ཉེ་བའི་ལོ་ཤས་རིང་། ཆབ་མདོ་གྲོང་ཁྱེར་ཁྲིམས་ཁང་ཁོངས་གཏོགས་ཀྱིས་རྒན་རྒོན་གྱི་ཁེ་དབང་འགན་སྲུང་ལས་དོན་ལ་དམིགས་ཏེ་རྒན་རྒོན་གྱི་ཁེ་དབང་འགན་སྲུང་གི་ཁྲིམས་འཛིན་ཐབས་ལམ་འཚོལ་ཞིབ་ཧུར་ཐག་བྱས་ནས། ཁྱོན་ཡོངས་དང་། དྲོ་སྐྱིད་ལྡན་པ། ལས་ཕྱོད་ཆེ་བ། ན་རྒས་ཅན་གྱི་ད་ལྟའི་གནས་ཚུལ་དང་རྒན་རྒོན་གྱི་ལུས་སེམས་ཁྱད་ཆོས་དང་འཚམ་པ་བཅས་ཀྱི་བརྩེ་བ་ཟབ་པའི་ཁྲིམས་འཛིན་ཞབས་ཞུ་བསྒྲུབས་ཏེ། རྒན་རྒོན་གཅེས་སྐྱོང་གི“སྲུང་བཅད་ཡག་པོ”བསྐྲུན་ནས་སེམས་ནུས་ཡོད་རྒུས་རྒན་རྒོན་གྱི་ཁེ་དབང་འགན་སྲུང་ནུས་ལྡན་བྱས་ཡོད།

ཤེས་རྟོགས་བྱུང་བར་གཞིགས་ན། ཆབ་མདོ་གྲོང་ཁྱེར་གྱི་རིམ་ཁག་མི་དམངས་ཁྲིམས་ཁང་གིས་ཉེས་དོན་འདྲི་གཅོད་ཀྱི་འགན་ནུས་གང་ལེགས་བཏོན་ཏེ་རྒན་རྒོན་ལ་སྡུག་གཅོད་དང་གསོ་འགན་མི་འཁུར་བའི་ཉེས་དོན་འགན་འཁྲི་བདའ་འདེད་ནན་པོ་གཏོང་བ་དང་། རྒན་རྒོན་གྱི་ཚེ་སྲོག་བདེ་ཐང་གི་དབང་ཆར་བཙན་གནོད་བྱས་ཏེ་རྐང་བཙུགས་ནས་མི་བསད་པ་དང་རྐང་བཙུགས་ནས་གནོད་འཚེ་བཏང་བའི་གྱོད་གཞིར་ཁྲིམས་ལྟར་ཆད་པ་ནན་པོ་གཅོད་པ། དམངས་དོན་འདྲི་གཅོད་ཀྱི་འགན་ནུས་གང་ལེགས་འདོན་པ་དང་དམངས་དོན་ཁྲིམས་གཞུང་སོགས་བཅའ་ཁྲིམས་གཞི་འཛིན་སར་བྱ་རྒྱུ་མཐའ་འཁྱོངས་ཀྱིས་མི་རྩ་བར་འཛིན་པ་མཐའ་འཁྱོངས་དང་། ཉག་ཉོག་དང་སྟབས་བསྡུས་ཁག་བགོས་དོན་འཁྱོལ་བྱེད་པ། གྱོད་གཞི་སྒྲུབ་ཡུན་ཐུང་དུ་གཏོང་བ། ཁྲིམས་འཛིན་ཞབས་ཞུ་སྒྲུབ་ཤུགས་ཆེ་རུ་གཏོང་བ། རྒན་རྒོན་ལ་དཔང་རྟགས་འདོན་པའི་མཛུབ་སྟོན་བྱེད་ཤུགས་ཆེ་རུ་གཏོང་བ། རྒན་རྒོན་གྱི་ཞུ་ལན་འདེབས་པ་དང་ཞུ་གཏུག་ནང་ཞུགས་པའི་ནུས་པ་ཆེ་རུ་གཏོང་བ་བཅས་བྱས་ནས། རྒན་རྒོན་དང་འབྲེལ་བ་ཡོད་པའི་གཉེན་སྒྲིག་དང་། ཁྱིམ་ཚང་། སྲི་ཞུ་སྒྲུབ་པ། ཁེ་དབང་ལ་བཙན་གནོད་སོགས་ཀྱི་འགལ་ཟླ་དང་རྩོད་གཞི་དུས་ཐོག་ཏུ་འདུམས་པ་རེད། “མངགས་ཐོ་རྣམ་པའི”ཁྲིམས་ལུགས་ཁྱབ་གདལ་དང་ཟུང་འབྲེལ་བྱས་ཏེ་ཆབ་མདོ་གྲོང་ཁྱེར་རིམ་ཁག་མི་དམངས་ཁྲིམས་ཁང་གིས་དུས་བཀག་ལྟར་ཆེད་ལས་ཁྲིམས་དཔོན་སྒྲིག་འཛུགས་བྱས་ནས་གྲོང་ཚོ་ཨུ་ལྷན་དང་། རྒན་གསོ་ཁང་། ཆ་སྒྲིག་རོགས་སྐྱོར་སྡེ་ཁུལ་བཅས་སུ་བསྐྱོད་དེ《ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་རྒན་རྒོན་གྱི་ཁེ་དབང་འགན་སྲུང་སྐོར་གྱི་བཅའ་ཁྲིམས》དང་། 《བོད་རང་སྐྱོང་ལྗོངས་ཀྱི<ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་རྒན་རྒོན་གྱི་ཁེ་དབང་འགན་སྲུང་སྐོར་གྱི་བཅའ་ཁྲིམས>ལག་བསྟར་བྱེད་ཐབས》དྲིལ་བསྒྲགས་བྱས་པ་དང་། དེ་བཞིན“རྒན་གསོའི་ཞབས་ཞུ”སྒྲུབ་པ་དང་། “རྒན་གསོའི་རྣམ་གྲངས”ལ་མ་དངུལ་གཏོང་བ། “རྒན་གསོའི་ཐོན་རྫས”ཕྱིར་ཚོང་སོགས་མ་དངུལ་བསྡུ་རུབ་ཀྱི་ཁ་བསླུས་དང་། ཁྲིམས་འགལ་ངང་སྤྱི་དམངས་ཀྱི་བཅོལ་དངུལ་བསྡུ་ལེན་བྱེད་པ། གན་རྒྱའི་ཁ་བསླུས་རྒྱག་པ་བཅས་རྒན་རྒོན་གྱི་ཁེ་དབང་ལ་གནོད་པའི་གྱོད་དཔེ་དངོས་ལ་བརྟེན་ནས་བཅའ་ཁྲིམས་འགྲེལ་བཤད་དང་ཉེན་བརྡའི་སློབ་གསོ་གཏོང་བ་བརྒྱུད། རྒན་གསོའི་ཁ་བསླུས་ཀྱི་དྲིལ་བསྒྲགས་ཕན་འབྲས་ཆེ་རུ་བཏང་བ་རེད།