ཀྲུང་སར་རང་མོས་ཚོང་དོན་གྲོས་མཐུན་གྱི་ནུས་ཐོན་མཛད་སྒོ་སར་པི་ཡར་འཚོགས་པ།
ཤིན་ཧྭ་གསར་འགྱུར་ཁང་སར་པི་ཡའི་གྲོང་ཁྱེར་ནུའོ་ཝེ་སཱ་ཏེ་ནས་གློག་འཕྲིན་འབྱོར་གསལ། ཀྲུང་གོ་དང་སར་པི་ཡའི་རང་མོས་ཚོང་དོན་གྲོས་མཐུན་གྱི་ནུས་ཐོན་མཛད་སྒོ་ཉེ་ཆར་སར་པི་ཡའི་གྲོང་ཁྱེར་ཆེ་གྲས་གཉིས་པ་ནུའོ་ཝེ་སཱ་ཏེ་རུ་འཚོགས་པ་རེད།
སར་པི་ཡའི་ཕྱི་ནང་ཚོང་དོན་པུའུ་ཀྲང་མོ་སྨི་ལུའོ་ཝེ་ཆི་དང་། སར་པི་ཡར་བཅའ་སྡོད་ཀྲུང་གོའི་གཞུང་ཚབ་ཆེ་མོ་བ་ལི་མིང་། སར་པི་ཡའི་བཟོ་ཚོང་ལྷན་ཚོགས་ཀྱི་ཀྲུའུ་ཞི་ཁྲ་ཏའེ་རི་སོགས་ཀྲུང་སར་རྒྱལ་ཁབ་གཉིས་ཀྱི་དཔོན་རིགས་དང་ཁེ་ལས་ཀྱི་འཐུས་མི་གྲོས་མཐུན་གྱི་ནུས་ཐོན་མཛད་སྒོར་ཞུགས་པ་རེད།
མོ་སྨི་ལུའོ་ཝེ་ཆི་ཡིས་མཛད་སྒོའི་ཐོག རང་མོས་ཚོང་དོན་གྱི་གྲོས་མཐུན་ལ་ནུས་པ་ཐོན་ཚེ་སར་པི་ཡའི་དཔལ་འབྱོར་འཕེལ་རྒྱས་དང་དེ་བཞིན་སར་ཀྲུང་རྒྱལ་ཁབ་གཉིས་པོའི“འགྱུར་མེད་མཛའ་བརྩེ”ཟབ་ཏུ་གཏོང་བར་དོན་སྙིང་གལ་ཆེན་ལྡན། སར་པི་ཡས་སར་ཀྲུང་གཉིས་པོའི“འགྱུར་མེད་མཛའ་བརྩེ”ཟབ་ཏུ་གཏོང་བར་ཤུགས་རྒྱག་གི་ཡོད། རང་མོས་ཚོང་དོན་གྱི་གྲོས་མཐུན་ལ་ནུས་པ་ཐོན་ཚེ་ཕྱོགས་གཉིས་ཀྱི་ཚོང་དོན་གཞི་རྒྱ་ཆེ་རུ་གཏོང་ཐུབ་པ་མ་ཟད་ད་དུང་མ་འཇོག་མཉམ་ལས་དང་ཐོན་ལས་འཁོར་འབྲེལ་མཉམ་འདྲེས་ལ་ཡང་སྐུལ་འདེད་ཐེབས་ནས། རྒྱལ་ཁབ་གཉིས་པོའི་དཔལ་འབྱོར་ལེགས་ཆ་འདོན་སྤེལ་སྔར་བས་ལེགས་པོ་ཐུབ་སྟེ་རྒྱལ་སྤྱིའི་འགྲན་རྩོད་ནུས་པ་མཉམ་དུ་ཆེ་རུ་གཏོང་ཐུབ་རྒྱུ་རེད་ཅེས་བརྗོད་པ་རེད།
ལི་མིང་གིས། ཀྲུང་སར་གྱི་རང་མོས་ཚོང་དོན་གྲོས་མཐུན་ནི་ཀྲུང་གོ་དང་ཡོ་རོབ་དབུས་ཤར་གྱི་རྒྱལ་ཁབ་དབར་ཐེངས་དང་པོར་བཞག་ནས་ནུས་པ་ཐོན་པའི་རང་མོས་ཚོང་དོན་གྱི་གྲོས་མཐུན་ཡིན། ཀྲུང་སར་གྱི་རང་མོས་ཚོང་དོན་གྲོས་མཐུན་དེ་གྲོས་མོལ་བྱེད་འགོ་ཚུགས་པ་ནས་ནུས་པ་ཐོན་པའི་བར་ཁྱོན་ལོ་གཅིག་དང་ལོ་ཕྱེད་ཀྱང་འགོར་མེད་པས་དེ་ནི་ཀྲུང་གོས་འཇོག་མགྱོགས་ཤོས་ཀྱི་རང་མོས་ཚོང་དོན་གྲོས་མཐུན་ཞིག་ཡིན། འདི་ལྟ་བུའི་སྤུས་ཀ་ལེགས་ཤིང་ཕན་འབྲས་ཆེ་བའི་གྲོས་མཐུན་ལས་ཕྱོགས་གཉིས་པོའི་ཆབ་སྲིད་ཐད་ཕན་ཚུན་ཚད་མཐོའི་ཡིད་ཆེས་དང“འགྱུར་མེད་མཛའ་བརྩེ”མཚོན་ཡོད་ཅེས་བརྗོད་པ་རེད།