འདི་ག་ཚགས་པར་གྱི་གསར་འགོད་པ། ཆུས་ཕེ་དང་། ཆུས་སུང་། ཧུའུ་ཙེ་ཤིས།

ས་གནས་དེ་གའི་དུས་ཚོད་ཟླ་7ཚེས་5ཉིན་གྱི་ཕྱི་དྲོར། རྒྱལ་ཁབ་ཀྱི་ཀྲུའུ་ཞི་ཞི་ཅིན་ཕིང་དང་ཐ་ཇིག་སི་ཐན་གྱི་ཙུང་ཐུང་ལཱ་ཧོ་མོང་རྣམ་གཉིས་གྲོང་ཁྱེར་དུ་ཤང་པེ་རུ་ཀྲུང་གོ་ཕྱོགས་ཀྱིས་ཐ་ཇིག་སི་ཐན་ལ་སྐྲུན་རོགས་བྱས་པའི་གྲོས་ཚོགས་ཐོག་བརྩེགས་ཁང་ཆེན་དང་སྲིད་གཞུང་ཐོག་བརྩེགས་ཁང་ཆེན་ལས་འགྲུབ་མཛད་སྒོར་མཉམ་དུ་ཞུགས་པ་རེད།

ལས་མཇུག་འགྲིལ་མ་ཐག་པའི་ཐ་ཇིག་སི་ཐན་གྱི་གྲོས་ཚོགས་ཐོག་བརྩེགས་ཁང་ཆེན་ནི་བརྗིད་ཆགས་ཉམས་དགའ་བ་ཞིག་ཡོད། ཙུང་ཐུང་ལཱ་ཧོ་མོང་གིས་གྲོས་ཚོགས་ཐོག་བརྩེགས་ཁང་ཆེན་གྱི་མདུན་དུ་སྤྲོ་སེམས་འཁོལ་བའི་ངང་ཀྲུའུ་ཞི་ཞི་ཅིན་ཕིང་ལ་བསུ་བ་ཞུས་པ་རེད།

ཙུང་ཐུང་ལཱ་ཧོ་མོང་གི་ཕེབས་རོགས་འོག་ཀྲུའུ་ཞི་ཞི་ཅིན་ཕིང་གྲོས་ཚོགས་ཐོག་བརྩེགས་ཁང་ཆེན་དུ་ཕེབས་ཤིང་། རྒྱལ་ཁབ་གཉིས་པོའི་གཙོ་བདག་གིས་ཀྲུང་གོ་ཕྱོགས་ཀྱིས་ཐ་ཇིག་སི་ཐན་ལ་སྐྲུན་རོགས་བྱས་པའི་གྲོས་ཚོགས་ཐོག་བརྩེགས་ཁང་ཆེན་དང་སྲིད་གཞུང་ཐོག་བརྩེགས་ཁང་ཆེན་གྱི་རྣམ་གྲངས་འགྲེམས་པང་ལ་མཉམ་དུ་གཟིགས་སྐོར་གནང་བ་དང་ཐོག་བརྩེགས་ཁང་ཆེན་གྱི་སྒོ་བྱང་གི་ཡོལ་ཁེབས་མཉམ་དུ་ཕྱེས་གནང་བ་རེད།

2019ལོའི་ཟླ་6པར། ཀྲུའུ་ཞི་ཞི་ཅིན་ཕིང་གིས་ཐ་ཇིག་སི་ཐན་ལ་རྒྱལ་དོན་འཚམས་འདྲི་གནང་རིང་རྒྱལ་ཁབ་གཉིས་པོའི་གཙོ་བདག་ཀྲུང་གོ་ཕྱོགས་ཀྱིས་ཐ་ཇིག་སི་ཐན་ལ་སྐྲུན་རོགས་བྱས་པའི་གྲོས་ཚོགས་ཐོག་བརྩེགས་ཁང་ཆེན་དང་སྲིད་གཞུང་ཐོག་བརྩེགས་ཁང་ཆེན་གྱི་རྣམ་གྲངས་དཔེ་དབྱིབས་ཀྱི་ཡོལ་ཁེབས་ཕྱེ་བའི་མཛད་སྒོར་མཉམ་དུ་ཞུགས་པ་རེད།

“དེ་རིང་ཐོག་བརྩེགས་ཁང་ཆེན་གཉིས་དངོས་སུ་ལེགས་གྲུབ་ཟིན་པས་ཐ་ཇིག་སི་ཐན་གྲོས་ཚོགས་དང་སྲིད་གཞུང་གི་གཞུང་དོན་སྒྲུབ་པའི་ཆ་རྐྱེན་ཧ་ཅང་ལེགས་སུ་འགྲོ་རྒྱུ་དང་ཀྲུང་ཐའི་མཛའ་མཐུན་མཉམ་ལས་མཚོན་པའི་གནས་རྟགས་གསར་པར་འགྱུར་རྒྱུ་རེད” ཀྲུའུ་ཞི་ཞི་ཅིན་ཕིང་གིས། ཀྲུང་གོ་ཕྱོགས་ཀྱིས་ཐ་ཇིག་སི་ཐན་ཕྱོགས་དང་མཉམ་དུ་མཉམ་གྲོས་དང་མཉམ་སྐྲུན་མཉམ་སྤྱོད་ཀྱི་རྩ་དོན་མུ་མཐུད་རྒྱུན་འཁྱོངས་བྱས་ཏེ་ཐ་ཇིག་སི་ཐན་དུ་མཉམ་ལས་རྣམ་གྲངས་དེ་བས་མང་བ་ལག་ལེན་བསྟར་ནས་ཐ་ཇིག་སི་ཐན་གྱི་དཔལ་འབྱོར་དང་སྤྱི་ཚོགས་འཕེལ་རྒྱས་ལ་ལེགས་སྐྱེས་དེ་བས་ཆེ་བ་འབུལ་འདོད་ཡོད་ཅེས་ནན་བཤད་གནང་བ་རེད།

ཙུང་ཐུང་ལཱ་ཧོ་མོང་གིས། ཐོག་བརྩེགས་ཁང་ཆེན་དེ་གཉིས་ལ་ཐ་ཇིག་སི་ཐན་གྱི་སྐྲུན་དངོས་ཀྱི་ཉམས་འགྱུར་དང་ཀྲུང་གོའི་སྐྲུན་དངོས་ལག་རྩལ་མཉམ་འདྲེས་ཡག་པོ་བྱུང་བ་དང་དེ་ནི་ཐ་ཇིག་སི་ཐན་དང་ཀྲུང་གོའི་མཛའ་གཅུགས་ཟབ་མོའི་དཔང་པོ་ཞིག་ཡིན་པས། ཐ་ཀྲུང་འབྲེལ་བའི་ལོ་རྒྱུས་དེབ་ཐེར་ནང་བཀོད་ནས་ཐ་ཇིག་སི་ཐན་མི་དམངས་ཀྱིས་མི་རབས་ནས་མི་རབས་བར་བསྔགས་བརྗོད་བྱེད་ངེས་རེད། ངས་ཐ་ཇིག་སི་ཐན་མི་དམངས་ཀྱི་ཚབ་ཞུས་ནས་ཀྲུང་གོས་སྒེར་སེམས་མེད་པའི་རོགས་རམ་གནང་བ་དང་དེ་བཞིན་ཀྲུང་གོའི་འཛུགས་སྐྲུན་པས་དཀའ་སྤྱད་འབད་བརྩོན་གནང་བར་སྙིང་ཐག་པ་ནས་ཐུགས་རྗེ་ཆེ་ཞུ་རྒྱུ་ཡིན་ཞེས་གསུངས་པ་རེད།

ཀྲུང་གོ་ཕྱོགས་ཀྱིས་ཐ་ཇིག་སི་ཐན་ལ་སྐྲུན་རོགས་བྱས་པའི་གྲོས་ཚོགས་ཐོག་བརྩེགས་ཁང་ཆེན་དང་སྲིད་གཞུང་ཐོག་བརྩེགས་ཁང་ཆེན་གྱི་རྣམ་གྲངས་ནི་ཀྲུང་གོས་ཕྱི་ཕྱོགས་ལ་སྐྲུན་རོགས་བྱས་པའི་རྣམ་གྲངས་ཁྲོད་མཉམ་འབྲེལ་ཇུས་འགོད་ཀྱི་རྣམ་པའི་ཐོག་ནས་ལག་བསྟར་བྱེད་ཐེངས་དང་པོ་ཡིན་པ་དང་། དེ་ནི་ཐ་ཇིག་སི་ཐན་གྱི་སྐྲུན་དངོས་ཀྱི་ཉམས་འགྱུར་དང་ཀྲུང་གོའི་སྐྲུན་དངོས་ལག་རྩལ་ཟུང་འབྲེལ་བྱས་པའི་དཔེ་མཚོན་ཞིག་ཡིན་ལ་རྒྱལ་ཁབ་གཉིས་པོས“རྒྱུད་གཅིག་ལམ་གཅིག”མཉམ་སྐྲུན་བྱས་པའི་གྲུབ་འབྲས་གལ་ཆེན་ཞིག་ཀྱང་ཡིན།

ཐ་ཇིག་སི་ཐན་གྱི་བཟོ་པ་མུའུ་སི་ཐ་ཕུའུ་གྲོས་ཚོགས་ཐོག་བརྩེགས་ཁང་ཆེན་གྱི་རྣམ་གྲངས་འཛུགས་སྐྲུན་བྱེད་འགོ་ཚུགས་པ་ནས་བཟུང་དེའི་ནང་ཞུགས་ཡོད། ཁོང་གིས་གསར་འགོད་པར། ཐ་ཇིག་སི་ཐན་མི་དམངས་ཀྱིས་ཐོག་བརྩེགས་ཁང་ཆེན་སྔ་ཙམ་བསྐྲུན་ཐུབ་པའི་རེ་སྒུག་བྱེད་ཀྱི་ཡོད། རང་ཉིད་རྣམ་གྲངས་དེའི་ནང་ལས་ཀ་བྱེད་རིང་རྟག་ཏུ་གཉེན་ཉེ་དང་གྲོགས་པོས་འཛུགས་སྐྲུན་གྱི་འཕེལ་རིམ་སྐད་ཆ་ཡང་ཡང་འདྲི་གི་འདུག “ཀྲུང་གོའི་ཚོགས་པ་དང་མཉམ་དུ་ལས་ཀ་བྱེད་རིང་ཁོང་ཚོའི་ལྷག་བསམ་རྣམ་དག་ཚོར་གྱི་འདུག དེའི་ནང་ཞུགས་ཐུབ་པ་ནི་ངའི་གཟི་བརྗིད་ཡིན”ཞེས་བརྗོད།

སྲིད་གཞུང་ཐོག་བརྩེགས་ཁང་ཆེན་རྣམ་གྲངས་ཀྱི་ཐ་ཇིག་སི་ཐན་ཕྱོགས་ཀྱི་འགན་འཁུར་བ་ཨ་ཧོ་མཱ་ཏེ་པེ་ཁེ་ཙུའོ་ཏ·ཡིའུ་སུའུ་ཕུའུ་དེ་སྔོན་གྲོང་ཁྱེར་དུ་ཤང་པེ་དང་པེ་ཅིང་བར་འགྲོ་འོང་ཐེངས་མང་བྱས་ནས་ཇུས་འགོད་ཀྱི་ཇུས་གཞིར་གྲོས་བསྡུར་བྱས་ཤིང་། རྣམ་གྲངས་དེ་དཔེ་རིས་ནས་རིམ་བཞིན་དོན་དངོས་སུ་འགྱུར་བའི་དཔང་པོ་བྱས་ཡོད། ཡིའུ་སུའུ་ཕུའུ་ཡིས་སྲིད་གཞུང་གི་ཐོག་བརྩེགས་ཁང་ཆེན་གསར་རྐྱང་དེ་འཛུགས་སྐྲུན་གྱི་ཕུལ་བྱུང་བརྩམས་ཆོས་ཤིག་རེད་ཅེས་དགའ་ཚོར་ཆེན་པོས་བརྗོད། ཁོང་གིས“ཐོག་བརྩེགས་ཁང་ཆེན་དེ་གཉིས་ཀྱིས་གྲོང་ཁྱེར་ལ་བཀྲག་མདངས་སྦྱིན་པ་མ་ཟད། ཐ་ཀྲུང་དབར་མཛའ་གཅུགས་ཟབ་མོ་ལྡན་པའི་དཔང་པོ་གཞན་ཞིག་ཏུ་འགྱུར་ངེས་ཡིན་པ་ང་ཚོར་ཡིད་ཆེས་ཡོད”ཅེས་བརྗོད།

རྣམ་གྲངས་འཛུགས་སྐྲུན་ཕྱོགས་ཡིན་པའི་ཅང་སུའུ་ཅང་ཏུའུ་འཛུགས་སྐྲུན་ཚོགས་པའི་ཕྱི་རྒྱལ་དུ་ཡོད་པའི་ཀུང་སིའི་སྤྱི་ཁྱབ་ཅིང་ལི་ཧྲ་ཝུན་ཧའེ་ཡིས“ཐོག་བརྩེགས་ཁང་ཆེན་གཉིས་ནི་ཀྲུང་ཐ་རྒྱལ་ཁབ་གཉིས་ཀྱི་སྐྲུན་དངོས་རིག་གནས་སྤེལ་རེས་དང་མཉམ་འདྲེས་ཀྱི་གྲུབ་འབྲས་ཡིན་ལ། ཀྲུང་ཐའི་མཛའ་མཐུན་མཉམ་ལས་ཀྱི་གནས་རྟགས་གསར་པ་གཏོད་པ་དེ་ནི་རྒྱལ་ཁབ་གཉིས་ཀྱི་འཛུགས་སྐྲུན་པའི་ཐུན་མོང་གི་བསམ་འདུན་ཡང་རེད”ཅེས་བརྗོད།

ཐ་ཇིག་སི་ཐན་མི་རིགས་སློབ་ཆེན་གྱི་རྒྱལ་སྤྱིའི་འབྲེལ་བའི་ཚན་ཁག་གི་ཀྲུའུ་རེན་གཞོན་པ་ཧ་པི་པུའུ·སྨིར་ཙུའོ་ཡེ་ཕུའུ་ཡིས། ཐོག་བརྩེགས་ཁང་ཆེན་གཉིས་ཀྱི་ཇུས་འགོད་ནང་ཐ་ཇིག་སི་ཐན་གྱི་མི་རིགས་རིག་གནས་ཀྱི་གཞི་རྒྱུ་གང་ལེགས་འདུས་ཡོད་པས“གྲོས་ཚོགས་དང་སྲིད་གཞུང་གི་གཞུང་དོན་སྒྲུབ་པའི་ཆ་རྐྱེན་ལེགས་སུ་ཤུགས་ཆེན་འགྲོ་རྒྱུ་མ་ཟད། གྲོང་ཁྱེར་དུ་ཤང་པེ་ལ་ཡིད་དབང་འཕྲོག་ཤུགས་དང་གསོན་ཤུགས་གསར་པ་བསྣན་རྒྱུ་རེད”ཅེས་བརྗོད།