བགྲང་བྱ་30ཡི་རིང་། ཧོ་པེ་ཞིང་ཆེན་གྱིས་སྔ་རྗེས་སུ་ཁག10ཡི་ལས་བྱེད་ཤེས་ལྡན་པ་495དང་ཁག་11གི་དུས་ཐུང་རོགས་སྐྱོར་ཆེད་ལས་ལག་རྩལ་ཤེས་ལྡན་པ་284བོད་དུ་ལས་དོན་སྒྲུབ་པར་མངགས་ཤིང་། རིམ་རྩིས་བྱས་ན་འཆར་འགོད་ནང(ཕྱི)གི་བོད་སྐྱོར་མ་དངུལ་སྒོར་དུང་ཕྱུར་28.18བཏང་བ་དང་རིགས་ཁག་གི་རྣམ་གྲངས467ལག་བསྟར་བྱས་ཡོད། ཐོན་ལས་ཀྱི་བོད་སྐྱོར་དང་། རིག་སྟོབས་ཀྱི་བོད་སྐྱོར། སློབ་གསོའི་བོད་སྐྱོར། སྨན་བཅོས་ཀྱི་བོད་སྐྱོར་སོགས་ལ་བརྟེན་ནས་བོད་སྐྱོར་ལས་དོན་གྱི“སྣ་འདུས་ཐབས་བཟང”གང་ལེགས་སྤྱད་དེ། མངའ་རིས་ས་ཁུལ་གྱི་ཡུན་རིང་བདེ་འཁོད་དང་སྤུས་ཚད་མཐོ་བའི་འཕེལ་རྒྱས་ལ་སྒུལ་ཤུགས་ཆེན་པོ་བསྣན་པ་རེད།

ཐོན་ལས་བོད་སྐྱོར་བྱས་ཏེ།

དཔལ་འབྱོར་གྱི་སྒུལ་ཤུགས་གསར་པ་སྐྱེད་སྲིང་ཧུར་ཐག་བྱས་པ།

ལོ་མང་རིང་། ཧོ་པེ་ཞིང་ཆེན་གྱིས་མངའ་རིས་ཀྱི་དོན་དངོས་ལ་གཞི་བཙུགས་ནས་ཚན་རིག་དང་མཐུན་པར་བོད་སྐྱོར་རྣམ་གྲངས་འཆར་འགོད་ཇུས་འགོད་བྱས་པ་དང་། ལྷག་པར་དུ་ཀྲུང་དབྱང་གི་བོད་ཀྱི་ལས་དོན་སྐོར་གྱི་བཞུགས་མོལ་ཚོགས་འདུ་ཐེངས་ལྔ་པ་དང་། དྲུག་པ། བདུན་པ་བཅས་ཀྱི་དགོངས་དོན་ལག་བསྟར་དོན་འཁྱོལ་ལ་དམིགས་ནས། ཧོ་པེ་ཞིང་ཆེན་གྱིས་བོད་ལ་ཁ་གཏད་རོགས་སྐྱོར་བྱེད་པའི་འཆར་འགོད་ཞིབ་འཇུག་གིས་བཟོས་པ་དང་། ཁྲོམ་ར་སྐྱེད་སྲིང་དང་ཀ་རྟེན་ཐོན་ལས་འཕེལ་རྒྱས་ལ་རྒྱབ་སྐྱོར་བྱེད་པ་སོགས་དམིགས་བཀར་རྣམ་གྲངས་སྐྲུན་ཤུགས་དང་མ་དངུལ་གཏོང་ཤུགས་ཆེ་རུ་བཏང་ཞིང་། མངའ་རིས་ས་ཁུལ་དང་ལྷག་པར་དུ་གཙོ་གནད་རོགས་སྐྱོར་བྱ་ཡུལ་རྩྭ་མདའ་དང་རུ་ཐོག་རྫོང་གཉིས་ཀྱི་དཔལ་འབྱོར་འཕེལ་རྒྱས་ལ་རྒྱུན་མཐུད་གསོན་ཤུགས་བསྣན་པ་རེད།

བོད་སྐྱོར་བྱེད་རིང་། ཧོ་པེ་ཞིང་ཆེན་གྱིས་སྒོར་ཁྲི་6900ལྷག་ཙམ་བཏང་ནས་ས་གནས་དེ་གའི་འགྲིམ་འགྲུལ་དང་ཡུལ་སྐོར་སོགས་ཀྱི་རྨང་གཞིའི་སྒྲིག་བཀོད་ལེཌ་གཏོང་གི་རྣམ་གྲངས་30ལྷག་ཙམ་སྐྲུན་རོགས་བྱས་ཤིང་། སྒོར་ཁྲི་9639.12བཏང་ནས་རྩྭ་མདའ་རྫོང་རྩྭ་ཧྲེང་ཡུལ་སྐོར་གྲོང་ཚོ་འཛུགས་སྐྲུན་རྣམ་གྲངས་བསྐྲུན་ཏེ་གནའ་བོའི་ཞང་ཞུང་རིག་གནས་ཡུལ་སྐོར་རྩེར་སོན་ལམ་ཐིག་གསར་སྤེལ་བྱས་པ་དང་། སྒོར་ཁྲི་1700བཏང་ནས་ཞིང་འབྲོག་ལས་མཉམ་ལས་དཔལ་འབྱོར་རྩ་འཛུགས་འཛུགས་སྐྱོང་དང་མི་རིགས་ལག་ཤེས་བཟོ་རྩལ་ཐོན་རྫས་དང་། ཡུལ་སྐོར་དྲན་རྟེན་དངོས་པོ། ཞིང་འབྲོག་ཐོན་རྫས་གསར་སྤེལ་བཅས་བྱེད་པར་འདེགས་སྐྱོར་བྱས་པ་རེད། སྒོར་ཁྲི་1500བཏང་ནས་མཐའ་མཚམས་ཚོང་དོན་ཁྲོམ་ར་དང་། ཞིང་ཟོག་ཁྲོམ་ར། ཚོང་དོན་ཁྲོམ་ར་བཅས་འཛུགས་སྐྲུན་ལ་རྒྱབ་སྐྱོར་བྱས་པ་དང་། ལྗོངས་ཕྱི་ནང་གི་ཁེ་ལས་མངའ་རིས་སུ་གཞིས་ཆགས་རྒྱུར་རང་འགུལ་ངང་ཁྲིད་སྟོན་བྱས་ཏེ་ཁྱོན་ས་གནས་དེ་གའི་མི་5000ཙམ་ཐག་ཉེ་ས་དང་ས་ཆ་དེ་རང་དུ་ལས་ཞུགས་ཐུབ་རྒྱུར་སྐུལ་ཁྲིད་བྱས་པ་རེད།

དམངས་འཚོའི་བོད་སྐྱོར་བྱས་ཏེ།

མི་རིགས་ཁག་གི་མང་ཚོགས་ཀྱི་སྐྱིད་སྣང་ཆེ་རུ་བཏང་བ།

“ལོ་ལྔ་ཚན་བཅུ་གཉིས་པའི”རིང་མ་དངུལ་བཏང་ནས་འབྱོར་འབྲིང་དཔེ་སྟོན་གྲོང་ཚོ་སྐྲུན་རོགས་བྱས་པ་ནས“ལོ་ལྔ་ཚན་བཅུ་གསུམ་པའི”རིང་རུ་ཐོག་དང་རྩྭ་མདའ་རྫོང་གཉིས་སུ་དབུལ་སྐྱོར་ལ་བརྟེན་ཏེ་གྲོང་ཚོ་ཧྲིལ་པོར་སྐུལ་འདེད་གཏོང་བའི་རྣམ་གྲངས་བསྐྲུན་པ་དང་། དེ་ནས“ལོ་ལྔ་ཚན་བཅུ་བཞི་པའི”རིང་དབུལ་སྒྲོལ་འགག་སྒྲོལ་གྱི་གྲུབ་འབྲས་གྲོང་གསེབ་དར་རྒྱས་དང་སྦྲེལ་མཐུད་ནུས་ལྡན་ཐུབ་རྒྱུར་སྤྱི་འདོམས་སྐུལ་འདེད་གཏོང་བ་ལ་སོགས། ཧོ་པེ་ཞིང་ཆེན་བོད་སྐྱོར་ལས་དོན་ཚོགས་ཆུང་གིས་བྱེད་ཐབས་ཏན་ཏིག་རབ་དང་རིམ་པ་བརྒྱུད་ས་གནས་དེ་གའི་ལས་བྱེད་པ་དང་མང་ཚོགས་ཀྱི་ཐོབ་སྣང་དང་། སྐྱིད་སྣང་། བདེ་འཇགས་ཚོར་སྣང་བཅས་ཆེ་རུ་ནུས་ལྡན་བཏང་བ་རེད།

དེའི་རིང་ཧོ་པེ་ཞིང་ཆེན་གྱིས་སྔ་རྗེས་སུ་རྩྭ་ཧྲེང་དང་རུ་ཐོག་གྲོང་ཚོ་སོགས་འབྱོར་འབྲིང་དཔེ་སྟོན་གྲོང་ཚོ་5སྐྲུན་རོགས་བྱས་ནས་རུ་ཐོག་དང་རྩྭ་མདའ་རྫོང་གཉིས་ཀྱི་བདེ་སྡོད་ལས་གྲྭ་དང་། ཤང་དང་གྲོང་རྡལ་གྱི་རྨང་གཞིའི་ལེ་ལག་ཚང་བའི་སྒྲིག་བཀོད། ཁྱད་ལྡན་གྲོང་རྡལ་ཆུང་ངུ་སོགས་འཛུགས་སྐྲུན་རྣམ་གྲངས་ལག་བསྟར་བྱས་པ་དང་། སྒོར་དུང་ཕྱུར་1.63བཏང་ནས་སེང་གེ་ཁ་འབབ་གྲོང་རྡལ་གྱི་རྐང་ཐང་ཟམ་པ་དང་། ཡན་ཀྲའོ་ལམ་ཆེན། རུ་ཐོག་དང་རྩྭ་མདའ་རྫོང་གཉིས་ཀྱི་གྲོང་ཁུལ་རྙིང་པ་སྒྱུར་བཀོད་སོགས་ཀྱི་རྣམ་གྲངས་བསྐྲུན་པས་གྲོང་ཁྱེར་དང་གྲོང་རྡལ་གྱི་རྣམ་པར་འགྱུར་ལྡོག་ཕྱིན་ཞིང་། གྲོང་ཁྱེར་དང་གྲོང་རྡལ་གྱི་ནུས་པ་སྔར་བས་ཆེ་རུ་ཕྱིན་པ་རེད། སྒོར་ཁྲི་2900སྤྱི་འདོམས་ཀྱིས་རྩྭ་མདའ་དང་། རུ་ཐོག སྒེར་རྩེ། སྤུ་ཧྲེང་། སྒར་བཅས་རྫོང་5ཡི་ལས་བྱེད་པ་དང་ལས་བཟོའི་སྡོད་ཁང་བསྐྱར་སྐྲུན་དང་རྒྱས་སྐྲུན་བྱས་པ་རེད། སྒོར་ཁྲི་1800བཏང་ནས་རུ་ཐོག་རྫོང་གྲོང་གི་དམངས་འཚོ་འགན་སྲུང་གི་ཚད་ལྡན་ཅན་གྱི་ཆུ་ཀ་ལ་བཟོ་གྲྭའི་འཛུགས་སྐྲུན་རྣམ་གྲངས་ལག་བསྟར་བྱས་ཏེ་རུ་ཐོག་རྫོང་གྲོང་གི་ལས་བྱེད་པ་དང་མང་ཚོགས་ཀྱི་འཐུང་ཆུའི་དཀོན་པའི་གནད་དོན་ཐག་གཅོད་བྱས་པ་རེད།

རིག་སྟོབས་བོད་སྐྱོར་བྱས་ཏེ།

སློབ་ཁྲིད་ལ་བརྟེན་ནས་སྤུས་ཚད་མཐོ་བའི་འཕེལ་རྒྱས་ལ་ནུས་པ་སྦྱིན་པ།

2005ལོར་ཧོ་པེ་ཞིང་ཆེན་གྱིས་རིག་སྟོབས་ཐད་ནས་མངའ་རིས་ལ་རོགས་སྐྱོར་གྱི་ལས་དོན་དངོས་སུ་སྤེལ་འགོ་ཚུགས་པ་དང་། 2010ལོར《རིག་སྟོབས་ཐད་ནས་མངའ་རིས་ལ་རོགས་སྐྱོར་གྱི་ལས་དོན་ལ་སྔར་བས་ཤུགས་སྣོན་རྒྱག་རྒྱུའི་སྐོར་གྱི་བསམ་འཆར》བཟོས་ནས། ལོ་ལྟར་ཧོ་པེ་ཞིང་ཆེན་ཁོངས་གཏོགས་ཀྱི་མཐོ་སློབ་ནས་ལོ་འདིའི་སློབ་ཐོན་སློབ་མ་དང་ཆེད་ལས་ལག་རྩལ་ཤེས་ལྡན་པ་བོད་དུ་ལས་ཀ་བྱེད་པར་གདན་འདྲེན་གྱི་ཡོད། གནས་སྦྱར་དང་སློབ་གྲྭར་སློབ་སྦྱོང་བྱེད་པ་སོགས་ཀྱི་རྣམ་པའི་ཐོག་ནས་ཕྱོགས་གཉིས་པོའི་ཤེས་ལྡན་པ་སྤེལ་རེས་གསོ་སྦྱོང་གི་མཉམ་ལས་ལ་ཤུགས་སྣོན་བརྒྱབ་སྟེ། མངའ་རིས་ས་ཁུལ་གྱི་ཏང་སྲིད་ལས་བྱེད་པ་200ལྷག་ཙམ་ཧོ་པེ་རུ་གནས་སྦྱར་དང་སྤེལ་རེས་སློབ་སྦྱོང་བྱེད་པར་བསྡུས་ཡོད། མངའ་རིས་ས་ཁུལ་གྱི་ཞིང་འབྲོག་པ་སྒྲིག་འཛུགས་བྱས་ནས་ལས་རྣམ་གསར་པའི་ལས་ཞུགས་གསོ་སྦྱོང་བྱས་པ་དང་ཁྱོན་ཞིང་འབྲོག་པ་མི་ཐེངས་6000ལྷག་ཙམ་ལ་གསོ་སྦྱོང་བྱས་ཡོད། ཁག་ཐེངས་16གི་སློབ་མ་400ལྷག་ཙམ་སྒྲིག་འཛུགས་ཀྱིས་ལྗོངས་ཕྱིར་བསྐྱོད་ནས་སྤེལ་རེས་དང་། ཞིབ་འཇུག སློབ་སྦྱོང་བཅས་བྱས་ཡོད། སྔ་རྗེས་སུ་ཁག་ཐེངས་3གྱི“ཚོགས་སྒྲིག་རྣམ་པའི”སློབ་གསོའི་ཤེས་ལྡན་པ་60དང་། ཁག་ཐེངས་2ཀྱི“མི་ཁྲིའི་འཆར་གཞིའི”དགེ་རྒན་44 ཁག་ཐེངས་3གྱི་དུས་ཐུང་བོད་སྐྱོར་དགེ་རྒན་42བཅས་མངགས་ནས་མངའ་རིས་ས་ཁུལ་གྱི་སློབ་གསོའི་བྱ་གཞག་ལ་རོགས་སྐྱོར་བྱས་པ་རེད།