ལྷོ་ཁ་གྲོང་ཁྱེར་ཆུ་གསུམ་རྫོང་དུ་ཡོད་པའི་ཀྲུང་གོ་ཧྭ་གློག་ལྷོ་ཁ་ནོར་བུ་ས་འོད་ཤུགས་རྣམ་གྲངས་ཀྱི་ལས་ཡུལ་དུ་གློག་ལས་བཟོ་པ་ཚོས་ལས་གྲྭའི་འཐབ་ས་དང་པོར་བྲེལ་འཚུབ་ཆེན་པོའི་ངང་ལས་ཀ་བྱེད་བཞིན་འདུག་ལ། འོད་ཤུགས་ཤེལ་ལེབ་ཀྱང་སྟར་པ་དང་སྟར་པ་བྱས་ནས་རྩྭ་ཐང་དུ་བསྒྲིགས་ནས་འདུག

འབྲི་ཆུའི་འགྲམ་དུ་སྒྲིག་སྦྱོར་འཕྲུལ་འཁོར་ནས་གློག་གཏོང་ཚད་ཆན་ཝ་ཁྲི་5200ཟིན་པའི་འབྲི་ཆུའི་སྟོད་རྒྱུད་ཀྱི་རྒྱལ་ཁབ་ཀྱི་ཆུ་དང་། རླུང་། འོད་བཅས་གཞི་གཅིག་ཅན་གྱི་དཔེ་སྟོན་རྟེན་གཞིའི་ཆུ་གློག་དང་འོད་ཤུགས་རྣམ་གྲངས་ཁག་ཚ་ཚ་འུར་འུར་ངང་སྐྲུན་བཞིན་འདུག་ལ། འཕྲུལ་འཁོར་ཆེ་གྲས་བཅུ་ཕྲག་ཁ་ཤས་ལྡིར་སྒྲ་གྲགས་བཞིན་མཆིས། རྣམ་གྲངས་ཁུལ་གྱི་གྲོང་མིར་སྐྱེལ་འདྲེན་ཉམས་བཟོ་དང་རྒྱབ་ཕྱོགས་མཁོ་སྒྲུབ་ཞབས་ཞུ་སོགས་ཀྱི་ལས་གནས་མཁོ་འདོན་བྱས་པས། གྲོང་མི་ཚོ་སྒོ་རྩ་ནས་ལས་ཀ་བཙལ་ཐུབ་པ་དང་ཡོང་འབབ་གསོག་ཐུབ་པ་བྱུང་ཡོད། 

དེ་ནི་ཀྲུང་གོ་ཧྭ་གློག་གིས་རྒྱལ་ཁབ་ཀྱི“ཐཱན་གཉིས”ཀྱི་དམིགས་ཚད་ལ་ཞབས་འདེགས་ཞུས་ནས་བོད་ཀྱི་སྤུས་ཚད་མཐོ་བའི་འཕེལ་རྒྱས་ལ་རམ་འདེགས་བྱེད་པའི་བསྡུས་རིས་ཤིག་རེད། ཉེ་བའི་ལོ་ཤས་རིང་། ཀྲུང་གོ་ཧྭ་གློག་གིས་བོད་ཀྱི“དོན་ཆེན་བཞིར”དམིགས་ནས་སྤྱི་ཚོགས་ཀྱི་འགན་འཁྲི་དང་ཀྲུང་དབྱང་ཁེ་ལས་ཀྱི་འགན་འཁྲི་ཧུར་ཐག་སྒྲུབ་པ་དང་རྒྱལ་ཁབ་ཀྱི་ནུས་རྒྱུ་གཙང་མའི་རྟེན་གཞི་འཛུགས་པ་དང་གྲོང་གསེབ་དར་རྒྱས་ལ་རམ་འདེགས་བྱེད་པའི་གསོན་ཉམས་ལྡན་པའི་ལག་ལེན་ལ་བརྟེན་ནས་བོད་ཀྱི་ཆུ་ཚད་དེ་བས་མཐོ་བ་དང་དེ་བས་རྒྱུན་མཐུད་རུང་བའི་འཕེལ་རྒྱས་མངོན་འགྱུར་བྱ་ཆེད་རམ་འདེགས་བྱས་ཡོད།

རྣམ་གྲངས་སྐྲུན་མགྱོགས་སུ་བཏང་ནས་ནུས་རྒྱུ་མཁོ་འདོན་འགན་ལེན་གྱི་གཙོ་ཤུགས་དམག་ལ་བརྩོན་ལེན་བྱས་པ།

དྭགས་པོ་ཆུ་ཤུགས་གློག་ཁང་གི་ལྟེ་བའི་ཚོད་འཛིན་ཁང་དུ་སྡོད་བྱ་བས་བརྙན་ཤེལ་ནས་འཕྲུལ་ཚན་གྱི་འཁོར་སྐྱོད་གནས་ཚུལ་ལ་ལྟ་བཞིན་འདུག “གློག་ཁང་བསྐྲུན་ནས་ལོ་གསུམ་སོང་རིང་། རིམ་རྩིས་བྱས་ན་གློག་གཏོང་ཚད་ཆུ་ཚོད་ཆན་ཝ་དུང་ཕྱུར་70ལས་བརྒལ་བ་དང་ད་ཆ་ལོ་ལྟར་གློག་གཏོང་ཚད་ཀྱིས་བོད་ཀྱི་སྤྱི་ཚོགས་ཡོངས་ཀྱི་གློག་སྤྱོད་བསྡོམས་འབོར་ཁྲོད་ལྔ་ཆ་གཅིག་ཙམ་བཟུང་སྟེ། བོད་ཀྱི་དཔལ་འབྱོར་དང་སྤྱི་ཚོགས་འཕེལ་རྒྱས་ལ་གློག་རྒྱུན་ཆད་མེད་པར་གཏོང་ཐུབ་ཡོད”ཅེས་ཀྲུང་གོ་ཧྭ་གློག་བོད་ལྗོངས་དྭགས་པོ་ཀུང་སིའི་འགན་འཁུར་བ་ཏུང་ཝུའེ་ཡིས་ངོ་སྤྲོད་བྱས།

ཉེ་བའི་ལོ་ཤས་རིང་། ཀྲུང་གོ་ཧྭ་གློག་གིས་ཐོན་སྐྱེད་ནུས་ཤུགས་གསར་མ་འཕེལ་རྒྱས་གཏོང་བར་དམིགས་པ་དང་། ཆུ་དང་། འོད། རླུང་བཅས་གསོག་འཇོག་གཞི་གཅིག་ཅན་གྱི་བྱེད་ཐབས་ལ་བརྟེན་པ། རྒྱལ་ཁབ་ཀྱི་ནུས་རྒྱུ་གཙང་མའི་རྟེན་གཞི་མགྱོགས་མྱུར་བསྐྲུན་པ། ནུས་རྒྱུ་མཁོ་སྤྲོད་འགན་ལེན་གྱི་ནུས་པ་རྒྱུན་ཆད་མེད་པར་ཆེ་རུ་གཏོང་བ་བཅས་བྱས་ནས་གཡུར་ཟའི་གྲུབ་འབྲས་མང་པོ་བཏོད་ཡོད།

2021ལོར་བོད་ཀྱི་ནང་མཁོའི་ཆུ་ཤུགས་གློག་ཁང་ཆེ་ཤོས་དྭགས་པོ་ཆུ་ཤུགས་གློག་ཁང་ལ་རྒྱལ་ཁབ་ཀྱི་སྤུས་ལེགས་ལས་གྲྭའི་གསེར་གྱི་བྱ་དགའ་ཐོབ་སྟེ་བོད་ལ་གཟི་བརྗིད་དེ་ཐོབ་མཁན་གློག་ཁང་འབའ་ཞིག་ཏུ་གྱུར་ཡོད།

2022ལོར་བོད་ཀྱི་ཕྱིར་གཏོང་ཆུ་ཤུགས་གློག་ཁང་ཆེ་ཤོས་དང་ལྗོངས་ནང་ཁུལ་གྱི་ཆན་ཝ་ཁྲི་བརྒྱ་རིམ་པའི་ཆུ་ཤུགས་གློག་ཁང་ཐོག་མ་སྟེ་སྭོ་བ་ནང་ཆུ་ཤུགས་གློག་ཁང་བསྐྲུན་པ་མ་ཟད། བོད་དུ་སྐབས་དེ་དུས་ཀྱི་སྒྲིག་སྦྱོར་འཕྲུལ་འཁོར་གྱི་གཞི་ཁྱོན་ཆེ་ཤོས་ཡིན་པའི་ནག་ཆུ་གྲོང་ཁྱེར་གསེར་རྙེད་ཆུས་ཀྱི་འོད་ཤུགས་རྣམ་གྲངས་བསྐྲུན་ཡོད།

2023ལོར་ལྷ་ས་དང་ལྷོ་ཁ་སོགས་ས་ཁུལ་དུ་ཁྱོན་ཆན་ཝ་ཁྲི་40ཡི་འོད་ཤུགས་མཁོ་འདོན་འགན་ལེན་རྣམ་གྲངས་5བསྐྲུན་ཡོད།

ནུས་རྒྱུ་གཙང་མའི་རྣམ་གྲངས་རེ་རེ་བཞིན་བསྐྲུན་ནས་སྤྱོད་འགོ་ཚུགས་པར་བརྟེན་བོད་ཀྱི་མི་རིགས་ཁག་གི་མང་ཚོགས་ཀྱི་གློག་གི་དགོས་མཁོ་རྒྱུན་ཆད་མེད་པར་བསྐངས་པ་མ་ཟད། བོད་ཀྱི་དཔལ་འབྱོར་དང་སྤྱི་ཚོགས་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་བཏང་ཡོད།

གསར་སྤེལ་དང་སྲུང་སྐྱོང་གལ་ཆེར་བཟུང་ནས་ས་མཐོའི་སྐྱེ་ཁམས་བཟང་པོ་སྲུང་སྐྱོང་བྱས་པ།

“འོད་ཤུགས་ཤེལ་ལེབ་ལ་བརྟེན་ནས་གློག་གཏོང་བ་དང་འོད་ཤུགས་ཤེལ་ལེབ་འོག་ཕྱུགས་འཚོ་བ” ས་བབ་མཐོ་ཚད་སྨི་4500ཟིན་པའི་ཀྲུང་གོ་ཧྭ་གློག་ནག་ཆུ་གྲོང་ཁྱེར་གསེར་རྙེད་ཆུས་ཀྱི་འོད་ཤུགས་རྣམ་གྲངས་བསྐྲུན་པ་དེ་ནི་ཀྲུང་གོ་ཧྭ་གློག་གིས་བོད་དུ་རྒྱལ་ཁབ་ཀྱི་སྐྱེ་ཁམས་ཤེས་དཔལ་གྱི་མཐོ་ས་གཏོད་པར་རམ་འདེགས་བྱེད་པའི་གསོན་ཉམས་ལྡན་པའི་མཚོན་ཚུལ་ཞིག་རེད།

ཀྲུང་གོ་ཧྭ་གློག་གིས་ཐོག་མཐའ་བར་གསུམ་དུ་ཞི་ཅིན་ཕིང་གི་སྐྱེ་ཁམས་ཤེས་དཔལ་གྱི་དགོངས་པ་ལག་བསྟར་དོན་འཁྱོལ་གཏིང་ཟབ་དང་། སྐྱེ་ཁམས་སྲུང་སྐྱོང་ནུས་རྒྱུ་གསར་སྤེལ་གྱི་སྔོན་འགྲོའི་ཆ་རྐྱེན་དུ་བརྩིས་ནས་ནུས་ཤུགས་ཡོད་རྒུས་གངས་ལྗོངས་ས་མཐོའི་ཆུ་ཁྲི་རི་སྟོང་དང་རྩྭ་རྩི་ཤིང་སྲུང་སྐྱོང་བྱས་ཡོད།

འོད་ཤུགས་རྣམ་གྲངས་སྐྲུན་རིང་། ཚན་རིག་དང་མཐུན་པའི་སྒོ་ནས་འོད་ཤུགས་ཤེལ་ལེབ་སྒྲིག་སྦྱོར་དང་འོད་ཤུགས་ཤེལ་ལེབ་སྒྲིག་སྦྱོར་གྱི་མཐོ་ཚད་ལུགས་མཐུན་ངང་མཐོ་རུ་བཏང་བར་བརྟེན་འོད་ཤུགས་ཤེལ་ལེབ་ལ་བརྟེན་ནས་གློག་གཏོང་ཐུབ་པ་བྱུང་བ་མ་ཟད། འོད་ཤུགས་ཤེལ་ལེབ་འོག་ཕྱུགས་འཚོ་ཐུབ་པ་བྱུང་ཡོད། མཐོ་གྲང་ཁུལ་གྱི་སྤང་ལྗོངས་སྲུང་སྐྱོང་ལས་དོན་གསར་གཏོད་དང“མཉམ་སྲུང་དང་། ཉར་ཚགས། བདག་སྐྱོང་། བསྐྱར་འཛུགས”བཅས་ལས་ཀའི་བྱེད་ཐབས་བཞིར་བརྟེན་ནས་རྩྭ་ཐང་སྐྱེ་ཁམས་སླར་གསོར་སྐུལ་འདེད་ནུས་ལྡན་བཏང་ཡོད། བཀོག་པའི་སྤང“དྲོད་ཁང་ཆེ་མོའི”ནང་བདག་སྐྱོང་བྱས་ཏེ་དབྱར་དུས་སུ་རང་སར་འདེབས་ཀྱི་ཡོད།

དེ་དང་ཆབས་ཅིག ཀྲུང་གོ་ཧྭ་གློག་ད་དུང་ལྷོ་རི་བྱང་རིའི་སྔོ་འགྱུར་ནགས་བཟོའི་ལས་གྲྭར་ཧུར་ཐག་ཞུགས་ནས་སྒོར་ཁྲི་8000བཏང་ནས་མུའུ་8200ལྷག་ཙམ་གྱི་ནགས་བཟོའི་ལས་འགན་ལེགས་སྒྲུབ་བྱས་ཏེ་ལྷ་སའི་སྔོ་འགྱུར་ལས་གྲྭར་ལེགས་སྐྱེས་ཕུལ་ཡོད།

ཀྲུང་དབྱང་ཁེ་ལས་ཀྱི་འགན་འཁྲི་ལག་ལེན་བསྟར་ནས་ནུས་ཤུགས་ཡོད་རྒུས་རོགས་སྐྱོར་ལ་བརྟེན་ནས་གྲོང་གསེབ་དར་རྒྱས་ལ་སྐུལ་འདེད་བཏང་བ།

2024ལོའི་ཟླ་5པར། རྒྱལ་སྲིད་སྤྱི་ཁྱབ་ཁང་གཞུང་རྒྱུ་ཨུ་ལྷན་གྱིས་འཚོགས་པའི་ཀྲུང་དབྱང་ཁེ་ལས་ཀྱིས་གྲོང་གསེབ་དར་རྒྱས་ལ་རམ་འདེགས་བྱེད་པའི་ཉམས་མྱོང་སྤེལ་རེས་ཚོགས་འདུའི་ཐོག་ཀྲུང་གོ་ཧྭ་གློག་གི་ཚོགས་ཞུགས་འཐུས་མིས་གྲོང་ཚོར་བཅའ་སྡོད་ཀྲུང་གོ་ཧྭ་གློག་ལས་དོན་རུ་ཁག་གིས་ཆབ་མདོ་གྲོང་ཁྱེར་འཇོ་མདའ་རྫོང་ཝེ་འཕྲང་གྲོང་ཚོའི་མང་ཚོགས་ཀྱི་སྣེ་ཁྲིད་དེ་ཤིང་བརྐོས་ཐོན་ལས་འཕེལ་རྒྱས་བཏང་ནས་འབབ་འཕར་ཕྱུག་འགྱུར་ཡོང་བར་བྱས་པ་མ་ཟད། གྲོང་ཚོ“རྒྱལ་ཡོངས་ཀྱི་གྲོང་གསེབ་བཅོས་སྐྱོང་དཔེ་སྟོན་གྲོང་ཚོར”འདེམས་རྒྱུར་རོགས་རམ་བྱས་པའི་སྐོར་ངོ་སྤྲོད་བྱས།

འཇོ་མདའ་རྫོང་ཝེ་འཕྲང་གྲོང་ཚོའི་གྲོང་མི་ཚོས་དེ་སྔ་གཙོ་བོ་ནས་འདེབས་པ་དང་། ནོར་ལུག་གསོ་ཚགས། ཤ་མོ་སྔོག་འདོན་བཅས་ལ་བརྟེན་ནས་འཚོ་བ་སྐྱེལ་བ་ལས། གྲོང་ཚོར་མཉམ་སྡེབ་དཔལ་འབྱོར་མེད། 2018ལོར་གྲོང་ཚོར་བཅའ་སྡོད་ཀྲུང་གོ་ཧྭ་གློག་ལས་དོན་རུ་ཁག་གྲོང་ཚོ་དེར་བཅའ་སྡོད་བྱས་ནས་བརྟག་ཞིབ་བྱས་པ་བརྒྱུད། གྲོང་ཚོའི་གནའ་བོའི་སྤོ་ལོ་སྐུ་ཚེའི་བརྐོས་མའི་ལག་རྩལ་ནི་རྒྱལ་ཁབ་རིམ་པའི་མངོན་མིན་རིག་གནས་ཤུལ་བཞག་ཡིན་པ་ཤེས་རྟོགས་བྱུང་རྗེས། གྲོང་ཚོ“ཨུ་ལྷན་གཉིས”ཀྱི་ཚན་ཁག་དང་མཉམ་འབྲེལ་བྱས་ཏེ་མངོན་མིན་རིག་གནས་སྲུང་སྐྱོང་རྒྱུན་འཛིན་དང་ཐོན་ལས་སྐྱེད་སྲིང་དང་ཟུང་འབྲེལ་གྱིས་ཤིང་བརྐོས་ལག་རྩལ་གྱི་རིན་ཐང་སྔོག་འདོན་གཏིང་ཟབ་བྱས་ནས་མི་རིགས་ལག་ཤེས་བཟོ་རྩལ་ཀུང་སི་བཙུགས་པ་དང་། སྒོར་དུང་ཕྱུར་གཅིག་ལྷག་ཙམ་གྱི་དངོས་ཟོག་མཁོ་འདོན་གྲོས་མཐུན་བཞག་པས་མང་ཚོགས་200ལྷག་ཙམ་གྱི་ལས་ཞུགས་ཐག་གཅོད་ཐུབ་པ་མ་ཟད། རིམ་རྩིས་བྱས་ན་ཡོང་འབབ་སྒོར་ཁྲི་1200ཙམ་བྱུང་ཡོད། 2023ལོའི་ཟླ་7པར། ཤིང་བརྐོས་སྒྱུ་རྩལ་པ་ཚེ་འཕེལ་གདན་ཞུས་ལྟར་ཧྲེན་ཀྲེན་དུ་ཀྲུང་གོའི་དགེ་སྒྲུབ་དངོས་མང་སྟོན་ཚོགས་ལ་ཞུགས་ནས་གནའ་བོའི་བརྐོས་མའི་ལག་རྩལ་རི་ཁུག་ནས་ཕྱིར་སྐྱོད་ཐུབ་པ་བྱུང་ཡོད།

དེ་དང་ཆབས་ཅིག གྲོང་ཚོར་བཅའ་སྡོད་ཀྲུང་གོ་ཧྭ་གློག་ལས་དོན་རུ་ཁག་གིས“གནའ་བོའི་བོད་ཡིག་ཡིག་གཟུགས”ཀྱི་སྒྱུ་རྩལ་དང་ཟུང་འབྲེལ་གྱིས་གྲོང་མི་སྒྲིག་འཛུགས་བྱས་ནས་བོད་བཟོའི་ཤིང་བརྐོས་རིག་གནས་ཐོན་རྫས་གསར་སྤེལ་བྱས་ཏེ་མངོན་མིན་རིག་གནས་ཤུལ་བཞག་ཐོན་ལས་དང་ཡུལ་སྐོར་ཐོན་ལས་མཉམ་འདྲེས་འཕེལ་རྒྱས་ལ་སྐུལ་འདེད་བཏང་བ་རེད། ད་ལྟའི་ཝེ་འཕྲང་གྲོང་ཚོ་ཉིད་ཤིང་བརྐོས་དང་། ཡིག་གཟུགས། གཟིམ་སྤོས། བོད་ཤོག གཡོས་སྦྱོར། སྨྱུག་ལས། སྤྲོ་གསེང་སྒར་ས་སོགས་གཞི་གཅིག་ཏུ་འདུས་པའི་ཕྱུག་འགྱུར་ཐོན་ལས་གཅིག་སྡུད་ཁུལ་ལ་འགྱུར་བ་མ་ཟད། གྲོང་གསེབ་དར་རྒྱས་ཀྱི་བཀྲག་མདངས་འཚེར་བའི་མིང་བྱང་དུ་གྱུར་ཡོད།

“ཏང་གི་སྲིད་ཇུས་བཟང་པོ་དང་གྲོང་ཚོར་བཅའ་སྡོད་ཧྭ་གློག་ལས་དོན་རུ་ཁག་གིས་རོགས་རམ་གནང་བར་ཐུགས་རྗེ་ཆེ་ཞུ་གི་ཡིན། ད་ཆ་ང་ཚོའི་གྲོང་ཚོ་ཉིན་བཞིན་ཡར་རྒྱས་འགྲོ་བཞིན་ཡོད་པ་དང་ཚང་མའི་འཚོ་བ་ཡང་ཇེ་ལེགས་སུ་ཕྱིན་པ་མ་ཟད། ད་དུང་ས་ཆ་གཞན་དུ་ལས་ཞུགས་བྱེད་མཁན་སློབ་ཆེན་སློབ་མ་མི་ཉུང་བ་ཞིག་ཕ་ཡུལ་དུ་ལོག་ནས་ལས་གཏོད་བྱེད་བཞིན་ཡོད”ཅེས་གྲོང་ཚོའི་འཕེལ་རྒྱས་དང་འགྱུར་ལྡོག་སྐོར་གླེང་སྐབས་ཝེ་འཕྲང་གྲོང་ཚོའི་ཏང་ཀྲི་པུའི་ཧྲུའུ་ཅི་ཐུབ་བཀྲས་སེམས་འགུལ་ཆེན་པོས་བཤད།

ཉེ་བའི་ལོ་ཤས་རིང་། ཀྲུང་གོ་ཧྭ་གློག་གིས་ནུས་རྒྱུ་གཙང་མ་གསར་སྤེལ་བྱས་ནས་ཕུགས་ཕན་རོགས་སྐྱོར་ལམ་སྲོལ་བཙུགས་པ་མ་ཟད། མང་ཚོགས་ལས་ཀར་བསྡུས་ཤིང་། རིམ་རྩིས་བྱས་ན་ལས་གནས་4200ལྷག་ཙམ་ཐག་གཅོད་བྱས་པས་མང་ཚོགས་ལ་ཡོང་འབབ་སྒོར་དུང་ཕྱུར་1.8བྱུང་ཡོད། སྒོར་ཁྲི་2600བཏང་ནས་ཆུ་གློག་གི་གནས་སྤོས་གྲོང་མིའི་སྡོད་ཁང་གསར་པ་བསྐྲུན་ནས་དུད་ཚང་30ཡི་གྲོང་མི་75ཡི་སྡོད་གནས་ཆ་རྐྱེན་ལེགས་སུ་ཕྱིན་ཡོད། འོད་ཤུགས་རྣམ་གྲངས་སྐྲུན་རོགས་བྱས་ནས་མང་ཚོགས་9000ལྷག་ཙམ་གྱི་གློག་སྤྱོད་གནད་དོན་ཐག་གཅོད་བྱས་པ་དང་། སྒོར་དུང་ཕྱུར་5.23རི་བའི་ཨར་སྐྲུན་རྒྱུ་ཆ་ཉོས་པ། འཛད་སྤྱོད་ཐད་སྒོར་ཁྲི་2600ལྷག་ཙམ་བཏང་བ། ཐེམ་ཁུངས་བོད་ནས་ཡིན་པའི་སློབ་ཆེན་དང་འབྲིང་རིམ་ཆེད་ལས་སློབ་གྲྭའི་སློབ་ཐོན་སློབ་མ་81གདན་ཞུ་བྱས་པ། ཡིག་ཚགས་དང་གཱ་བཟོས་པའི་སློབ་མ་44གསོ་སྐྱོང་བྱས་ཏེ་ཧྭ་གློག་གི་ལས་ཀར་བཅུག་པ་བཅས་བྱས་ནས་དེ་བས་བརྟན་པའི་ཕུགས་ཕན་གྱི་རོགས་སྐྱོར་བྱས་ཡོད། གྲངས་གཞི་རབ་དང་རིམ་པ་ལས། ཀྲུང་གོ་ཧྭ་གློག་གིས་བོད་ཀྱི་འཕེལ་རྒྱས་ལ་ཞབས་འདེགས་ཞུ་བ་དང་གྲོང་གསེབ་དར་རྒྱས་ལ་རོགས་རམ་བྱེད་པའི་འགན་འཁྲི་དང་གསོན་ཉམས་ལྡན་པའི་ལག་ལེན་མཐོང་ཐུབ།