ད་ལོ་ལོ་36ལ་སླེབས་པའི་ཆོས་སྒྲོན་དཔལ་བཟང་ལ་དེ་སྔ་བདེ་སྐྱིད་ལྡན་པའི་ཁྱིམ་ཚང་ཞིག་ཡོད། ཁོང་གི་ཕ་པད་མ་ཨོ་རྒྱན་གྱིས་ལོ་38ཉིན་གཅིག་ལྟར་མཐའ་མཚམས་སུ་སྐྱོད་སའི་གྲོང་ཚོའི་ཟམ་ཆེན་དེར་འོས་འགན་ལྟ་སྲུང་བྱས་པས་གྲོང་ཚོ་ཡོངས་ཀྱི་གུས་བཀུར་ཐོབ་པ་མ་ཟད། གསར་འགྱུར་སྨྱན་སྦྱོར་གྱིས་རྒྱ་ཁྱབ་ངང་གཏོང་སྤེལ་བྱས་ཏེ་མི་རྣམས་ཀྱིས་གུས་བཀུར་ཆེན་པོས་ཁོང་ལ“ཟམ་སྲུང་རྒན་པོ”ཞེས་འབོད་ཀྱི་ཡོད། ཆུང་དུས་ནས་ཕ་མའི་བྱམས་སྐྱོང་འོག་འཚར་ལོངས་བྱུང་བའི་ཆོས་སྒྲོན་དཔལ་བཟང་ལ་དཀའ་ངལ་གང་ཡང་འཕྲད་མྱོང་མེད་པ་དང་བདེ་ཐང་ངང་འཚར་ལོངས་བྱུང་རྗེས་གཉེན་སྒྲིག་བྱས་ནས་ཕྲུ་གུ་སྐྱེས་ཡོད།

འོན་ཀྱང་གནམ་ལ་སྤྲིན་རླུང་འགྱུར་ལྡོག་ཚོད་དཔག་དཀའ། མི་ལ་ཕན་གནོད་ཇི་ཡོང་ངེས་གཏན་མེད་ཅེས་པ་ལྟར། 2020ལོ་ནས་2022ལོའི་བར་ཆོས་སྒྲོན་དཔལ་བཟང་གི་ཕ་མ་གཉིས་སྔ་རྗེས་སུ་གྲོངས་པ་དང་བཟའ་ཚང་ཡང་ཁ་བྲལ་ནས་སེམས་ལ་སྡུག་བསྔལ་ཆེན་པོ་བྱུང་། དེ་སྔ་འཆམ་མཐུན་དང་བདེ་སྐྱིད་ལྡན་པའི་ཁྱིམ་ཚང་དེར་ཁོང་རང་གཅིག་པུ་ལས་ལྷག་མེད། ཁོང་གི་བཟའ་ཟླས་ཁྱིམ་གྱི་སྒོ་ཕྱུགས་བཙོངས་རྗེས་རླངས་འཁོར་ཉོས་པ་མ་ཟད། ད་དུང་ཁོང་གི་ཕྲུ་གུ་གསུམ་འཁྲིད་པས་འཚོ་བ་བདེ་སྐྱིད་ནས་སྡུག་བསྔལ་གྱི་གནས་སུ་ལྷུངས་ཏེ་རིམ་གྱིས་སེམས་ཐང་པོ་མེད་པར་གྱུར་པ་མ་ཟད། ཐ་ན་རང་མགོ་ཡང་ཐོན་གྱི་མེད།

སྟབས་ལེགས་པ་ཞིག་ལ་ཏང་ཨུད་དང་། སྲིད་གཞུང་། སེམས་རྩ་འཁོལ་བའི་གྲོང་མི་བཅས་ཀྱིས་དུས་ཐོག་ཏུ་རོགས་སྐྱོར་བྱས་པ་དང་། གྲོང་ཚོའི་བུད་མེད་མཉམ་འབྲེལ་ལྷན་ཚོགས་ཀྱི་ཀྲུའུ་ཞིའི་ལས་གནས་ནས་བབས་མ་ཐག་པའི་འོད་ཟེར་གྱིས་རང་འགུལ་ངང་ཆོས་སྒྲོན་དཔལ་བཟང་རང་ཁྱིམ་དུ་བསུས་ནས་རང་གི་བུ་མོ་ལྟར་བརྩིས་ཏེ་ལོ་གཉིས་ལྷག་ཙམ་ལྟ་རྟོག་ཧུར་ཐག་བྱས་པ་རེད།

འོད་ཟེར་གྱི་ལྟ་རྟོག་ཞིབ་ཚགས་འོག ཆོས་སྒྲོན་དཔལ་བཟང་གི་སེམས་ཁམས་རིམ་བཞིན་ཐང་དུ་ཕྱིན་པ་དང་འཚོ་བ་ཡང་རང་རྐྱ་འཕེར་ནས་སྐབས་འགར་ཕྱུགས་འཚོ་བར་ཡང་སྐྱོད་ཀྱི་ཡོད།

འོད་ཟེར་གྱིས་ཉིན་ཞིག་རང་ཉིད་རྒས་ནས་ཆོས་སྒྲོན་དཔལ་བཟང་ལ་ལྟ་རྟོག་བྱེད་ཐབས་བྲལ་བ་བསམ་བློ་འཁོར་ནས་ན་ནིང་ཟླ་7པར་གྲོང་ཚོའི“ཨུ་ལྷན་གཉིས”ཀྱི་ཚན་ཁག་ལ་རང་ཁྱིམ་གྱི་ཁང་པའི་འགྲམ་དུ་ཆོས་སྒྲོན་དཔལ་བཟང་ལ་ཁང་པ་གསར་པ་ཞིག་རྒྱག་རྒྱུའི་རེ་བ་ཞུས། དེ་ལྟར་བྱས་ཚེ་བུ་མོ་དེར་མུ་མཐུད་ལྟ་རྟོག་བྱེད་བདེ་བ་མ་ཟད། ཁོ་མོའི་རང་མགོ་རང་ཐོན་གྱི་ནུས་པ་ཡང་ཆེ་རུ་གཏོང་ཐུབ”ཅེས་བཤད། 

གླང་དམར་གྲོང་ཚོའི་ཏང་ཀྲི་པུའུ་ཧྲུའུ་ཅི་ཟླ་བ་རིག་འཛིན་གྱིས་དེའི་སྐོར་ཐོས་མ་ཐག་དེ་ནི་བྱ་བ་བཟང་པོ་ཞིག་རེད་སྙམ་ནས་འཕྲལ་དུ་གྲོང་ཚོ་ཡོངས་ཀྱི་ཏང་ཡོན་ཚོགས་ཆེན་ཐོག་གྲོས་འགོ་བཏོན་པར་ཏང་ཡོན་ཡོངས་ཀྱི་མོས་མཐུན་མཐའ་གཅིག་ཏུ་ཐོབ་པ་རེད།

དེ་རྗེས་ཁོང་གིས་གཅེས་སེམས་ཁེ་ལས་མཁས་ཅན་ཞིག་དང་འབྲེལ་གཏུག་བྱས་ནས་ས་ཕག་ཞལ་འདེབས་བརྒྱབ་པ་དང་ཏང་ཡོན་གཞན་དག་68དང་མཉམ་དུ་ནུས་ཤུགས་གང་ཡོད་ཀྱིས་ལས་ཀ་ཧུར་ཐག་བྱས་མཐར་ཉིན་བརྒྱད་ནང་ཁང་པ་གསར་པ་ཞིག་བརྒྱབ། ན་ནིང་ཟླ་9པར་མུ་མཐུད་ལུག་ཚང་བརྒྱབ་པ་དང་། འདི་ལོའི་ཟླ་5པར་སླར་ཡང་ཁང་པའི་ཕྱིའི་གྱང་ལ་དཀར་རག་བྱུགས་པ་དང་གྱང་སྐོར། སྒྲིག་ཆས་ཆ་ཚང་བའི་ཁང་ཆུང་བསྐྲུན་རྗེས་མི་ཧྲེང་ཆོས་སྒྲོན་དཔལ་བཟང་ལ་མུ་མཐའ་མེད་པའི་རྩྭ་ཐང་ཐོག་དྲོ་སྐྱིད་ལྡན་པའི་སྡོད་ཁང་ཞིག་ཡོད་པར་འགྱུར།

“མི་མང་པོས་མཉམ་དུ་བརྒྱབ་པས་མགྱོགས་པོ་ཚར་སོང་། ཞལ་འདེབས་བརྒྱབ་པའི་ས་ཕག་ཕུད། ཨར་འདམ་དང་སྤྱིན་རྩི་སོགས་འཛུགས་སྐྲུན་རྒྱུ་ཆ་ཚང་མ་ཏང་ཡོན་གྱིས་མ་དངུལ་བསྡུ་རུབ་བྱས་ནས་ཉོས་པ་ཡིན། ང་ཚོས་ཁྱོན་སྒོར་5000ལྷག་ཙམ་གྲབས་གསོག་བྱས་པ་མ་ཟད། ད་དུང་ཁོང་ལ་འཚམས་འདྲིའི་དངུལ་སྒོར་1500དང་འབྲས་དང་གྲོ་ཞིབ་སྣུམ་སོགས་འཚོ་བའི་དངོས་རྫས་ཀྱང་སྤྲད་པ་ཡིན”ཞེས་ཟླ་བ་རིག་འཛིན་གྱིས་གསར་འགོད་པར་བཤད།

གླང་དམར་གྲོང་ཚོའི་སེམས་རྩ་འཁོལ་བའི་མང་ཚོགས་གཞན་དག་གིས་ཀྱང་ཆོས་སྒྲོན་དཔལ་བཟང་ལ་ལུག་23ཞལ་འདེབས་བརྒྱབ་ནས་ཁོང་གི་ཕྱིས་འབྱུང་གི་འཚོ་བ་འགན་ལེན་ཐུབ་པ་བྱས་ཡོད།

དགུན་ས་འདམ་རར་དབྱར་རླུང་ལྡང་བ་དང་བསྟུན་ཏེ་འོད་ཟེར་དང་ཆོས་སྒྲོན་དཔལ་བཟང་གཉིས་ལག་གདང་སྦྲེལ་ནས་དལ་བུར་སྐྱོད་བཞིན་ཡོད་པ་དང་། གླང་དམར་གྲོང་ཚོའི་གཅེས་སེམས་ཆེ་མོ་ལས་དེ་གའི་མི་རྣམས་ཀྱི་སེམས་ལ་དྲོ་སྐྱིད་སྟེར་བཞིན་ཡོད།