འདི་ནི་ཟླ་7ཚེས་8ཉིན་ཙམ་པབ་ཝེའི་རྒྱལ་ས་ཧ་ར་རེར་འཚོགས་པའི་ཧ་ར་རེའི་ཨ་ཧྥེ་རི་ཁའི་གླེང་སྟེགས་ཐོག་ཀྲུང་གོ་དང་ཙམ་པབ་ཝེ་རྒྱལ་ཁབ་གཉིས་པོའི་སྐུ་མགྲོན་གྱིས་བགྲོ་གླེང་བྱེད་བཞིན་པ།

ཤིན་ཧྭ་གསར་འགྱུར་ཁང་གྲོང་ཁྱེར་ཧ་ར་རེ་ནས་ཟླ་7ཚེས་9ཉིན་གློག་འཕྲིན་འབྱོར་གསལ། ཚེས་8ཉིན་ཧ་ར་རེའི་ཨ་ཧྥེ་རི་ཁའི་གླེང་སྟེགས་སྐབས་དང་པོ་ཙམ་པབ་ཝེའི་རྒྱལ་ས་ཧ་ར་རེར་འཚོགས་པ་དང་། ཀྲུང་གོ་དང་ཙམ་པབ་ཝེ་རྒྱལ་ཁབ་གཉིས་པོའི་དཔོན་རིགས་དང་། མཁས་དབང་། ན་གཞོན་སློབ་མ་སོགས་མི་གྲངས་120ལྷག་ཙམ་གྱིས་ཀྲུང་གོ་དང་ཨ་ཧྥེ་རི་ཁའི་ཤེས་དཔལ་ཕན་ཚུན་དཔྱད་གཞིར་འཛིན་པ་དང་། གྲོང་གསེབ་འཕེལ་རྒྱས་མཉམ་ལས་སོགས་ཀྱི་གྲོས་གཞིའི་སྐོར་ལ་སྤེལ་རེས་རྒྱ་ཁྱབ་བྱས་པ་རེད།

“གླེང་སྟེགས་འདིས་མཉམ་འགུལ་སྤེལ་རེས་ཀྱི་ལས་སྟེགས་ཤིག་བསྐྲུན་པས་ཙམ་པབ་ཝེའི་འཕེལ་རྒྱས་ལ་ཕན་ཐོགས་ཆེན་པོ་བྱུང་བས་ང་ཚོས་སྙིང་ཐག་པ་ནས་ཐུགས་རྗེ་ཆེ་ཞུ་རྒྱུ་ཡིན”ཞེས་ཙམ་པབ་ཝེའི་བུད་མེད་ལས་དོན་དང་། སྡེ་ཁུལ་དང་ཁེ་ལས་ཆུང་འབྲིང་འཕེལ་རྒྱས་པུའི་པུའུ་ཀྲང་མོ་ཉི་ཁཱ་·མུའུ་ཚི་དབན་ཀུའུ་ཝ་ཡིས་བརྗོད་ཅིང་། ཁོང་གིས་ཙམ་པབ་ཝེའི་མི་འབོར་མང་ཆེ་བ་གྲོང་གསེབ་ལ་ཡོད་པས། གྲོང་གསེབ་ས་ཁུལ་རྒྱུན་མཐུད་ཆོག་པའི་འཕེལ་རྒྱས་ཡོང་བར་བྱས་པ་དེས་མི་དམངས་ཀྱི་འཚོ་བའི་ཆུ་ཚད་མཐོ་རུ་འགྲོ་བར་ནུས་པ་གལ་ཆེན་ལྡན་པས། ཁྱབ་ཁོངས་འདིའི་ཀྲུང་གོའི་ཉམས་མྱོང་ཙམ་པབ་ཝེས་དཔྱད་གཞིར་འཛིན་འོས་པ་ཞིག་ཡོད་ཅེས་བརྗོད།

ཙམ་པབ་ཝེར་བཅའ་སྡོད་ཀྲུང་གོའི་གཞུང་ཚབ་ཆེ་མོ་བ་ཀྲོའུ་ཏིང་གིས་ད་རེས་ཀྱི་གླེང་སྟེགས་ཀྱིས་ཤེས་དཔལ་ཕན་ཚུན་དཔྱད་གཞིར་འཛིན་པ་དང་གྲོང་གསེབ་འཕེལ་རྒྱས་ཀྱི་མཉམ་ལས་བརྗོད་གཞིར་བྱས་ནས་ཀྲུང་ཧྥེ་མཉམ་ལས་གླེང་སྟེགས་དབུ་ཚོགས་མ་འཚོགས་གོང་འཚོགས་པ་ནི། མིག་སྔའི་ཀྲུང་གོ་དང་ཨ་ཧྥེ་རི་ཁའི་དབར་དང་། ཀྲུང་གོ་དང་ཙམ་པབ་ཝེའི་དབར་གྱི་འབྲེལ་བ་འཕེལ་རྒྱས་གཏོང་བའི་དགོས་མཁོ་དང་མཐུན་པས། ཀྲུང་གོ་ཕྱོགས་ཀྱིས་ཙམ་པབ་ཝེ་ཕྱོགས་དང་མཉམ་དུ་ཤེས་དཔལ་སྤེལ་རེས་དང་ཕན་ཚུན་དཔྱད་གཞིར་འཛིན་རྒྱུར་ཤུགས་སྣོན་བརྒྱབ་ནས་གྲོང་གསེབ་དར་རྒྱས་ཀྱི་གྲུབ་འབྲས་ལྡན་པའི་ཉམས་མྱོང་མཉམ་སྤྱོད་ཀྱིས་ཙམ་པབ་ཝེ་དར་རྒྱས་གོང་འཕེལ་ཡོང་བར་རམ་འདེགས་བྱེད་འདོད་ཡོད་ཅེས་བརྗོད།