 

ངག་སྒྲོལ། གྲོང་གསེབ་ཀྱི་སྨན་པ་ཡག་པོ་བྱས་ནས་ཁྱིམ་མཚེས་ལ་ཞབས་འདེགས་ཞུས་པ།

ལོ་40ལྷག་ཙམ་གྱི་གོང་དུ་ལོ17ལ་སོན་པའི་ངག་སྒྲོལ་གྱིས་སྒར་རྫོང་སློབ་འབྲིང་གི་སློབ་ཐོན་སློབ་མ་ཁག་དང་པོའི་མིང་ཐོག་ནས་མངའ་རིས་ས་ཁུལ་གྱིས་སྒྲིག་འཛུགས་བྱས་པའི་གསོ་རིག་ཤེས་བྱའི་སྐོར་གྱི་འབྲེལ་ཡོད་གསོ་སྦྱོང་ནང་ཞུགས། ཕྱིས་སུ་དགུན་ས་ཤང་དུ་གྲོང་ཚོའི་སྨན་པ་བྱེད་པར་མངགས། ལོ་23ལ་སླེབས་དུས་ངག་སྒྲོལ་བཀྲ་ཤིས་སྒང་ཤང་གླང་དམར་གྲོང་ཚོར་མནའ་མར་བརྫངས་པ་དང་། དེ་ནས་བཟུང་མུ་མཐུད་སྨན་པ་བྱས།

སྐབས་དེར་གྲོང་ཚོའི་སྨན་པ་ནི་ཡུལ་མིའི་སྐྱབས་མགོན་ལྟ་བུ་ཡིན་ཞིང་། ཁྱིམ་ཚང་ནང་མགོ་ན་བ་དང་ཚ་བ་རྒྱས་པ་ལ་སོགས་པའི་ནད་གཞི་གང་ཞིག་ཐོན་རུང་ཐོག་མར་ཡིད་ལ་དྲན་པ་ནི་ཁོ་མོ་ལས་མེད། སྐབས་དེ་དུས་གྲོང་གསེབ་ཀྱི་སྨན་པར་ཆ་མཚོན་ན། ཉིན་མཚན་དང་དབྱར་དགུན་མེད་པར་དུས་ཐོག་ཏུ་སྨན་བཅོས་བྱེད་པར་འགྲོ་དགོས་ཀྱི་ཡོད།

“སྐབས་དེར་གྲོང་ཚོར་འཕྲོད་བསྟེན་ཁང་མེད་པས། རང་ཁྱིམ་གྱི་སྒྲོག་ཙེའི་སྟེང་ནད་བརྟག་སྨན་བཅོས་བྱེད་ཅིང་། སྨན་བཅོས་ཡོ་བྱད་མེད་ལ་སྨན་ཡང་དེ་ཙམ་མེད”ཅེས་ངག་སྒྲོལ་གྱིས་ཕྱིར་དྲན་བྱེད་བཞིན་བཤད།

ནད་པར་ཁྲག་བླུག་དགོས་ཚེ་ངག་སྒྲོལ་གྱིས་ཐེ་ཚོམ་སྤུ་ཙམ་མེད་པར་དང་ཐོག་ཕུ་ཐུང་བརྫེས་ནས་ཁྲག་སྦྱིན་པ་མ་ཟད། ད་དུང་ཁོ་མོས་རང་ཉིད་ཀྱི་གླ་ཕོགས་བེད་སྤྱད་ནས་ཡུལ་མིར་འཕྲལ་མཁོའི་སྨན་རྫས་ཉོས། “ལོ་བཅུ་ཕྲག་ཁ་ཤས་ཡུད་ཙམ་ཞིག་ལ་སོང་། ད་ཆ་རིམ་ཁག་ཏང་དང་སྲིད་གཞུང་གི་ཐུགས་ཁུར་འོག་གྲོང་གསེབ་ཀྱི་སྨན་བཅོས་འཕྲོད་བསྟེན་ཆ་རྐྱེན་ལེགས་སུ་ཕྱིན་པ་དང་། ང་ཚོར་རྒྱ་ཆེ་ལ་དཀར་ཆ་དོད་པའི་གྲོང་ཚོའི་འཕྲོད་བསྟེན་ཁང་དང་སྨན་བཅོས་སྒྲིག་ཆས་ཆ་ཚང་པོ་ཡོད་ལ། ཆེད་ལས་སློབ་གྲྭ་ནས་ཐོན་པའི་གཞོན་ནུ་དེ་བས་མང་པོའང་ང་ཚོའི་དཔུང་ཁག་ནང་ཞུགས་པ་དེ་དངོས་གནས་དཔེ་མི་སྲིད་པའི་ཡག་པོ་རེད་འདུག”ཅེས་ངག་སྒྲོལ་གྱིས་མྱོང་བ་ཟབ་མོས་བཤད།

ལོ་མང་རིང་གི་སྨན་བཅོས་ལག་ལེན་ཁྲོད་དུ་ངག་སྒྲོལ་གྱིས་ནད་པ་རང་ཉིད་ཀྱི་གཉེན་ཉེ་ལྟ་བུར་བརྩིས་པ་དང་སྐྱོབ་བཅོས་བྱ་རྒྱུ་རང་ཉིད་ཀྱི་འགན་འཁྲིར་བརྩིས་ནས་སྨན་དོན་ལས་ལ་གཞོལ་ནས་གོམ་མཚམས་འཇོག་མྱོང་མེད། “ངས་ཐོག་མར་གསོ་རིག་སྦྱངས་དོན་ནི་ཡུལ་མིར་སྨན་བཅོས་བྱེད་པ་དང་ནད་པར་སྟབས་བདེ་སྐྲུན་ཆེད་ཡིན། གཟུགས་པོ་ཐང་པོ་བྱུང་ན་ངས་རྒྱུན་འཁྱོངས་བྱེད་ཀྱི་ཡིན”ཞེས་ངག་སྒྲོལ་གྱིས་བཤད།

འོད་ཟེར། བུད་མེད་མང་ཚོགས་ཀྱི་གྲོགས་པོ་བློས་ཐུབ།

འདི་ལོ་ལོ་55ལ་སླེབས་པའི་འོད་ཟེར་གྱིས་2014ལོ་ནས་བཟུང་གླང་དམར་གྲོང་ཚོའི་བུད་མེད་མཉམ་འབྲེལ་ལྷན་ཚོགས་ཀྱི་ཀྲུའུ་ཞིའི་འགན་འཁུར་བ་དང་2020ལོར་དངོས་སུ་ལས་གནས་ནས་ཕྱིར་འཐེན་བྱས། ཁོ་མོས་སྤྱིར་བཏང་གི་ལས་གནས་ཐོག་ནུས་ཤུགས་ཡོད་རྒུས་བུད་མེད་ཚོར་ཞབས་འདེགས་ཞུས།

གླང་དམར་གྲོང་ཚོར་མིང་ལ་ཆོས་སྒྲོན་ཟེར་བའི་བུ་མོ་ཞིག་ཡོད། ཆོས་སྒྲོན་གྱི་སྐོར་གླེང་མ་ཐག་འོད་ཟེར་རང་དབང་མེད་པར་མིག་ཆུ་ཤོར། ཆོས་སྒྲོན་ལོ་30ལྷག་ཙམ་ལ་སླེབས་སྐབས་ཕ་མ་གཉིས་ཀ་ཚེ་ལས་འདས་ཤིང་། དེ་རྗེས་ཁྱོ་ག་དང་ཡང་ཁག་ཁག་བྱས། རྐྱེན་ངན་གོད་ཆག་བསྟུད་མར་བྱུང་བ་ལས་ཁོ་མོར་སྨྱོ་ནད་ཕོག གྲོགས་མེད་ཁེར་རྐྱང་གི་ཆོས་སྒྲོན་མཐོང་རྗེས་འོད་ཟེར་གྱིས་ཁོ་མོ་རང་ཁྱིམ་དུ་ཁྲིད་ནས་ལྟ་རྟོག་བྱེད་རྒྱུའི་སེམས་ཐག་བཅད།

ལོ་གཉིས་རིང་ཆོས་སྒྲོན་ལ་ལྟ་རྟོག་བྱེད་རིང་འོད་ཟེར་གྱིས་དུས་བཀག་ལྟར་ཁོ་མོ་སྨན་ཁང་དུ་ཁྲིད་ནས་སྨན་བཅོས་བྱས་པས་ཡུན་རིང་མ་སོང་བར་ཆོས་སྒྲོན་གྱི་ན་ཚ་ཡང་རིམ་བཞིན་དྲག་སྐྱེད་བྱུང་།

འོད་ཟེར་གྱིས་རང་ཉིད་ལོ་ན་རྒས་པ་དང་ཆབས་ཅིག སླད་ཕྱིན་ཆོས་སྒྲོན་ལ་ལྟ་རྟོག་ཡག་པོ་བྱེད་ཐུབ་མིན་ཐད་ལ་སེམས་ཁྲལ་བྱུང་། དེར་བརྟེན་གྲོང་ཚོར་ཡར་ཞུ་བྱས་ཏེ་དངུལ་གྲབས་གསོག་བྱས་ནས་རང་ཁྱིམ་གྱི་ཉེ་འགྲམ་དུ་ཆོས་སྒྲོན་ལ་ཁང་པ་ཞིག་བརྒྱབ་པ་མ་ཟད། ཕྱུགས་ཟོག་མགོ་གྲངས་བཅུ་ལྷག་ཙམ་་དང་འབྲས་དང་རྩམ་པ་སྣུམ་སོགས་དངོས་ཟོག་སྣ་ཚོགས་ཉོས་ནས་ཁོ་མོ་རང་མགོ་ཐོན་ཐབས་བྱས། “ངའི་སེམས་ཁྲལ་ཆེ་ཤོས་ནི་ཆོས་སྒྲོན་རེད་འདུག”ཅེས་འོད་ཟེར་གྱིས་ངུ་སྐད་ཐོན་བཞིན་བཤད།

ཆོས་སྒྲོན་ལ་རོགས་རམ་བྱེད་པ་ཕུད། འོད་ཟེར་གྱིས་ད་དུང་བུད་མེད་ཚོའི་ལས་ཀ་དང་འཚོ་བར་ལྟ་རྟོག་གིས་ཚང་མའི་ཡོང་འབབ་མང་དུ་གཏོང་གང་ཐུབ་བྱས།

ལས་འགན་འཁུར་མ་ཐག་པའི་ལོ་དེའི་དབྱར་ཁར། འོད་ཟེར་དང་བུད་མེད་གཞན་4ཡིས་གྲོང་ཚོའི་མཉམ་སྡེབ་དཔལ་འབྱོར་ཡིན་པའི་གླིང་ཁ་འགན་གཙང་བླངས་པར་ལོ་དེར་ཡོང་འབབ་སྒོར་ཁྲི་2ལྷག་ཙམ་བྱུང་། དེ་རྗེས་ཁོ་མོས་རང་ཁྱིམ་གྱི་ཁང་པ་སྟོང་པ་ཞིག་གྲོང་ཚོའི་བུད་མེད་མཉམ་འབྲེལ་ཇ་ཁང་དུ་བསྒྱུར་བར་ཚོང་ཧ་ཅང་ཡག་པོ་བྱུང་། ན་ནིང་ལོ་མཇུག་ཏུ་ཇ་ཁང་གིས་གྲོང་ཚོ་ཡོངས་ཀྱི་བུད་མེད་ལ་བགོ་འགྲེམས་སྒོར་ཁྲི་10ལྷག་ཙམ་བརྒྱབ།

གྲོང་ཚོའི་བུད་མེད་མཉམ་འབྲེལ་ལྷན་ཚོགས་ཀྱི་ཀྲུའུ་ཞིའི་འགན་འཁུར་བའི་ལོ་6རིང་འོད་ཟེར་གྱི་ཁྱིམ་རྒྱལ་ཁབ་རིམ་པའི“ཁྱིམ་ཚང་ཡག་ཤོས”ལ་བདམས་པ་དང་ཁོ་མོ་མི་སྒེར་ཡང“སྔོན་ཐོན་ལས་དོན་པ”དང“ཕུལ་བྱུང་གུང་ཁྲན་ཏང་ཡོན”ལ་ཐེངས་མང་བདམས།