ཀྲུང་གོ་དང་སི་ཕེན་གྱི“གྲོང་ཁྱེར་འཆར་འགོད་དང་རིག་གནས་འཕེལ་རྒྱས”ཀྱི་སྐད་ཆ་ཤོད་རེས་ཚོགས་འདུ་མ་ཏེ་རིར་འཚོགས་པ།
ཉིན་ཤས་གོང་། མ་ཏེ་རིར་ཀྲུང་གོ་དང་སི་ཕེན་གྱི“གྲོང་ཁྱེར་འཆར་འགོད་དང་རིག་གནས་འཕེལ་རྒྱས”ཀྱི་སྐད་ཆ་ཤོད་རེས་ཚོགས་འདུ་འཚོགས་ཤིང་། ཀྲུང་གོ་དང་སི་ཕེན་གྱི་ལས་རིགས་ཁག་གི་སྐུ་མགྲོན་དང་འཐུས་མི་བརྒྱ་ཕྲག་སྐད་ཆ་ཤོད་རེས་ཚོགས་འདུར་ཞུགས་ཏེ་གྲོང་ཁྱེར་འཆར་འགོད་དང་རིག་གནས་འཕེལ་རྒྱས་ཁྱབ་ཁོངས་ཀྱི་ལག་ལེན་དང་ཉམས་མྱོང་སྐོར་ལ་མཉམ་དུ་གྲོས་བསྡུར་བྱས་པ་རེད།
ཀྲུང་དབྱང་བསམ་པའི་དཔལ་ཡོན་སྲོལ་གཏོད་གཞུང་དོན་ཁང་གི་ཆེད་བསྐོས་ཀྲུའུ་རེན་གཞོན་པ་ཧུའུ་ཁའེ་ཧུང་གིས་ཤིས་ཚིག་སྒྲོན་སྐབས། གྲོང་ཁྱེར་འཆར་འགོད་དང་རིག་གནས་འཕེལ་རྒྱས་ཀྱིས་གྲོང་ཁྱེར་གྱི་ཤེས་དཔལ་སྲོལ་གཏོད་དང་འཕེལ་རྒྱས་ལ་དོན་སྙིང་གལ་ཆེན་ལྡན་ཡོད། གྲོང་ཁྱེར་འཆར་འགོད་ཀྱིས་གྲོང་ཁྱེར་གྱི་ཤེས་དཔལ་འཕེལ་རྒྱས་ལ་བར་མཐོངས་དང་ལས་སྟེགས་མཁོ་འདོན་བྱེད་པ་དང་། རིག་གནས་འཕེལ་རྒྱས་ཀྱིས་གྲོང་ཁྱེར་ལ་ཐུན་མོང་མ་ཡིན་པའི་བླ་སྲོག་དང་ཡིད་དབང་འཕྲོག་ཤུགས་སྦྱིན་གྱི་ཡོད་ཅེས་བརྗོད་པ་རེད།
མ་ཏེ་རིའི་གྲོས་ཚོགས་ཀྱི་བཟོ་པའི་སྤྱི་ཚོགས་ཏང་གི་མགྲིན་ཚབ་པ་སི་ཕེན་གྱི་བཟོ་ལས་དང་། ཚོང་དོན། ཡུལ་སྐོར་བཅས་ཀྱི་བློན་ཆེན་མ་ལུའོ་ཐུའོ་ཡིས་ཤིས་ཚིག་སྒྲོན་སྐབས། “ད་ཆ་ང་ཚོར་འཕྲད་པའི་ཐུན་མོང་གི་འགྲན་སློང་ནི་སྔར་བས་འཚོ་སྡོད་རུང་བ་དང་སྔར་བས་མི་གཤིས་ཅན་གྱི་གྲོང་ཁྱེར་ཇི་ལྟར་བསྐྲུན་རྒྱུ་དེ་རེད” གྲོང་ཁྱེར་འཛུགས་སྐྲུན་དང་འཕེལ་རྒྱས་ནན་བཤད་བྱེད་པ་ཕུད། ད་དུང་གྲོང་མིའི་སྤྱི་པའི་བར་མཐོངས་སླར་གསོ་བྱེད་དགོས་ཞེས་བརྗོད་པ་རེད།