འདི་ནི་འགོ་ཚུགས་མཛད་སྒོ་འཚོགས་ཡུལ་ཡིན་པ།

འདི་ནི་ལྷུན་གྲུབ་རྫོང་འཐུས་མིའི་རུ་ཁག་གི་ལུས་རྩལ་པ་འགྲན་རར་འཛུལ་བཞིན་པ།

འདི་ནི་སྟོད་ལུང་བདེ་ཆེན་ཆུས་འཐུས་མིའི་རུ་ཁག་གི་ལུས་རྩལ་པ་འགྲན་རར་འཛུལ་བཞིན་པ།

འདི་ནི་ལུས་རྩལ་པའི་འཐུས་མིས་དམ་བཅའ་འཇོག་བཞིན་པ།

ཟླ་6ཚེས་22ཉིན། ལྷ་སའི་ཞིང་འབྲོག་པའི་ལུས་རྩལ་འགྲན་ཚོགས་སྐབས་དང་པོ་ལྷ་ས་གྲོང་ཁྱེར་མང་ཚོགས་རིག་གནས་ལུས་རྩལ་ལྟེ་གནས་སུ་འགོ་ཚུགས་ཤིང་། གྲོང་ཁྱེར་ཡོངས་ཀྱི་རྫོང(ཆུས)དང་བྱེད་ནུས་གླིང་ཁུལ་ཁག་ནས་ཡོང་བའི་འཐུས་མིའི་རུ་ཁག་11གི་ལུས་རྩལ་པ་500ལྷག་ཙམ་འགྲན་བསྡུར་ལ་ཞུགས་པ་རེད།

ཤེས་རྟོགས་བྱུང་བར་གཞིགས་ན། སྐབས་འདིའི་ལུས་རྩལ་འགྲན་ཚོགས་ཀྱི་དུས་ཡུན་ཉིན་5ཡིན་པ་དང་། རྩལ་འགྲན་རྣམ་གྲངས་དང་མི་རིགས་ཀྱི་སྲོལ་རྒྱུན་དང་སྤྲོ་སྣང་དོད་པའི་རྣམ་གྲངས་རིགས་ཆེན་པོ་གཉིས་སུ་དབྱེ་ཡོད་པའི་ནང་གཉའ་ཐག་འཐེན་པ་དང་། འུར་རྡོ་འགྲན་བསྡུར། གཡག་རྒྱུག་འགྲན་བསྡུར། རྒྱལ་པོ་མགོ་གཉིས། ཤོ་རྩེད་སོགས་འགྲན་བསྡུར་རྣམ་གྲངས་19ཚུད་ཡོད། ལུས་རྩལ་འགྲན་བསྡུར་བྱེད་རིང་། ད་དུང་མཚན་མོའི་གློག་འོད་འགྲེམས་སྟོན་དང་། རླངས་འཁོར་འགྲེམས་སྟོན། ཁྱད་ལྡན་ཞིང་ལས་ཐོན་རྫས་གཤོམ་པ། ཞིམ་ཟས་དགའ་ནེའུ་དུས་ཆེན་སོགས་ཀྱི་བྱེད་སྒོ་རབ་དང་རིམ་པ་སྤེལ་རྒྱུ་ཡིན་པས། ལྟད་མོ་བ་ཚོས་འགྲན་བསྡུར་ལ་རོལ་བ་དང་ཆབས་ཅིག་ལྷ་སའི་ཐུན་མོང་མ་ཡིན་པའི་རིག་གནས་དང་ཡུལ་སྐོར་གྱི་ཡིད་དབང་འཕྲོག་ཤུགས་མྱོང་རོལ་བྱེད་ཐུབ། སྐབས་འདིའི་འགྲན་ཚོགས་ལ་ད་དུང་ལུས་རྩལ་རྣམ་གྲངས་གསར་པའི་བྱ་དགའ་ཡོད་པའི་མྱོང་རོལ་ཁུལ་བཙུགས་ཡོད་པས། ལྟད་མོ་ལྟ་མཁན་མང་ཚོགས་ཚོས་ལུས་རྩལ་འགྲན་བསྡུར་གྱི་ཡིད་དབང་འཕྲོག་ཤུགས་དང་སྤྲོ་སྣང་ཆེན་པོ་མྱོང་རོལ་བྱེད་ཆོག

འགོ་ཚུགས་མཛད་སྒོ་འཚོགས་ཡུལ་དུ་སྟག་རྩེ་ཆུས་ཀྱི་ཞིང་པ་ལྷག་པ་སྒྲོལ་མས། སྟག་རྩེ་ཆུས་ཀྱི་ཞིང་པའི་འཐུས་མི་ཡིན་པའི་ངོས་ནས་ཐག་འཐེན་འགྲན་བསྡུར་ནང་ཞུགས་པ་ཡིན། ད་ལྟ་ནི་ཞིང་དལ་གྱི་དུས་ཡིན་པས་ཁྱིམ་གྱི་སྒོ་རྩ་ནས་འགྲན་བསྡུར་གལ་ཆེན་འདི་ལྟ་བུའི་ནང་ཞུགས་ཐུབ་པར་དགའ་ཚོར་ཧ་ཅང་ཆེན་པོ་འདུག འབྲེལ་ཡོད་སྡེ་ཚན་གྱིས་རྗེས་སུ་བྱེད་སྒོ་དེ་རིགས་མང་ཙམ་སྤེལ་རྒྱུའི་རེ་བ་ཡོད་ཅེས་གསར་འགོད་པར་བརྗོད།

ཉེ་བའི་ལོ་ཤས་རིང་། ལྷ་ས་གྲོང་ཁྱེར་གྱིས་ལྗོངས་ཡོངས་ཀྱི་སྔོན་ལ་སྤྱི་ཡོངས་དབུལ་སྒྲོལ་དང་། དེང་རབས་ཅན་གྱི་ཞིང་འབྲོག་ཐོན་ལས་མགྱོགས་མྱུར་འཕེལ་རྒྱས་གཏོང་བ། གནས་འཕྲོད་ལས་འཚམ་མཛེས་མཐུན་གསུམ་ལྡན་གྱི་གྲོང་གསེབ་སྐྲུན་མགྱོགས་སུ་གཏོང་བ་བཅས་བྱས་པས། ཞིང་འབྲོག་ཁུལ་གྱི་གྲོང་ཚོའི་རྣམ་པ་དང་ཞིང་འབྲོག་པའི་ཐོན་སྐྱེད་དང་འཚོ་བའི་ཆུ་ཚད་ལ་གནམ་ས་བླ་འོག་ཏུ་འགྱུར་བ་ལྟ་བུའི་འགྱུར་ལྡོག་བྱུང་ཡོད། 2023ལོར། གྲོང་ཁྱེར་ཡོངས་ཀྱི་གྲོང་གསེབ་ཀྱི་གྲོང་མི་མི་རེའི་ཆ་སྙོམས་བཀོལ་སྤྱོད་ཆོག་པའི་ཡོང་འབབ་སྒོར་25010ཟིན་པ་དེ་ལྗོངས་ཡོངས་ལས་སྒོར་5086གིས་མཐོ་བ་ཡོད་པ་རེད།