བོད་ཀྱི་དཔལ་འབྱོར་བཀོད་གཏོང་སྐུལ་སྤེལ་ཚོགས་འདུ་འཚོགས་པ།
ཡན་ཅིན་ཧའེ་ཚོགས་འདུར་ཞུགས་པ་དང་སྦྲགས་གསུང་བཤད་ཀྱང་གནང་བ།
ཚེས་25ཉིན། རང་སྐྱོང་ལྗོངས་ཀྱི་དཔལ་འབྱོར་བཀོད་གཏོང་སྐུལ་སྤེལ་ཚོགས་འདུ་འཚོགས་ཤིང་། ཚོགས་འདུའི་ཐོག་ལྗོངས་ཡོངས་ཀྱི་དཔལ་འབྱོར་ཡར་སྤེལ་དང་འཕེལ་རྒྱས་དམ་འཛིན་བྱེད་པའི་ལོ་དཀྱིལ་གྱི་འགག་སྒྲོལ་བྱ་སྤྱོད་སྤེལ་འགོ་ཚུགས་པ་རེད། ལྗོངས་ཏང་ཨུད་ཀྱི་ཧྲུའུ་ཅི་གཞོན་པ་དང་རང་སྐྱོང་ལྗོངས་ཀྱི་ཀྲུའུ་ཞི་ཡན་ཅིན་ཧའེ་ཡིས། བོད་ཀྱི་ལས་དོན་སྐོར་གྱི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་མཛུབ་སྟོན་གལ་ཆེན་དང་དུས་རབས་གསར་པའི་ཏང་གི་བོད་སྐྱོང་མཛད་ཇུས་ལག་བསྟར་དོན་འཁྱོལ་ཡག་པོ་བྱས་ཐོག་ལྗོངས་ཏང་ཨུད་ཀྱི་ལས་དོན་བླང་བྱ་གཞིར་བཟུང་། འགག་སྒྲོལ་བྱ་སྤྱོད་ལ་དམ་འཛིན་ནན་པོ་བྱས་ནས། དཔལ་འབྱོར་འཁོར་རྒྱུག་བརྟན་ལ་ལེགས་པའི་རྣམ་པ་ནུས་ཤུགས་ཡོད་རྒུས་སྲ་བརྟན་དུ་གཏོང་དགོས་ཞེས་ནན་བཤད་གནང་བ་རེད།
ཡན་ཅིན་ཧའེ་ཡིས་བསྟན་དོན། ཟླ་བ་དང་པོ་ནས་ལྔ་པའི་བར་གྱི་དཔལ་འབྱོར་དམིགས་ཚད་གཙོ་བོ་བརྟན་ཐོག་ཡར་འཕེལ་དང་བརྟན་ཐོག་ལེགས་འཕེལ་བྱུང་ཡོད། ཡིན་ན་ཡང་། མིག་སྔར། དུས་བབ་དང་། ལས་འགན། དུས་ཚོད་བཅས་ཀྱིས་ང་ཚོ་བསྒུགས་ནས་མི་སྡོད་པས།
དམིགས་ཚད་ཀྱི་སྟོན་ཕྱོགས་དང་། གནད་དོན་གྱི་སྟོན་ཕྱོགས། མཇུག་འབྲས་ཀྱི་སྟོན་ཕྱོགས་བཅས་ཕན་ཚུན་གཅིག་གྱུར་ཡོང་བར་མཐའ་འཁྱོངས་བྱེད་པ་དང་། མིག་སྔ་དང་སླད་ཕྱིན་སྤྱི་འདོམས། དཀའ་གནད་སེལ་བ་དང་། སྒུལ་ཤུགས་ཆེ་རུ་གཏོང་བ། འཕེལ་རྒྱས་ལ་སྐུལ་འདེད་བཅས་ཟུང་འབྲེལ་དམ་ཟབ་བྱས་ཐོག མ་འཇོག་དང་། འཛད་སྤྱོད། ལས་ཞུགས། ཐོན་ལས། དམངས་འཚོ་བཅས་ལ་དམིགས་ནས། རྣམ་གྲངས་འཛུགས་སྐྲུན་དང་། ཁྲོམ་ར་དར་རྒྱས། ལས་ཞུགས་མང་གཏོང་། ཐོན་ལས་རྒྱ་སྟོབས་ཆེ་རུ་གཏོང་བ། ཡུལ་མིའི་ཡོང་འབབ་འཕར་བ། སྐྱེ་ཁམས་ལེགས་བཅོས། མཐའ་དར་དམངས་ཕྱུག་སོགས་ཀྱི་དམིགས་ཚད་མང་པོ་མངོན་འགྱུར་བྱེད་དགོས། དེ་དང་ཆབས་ཅིག གོང་འོག་བློ་སེམས་གཅིག་མཐུན་དང་སྟོབས་ཤུགས་གཅིག་སྒྲིལ་གྱིས་དུས་ཚོད་དང་ཆུ་ཚད་ཕན་འབྲས་བཅས་བརྩོན་ལེན་དང་འགག་སྒྲོལ་དམག་འཐབ་ཡག་པོ་བརྒྱབ་སྟེ། ལོ་སྟོད་ཀྱི་འཕེལ་ཕྱོགས་བརྟན་པོར་བརྟེན་ནས་ལོ་ཧྲིལ་པོའི་འཕེལ་རྒྱས་འགན་ལེན་བྱེད་དགོས།
ཡན་ཅིན་ཧའེ་ཡིས་ནན་བཤད་གནང་དོན། རྣམ་གྲངས་མ་འཇོག་གི་ཆེད་དོན་འགག་སྒྲོལ་ལས་དོན་ལ་དམ་འཛིན་ནན་པོ་བྱེད་དགོས་པ་དང་། སྟོབས་ཤུགས་གཅིག་སྡུད་དང་། ཐོན་ཁུངས་གཅིག་སྡུད། གཞི་རྒྱུ་གཙོ་བོ་གཅིག་འདུས་བཅས་བྱས་ནས་རྣམ་གྲངས་འཆར་འགོད་དང་། ཚོང་འགུགས་མ་འདྲེན། འཕེལ་རིམ། དཔྱད་བསྡུར་བཅས་ཚེ་སྲོག་གི་དུས་འཁོར་ཧྲིལ་པོའི་དོ་དམ་ལ་དམ་འཛིན་ནན་པོ་བྱས་ཐོག གཙོ་གནད་རྣམ་གྲངས་མཉམ་བཤེར་དང་མཉམ་འབྲེལ་མཆན་འགོད་དང“ཐོགས་མེད་འགན་ལེན་བགྲོད་ལམ”སོགས་ཀྱི་ལམ་ལུགས་དོན་འཁྱོལ་ནན་པོ་བྱེད་པ་དང་། རྣམ་གྲངས་ཀྱི་འཕེལ་རིམ་འགྲན་པའི་དཔྱད་ཞིབ་ལམ་སྲོལ་འཛུགས་པ། ཁ་གཏད་བོད་སྐྱོར་གྱི་ཐབས་ལམ་ལ་བརྟེན་ནས་ཚོང་འགུགས་རྒྱ་ཆེ་དང་ཚོང་པ་སྟོབས་ཆེན་འགུག་པ་བཅས་བྱས་ནས། ཚོང་འགུགས་མ་འདྲེན་གྱི་གན་འཇོག་རྣམ་གྲངས་དོན་ཐོག་ཏུ་འཁྱོལ་བར་མགྱོགས་མྱུར་སྐུལ་འདེད་གཏོང་དགོས། འཛད་སྤྱོད་ཤུགས་ཆེར་གཏོང་བའི་ཆེད་དོན་འགག་སྒྲོལ་ལས་དོན་ལ་དམ་འཛིན་ནན་པོ་བྱེད་དགོས་པ་དང་། རེས་སྐོར་གསར་པའི་འཛད་སྤྱོད་ལ་སྐུལ་འདེད་གཏོང་བའི་སྲིད་ཇུས་གཅིག་སྡུད་ཐོག་བཏོན་ནས་འཛད་རྫས་གསར་རྙིང་བརྗེ་བའི་བྱ་སྤྱོད་དོན་འཁྱོལ་དང་མཚན་མོའི་དཔལ་འབྱོར་གྱི་བཀྲག་མདངས་འཚེར་ས་ཁག་གཅིག་གཏོད་དགོས། ཐོན་ལས་ཀྱི་སྤུས་ཚད་ལེགས་སུ་གཏོང་བའི་ཆེད་དོན་འགག་སྒྲོལ་ལས་དོན་ལ་དམ་འཛིན་ནན་པོ་བྱེད་དགོས་པ་དང་། འབྲུ་བརྟན་ཞིང་དར་ཡོང་བར་དམིགས་ནས་ཚན་རྩལ་དང་། སྲིད་ཇུས། གཞི་ཁྱོན་རན་པའི་གསོ་སྤེལ་བཅས་ཀྱི་ཐད་ཤུགས་སྣོན་རྒྱག་དགོས། ཐོན་སྐྱེད་གཞི་ཁྱོན་དང་ཐོན་ནུས་ཆེ་རུ་གཏོང་བར་དམིགས་ནས“གཅིག་གཏད་གཅིག”གིས་གཙོ་གནད་ཁེ་ལས་ཀྱི་རོགས་སྐྱོར་ཡག་པོ་བྱས་ཏེ་ཐོན་ལས་ཀྱི་བཀོད་པར་འཆར་འགོད་ཡག་པོ་བྱེད་དགོས། གསར་རྟེན་གསར་བསྟུན་ལ་དམིགས་ནས་ཐོན་ལས་གསར་གཏོད་འཕེལ་རྒྱས་ལ་སྐུལ་འདེད་གཏོང་དགོས། སྒོ་དབྱེ་འཕེལ་རྒྱས་ལ་དམིགས་ནས། ཕྱི་ཕྱོགས་ཚོང་དོན་མགྱོགས་མྱུར་འཕར་བའི་རྣམ་པ་བཟང་པོ་རྒྱུན་འཁྱོངས་བྱེད་དགོས། འབབ་འཕར་དམངས་ཕན་གྱི་ཆེད་དོན་འགག་སྒྲོལ་ལས་དོན་ལ་དམ་འཛིན་ནན་པོ་བྱེད་དགོས་པ་དང་། ལས་ཞུགས་འབབ་འཕར་དང་། རྩལ་ནུས་འབབ་འཕར། ལས་གྲྭའི་འབབ་འཕར་སོགས་ཀྱི་རྒྱབ་སྐྱོར་སྲིད་ཇུས་ལ་ཤུགས་སྣོན་བརྒྱབ་ནས་གྲོང་ཁྱེར་དང་གྲོང་གསེབ་ཀྱི་ཡུལ་མིའི་འབབ་འཕར་དང་མཐོ་སློབ་སློབ་ཐོན་སློབ་མའི་ལས་ཞུགས་ལས་དོན་རྒྱུན་མཐུད་ཡག་པོ་བསྒྲུབས་ཏེ། དམངས་འཚོའི་བྱ་བ་དངོས་21ཡག་པོ་སྒྲུབ་དགོས།
ཡན་ཅིན་ཧའེ་ཡིས་བླང་བྱ་བཏོན་དོན། སྒྱུར་བཅོས་དང་གསར་གཏོད་སྲོག་ཤིང་དུ་བྱེད་པའི་དུས་རབས་ཀྱི་སྙིང་སྟོབས་དང་། མཚོ་བོད་ས་མཐོའི་སྙིང་སྟོབས་དར་སྤེལ་ཤུགས་ཆེན་བཏང་ནས་སྤྱོད་ཚུལ་ལེགས་གཏོང་དང་དོན་འཁྱོལ་ལ་དམ་འཛིན་ནན་པོ་བྱས་ཏེ། འགག་སྒྲོལ་གྱི་བྱ་སྤྱོད་ལ་བྱས་རྗེས་གསར་པ་དང་། རྣམ་པ་གསར་པ། གྲུབ་འབྲས་གསར་པ་བཅས་ཐོན་པའི་འགན་ལེན་གྱིས་ཕྱོགས་ཡོངས་ཀྱི་དམིགས་ཚད་དང་ལས་འགན་ལེགས་སྒྲུབ་ཡོང་བར་རྨང་གཞི་བརྟན་པོ་འདིང་དགོས།