འགོ་འཛུགས་ས་དེ་བས་མཐོ་བའི་ཐོག་ལག་གདང་སྦྲེལ་ནས་ཀྲུང་གོ་དང་ཐ་ཇིག་སི་ཐན་གྱི་ལས་དབང་གཅིག་མཐུན་ཚོགས་པ་འཛུགས་དགོས།
ཉེ་ཆར། ཐ་ཇིག་སི་ཐན་གྱི་ཙུང་ཐུང་ལཱ་ཧོ་མོང་གི་གདན་ཞུས་ལྟར་ཉེ་ཆར་ཀྲུའུ་ཞི་ཞི་ཅིན་ཕིང་གིས་རྒྱལ་ཁབ་དེར་རྒྱལ་དོན་འཚམས་འདྲི་གནང་བ་དང་། འཚམས་འདྲི་གནང་རིང་རྒྱལ་ཁབ་གཉིས་པོའི་གཙོ་བདག་གིས་ནང་དོན་ཕུན་སུམ་ཚོགས་ལ་གྲུབ་འབྲས་གཡུར་དུ་ཟ་བའི་གྲོས་མོལ་གནང་བ་དང་། མཉམ་འབྲེལ་གསལ་བསྒྲགས་ལ་ཐུན་མོང་ཐོག་མཚན་རྟགས་བཀོད་དེ་དུས་རབས་གསར་པའི་ཀྲུང་ཐའི་ཕྱོགས་ཡོངས་ཀྱི་འཐབ་ཇུས་མཉམ་ལས་རོགས་ཟླའི་འབྲེལ་བ་འཛུགས་རྒྱུའི་ཁྱབ་བསྒྲགས་གནང་ཞིང་། འགོ་འཛུགས་ས་དེ་བས་མཐོ་བ་མི་རབས་ནས་མི་རབས་བར་གྱི་མཛའ་གྲོགས་དང་། བདེ་སྡུག་མཉམ་མྱོང་། གཉིས་ཁེ་གཉིས་ཕན་བཅས་ཀྱི་ཀྲུང་ཐའི་ལས་དབང་གཅིག་མཐུན་ཚོགས་པ་བསྐྲུན་ཏེ་ཀྲུང་ཐའི་འབྲེལ་བ་སྐས་རིམ་གསར་པར་ཞིག་ཏུ་སླེབས་རྒྱུར་སྐུལ་འདེད་བཏང་ཐོག་ཀྲུང་ཐའི་འབྲེལ་བའི་དེ་བས་མཛེས་སྡུག་ལྡན་པའི་མདུན་ལྗོངས་གསར་པ་ཐུན་མོང་ཐོག་གཏོད་རྒྱུའི་གཏན་འཁེལ་ཏུ་གནང་བ་རེད།
ད་ཐེངས་ཀྱི་འཚམས་འདྲི་ལས་ཕྱོགས་གཉིས་པོའི་ཆུ་ཚད་མཐོ་བའི་ཆབ་སྲིད་ཐད་ཀྱི་ཕན་ཚུན་ཡིད་ཆེས་བྱེད་ཤུགས་ཆེ་རུ་ཕྱིན་ཞིང་། ཀྲུའུ་ཞི་ཞི་ཅིན་ཕིང་གིས་རྒྱལ་སྤྱིའི་དུས་བབ་ལ་འགྱུར་ལྡོག་ཇི་ལྟར་བྱུང་རུང་ཀྲུང་གོ་ནི་ནམ་ཡང་ཐ་ཇིག་སི་ཐན་གྱི་བློས་འགེལ་ཆོག་པའི་གྲོགས་པོ་དང་། གཙིགས་ཆེ་བའི་རོགས་ཟླ། སྙིང་ཉེ་བའི་སྤུན་ཟླ་བཅས་ཡིན་ཞེས་གསུངས་པ་རེད། ཙུང་ཐུང་ལཱ་ཧོ་མོང་གིས་ཀྲུང་གོ་དང་དུས་རབས་གསར་པའི་ཕྱོགས་ཡོངས་ཀྱི་འཐབ་ཇུས་མཉམ་ལས་རོགས་ཟླའི་འབྲེལ་བར་ཤུགས་སྣོན་རྒྱག་རྒྱུ་ནི་ཐ་ཇིག་སི་ཐན་ཕྱོགས་ཀྱིས་སྔོན་ལ་ལག་ལེན་བསྟར་བའི་སྲིད་ཇུས་ཀྱི་ཁ་ཕྱོགས་ཡིན། ཐ་ཇིག་སི་ཐན་ཕྱོགས་ཀྱིས་བློ་བརྟན་འགྱུར་མེད་ངང་ཀྲུང་གོ་གཅིག་གི་རྩ་དོན་ལ་བརྩི་སྲུང་ནན་པོ་ཞུ་བ་དང་། རྣམ་པ་གང་རུང་གི“ཐའེ་དབན་རང་བཙན”ལ་ངོ་རྒོལ་བྱེད་པ། བདག་དབང་དང་མངའ་ཁོངས་ཆ་ཚང་སྲུང་སྐྱོང་དང་རྒྱལ་ཁབ་གཅིག་གྱུར་མངོན་འགྱུར་བྱ་ཆེད་ཀྱི་ཀྲུང་གོ་ཕྱོགས་ཀྱི་འབད་བརྩོན་མཐའ་དག་ལ་རྒྱབ་སྐྱོར་མཐའ་གཅིག་ཏུ་ཞུ་གི་ཡིན་ཞེས་གསུངས་པ་རེད། འབྱུང་འགྱུར་ལ་རྒྱང་ལྟ་བྱེད་སྐབས་ཕྱོགས་གཉིས་པོས་མཐོ་རིམ་དབར་གྱི་འགྲོ་འོང་དམ་ཟབ་རྒྱུན་འཁྱོངས་དང་། རྒྱལ་སྲིད་སྐྱོང་ལུགས་ཀྱི་ཉམས་མྱོང་སྤེལ་རེས་གཏིང་ཟབ་ཏུ་གཏོང་བ། ཆུ་ཚད་མཐོ་བའི་ཆབ་སྲིད་ཐད་ཀྱི་ཕན་ཚུན་ཡིད་ཆེས་བྱེད་ཤུགས་ཆེ་རུ་གཏོང་བ་བཅས་བྱས་ནས་རྒྱལ་ཁབ་གཉིས་པོའི་འབྲེལ་བ་ཐོག་མཐའ་བར་གསུམ་དུ་ཡང་དག་པའི་བགྲོད་ལམ་ཐོག་བསྐྱོད་ཐུབ་པ་བྱེད་ཀྱི་ཡིན།
ཀྲུང་གོས་སྤུས་ཚད་མཐོ་བའི་འཕེལ་རྒྱས་དང་ཆུ་ཚད་མཐོ་བའི་ཕྱི་ཕྱོགས་སྒོ་དབྱེར་སྐུལ་འདེད་ཤུགས་ཆེན་གཏོང་བཞིན་ཡོད་པ་དང་། ཀྲུང་གོའི་ལུགས་ཀྱི་དེང་རབས་ཅན་ལ་བརྟེན་ནས་རྒྱལ་ཁབ་སྟོབས་ཆེན་འཛུགས་སྐྲུན་དང་མི་རིགས་བསྐྱར་དར་གྱི་བྱ་གཞག་རླབས་པོ་ཆེར་ཕྱོགས་ཡོངས་ནས་སྐུལ་འདེད་གཏོང་བཞིན་ཡོད། ཐ་ཇིག་སི་ཐན་གྱིས་ཀྱང“2030ལོའི་གོང་གི་རྒྱལ་ཁབ་འཕེལ་རྒྱས་འཐབ་ཇུས”མངོན་འགྱུར་བྱེད་པའི་ལམ་བུའི་ཐོག་གོམ་ཞེང་ཆེན་པོས་མདུན་སྐྱོད་བྱེད་བཞིན་ཡོད། ད་ཐེངས་འཚམས་འདྲི་གནང་རིང་ཀྲུང་ཐ་ཕྱོགས་གཉིས་པོས་སྤུས་ཚད་མཐོ་པོས“རྒྱུད་གཅིག་ལམ་གཅིག”མཉམ་སྐྲུན་མཉམ་ལས་གཙོ་རྐང་དུ་བྱས་ཏེ་རྒྱལ་ཁབ་གཉིས་པོའི་འཕེལ་རྒྱས་ཀྱི་འཐབ་ཇུས་སྦྲེལ་མཐུད་ལ་ཕྱོགས་ཡོངས་ནས་སྐུལ་འདེད་གཏོང་བ་དང་། རང་སོ་སོའི་དེང་རབས་ཅན་འཛུགས་སྐྲུན་ལ་རམ་འདེགས་བྱས་ཏེ་ཐུན་མོང་ཐོག་ཀྲུང་ཐ་འབྲེལ་བའི་དངོས་པོའི་རྨང་གཞི་བརྟན་པོ་འཛུགས་རྒྱུའི་གྲོས་ཐག་བཅད་པ་རེད། ཀྲུང་གོ་ཕྱོགས་ཀྱིས་ཐ་ཇིག་སི་ཐན་གྱི་སྤུས་ལེགས་ཐོན་རྫས་ནང་འདྲེན་བྱེད་རྒྱ་ཆེ་རུ་བཏང་ནས་ཀྲུང་གོ་དང་ཐ་ཇིག་སི་ཐན་གྱི་དཔལ་འབྱོར་ཚོང་དོན་མཉམ་ལས་ཀྱི་སྤུས་ཚད་དང་གཞི་ཁྱོན་རྒྱུན་ཆད་མེད་པར་ཆེ་རུ་གཏོང་འདོད་ཡོད། ཕན་ཚུན་འབྲེལ་མཐུད་དང་མཉམ་ལས་མུ་མཐུད་གཏིང་ཟབ་ཏུ་བཏང་ནས་ཐ་ཇིག་སི་ཐན་གྱིས་རྒྱལ་མཚམས་སྒྲོལ་བའི་སྐྱེལ་འདྲེན་གྱི་མི་མངོན་པའི་སྟོབས་ཤུགས་དེ་བས་མང་བ་སྔོག་འདོན་བྱ་རྒྱུར་རྒྱབ་སྐྱོར་བྱེད་འདོད་ཡོད། གཏེར་ཁའི་ཐོན་ཁུངས་མཉམ་ལས་གཏིང་ཟབ་ཏུ་གཏོང་བ་དང་། ཞིང་ལས་མཉམ་ལས་ཀྱི་ཆུ་ཚད་མཐོ་རུ་གཏོང་བ། ནུས་རྒྱུ་གསར་པ་དང་། གྲངས་འཛིན་དཔལ་འབྱོར། མིས་བཟོས་རིག་ནུས། དྲ་ཐོག་ཚོང་དོན་སོགས་ཐོན་སྐྱེད་ནུས་ཤུགས་གསར་མའི་མཉམ་ལས་ཀྱི་འཕར་གཞི་སྐྱེད་སྲིང་བྱེད་དགོས་པ། ཕྱོགས་གཉིས་པོས་དངོས་སྒྲུབ་མཉམ་ལས་བྱེད་རྒྱ་ཆེ་རུ་བཏང་ནས་རང་སོ་སོའི་དར་རྒྱས་གོང་འཕེལ་ལ་སྔར་ལས་ལེགས་པའི་སྒོ་ནས་རམ་འདེགས་བྱས་ཏེ་རྒྱལ་ཁབ་གཉིས་པོའི་མི་དམངས་ལ་བདེ་རྩ་དེ་བས་མང་བ་བསྐྲུན་དགོས་ཞེས་བཏོན་པ་རེད།
བདེ་འཇགས་ཁྱབ་ཁོངས་ཀྱི་ནུས་ཆེའི་མཉམ་ལས་ཐོག་ནས་རྒྱལ་ཁབ་གཉིས་པོའི་ཕན་ཚུན་ཡིད་ཆེས་ཀྱི་ཆུ་ཚད་མཐོ་པོ་ཡོད་པ་མཚོན་གྱི་ཡོད། ཀྲུང་གོ་དང་ཐ་ཇིག་སི་ཐན་ཕྱོགས་གཉིས་པོས་བདེ་འཇགས་མཉམ་ལས་ལ་སྔར་བས་ཤུགས་སྣོན་བརྒྱབ་ནས་རྒྱལ་ཁབ་གཉིས་པོའི་འཕེལ་རྒྱས་ཀྱི་བདེ་འཇགས་སྲུང་བཅད་བསྐྲུན་པ་དང“ཤར་ཐུའུ་ཅུའེ་སི་ཐན་དབྱི་སི་ལམ་ལས་འགུལ”སོགས“ངན་ཤུགས་གསུམ”ལ་ཐུན་མོང་ཐོག་རྡུང་རྡེག་དྲག་པོ་བཏང་ནས་རྒྱལ་ཁབ་གཉིས་པོའི་མཐའ་མཚམས་བདེ་འཇགས་སྲུང་སྐྱོང་དང་ཕྱོགས་གསུམ་པས་རྒྱལ་ཁབ་གཉིས་པོའི་ནང་སྲིད་ལ་ཐེ་ཇུས་བྱེད་པར་དར་ཆ་གསལ་སྟོན་གྱིས་ངོ་རྒོལ་བྱས་ཏེ་ས་ཁུལ་དེ་གའི་བདེ་འཇགས་བརྟན་ལྷིང་ཐུན་མོང་ཐོག་སྲུང་སྐྱོང་བྱ་རྒྱུའི་ཆོད་སེམས་ཡོད་པ་རེད། ཕྱོགས་གཉིས་པོས་ཨ་ཧྥུ་ཀ་ནི་སི་ཐན་གྱི་གནད་དོན་ཐད་འབྲེལ་གཏུག་དང་མཐུན་སྦྱོར་ལ་མུ་མཐུད་ཤུགས་སྣོན་བརྒྱབ་ནས་ཨ་ཧྥུ་ཀ་ནི་སི་ཐན་དང་འབྲེལ་བ་ཡོད་པའི་ལམ་སྲོལ་མཉམ་ལས་ནང་ཐུན་མོང་ཐོག་ཞུགས་ཏེ་ཨ་ཧྥུ་ཀ་ནི་སི་ཐན་གྱི་གནས་སྐབས་སྲིད་གཞུང་གིས་བསྟུན་མཁས་ཀྱི་སྲིད་དབང་འཛུགས་པ་དང་། འཕེལ་རྒྱས་ལ་དམིགས་པ། དམངས་འཚོ་ལེགས་གཏོང་བཅས་ལ་ལྕག་སྐུལ་བྱས་ཏེ་འཇིགས་སྐུལ་དང་འབྲེལ་བ་ཡོད་པའི་ཁྲིམས་འགལ་ཉེས་གསོག་ལ་རྡུང་རྡེག་མཐའ་གཅིག་ཏུ་བཏང་ནས་ཁྱིམ་མཚེས་རྒྱལ་ཁབ་དབར་གྱི་མཛའ་གྲོགས་རྒྱུན་འཁྱོངས་བྱེད་དགོས། ཐ་ཇིག་སི་ཐན་ཕྱོགས་ཀྱིས་ཀྲུང་གོ་ཕྱོགས་ཀྱིས་བཏོན་པའི་གོ་ལ་ཧྲིལ་པོའི་བདེ་འཇགས་གྲོས་འགོར་རྒྱབ་སྐྱོར་བྱེད་པ་དང་ཀྲུང་གོ་ཕྱོགས་དང་སྤེལ་རེས་མཉམ་ལས་བྱས་ཏེ་ས་ཁུལ་དང་འཛམ་གླིང་གི་ཞི་བདེ་དང་བདེ་འཇགས་ཐུན་མོང་ཐོག་སྲུང་སྐྱོང་བྱེད་འདོད་ཡོད་ཅེས་གསུངས་པ་རེད།
མི་དམངས་དབར་གྱི་བརྩེ་སེམས་གཅིག་ཏུ་སྒྲིལ་བའི་ཆུ་ཕྲན་དེ་རྒྱལ་ཁབ་གཉིས་པོའི་མཛའ་གྲོགས་ཟབ་པའི་རྒྱ་མཚོ་ཆེན་པོར་འདྲེས་ནས་ཀྲུང་ཐའི་མཛའ་གྲོགས་བྱ་གཞག་ལ་གསོན་ཤུགས་གསར་པ་རྒྱུན་ཆད་མེད་པར་འཕེལ་བཞིན་ཡོད། ཀྲུང་གོ་ཕྱོགས་ཀྱིས་གྲོགས་པོ་ཐ་ཇིག་སི་ཐན་བ་དེ་བས་མང་བ་ཀྲུང་གོར་ཡུལ་སྐོར་དང་། ཟབ་སྦྱོང་བྱེད་པ། མ་འཇོག་ཚོང་གཉེར། འཚམས་འདྲི་བཅས་བྱེད་པར་ཡོང་རྒྱུར་དགའ་བསུ་ཞུ་རྒྱུ་དང་ཐ་ཇིག་སི་ཐན་ཕྱོགས་དང་རིག་གནས་དང་། སློབ་གསོ། འཕྲོད་བསྟེན། ལུས་རྩལ། གཞོན་ནུ། ས་གནས་སོགས་ཁྱབ་ཁོངས་ཀྱི་མཉམ་ལས་རྒྱུན་ཆད་མེད་པར་རྒྱ་ཆེར་བཏང་ནས་རྒྱལ་ཁབ་གཉིས་པོའི་མི་དམངས་གཉེན་ཉེ་ལྟར་རྒྱུན་དུ་ཕར་འགྲོ་ཚུར་འོང་བྱེད་དུ་འཇུག་འདོད་ཡོད། ཀྲུང་ཐ་རྒྱལ་ཁབ་གཉིས་པོས་ཐ་ཇིག་སི་ཐན་དུ་ཡོད་པའི་ལུའུ་པན་བཟོ་ཁང་དང་། ཁུང་ཙི་སློབ་གླིང་། ཀྲུང་ཐའི་ཀྲུང་ལུགས་གསོ་རིག་ལྟེ་གནས་བཅས་ཀྱི་ནུས་པ་འདོན་སྤེལ་གང་ལེགས་བྱས་ཏེ་ཕན་ཚུན་རིག་གནས་ལྟེ་གནས་འཛུགས་རྒྱུར་སྐུལ་འདེད་མགྱོགས་སུ་གཏོང་བ་དང་རྒྱལ་ཁབ་གཉིས་པོའི་ས་གནས་དབར་གྱི་མཉམ་ལས་རྒྱ་ཆེར་བཏང་ནས་ཀྲུང་ཐ་རྒྱལ་ཁབ་གཉིས་པོའི་མཛའ་གྲོགས་མི་རབས་ནས་མི་རབས་བར་རྒྱུན་འཛིན་དང་དར་རྒྱས་གོང་འཕེལ་ཡོང་ཐབས་བྱ་རྒྱུ་རེད།
ད་ཐེངས་ཀྱི་ཀྲུའུ་ཞི་ཞི་ཅིན་ཕིང་གི་འཚམས་འདྲི་ནི་ཀྲུང་ཐའི་འབྲེལ་བའི་ལམ་ཚད་རྡོ་རིང་གལ་ཆེན་གཞན་ཞིག་རེད། ཀྲུང་གོ་ཕྱོགས་ཀྱིས་ཐ་ཇིག་སི་ཐན་ཕྱོགས་དང་མཉམ་དུ་རྒྱལ་ཁབ་གཉིས་པོའི་གཙོ་བདག་གི་ཐུན་མོང་ངོས་འཛིན་དོན་འཁྱོལ་ཡག་པོ་བྱས་ཏེ་དུས་རབས་གསར་པའི་ཀྲུང་ཐའི་ཕྱོགས་ཡོངས་ཀྱི་འཐབ་ཇུས་མཉམ་ལས་རོགས་ཟླའི་འབྲེལ་བ་ཆུ་ཚད་དེ་བས་མཐོ་བའི་ཕྱོགས་སུ་འཕེལ་རྒྱས་འགྲོ་རྒྱུར་སྐུལ་འདེད་བཏང་ནས་རྒྱལ་ཁབ་གཉིས་པོའི་མི་དམངས་ཀྱི་མཛེས་སྡུག་ལྡན་པའི་འབྱུང་འགྱུར་གཏོད་རྒྱུ་དང་འབྲེལ་རྒྱལ་སྤྱིའི་གར་སྟེགས་ཐོག་མཐུན་སྒྲིལ་རོགས་ལས་ལ་ཤུགས་སྣོན་བརྒྱབ་ནས་འཛམ་གླིང་ཞི་བདེ་དང་འཕེལ་རྒྱས་ཀྱི་བྱ་གཞག་ཆེད་ཀྲུང་ཐའི་སྟོབས་ཤུགས་སྐྱེས་སུ་འབུལ་རྒྱུའི་རེ་སྒུག་བྱེད་བཞིན་ཡོད།
（བསོད་བདེ་ཆེ་བས་བསྒྱུར། བསོད་བདེ་དང་ལྷག་ཚེས་ཞུས）