“12309ཞིབ་དཔྱོད་ཞབས་ཞུའི་ལྟེ་གནས”བཙུགས་པ་ནི་ཆེས་མཐོའི་མི་དམངས་ཞིབ་དཔྱོད་ཁང་དང་རང་སྐྱོང་ལྗོངས་མི་དམངས་ཞིབ་དཔྱོད་ཁང་གི་གཅིག་གྱུར་བཀོད་སྒྲིག་གཞིར་བཟུང་། དམངས་ལ་ཞབས་འདེགས་ཞུ་བའི་ཞིབ་དཔྱོད་ཀྱི་སྐར་ཁུང་བསྐྲུན་ནས་ཁྲིམས་འཛིན་གྱོད་སྒྲུབ་ཚད་ལྡན་དུ་གཏོང་བ་དང་ཞིབ་དཔྱོད་ཡོངས་བསྒྲགས་གཏིང་ཟབ་ཏུ་གཏོང་བའི་བྱེད་ཐབས་གལ་ཆེན་ཞིག་རེད། ལྷོ་ཁ་གྲོང་ཁྱེར་ཞིབ་དཔྱོད་ལས་ཁུངས་ཀྱིས་སྤྱི་ཚོགས་བཅོས་སྐྱོང་གི་དགོས་མཁོ་དང་རང་འགུལ་ངང་འཚམ་པར་བྱས་ཏེ་སྤུས་ཚད་དང་ཕན་འབྲས་མཐོ་པོས“12309ཞིབ་དཔྱོད་ཞབས་ཞུ་ལྟེ་གནས”ཀྱི་དྲ་རྒྱའི་ལས་སྟེགས་དང་ཚོམས་ཆེན་མུ་མཐུད་ལེགས་པར་བསྐྲུན་ནས། གྱོད་གཞི་བདག་སྤྲོད་དང་། ཁག་བགོས། སྒྲུབ་གཉེར། ལྟ་སྐུལ། གདེང་འཇོག་བཅས་གཞི་གཅིག་ཏུ་འདུས་པའི“གཅིག་འཐུས་རྣམ་པའི”ནུས་ཆེའི་ཞབས་ཞུའི་ལས་སྟེགས་བཏོད་དེ་མང་ཚོགས་ཀྱི་བློ་ཡིད་ཚིམ་ཚད་རྒྱུན་ཆད་མེད་པར་ཆེ་རུ་བཏང་ནས་མང་ཚོགས་ཀྱི“སྒོ་འགྲམ་གྱི་ཞིབ་དཔྱོད་ཁང”ཧུར་ཐག་བསྐྲུན་ཡོད་པ་རེད།

འབྱུང་རྩ་ནས་སྔོན་འགོག་བྱས་ཏེ་སྣེ་ལེན་གྱི་སྤུས་ཚད་དང་ཕན་འབྲས་ཆེ་རུ་བཏང་ནས་དེ་བས་སྟབས་བདེ་ཡོང་བར་བྱས་པ།

ལྷོ་ཁ་གྲོང་ཁྱེར་ཞིབ་དཔྱོད་ལས་ཁུངས་ཀྱིས་གཞི་གཅིག་ཅན་གྱི་ཐོག་ནས་གཏུག་བཤེར་གྱི་འབྱུང་རྩ་བཅོས་སྒྲིག་ལ་སྐུལ་འདེད་བཏང་སྟེ། ཡིག་འབུལ་དང་། ཞུ་བཅར། 12309ཐད་སྦྲེལ་ཁ་པར། དྲ་རྒྱ། བརྙན་ལམ་བཅས་གཞི་གཅིག་ཏུ་འདུས་པའི་བཅར་འདྲིའི་སྣེ་ལེན་ལམ་སྲོལ་མཐའ་འཁྱོངས་ཀྱིས་ཁྲིམས་འཛིན་རོགས་སྐྱོབ་ཉེར་སྤྱོད་ཀྱི་བཅའ་ཁྲིམས་ལྟ་སྐུལ་དཔེ་དབྱིབས་ཞིབ་འཇུག་གསར་སྤེལ་བྱེད་པ་དང་། རྒྱུན་གཏན་ཅན་གྱི་བཅའ་ཁྲིམས་བློ་འདྲི་དང་། རྒྱང་ཁྲིད་བརྙན་ལམ་གྱི་བཅར་འདྲི་དང་ལེན། ཡོངས་བསྒྲགས་ཐོག་དཔང་ཉན། ཁྲིམས་འཛིན་རོགས་སྐྱོབ་བཅས་ཀྱི་ལས་དོན་རྒྱུན་དུ་སྤེལ་བ། ཁོངས་གཏོགས་ཁུལ་གྱི་གཞི་རིམ་ཁང་དང་མཉམ་འབྲེལ་ཐོག“ཟླ་རེར་ཐེངས་རེའི”ཅན་ཁྲ་ཀྲང་གིས་དྲ་ཕྱིར་སྣེ་ལེན་ཞུ་བའི“འཆར་ཅན་་བྱེད་ཐབས”བཟོས་ཏེ། “གཅིག་འཐུས་རྣམ་པའི”ཐོག་ནས་ཡིག་འབུལ་ཞུ་བཅར་བྱེད་མཁན་མང་ཚོགས་ལ་དུས་ཐོག་དང་། སྟབས་བདེ། ནུས་ཆེ་བཅས་ཀྱི་ཞིབ་དཔྱོད་ཞབས་ཞུ་མཁོ་འདོན་བྱས་པ་རེད།

ལྷོ་ཁ་གྲོང་ཁྱེར་ཞིབ་དཔྱོད་ལས་ཁུངས་ཀྱིས་མཐའ་མཚམས་ཀྱི་འཐབ་ས་དང་པོར་བརྟག་ཞིབ་ལ་བསྐྱོད་ནས་ལྗོངས་ཡོངས་ཀྱི“ཁྲིམས་སྐྱོང་མི་སྣ་ཆེན་པོ་བཅུ”དང་རྒྱལ་ཁབ་ཀྱི་དོན་དུ་མཐའ་སྲུང་བྱེད་མཁན“སྐལ་བཟང་མེ་ཏོག”ལྷུན་རྩེ་རྫོང་ཡུལ་སྨད་ཤང་ཡུལ་སྨད་གྲོང་ཚོའི་གྲོང་མི་སྒྲོལ་དཀར་མིག་དཔེར་འཛིན་ནས་དུས་བཀག་ལྟར་གྲོང་གསེབ་དང་། ཚོང་དུད། དུད་ཁྱིམ་བཅས་སུ་འཚམས་འདྲིར་བསྐྱོད་དེ་མཐའ་མཚམས་མང་ཚོགས་ཀྱིས་རྒྱལ་ཁབ་ཀྱི་བཅའ་ཁྲིམས་ལ་འཛིན་པའི་ངོས་འཛིན་དང་དགོས་མཁོ་ཁོང་དུ་ཆུད་པ་དང་། མཐའ་མཚམས་མང་ཚོགས་ཀྱིས་དོ་ཁུར་ཆེན་པོ་བྱེད་པའི་གློག་འཕྲིན་དྲ་རྒྱའི་ཁ་བསླུས་དང་། ཁྱིམ་མཚེས་ཀྱི་རྩོད་གཞི། དམངས་ཁྲོད་ཀྱི་དངུལ་བུན་གཡར་བ། བསྙེན་བསྐུར་གྱི་གྲོན་དངུལ་སོགས་ཀྱི་གནད་དོན་ལ་ལན་ཞིབ་ཕྲ་བརྒྱབ་སྟེ། ཁྲིམས་ལུགས་ཁྱབ་གདལ་དྲིལ་བསྒྲགས་ཀྱི་ལས་དོན་གཏིང་ཟབ་དང་ཞིབ་ཚགས་བསྒྲུབས་ཡོད། མཐའ་མཚམས་རྫོང་བཞིའི་མཐའ་མཚམས་གྲོང་ཚོ་15རུ“12309ཞིབ་དཔྱོད་ཞབས་ཞུ་ལྟེ་གནས”བཙུགས་ནས་ཤང(གྲོང་རྡལ)སྲིད་གཞུང་གི་ལས་དོན་མི་སྣ་དང་། གྲོང་སྡོད་ལས་དོན་རུ་ཁག གྲོང་ཚོའི“ཨུ་ལྷན་གཉིས”ཚན་ཁག་གི་ཁོངས་མི་སོགས་ཞིབ་དཔྱོད་འབྲེལ་གཏུག་པའི་འགན་འཁུར་བར་གདན་དྲངས་ནས་འཐབ་ས་དང་པོར་འགལ་བ་སེལ་བར་བསྐྱོད་དེ་མང་ཚོགས་མི་ཐེངས་105ཡི་བཅའ་ཁྲིམས་བློ་འདྲིར་ལན་བཏབ་པ་དང་། འགལ་བ་དང་རྩོད་གཞི་ཐེངས་48ལ་གྲལ་བཤེར་བྱས་པ། འགལ་བ་དང་རྩོད་གཞི་1བསལ་བ། གྱོད་གཞིའི་ཁུངས་སྣེ་1བདག་སྤྲོད་བྱས་པ། མཐའ་མཚམས་གྲོང་ཚོའི“12309ཞིབ་དཔྱོད་ཞབས་ཞུ་ལྟེ་གནས”ཀྱི་ལས་དོན་ལ་འཕྲད་པའི་དཀའ་ངལ་དང་གནད་དོན་དུས་ཐོག་ཏུ་ཞིབ་འཇུག་དང་ཐག་གཅོད་བྱས་པས། སྤུས་ཚད་དང་ཕན་འབྲས་མཐོ་པོས“ཞིབ་དཔྱོད་ཆེན་པོ་བཞི”དང“ལས་སྒོ་ཆེན་པོ་བཅུ”མཐའ་མཚམས་སུ་གཞི་ཚུགས་པར་སྐུལ་འདེད་བཏང་བ་རེད།

ཞབས་ཞུ་གནད་ལ་འཁེལ་བར་བྱས་ནས་གྱོད་གཞི་སྒྲུབ་ནུས་ཆེ་ལ་མི་སེམས་ཀྱང་དྲོས་པར་བྱས་པ།

ལྷོ་ཁ་གྲོང་ཁྱེར་ཞིབ་དཔྱོད་ལས་ཁུངས་ཀྱིས་སྐར་ཁུང་གི་རྣམ་པ་ལེགས་སུ་གཏོང་བ་དང་། ལས་ཀ་བྱེད་སྟངས་ལེགས་སུ་གཏོང་བ། ཞབས་ཞུའི་འདུ་ཤེས་ཟབ་ཏུ་གཏོང་བ། ཁྲིམས་མཐུན་ཁེ་དབང་སྲུང་སྐྱོང་སོགས་ཀྱི་ཐད་ལ་དམིགས་ཏེ། ཐོ་འགོད་ཡང་དག་བྱེད་པ་དང་། རྩིས་ཐོའི་ཆ་འཕྲིན་བཟོ་བ། ཡིག་འབུལ་ཞུ་བཅར་བྱེད་མཁན་ལ་བདེ་འཇགས་ངང་ཞིབ་བཤེར་དང་ལེན་བྱ་རྒྱུའི་ཁྲིད་སྟོན་བྱས་ནས། ཡིག་འབུལ་ཞུ་བཅར་ལས་དོན་ལ་ཀུན་གྱིས་ཡིད་ཆེས་བྱེད་ཚད་དང་མང་ཚོགས་བློ་ཡིད་ཚིམ་ཚད་རྒྱུན་ཆད་མེད་པར་ཆེ་རུ་བཏང་བ་རེད།

ལྷོ་ཁ་གྲོང་ཁྱེར་ཞིབ་དཔྱོད་ལས་ཁུངས་ཀྱིས་ཡིག་འབུལ་དང་ཞུ་བཅར་ཐོག་མར་ཞིབ་དཔྱོད་དཔོན་གྱིས་ཐུག་འཕྲད་བྱེད་པའི་ལམ་ལུགས་ཁྱོན་ཡོངས་ནས་ཁྱབ་གདལ་བཏང་ནས། ཡིག་འབུལ་ལ་བདག་སྤྲོད་ཐོ་འགོད་དང་། ཁག་བགོས་སྒྲུབ་གཉེར། ལན་ཚད་ལྡན་འདེབས་པ་སོགས་ཀྱི་བླང་བྱ་ཁ་གསལ་བཟོས་ཡོད། 2021ལོ་ནས་བཟུང་ཁྱོན་ཡིག་འབུལ་278དང་ཞུ་བཅར་ལ་ཡོང་བའི་མང་ཚོགས་343ལ་སྣེ་ལེན་ཞུས་པ་དང་། ཅན་ཁྲ་ཀྲང་གིས་མི་ཐེངས་72ལ་སྣེ་ལེན་ཞུས་པ། ཡིག་འབུལ་72ལ་བལྟས་པ། ཉིན་7ནང་གོ་རིམ་རང་བཞིན་གྱི་ལན་སློག་ཚད་དང་ཟླ་བ་3གྱི་སྒྲུབ་གཉེར་བརྒྱུད་རིམ་ལམ་ཡང་ན་མཇུག་འབྲས་ལ་ལན་སློག་ཚད་ཚང་མ་100%ཟིན་པས། “དོན་དག་ཚང་མར་འདི་བྱས་འདི་མིན་གྱི་ལན་གསལ་པོ་ཡོད་པ”དངོས་འབྲེལ་ཐུབ་པར་བྱས་པ་རེད།

དུས་བཀག་ལྟར་གསེད་བཀྲོལ་བྱས་ནས་འགལ་བ་སེལ་ནུས་སྔར་བས་ཆེ་རུ་བཏང་བ།

ལྷོ་ཁ་གྲོང་ཁྱེར་ཞིབ་དཔྱོད་ལས་ཁུངས་ཀྱིས་འགོ་ཁྲིད་ཀྱིས་སྣེ་ཁྲིད་དེ་གྱོད་དོན་ལ་འགན་ཁུར་ནས་ཡིག་འབུལ་དང་ཞུ་བཅར་ཐོག་མའི་ཉེས་དོན་དག་ཞུ་དང་། གྱོད་དོན་ཐོ་འགོད་ལྟ་སྐུལ། རྒྱལ་ཁབ་ཀྱི་སྐྱིན་ཚབ་འཇལ་བ་སོགས་ཀྱི་གྱོད་གཞི་15བསྒྲུབས་ཡོད། དོ་བདག་ལ་དངོས་སུ་སྣེ་ལེན་ཞུ་བ་དང་། ཡིག་ཤོག་ལ་དངོས་སུ་ལྟ་ཀློག་དང་ཞིབ་བཤེར་བྱེད་པ། དངོས་སུ་བཅའ་ཁྲིམས་འགྲེལ་བཤད་དང་གནས་ལུགས་ཤོད་པ་བཅས་བྱས་ཏེ། ཡོངས་བསྒྲགས་ཀྱི་དཔང་ཉན་གཙོ་སྐྱོང་བྱེད་པ་དང་ལན་འདེབས་ནང་ཞུགས་པ་སོགས་ཀྱི་བྱ་ཐབས་བརྒྱུད། དཀའ་གནད་ཆེ་བའི་གནད་དོན་15དངོས་འབྲེལ་ཐག་གཅོད་ཡོང་བར་སྐུལ་འདེད་ནུས་ལྡན་བཏང་བ་རེད།

ལྷོ་ཁ་གྲོང་ཁྱེར་ཞིབ་དཔྱོད་ལས་ཁུངས་ཀྱིས་ལྷོ་ཁ་གྲོང་ཁྱེར་ཁྲིམས་འཛིན་ཅུས་དང་མཉམ་དུ《ཁྲིམས་རྩོད་པ་ཕུང་གསུམ་པའི་བཅའ་ཁྲིམས་དང་གཏུག་བཤེར་དང་འབྲེལ་བ་ཡོད་པའི་ཡིག་འབུལ་ཞུ་བཅར་ཐག་གཅོད་དང་ཚབ་གཉེར་གྱི་ལས་དོན་ནང་ཞུགས་པའི་བྱ་ཐབས》བཏོན་ནས་ཁྲིམས་རྩོད་པ་བཅའ་ཁྲིམས་དང་གཏུག་བཤེར་དང་འབྲེལ་བ་ཡོད་པའི་ཡིག་འབུལ་ཞུ་བཅར་གྱི་གྱོད་གཞི་ཐག་གཅོད་ལ་ཞུགས་པར་ཁྲིད་སྟོན་ཧུར་ཐག་བྱས་ཏེ་དོ་བདག་ལ་དོགས་གཞི་སེལ་བ་དང་། བཅའ་ཁྲིམས་འགྲེལ་བཤད་དང་གནས་ལུགས་འགྲེལ་བཤད་རྒྱག་པ། གྱོད་སྒྲུབ་ཀྱི་གོ་སྐོན་བློ་འགུག་གི་ནུས་པ་ཆེ་རུ་གཏོང་བ་བཅས་བྱས་པས། “གྱོད་མཇུག་འགྲིལ་བ་དང་། གནད་དོན་ཐག་གཅོད་ཐུབ་པ། མི་འཆམ་མཐུན་ཡོང་བ”བཅས་མངོན་འགྱུར་བྱུང་བ་རེད།

ལྷོ་ཁ་གྲོང་ཁྱེར་མི་དམངས་ཞིབ་དཔྱོད་ཁང་གི་འགན་འཁུར་བས་ངོ་སྤྲོད་བྱས་པར་གཞིགས་ན། “12309ཞིབ་དཔྱོད་ཞབས་ཞུ་ལྟེ་གནས”བཙུགས་པ་ནས་བཟུང་། གྲོང་ཁྱེར་ཡོངས་ཀྱི་ཞིབ་དཔྱོད་ལས་ཁུངས་ཀྱིས་གཏུག་བཤེར་རིགས་ཀྱི་གྱོད་གཞི་13དང་། ཉེས་དོན་ཞུ་གཏུག་རིགས་ཀྱི་གྱོད་གཞི་17 དམངས་དོན་ལྟ་སྐུལ་རིགས་ཀྱི་གྱོད་གཞི་49སྒྲུབ་གཉེར་བྱས་པ་དང་། ཁྲིམས་འཛིན་རོགས་སྐྱོབ་རིགས་ཀྱི་གྱོད་གཞི་105དང་མི་105ཟིན་པ། ཁྲིམས་འཛིན་རོགས་སྐྱོབ་མ་དངུལ་སྒོར་ཁྲི་137.476སྤྲད་ཡོད། གཞན་ཡང་ཁྲིམས་རྩོད་པ་དང་། ཆེད་མངགས་གདན་ཞུས་ཞིབ་དཔྱོད་དཔོན་གྱི་ལས་རོགས་པ། ཡིག་འབུལ་ཞུ་བཅར་ཅུས་ཀྱི་ལས་དོན་མི་སྣ་སོགས་གདན་དྲངས་ནས། ཡོངས་བསྒྲགས་ཀྱི་དཔང་ཉན་ནང་ཐེངས་217ཞུགས་ཏེ། ནུས་ཤུགས་ཡོད་རྒུས་འགལ་བ་དང་རྩོད་གཞི་ནུས་ལྡན་སེལ་རྒྱུར་སྐུལ་འདེད་བཏང་ནས་སྤྱི་ཚོགས་ཞི་མཐུན་བརྟན་ལྷིང་སྲུང་སྐྱོང་བྱས་པ་རེད།

གོམ་སྟབས་རྗེས་མར། ལྷོ་ཁ་གྲོང་ཁྱེར་ཞིབ་དཔྱོད་ལས་ཁུངས་ཀྱིས“12309ཞིབ་དཔྱོད་ཞབས་ཞུ་ལྟེ་གནས”དངོས་སུ་འཁོར་རྒྱུག་བྱས་ནས། སྒོ་འགྲམ་ནས་རེ་ཞུ་འདོན་པ་དང་། སྒོ་འགྲམ་ནས་འགལ་བ་སེལ་བ། སྒོ་འགྲམ་ནས་རོགས་སྐྱོབ་རོགས་སྐྱོར་བཅས་བྱེད་རྒྱུར་སྐུལ་འདེད་བཏང་ནས། མང་ཚོགས་ཀྱི“སྒོ་འགྲམ་གྱི་ཞིབ་དཔྱོད་ཁང”གཏོད་པ་དང་། དུས་རབས་གསར་པའི“ཧྥེང་ཆའོ་ཡི་ཉམས་མྱོང”རྒྱུན་འཁྱོངས་དང་འཕེལ་རྒྱས་བཏང་སྟེ། མང་ཚོགས་ཀྱི་འགལ་བ་ཐག་གཅོད་བྱས་ནས་ཆུ་ཚད་དེ་བས་མཐོ་བའི་དུས་བདེའི་ལྷོ་ཁ་འཛུགས་སྐྲུན་ལ་སྐུལ་འདེད་གཏོང་ཆེད་ལེགས་སྐྱེས་གསར་པ་དེ་བས་ཆེ་བ་འབུལ་རྒྱུ་རེད།