འབད་འབུངས་མདུན་སྐྱོད་ཀྱིས་མི་དེ་བས་མང་བས་བོད་ཡིག་གི་མཛེས་ཉམས་མཐོང་ཐུབ་པ་བྱེད་ཀྱི་ཡིན།
—— ཡོན་ཧྲི་ཉི་མ་བཀྲ་ཤིས་ཀྱི་བྱས་རྗེས་ལ་རང་ལྗོངས་སུ་ཚུར་སྣང་ལན་ཆ་ཆེན་པོ་བྱུང་བ།
ཉེ་ཆར། 《བོད་ལྗོངས་ཉིན་རེའི་ཚགས་པར》ཐོག་ཡོན་ཧྲི་ཉི་མ་བཀྲ་ཤིས་ཀྱི་བྱས་རྗེས་གཅིག་སྡུད་ཐོག་བཏོན་པར་རང་ལྗོངས་ཀྱི་ལས་རིགས་ཁག་ཏུ་ཚུར་སྣང་ལན་ཆ་ཆེན་པོ་བྱུང་ཞིང་། ཚང་མས་ཡོན་ཧྲི་ཉི་མ་བཀྲ་ཤིས་ཀྱིས་དཀའ་སྤྱད་འབད་བརྩོན་དང་གསར་གཏོད་བྱེད་ཕོད་པའི་སྙིང་སྟོབས་ལ་བརྟེན་ནས་ང་ཚོ་རྒྱུན་ཆད་མེད་པར་མདུན་སྐྱོད་བྱེད་པར་ཁྲིད་སྟོན་བྱས་ཡོད། འབྱུང་འགྱུར་གྱི་ལམ་བུར་ཐོག་མའི་བསམ་འདུན་མ་བརྗེད་པར་འབད་བརྩོན་ཧུར་ཐག་བྱས་ཏེ། རང་ངོས་ལས་ཚད་བརྒལ་ཡོང་བར་བྱས་ནས་མི་དེ་བས་མང་བས་བོད་ཡིག་གི་མཛེས་ཉམས་མཐོང་ཐུབ་པ་བྱེད་ཀྱི་ཡིན་ཞེས་གཅིག་རྗེས་གཉིས་མཐུད་ངང་བཤད།
“ཡོན་ཧྲི་ཉི་མ་བཀྲ་ཤིས་ལ་གྲུབ་འབྲས་བཟང་པོ་དེ་འདྲ་ཐོབ་པར་ང་ཚོ་དགའ་ཚོར་ཆེན་པོ་བྱུང་། ཁོང་ཡོན་ཧྲིར་མ་བདམས་གོང་དཀའ་བ་ཚད་མེད་སྤྱད་པ་མིག་ལམ་དུ་གསལ་ལྷམ་མེར་འཆར་གྱི་འདུག ཁོང་ལ་གྲུབ་འབྲས་འདི་དག་ཐོབ་པ་ནི་ཞོགས་སྔ་ལངས་དང་དགོང་ཕྱི་ཉལ་གྱི་དཀའ་སྤྱད་རྔུལ་ཆུ་ལས་བྱུང་བ་ཞིག་ཡིན་པ་ཡང་ཚོར་བྱུང་། དཀའ་བ་བརྒྱ་དང་འབད་པ་སྟོང་མ་བྱས་ན་ཐོབ་པར་དཀའ་བའི་གཟི་བརྗིད་འདིའི་དོན་སྙིང་རྟོགས་མི་ཐུབ”ཅེས་བོད་ལྗོངས་སློབ་ཆེན་ཆ་འཕྲིན་ཚན་རིག་ལག་རྩལ་སློབ་གླིང་རྩིས་འཁོར་ཚན་ཁག་གི་ཀྲུའུ་རེན་གཞོན་པ་བློ་བཟང་སྐལ་ལྡན་གྱིས་བརྗོད།
བློ་བཟང་སྐལ་ལྡན་ནི་ཉི་མ་བཀྲ་ཤིས་ཀྱི་ཚོགས་པའི་ཁོངས་མི་ཞིག་ཡིན་ཞིང་། ཉེ་ཆར《བོད་ལྗོངས་ཉིན་རེའི་ཚགས་པར》ཐོག་བཀོད་པའི་ཡོན་ཧྲི་ཉི་མ་བཀྲ་ཤིས་སྐོར་གྱི་འབྲེལ་ཡོད་གནས་ཚུལ་བཀླགས་རྗེས་མྱོང་ཚོར་ཟབ་མོ་བྱུང་ཞིང་། ཁོང་གིས“ཡོན་ཧྲི་ཉི་མ་བཀྲ་ཤིས་ལ་ཚན་ཞིབ་ཐད་གཟེངས་སུ་ཐོན་པའི་གྲུབ་འབྲས་ཐོབ་པ་མ་ཟད། ང་ཚོར་མིག་དཔེ་བཟང་པོ་བཏོད་ཡོད། སླད་ཕྱིན་ང་ཚོས་ཡོན་ཧྲི་ཉི་མ་བཀྲ་ཤིས་མིག་དཔེར་བྱས་ཏེ་ཚན་ཞིབ་ཁྲོད་ཀྱི་འགྲན་སློང་སྣ་ཚོགས་ལ་ཁ་གཏད་བཅག་སྟེ་དད་སེམས་བརྟན་པོ་དང་དཔའ་ངར་ཆེན་པོས་མདུན་དུ་བསྐྱོད་དེ་ཆ་འཕྲིན་དུས་རབས་སུ་བོད་ཡིག་དར་རྒྱས་གོང་འཕེལ་ཡོང་ཕྱིར་ང་ཚོའི་བློ་གྲོས་དང་སྟོབས་ཤུགས་སྐྱེས་སུ་འབུལ་བ་དང་། ཆ་འཕྲིན་དུས་རབས་སུ་བོད་ཡིག་ལ་དེ་བས་གཟི་འོད་འཕྲོ་བར་བྱེད་ཀྱི་ཡིན”ཞེས་བརྗོད།
ནག་ཆུ་གྲོང་ཁྱེར་སྲིད་གྲོས་ཀྱི་ལས་བྱེད་པ་ཀརྨ་ཀུན་ཁྱབ་ཀྱིས་ཡོན་ཧྲི་ཉི་མ་བཀྲ་ཤིས་སྐོར་གྱི་གསར་འགྱུར་ནན་ཏན་བཀླགས་རྗེས་གསར་འགོད་པར“ང་ལ་སེམས་འགུལ་ཐེབས་པ་ནི་ཡོན་ཧྲི་ཉི་མ་བཀྲ་ཤིས་ཀྱི་ལུས་ཐོག་ནས་མངོན་པའི་རང་རྟོན་རང་དར་གྱི་སྙིང་སྟོབས་དེ་ཡིན། ཁོང་གིས་རྒྱལ་གཅེས་ཀྱི་བརྩེ་བ་རྒྱལ་ཁབ་ལ་དྲིན་ལན་འཇལ་བའི་བྱ་སྤྱོད་ཐོག་དོན་འཁྱོལ་བྱས་ནས། ཐོག་མར་གང་ཡང་མ་ཤེས་པ་ནས་དཀའ་སྤྱད་སྙིང་རུས་ཀྱིས་སྦྱངས་བརྩོན་ལྷོད་མེད་མཛད་དེ་མི་སྒེར་གྱི་དོན་གཉེར་བྱེད་ས་དེ་རྒྱལ་ཁབ་དང་མི་དམངས་ཀྱི་དགོས་མཁོ་དང་ཟུང་འབྲེལ་གནང་ཡོད། དེ་ཐོག་ནས་ཚན་རིག་ལས་དོན་པའི་གཤིས་རྒྱུད་བཟང་པོ་མཚོན་པ་དང་། སྙིང་སྟོབས་དེ་རིགས་ནི་ང་ཚོས་ལས་སྒྲུབ་ལས་གཏོད་དང་འབད་འབུངས་མདུན་སྐྱོད་བྱེད་པར་སྐུལ་འདེད་གཏོང་བའི་སྟོབས་ཤུགས་ཆེན་པོ་ཞིག་རེད”ཅེས་བཤད།
བོད་ལྗོངས་སློབ་ཆེན་གྱི་རབ་འབྱམས་ཞིབ་འཇུག་སློབ་མ་ལྷ་རྒོད་ལ་ཡོན་ཧྲི་ཉི་མ་བཀྲ་ཤིས་ཀྱི་བྱས་རྗེས་རྒྱུས་མངའ་ཧ་ཅང་ཆེན་པོ་ཡོད། ཁོང་གིས“ཡོན་ཧྲི་ཉི་མ་བཀྲ་ཤིས་ཀྱི་ལུས་ཐོག་ནས་མངོན་པའི་དཀའ་ངལ་ལས་རྣམ་པར་རྒྱལ་བ་དང་སྙིང་རུས་གཏན་འཁྱོངས་ཀྱི་དཔའ་ངར་དང་བློ་སྟོབས་ལས་ང་རང་ནག་ཆུ་ནས་གསར་གཏོད་ལས་གཏོད་ཀྱི་ལམ་བུར་བསྐྱོད་རྒྱུར་སྐུལ་མ་ཐེབས་བྱུང་། མིག་དཔེའི་སྟོབས་ཤུགས་ནི་འཛད་མཐའ་མེད་པ་ཞིག་རེད། རྒན་ལགས་ཀྱིས་བཀའ་སློབ་གནང་བ་ལས་ང་ཚོའི་འཚར་ལོངས་ཀྱི་ལམ་བུར་ཕན་ནུས་ཆེན་པོ་འདུག ང་ཚོ་ན་གཞོན་ཚོས་མིག་དཔེའི་རྗེས་སུ་འབྲངས་ཏེ་རང་ཉིད་ཀྱི་བྱ་སྤྱོད་ངོ་མའི་ཐོག་ནས་ངོ་མཚར་ཆེ་བའི་མི་ཚེའི་ལེའུ་རྩོམ་རྒྱུ་ཡིན”ཞེས་བཤད་པ་རེད།