དྲི་བ། ཁྲིམས་འགལ་ཉེས་གསོག་གི་ཏང་ཡོན་ལ་ཆད་པ་ཇི་ལྟར་གཅོད་དགོས་སམ།

དྲིས་ལན། དོན་ཚན་ཉེར་བརྒྱད་པ། ཁྲིམས་འགལ་གྱི་བྱས་ཉེས་བསགས་པའི་ཏང་ཡོན་ལ་གཏན་འབེབས་ལྟར་ཏང་གི་སྒྲིག་ཁྲིམས་ཀྱི་ཆད་པ་བཅད་ནས་སྒྲིག་ཁྲིམས་དང་བཅའ་ཁྲིམས་ཀྱི་འཚམ་སྤྱོད་ཟུང་འབྲེལ་དམ་ཚགས་བྱེད་པ་དང་། ཏང་གི་སྒྲིག་ཁྲིམས་དང་སྲིད་དོན་སོགས་ཀྱི་ཆད་གཅོད་སྙོམས་སྒྲིག་ཡོང་བར་བྱེད་དགོས།

དོན་ཚན་ཉེར་དགུ་པ། སྒྲིག་ཁྲིམས་ཞིབ་བཤེར་བྱེད་རིང་ཏང་ཡོན་ལ་ལྐོག་རྔན་ཟ་ལེན་དང་། འགན་དབང་གང་བྱུང་དུ་སྤྱོད་པ། རང་འཁྲིའི་ལས་འགན་སྣང་མེད་དུ་འཇོག་པ། དབང་བརྟེན་ཁེ་གཉེར། ཁེ་ཕན་སྐྱེལ་སྤྲོད། ཉེར་ཕྱོགས་གཡོ་ཟོལ། རྒྱལ་ཁབ་ཀྱི་རྒྱུ་ནོར་ཆུད་ཟོས་སུ་གཏོང་བ་སོགས་བཅའ་ཁྲིམས་དང་འགལ་བའི་ཉེས་གསོག་གི་དོགས་གཞིའི་བྱེད་སྤྱོད་ཡོད་པ་ཏང་རྩ་འཛུགས་ཀྱིས་ཤེས་རྟོགས་བྱུང་ཚེ། དེའི་ཏང་ནང་ཁུལ་གྱི་གོ་གནས་མེད་པར་བཟོ་བ་དང་། ཏང་ནང་བཞག་ནས་ལྟ་ཞིབ་བྱེད་པའམ་ཏང་གི་སྐྱིད་སྡུག་ནས་འབུད་པའི་ཆད་པ་གཅོད་རྒྱུ།

དོན་ཚན་སུམ་ཅུ་པ། སྒྲིག་ཁྲིམས་ཞིབ་བཤེར་བྱེད་རིང་ཏང་ཡོན་ལ་ཉེས་ཁྲིམས་ནང་འཁོད་པའི་གཏན་འབེབས་ཀྱི་བྱེད་སྤྱོད་ཡོད་པ་ཏང་རྩ་འཛུགས་ཀྱིས་ཤེས་རྟོགས་བྱུང་ཚེ། བྱས་ཉེས་སུ་མ་གྲུབ་ཀྱང་ཏང་གི་སྒྲིག་ཁྲིམས་ཀྱི་འགན་འཁྲི་བདའ་འདེད་གཏོང་དགོས་རིགས་སམ་སྤྱི་ཚོགས་རིང་ལུགས་ཀྱི་ཁྲོམ་རའི་དཔལ་འབྱོར་གྱི་སྒྲིག་ལམ་གཏོར་བཤིག་བཏང་བ་དང་། བདེ་སྲུང་དོ་དམ་དང་འགལ་བ་སོགས་ཁྲིམས་འགལ་གྱི་བྱེད་སྤྱོད་གཞན་དག་ཡོད་པའི་རྐྱེན་གྱིས་ཏང་དང་། རྒྱལ་ཁབ། མི་དམངས་བཅས་ཀྱི་ཁེ་ཕན་ལ་གནོད་འཚེ་བཏང་རིགས་ལ་ཞིབ་ཕྲའི་གནས་ཚུལ་ལ་གཞིགས་ནས་ཐ་ཚིག་སྒྲོག་པ་ནས་ཏང་གི་སྐྱིད་སྡུག་ནས་འབུད་པའི་བར་གྱི་ཆད་པ་གཅོད་རྒྱུ།

རྒྱལ་ཁབ་ཀྱི་ནོར་སྲིད་དཔལ་འབྱོར་གྱི་སྒྲིག་ཁྲིམས་དང་འགལ་ནས། སྤྱི་པའི་མ་དངུལ་གཏོང་ཡོང་དང་། ཁྲལ་དོན་དོ་དམ། གཞུང་ཁོངས་རྒྱུ་ནོར་དོ་དམ། སྲིད་གཞུང་གི་ཉོ་སྒྲུབ་དོ་དམ། དངུལ་རྩའི་དོ་དམ། ནོར་དོན་རྩིས་གཉེར་དོ་དམ་སོགས་ནོར་སྲིད་དཔལ་འབྱོར་གྱི་བྱེད་སྒོའི་ནང་ཁྲིམས་འགལ་གྱི་བྱེད་སྤྱོད་ཡོད་རིགས་ལ་གོང་གསལ་ནང་གསེས་དོན་ཚན་གྱི་གཏན་འབེབས་ལྟར་ཐག་གཅོད་བྱ་རྒྱུ།

ཏང་ཡོན་ལ་འཆལ་པོ་རྒྱུག་པའམ་དུག་རྫས་འཐེན་པ་དང་དུག་ཁབ་རྒྱག་པ་སོགས་ཏང་ཡོན་གྱི་ཆ་རྐྱེན་ཤོར་ནས་ཏང་གི་གཟུགས་བརྙན་ལ་གཏོར་བརླག་ཚབས་ཆེན་བཟོས་པའི་བྱེད་སྤྱོད་ཡོད་ན། ཏང་གི་སྐྱིད་སྡུག་ནས་འབུད་པའི་ཆད་པ་གཅོད་རྒྱུ།

དོན་ཚན་སོ་གཅིག་པ། སྒྲིག་ཁྲིམས་ཞིབ་བཤེར་བྱེད་རིང་ཏང་ཡོན་ལ་སྒྲིག་འགལ་ཚབས་ཆེན་བྱུང་ནས་ཁྲིམས་འགལ་ཉེས་གསོག་གི་དོགས་གཞི་ཡོད་པ་ཏང་རྩ་འཛུགས་ཀྱིས་ཤེས་རྟོགས་བྱུང་ཚེ། རྩ་དོན་གྱི་ཐོག་ནས་སྔོན་ལ་ཏང་གི་སྒྲིག་ཁྲིམས་ཀྱི་ཆད་པ་གཅོད་རྒྱུའི་ཐག་གཅོད་བྱེད་པ་མ་ཟད། གཏན་འབེབས་ལྟར་ཞིབ་དཔྱོད་ལས་ཁུངས་ཀྱིས་སྲིད་དོན་གྱི་ཆད་པ་གཅོད་རྒྱུའམ་བསྐོ་འཐེན་ལས་ཁུངས(ཚན་པ)ཀྱིས་ཆད་པ་བཅད་རྗེས། སླར་ཡང་འབྲེལ་ཡོད་ཀྱི་རྒྱལ་ཁབ་ལས་ཁུངས་ལ་སྤོ་སྐྱེལ་བྱས་ནས་ཁྲིམས་ལྟར་ཐག་གཅོད་བྱ་རྒྱུ།

དོན་ཚན་སོ་གཉིས་པ། ཁྲིམས་ལྟར་བཀག་འཇོག་དང་འཛིན་བཟུང་བྱས་པའི་ཏང་ཡོན་ཡིན་ན། ཏང་རྩ་འཛུགས་ཀྱིས་དོ་དམ་གྱི་དབང་ཚད་ལྟར་དེའི་བརྡས་ཐག་གཅོད་དབང་དང་། འདེམས་བསྐོ་བྱེད་དབང་། གདམ་བྱའི་དབང་ཆ་སོགས་ཏང་ཡོན་གྱི་ཁེ་དབང་མཚམས་འཇོག་བྱ་རྒྱུ། ལྟ་ཞིབ་ལས་ཁུངས་དང་ཁྲིམས་འཛིན་ལས་ཁུངས་ཀྱི་ཐག་གཅོད་བྱས་འབྲས་ལ་གཞིགས་ནས་དེའི་ཏང་ཡོན་གྱི་ཁེ་དབང་སླར་གསོ་བྱེད་དགོས་རིགས་དུས་ཐོག་ཏུ་སླར་གསོ་བྱ་རྒྱུ།

དོན་ཚན་སོ་གསུམ་པ། ཏང་ཡོན་གྱི་ཉེས་ཚབས་ཆུང་བས་མི་དམངས་ཞིབ་དཔྱོད་ཁང་གིས་ཁྲིམས་ལྟར་ཞུ་གཏུག་མི་རྒྱག་པའི་ཐག་གཅོད་བྱས་རིགས་དང་། ཡང་ན་མི་དམངས་ཁྲིམས་ཁང་གིས་ཁྲིམས་ལྟར་ཉེས་པ་ཡོད་པའི་ཁྲིམས་ཐག་བཅད་ཀྱང་ཉེས་དོན་གྱི་ཆད་པ་མ་བཅད་ན། ཏང་ནང་ཁུལ་གྱི་གོ་གནས་མེད་པར་བཟོ་བ་དང་། ཏང་ནང་བཞག་ནས་ལྟ་ཞིབ་བྱེད་པའམ་ཏང་གི་སྐྱིད་སྡུག་ནས་འབུད་པའི་ཆད་པ་གཅོད་རྒྱུ།

ཏང་ཡོན་གྱིས་བྱས་ཉེས་བསགས་པར་དངུལ་ཆད་རྐྱང་པ་གཅོད་རྒྱུ་ཡིན་ན། གོང་གསལ་ནང་གསེས་དོན་ཚན་གྱི་གཏན་འབེབས་ལྟར་ཐག་གཅོད་བྱ་རྒྱུ།

དོན་ཚན་སོ་བཞི་པ། ཏང་ཡོན་གྱིས་བྱས་ཉེས་བསགས་པར་གཤམ་གསལ་གྱི་གནས་ཚུལ་ལས་རིགས་གཅིག་ཡོད་ན། ཏང་གི་སྐྱིད་སྡུག་ནས་འབུད་པའི་ཆད་པ་གཅོད་རྒྱུ་སྟེ།

(གཅིག) རྐང་བཙུགས་ནས་ཉེས་པ་བསགས་པའི་རྐྱེན་གྱིས་ཁྲིམས་ལྟར་ཉེས་ཁྲིམས་ནང་གཏན་འབེབས་བྱས་པའི་ཉེས་ཆད་གཙོ་བོ(ཁྲིམས་ཆད་ཕྱིར་འགྱངས་ཀྱི་ཁྱབ་བསྒྲགས་བྱས་པ་ཚུད་པ)ཕོག་པ།

(གཉིས) ཆབ་སྲིད་ཀྱི་ཁེ་དབང་མེད་པར་བཟོ་བའི་ཉེས་ཆད་རྐྱང་པ་བཅད་པའམ་ཁ་སྣོན་བརྒྱབ་པ།

(གསུམ) ལས་འཛོལ་ཤོར་བའི་རྐྱེན་གྱིས་བྱས་ཉེས་བསགས་པར་ཁྲིམས་ལྟར་དུས་བཙོན་ལོ་གསུམ་ཡན(ལོ་གསུམ་ཚུད་མེད)གྱི་ཉེས་ཆད་བཅད་པ།

ལས་འཛོལ་ཤོར་བའི་རྐྱེན་གྱིས་བྱས་ཉེས་བསགས་པར་དུས་བཙོན་ལོ་གསུམ་མན་གྱི་ཉེས་ཆད་དམ་རྩིས་སྤྲོད་དོ་དམ་དང་བཙན་ཉར་ལས་སྐུལ་གྱི་ཉེས་ཆད་བཅད་རིགས། སྤྱིར་བཏང་དུ་ཏང་གི་སྐྱིད་སྡུག་ནས་འབུད་རྒྱུ། ཏང་གི་སྐྱིད་སྡུག་ནས་འབུད་མི་དགོས་པའི་རིགས། སྒྲིག་འགལ་ཏང་ཡོན་ལ་ཆད་པ་གཅོད་པའི་ཆོག་མཆན་དབང་ཚད་ཀྱི་གཏན་འབེབས་ལྟར་རང་ལས་རིམ་པ་གཅིག་གིས་མཐོ་བའི་ཏང་རྩ་འཛུགས་ལ་ཆོག་མཆན་ཞུ་དགོས།

དོན་ཚན་སོ་ལྔ་པ། ཁྲིམས་ལྟར་ཉེས་འགན་བདའ་འདེད་ཀྱི་ཆད་པ་ཕོག་པའི་ཏང་ཡོན་ལ་ཏང་རྩ་འཛུགས་ཀྱིས་ཁྲིམས་འཛིན་ལས་ཁུངས་ཀྱི་ནུས་ཐོན་དཔྱད་མཚམས་དང་། ཁྲུན་བཅད། ཆོད་དོན། དེ་བཞིན་ངོས་འཛིན་བྱས་པའི་དོན་དངོས་དང་། ངོ་བོ། གནས་ཚུལ་བཅས་ལ་གཞིགས་ནས་སྲོལ་ཡིག་འདིའི་གཏན་འབེབས་ལྟར་ཏང་གི་སྒྲིག་ཁྲིམས་ཀྱི་ཆད་པ་གཅོད་དགོས་པ་དང་། གཞུང་དོན་ལས་སྒྲུབ་པ་ཡིན་རིགས་ལ་ལྟ་ཞིབ་ལས་ཁུངས་ཀྱིས་དེ་མཚུངས་ཀྱི་སྲིད་དོན་ཆད་པ་གཅོད་རྒྱུའམ་བསྐོ་འཐེན་ལས་ཁུངས(ཚན་པ)ཀྱིས་དེ་མཚུངས་ཀྱི་ཆད་པ་གཅོད་རྒྱུ།

ཏང་ཡོན་ལ་ཁྲིམས་ལྟར་སྲིད་དོན་གྱི་ཆད་པ་དང་བསྐོ་འཐེན་ལས་ཁུངས(ཚན་པ)ཀྱིས་བཅད་པའི་ཆད་པ་དང་སྲིད་འཛིན་གྱི་ཆད་པ་ཕོག་སྟེ་ཏང་གི་སྒྲིག་ཁྲིམས་ཀྱི་འགན་འཁྲི་བདའ་འདེད་གཏོང་དགོས་ན། ཏང་རྩ་འཛུགས་ཀྱིས་ནུས་པ་ཐོན་པའི་ཆད་པ་དང་སྲིད་འཛིན་ཆད་གཅོད་ཀྱི་ཆོད་དོན་ནང་ངོས་འཛིན་བྱས་པའི་དོན་དངོས་དང་། ངོ་བོ། གནས་ཚུལ་བཅས་ལ་གཞིགས་ནས་ཞིབ་དཔྱད་བྱས་རྗེས་གཏན་འབེབས་ལྟར་དེ་མཚུངས་ཀྱི་ཏང་གི་སྒྲིག་ཁྲིམས་ཀྱི་ཆད་པ་གཅོད་པའམ་རྩ་འཛུགས་ཀྱི་ཐག་གཅོད་བྱ་རྒྱུ། དེའི་ནང་ཁྲིམས་ལྟར་གནས་དབྱུང་གཏོང་བ་ཡན་གྱི་ཆད་པ་ཕོག་པའི་ཏང་ཡོན་ལ་སྲོལ་ཡིག་འདིའི་གཏན་འབེབས་ལྟར་ཏང་ནང་ཁུལ་གྱི་གོ་གནས་མེད་པར་བཟོ་བ་ཡན་གྱི་ཆད་པ་གཅོད་རྒྱུ།

ཏང་ཡོན་ལ་རྒྱལ་ཁབ་ཀྱི་བཅའ་ཁྲིམས་དང་ཁྲིམས་སྲོལ། ཁེ་ལས་དང་བྱ་གཞག་ཚན་པའམ་སྤྱི་ཚོགས་ཀྱི་རྩ་འཛུགས་གཞན་དག་གི་སྒྲིག་སྲོལ་ལམ་ལུགས་དང་འགལ་ནས་ཆད་པ་གཞན་ཕོག་སྟེ་ཏང་གི་སྒྲིག་ཁྲིམས་ཀྱི་འགན་འཁྲི་བདའ་འདེད་གཏོང་དགོས་ན། ཏང་རྩ་འཛུགས་ཀྱིས་འབྲེལ་ཡོད་ཕྱོགས་ནས་ངོས་འཛིན་བྱས་པའི་དོན་དངོས་དང་། ངོ་བོ། གནས་ཚུལ་བཅས་ལ་ཞིབ་དཔྱད་བྱས་རྗེས་གཏན་འབེབས་ལྟར་དེ་མཚུངས་ཀྱི་ཏང་གི་སྒྲིག་ཁྲིམས་ཀྱི་ཆད་པ་གཅོད་པའམ་རྩ་འཛུགས་ཀྱི་ཐག་གཅོད་བྱ་རྒྱུ།

ཏང་རྩ་འཛུགས་ཀྱིས་ཏང་གི་སྒྲིག་ཁྲིམས་ཀྱི་ཆད་པ་གཅོད་པའམ་རྩ་འཛུགས་ཀྱི་ཐག་གཅོད་ཀྱི་ཆོད་དོན་བཞག་རྗེས། ལྟ་ཞིབ་ལས་ཁུངས་དང་། ཁྲིམས་འཛིན་ལས་ཁུངས། སྲིད་འཛིན་ལས་ཁུངས་སོགས་ཀྱིས་ཁྲིམས་ལྟར་དེ་སྔའི་ནུས་ཐོན་ཁྲིམས་བཅད་དང་། ཁྲུན་བཅད། ཆོད་དོན་སོགས་འགྱུར་བ་བཏང་ནས་དེ་སྔའི་ཏང་གི་སྒྲིག་ཁྲིམས་ཀྱི་ཆད་གཅོད་དམ་རྩ་འཛུགས་ཀྱི་ཐག་གཅོད་ཆོད་དོན་ལ་ཤུགས་རྐྱེན་ཐེབས་རིགས། ཏང་རྩ་འཛུགས་ཀྱིས་འགྱུར་བ་བཏང་རྗེས་ཀྱི་ནུས་ཐོན་ཁྲིམས་བཅད་དང་། ཁྲུན་བཅད། ཆོད་དོན་སོགས་ལ་གཞིགས་ནས་བསྐྱར་དུ་དེ་མཚུངས་ཀྱི་ཐག་གཅོད་བྱ་རྒྱུ།