“དབུགས་རྡིག་དེ་དངོས་གནས་སྤྱོད་གོ་ཆོད་པོ་འདུག ང་ཚོས་ཚགས་ཤ་ཕྲན་བུ་བཙོས་ཏེ་བྲོ་བ་ཞིག་ལྟ་ཙམ་བྱས་ན”ཉེ་ཆར“ས་མཐོའི་དབུགས་རྡིག”ཅིག་ལས་ལྷ་ས་གྲོང་ཁྱེར་སྙེ་མོ་རྫོང་གཞུ་སྨད་ཤང་གི་གྲོང་མི་བཀྲ་དབང་ཁྱིམ་ལ་བདེ་སྐྱིད་ཀྱི་ཚོར་སྣང་ཆེན་པོ་བྱུང་བ་རེད།

བོད་ནི་ས་བབ་མཐོ་བ་དང་། རླུང་གནོན་དམའ་བ། ཆུ་འཁོལ་ཚད་དམའ་བ་བཅས་ཡོད་པས་ལྟོ་ཆས་ཚོས་པོ་དང་ཆུའི་དྲོད་ཚད་ཨང་གྲངས100བར་འཁོལ་ཐུབ་པ་ལ་སོགས་རྒྱུན་གཏན་འཚོ་བའི་ཁྲོད་ཀྱི་སྤྱིར་བཏང་གི་བྱ་བ་དེ་དག་ས་བབ་མཐོ་ཚད་སྨི་3000ཡན་གྱི་ས་མཐོར་མངོན་འགྱུར་ཐུབ་དཀའ་པོ་ཞིག་རེད།

“ས་མཐོའི་དབུགས་རྡིག”ཅིག་ལས་བྱ་བ་དེ་དག་ཧ་ཅང་གིས་འགྲུབ་སླ་བར་གྱུར་ཡོད།

“སྲོལ་རྒྱུན་གྱི་དབུགས་རྡིག་སྤྱོད་སྐབས་རྙོག་འཛིང་ཆེ་ལ་བྱེད་ནུས་རྐྱང་པ་ཡིན་པའི་ཁར་ཆུ་བཤོས་ཏེ་གནོན་ཤུགས་གཅོག་དགོས་ཀྱི་ཡོད་ལ་ཆུ་བཤོ་ཡུན་རིང་དྲགས་ཚེ་ཟས་རིགས་ཀྱི་བྲོ་བ་ཉམས་ཀྱི་ཡོད”བཀྲ་དབང་གིས“ས་མཐོའི་དབུགས་རྡིག”བེད་སྤྱོད་བཞིན་དུ་གསར་འགོད་པར“ཁྱེད་རང་ལྟོས་དང་། ཤ་རིགས་ཀྱི་བྱེད་ནུས་མཐེབ་གནོན་བསྣན་ཚེ་སྐར་མ་ཁ་ཤས་ལས་མི་འགོར་བར་དྲན་སྐུལ་སྒྲ་གྲགས་ཏེ་ཁེབས་གཅོད་སྟེང་ནས་དྲོད་ཚད་ཨང་གྲངས་100སླེབས་པ་མངོན་གྱི་ཡོད། དབུགས་རྡིག་དེ་སྤྱོད་སྟབས་ཧ་ཅང་བདེ་པོ་འདུག་པས་སྤྲད་པའི་ཉིན་དེ་གར་བེད་སྤྱོད་བྱེད་ཤེས་བྱུང་ལ་ངེད་ཚོའི་ནང་མི་ཚང་མས་དེ་སྤྱོད་རྒྱུར་དགའ་པོ་ཡོད”ཅེས་བཤད།

དབུགས་རྡིག་ཆུང་ཆུང་དེས་མི་སེར་གྱི་དམངས་འཚོར་ཕན་བཏགས་ཤིང་། མང་ཚོགས་ཀྱི་དགོས་མཁོ་དེ་བས་ལེགས་པའི་སྒོ་ནས་སྐོང་ཆེད་2022ལོ་ནས་བཟུང་བོད་རང་སྐྱོང་ལྗོངས་དཔལ་འབྱོར་དང་ཆ་འཕྲིན་ཅན་ཐིང་གིས་རྒྱལ་ནང་གི་འབྲེལ་ཡོད་སྣེ་འདྲེན་ཐབ་ཆས་ཁེ་ལས་དང་མཉམ་འབྲེལ་བྱས་ཏེ་དུས་ཡུན་ཟླ་བ་གསུམ་རིང་ས་མཐོའི་ས་ཁུལ་དུ་འཚམ་པའི་ནུས་མང་ཐབ་ཆས་སྣ་ཁ་14ཞིབ་སྤེལ་བྱས་པ་དང་ཁེ་བེད་བདག་ཐོབ་ཁག་18རེ་ཞུ་བྱས་པ་རེད།

ལོ་དེ་གར་བོད་ཀྱི་ས་མཐོའི་ནུས་མང་ཐབ་ཆས་ཐོན་སྐྱེད་ཀུང་སི་དང་པོ་སྟེ་བོད་ལྗོངས་ཧྲང་ཁྲུའུ་ཐབ་ཆས་ཚན་རྩལ་ཚད་ཡོད་ཀུང་སི་ལྷ་སའི་དཔལ་འབྱོར་ལག་རྩལ་གསར་སྤེལ་ཁུལ་དུ་གཞིས་ཆགས་ཤིང་། “ཀུང་སི་དེས་ས་ཁྱོན་སྨི་ངོས་གྲུ་ཁྲི་1.3ལྷག་ཙམ་བཟུང་བ་དང་ཁྱོན་མ་རྩ་སྒོར་ཁྲི་4000བཏང་ནས་མིག་སྔར་ཐོན་སྐྱེད་སྒྲུབ་རིམ་བདུན་བསྐྲུན་ཟིན་པར་ལོར་ས་མཐོའི་བྱེད་ནུས་མང་བའི་དབུགས་རྡིག་ཁྲི་100ཐོན་སྐྱེད་ཐུབ་ཀྱི་ཡོད”ཅེས་ཀུང་སིའི་འགན་འཁུར་བ་ཀའོ་ཅིའུ་ཧོས་ངོ་སྤྲོད་བྱས།

ཐོན་སྐྱེད་འཁོར་ཁང་འགྲམ་གྱི་སྤུས་ཚད་ཞིབ་བཤེར་འཁོར་ཁང་དུ་སྐྱོད་སྐབས་ལས་དོན་མི་སྣས་ཁྲོམ་རར་གསར་དུ་འདོན་རྒྱུའི་ཇ་བསྲུབས་འཕྲུལ་ཆས་ཚོད་ལྟ་བྱེད་བཞིན་ཡོད་པ་དང“དེ་ནི་ཐོན་རྫས་གསར་པ་ཞིག་ཡིན། དེས་སྐར་ཆ་60ཡི་ནང་ཇ་བསྲུབས་མ་ཕོར་པ་གང་བཟོ་ཐུབ་པས་དུས་ཚོད་དང་ནུས་ཤུགས་གྲོན་ཆུང་ཐུབ་ཀྱི་ཡོད”ཅེས་བཤད།

ཚང་མའི་ཡིད་ཆེས་ཐོབ་པར་བྱ་ཆེད་ལས་དོན་མི་སྣས་ཡུལ་དེ་གར་བཀོལ་སྤྱོད་བྱེད་འགོ་ཚུགས་ནས་སྔོན་ལ་ཆུ་ཚ་པོ་དང་། ཇ། མར། ཚྭ་བཅས་བླུགས་རྗེས་ཇ་བཟོའི་མཐེབ་གནོན་བསྣན་མ་ཐག“ཏིར”ཞེས་པའི་སྒྲ་དང་བཅས་ཇ་བཟོས་ཟིན་ནས་ལས་དོན་པས་ཚང་མར་ཇ་བཏེགས།

“མགྱོགས་པོ་དེ་འདྲ་རེད་པས། ངེད་ཚོ་ཆུང་དུས་ནས་ཇ་བསྲུབས་མ་འཐུང་གི་ཡོད་ལ་ཇ་བཟོ་བའི་བརྒྱུད་རིམ་ཕར་བཞག་ཇ་དྭངས་བཀོལ་བ་ཁོ་ནར་ཆུ་ཚོད་གཅིག་གཉིས་ཙམ་འགོར་གྱི་ཡོད”ཅེས་མཉམ་དུ་ཡོད་པའི་བོད་རིགས་ཕོ་གསར་ཞིག་གིས་བསམ་ཡུལ་ལས་འདས་པའི་ངང་དེ་ལྟར་ཤོད་བཞིན་དུ་ཧུབ་གང་བཏུངས་རྗེས་བྲོ་བ་དེ་བས་ཞིམ་པོ་འདུག་ཅེས་བཤད།

ས་མཐོའི་ས་ཁུལ་དུ་འཚམ་པའི་ནུས་མང་ཐབ་ཆས་ཞིབ་སྤེལ་དང་ཁྱབ་གདལ་གཏོང་བ་ནི་བོད་རང་སྐྱོང་ལྗོངས་ཀྱིས་ཁྱབ་གདལ་བཏང་བའི་དམངས་འཚོའི་འདུ་འགོད་ཅིག་རེད། འབྱུང་འགྱུར་བོད་ཀྱིས་ཐོན་ལས་འཕེལ་རྒྱས་ཀྱི་འཁོར་སྦྲེལ་སྣུར་སྲིང་བྱེད་པ་དང་ཐོན་ལས་འཕེལ་རྒྱས་ཀྱི་སྤེལ་རེས་མཉམ་ལས་གཏིང་ཟབ་ཏུ་བཏང་ནས་ཁྱད་ཆོས་མངོན་གསལ་དོད་པ་དང་། ལག་རྩལ་སྔོན་ཐོན། སྤུས་རྟགས་འབུར་དུ་ཐོན་པ་བཅས་ཀྱི་དེང་རབས་ཅན་གྱི་ཐབ་ཆས་ཐོན་ལས་མ་ལག་བསྐྲུན་ནས་ས་མཐོའི་མི་རིགས་ཁག་གི་མང་ཚོགས་ཀྱི་འཚོ་བའི་སྤུས་ཚད་མཐོ་རུ་གང་ཐུབ་གཏོང་རྒྱུ་རེད།