ཏང་གི་སྒྲིག་ཁྲིམས་སློབ་སྦྱོང་སློབ་གསོ་སྤེལ་ཚུན། གཞིས་རྩེ་གྲོང་ཁྱེར་གྱིས་ཏང་གི་སྒྲིག་ཁྲིམས་སློབ་སྦྱོང་སློབ་གསོ་སྤེལ་བ་དེ་ཆབ་སྲིད་ཀྱི་ལས་འགན་གལ་ཆེན་ཞིག་དང་སེམས་ཁམས་དྭངས་གཙང་དང་། ཐོག་མའི་བསམ་འདུན་བརྟན་སྲུང་། དད་མོས་བརྟན་གཏོང་བཅས་ཀྱི“ངེས་པར་དུ་སྦྱོང་དགོས་པའི་སློབ་ཚན”ཞིག་ལ་བརྩིས་ནས། རྒྱུན་གཏན་དང་མཉམ་འདྲེས་དང་རྒྱུན་གཏན་ནས་དམ་འཛིན་བྱ་རྒྱུར་མཐོང་ཆེན་གྱིས་སྒྲིག་ཁྲིམས་སྦྱོང་བ་དང་། སྒྲིག་ཁྲིམས་ཤེས་པ། སྒྲིག་ཁྲིམས་དམ་པ། སྒྲིག་ཁྲིམས་སྲུང་བ་བཅས་ཀྱི་སྤྱིའི་དམིགས་ཚད་བླང་བྱར་དམ་པོར་དམིགས་ཏེ། “དོན་དངོས”ཐད་ཤུགས་རྒྱག་པ་དང་། “དམ་ནན”ཐད་འབད་བརྩོན་བྱེད་པ། “ཏན་ཏིག”ཐད་ཤུགས་རྒྱག་པ་བཅས་བྱས་ནས《ཀྲུང་གོ་གུང་ཁྲན་ཏང་གི་སྒྲིག་ཁྲིམས་ཆད་གཅོད་སྲོལ་ཡིག》སློབ་སྦྱོང་དང་། གསལ་འགྲེལ་གསོ་སྦྱོང་། ཉེན་ཟོན་སློབ་གསོ། ཞིབ་བརྟག་དག་ཐེར་སོགས་ཀྱི་ལས་དོན་ཏན་ཏིག་དང་ཞིབ་ཚགས་སྤེལ་ཁར། ཏང་ཡོན་ལས་བྱེད་པར་ཏང་གི་སྒྲིག་ཁྲིམས་བློ་ལ་བརྟན་པོར་འཛིན་པ་དང་ལག་ལེན་བསྟར་བར་ཁྲིད་སྟོན་བྱས་ཏེ་ཏང་གི་སྒྲིག་ཁྲིམས་སློབ་སྦྱོང་སློབ་གསོ་ལག་ལེན་བསྟར་བ་དང་ཕན་འབྲས་ཐོན་རྒྱུར་སྐུལ་འདེད་བཏང་བ་རེད།

གཞིས་རྩེ་གྲོང་ཁྱེར་གྱི་རིམ་ཁག་ཏང་རྩ་འཛུགས་ཀྱིས་ཏང་གི་སྒྲིག་སྲོལ་དང་ཏང་གི་སྒྲིག་ཁྲིམས་སེམས་ལ་གཏིང་ཟབ་ཟུག་རྒྱུར་དམིགས་ཏེ་སེམས་ནུས་གཅིག་སྒྲིལ་གྱིས་ཏང་ལ་ལྷག་བསམ་རྣམ་དག་བྱེད་རྒྱུ་དེ་ཁྲག་རྒྱུན་ནང་འདྲེས་པ་དང་བླ་སྲོག་ནང་སིམ་པར་བྱས་པ་དང་། 《སྲོལ་ཡིག》སོགས་ཏང་གི་སྒྲིག་སྲོལ་དང་ཏང་གི་སྒྲིག་ཁྲིམས་ལ་དམ་པོར་དམིགས་ནས་མི་སྒེར་གྱིས་རང་སྦྱོང་དང་གཅིག་སྡུད་སློབ་སྦྱོང་བྱ་རྒྱུ་ཟུང་འབྲེལ་མཐའ་འཁྱོངས་ཀྱིས་རིགས་པའི་གཞུང་ལུགས་སློབ་སྦྱོང་ལྟེ་བའི་ཚོགས་ཆུང་གི་སློབ་སྦྱོང་ཐེངས་2650ལྷག་ཙམ་དང་། “ཚོགས་འདུ་གསུམ་དང་སློབ་ཚན་གཅིག”དང་བརྗོད་དོན་གཙོ་བོའི་ཏང་གི་ཉིན་མོའི་བྱེད་སྒོ་ཐེངས་10300ལྷག་ཙམ། དཔེ་ཀློག་འཛིན་གྲྭ་དུས་ཐེངས་1500ལྷག་ཙམ། བགྲོ་གླེང་སྤེལ་རེས་ཐེངས་297སོགས་བྱས་པ་བརྒྱུད། ཇི་མ་ཇི་བཞིན་སློབ་སྦྱོང་དང་། ཕྱོགས་ཡོངས་དང་གོ་རིམ་ལྡན་པའི་ངང་སློབ་སྦྱོང་། དོན་ཚན་དང་ཡིག་འབྲུ་རེ་རེ་བཞིན་སློབ་སྦྱོང་། དོན་དངོས་དང་ཟུང་འབྲེལ་གྱིས་སློབ་སྦྱོང་བཅས་བྱས་ནས། ཏང་གི་སྒྲིག་ཁྲིམས་སློབ་སྦྱོང་སློབ་གསོ་ཟམ་མི་ཆད་པར་གཏིང་ཟབ་ཕྱོགས་སུ་སྤེལ་ཡོད། བྱེད་པོའི་འགན་འཁྲི་ལག་བསྟར་ནན་པོ་བྱས་ཤིང་། ཏང་ཨུད(ཏང་ཙུའུ)ཀྱི་འགན་འཁུར་བློ་མཐུན་གཙོ་བོས་སྣེ་ཁྲིད་དེ་སློབ་སྦྱོང་དང་། སྣེ་ཁྲིད་དེ་དམ་འཛིན། སྣེ་ཁྲིད་དེ་སྒྲུབ་པ་བཅས་བྱེད་པ་དང་ལས་དོན་ཆེད་སྒྲུབ་ཚན་ཁག་གིས་མཛུབ་སྟོན་དང་ལྟ་སྐུལ་མཛུབ་ཁྲིད་བྱེད་ཤུགས་ཆེ་རུ་གཏོང་བ་དང་ཕྱི་ཚུལ་རིང་ལུགས་སྤངས་ཏེ། གཞི་རིམ་གྱི་ཁུར་པོ་ཡང་དུ་བཏང་བ། གཅིག་གྱུར་འཆར་འགོད་དང་སྤྱི་ཡོངས་ལ་ལྟ་རྟོག་བྱེད་པར་མཐོང་ཆེན་བཅས་བྱས་ནས་ཏང་གི་སྒྲིག་ཁྲིམས་སློབ་སྦྱོང་སློབ་གསོ་དང་གཙོ་གནད་ལས་དོན་དོན་འཁྱོལ་བྱེད་པར་ཕྱོགས་གཉིས་ཀར་དམ་འཛིན་དང་ཕྱོགས་གཉིས་ཀར་སྐུལ་འདེད་བཏང་ཡོད།

 གྱོད་དཔེར་བརྟེན་ནས་སློབ་སྦྱོང་ལ་སྐུལ་འདེད་དང་གསོ་སྦྱོང་ལ་བརྟེན་ནས་སློབ་སྦྱོང་ལ་སྐུལ་འདེད་མཐའ་འཁྱོངས་ཀྱིས་ཉེ་འགྲམ་གྱི་སྒྲིག་འགལ་ཁྲིམས་འགལ་གྱི་གྱོད་དཔེར་སློབ་སྦྱོང་དང་བེད་སྤྱོད་ཡག་པོ་བྱས་པ་དང་། ཉེན་ཟོན་སློབ་གསོའི་འགྲེམས་སྟོན་དང་ཉེན་ཟོན་སློབ་གསོའི་བརྙན་ཐུང་ནན་ཏན་ངང་བལྟས་པ། ཉེ་བའི་ལོ་ཤས་རིང་བཀྲམ་པའི་སྒྲིག་བཤེར་ལྟ་ཞིབ་ཀྱི་གྲོས་འགོ་24ལ་གསེད་བཀྲོལ་བྱེད་པ། སྒྲིག་འགལ་ཁྲིམས་འགལ་གྱི་དཔེ་མཚོན་གྱོད་དཔེ་25བདམས་ནས་ཞིབ་བསྡུར་ཞིབ་ཚགས་དང་རང་ངོས་ཉེན་བརྡ་གཏོང་བ། རྒྱ་ཆེའི་ཏང་ཡོན་ལས་བྱེད་པས་བསམ་བློ་དྭངས་གཙང་གི“གློག་སྒོ་ལྟེ་བ”དམ་དུ་གཏོང་བར་ཁྲིད་སྟོན་བཅས་བྱས་ཏེ་རུལ་འགོག་འགྱུར་ཟོན་གྱི“མེ་འགོག་གྱང”ཕྱོགས་ཡོངས་ནས་བསྐྲུན་ནས་ཐོག་མཐའ་བར་གསུམ་དུ་གུས་སྐྲག་ཤེས་པ་དང་། ཟོན་སྐྲག་བྱེད་པ། མཐའ་ཚད་སྲུང་བ་བཅས་ཐུབ་པར་བྱས་པ་རེད།

སྒྲིག་ཁྲིམས་ནན་ན་གཞུང་དྲང་ཡོང་བ་དང་། གཞུང་དྲང་ན་སེམས་པ་གཅིག་ཏུ་མཐུན། སེམས་པ་གཅིག་ཏུ་མཐུན་ན་བྱ་བ་འགྲུབ། གོམ་སྟབས་རྗེས་མར་གཞིས་རྩེ་གྲོང་ཁྱེར་གྱིས་སྒྲིག་ཁྲིམས་ལ་ངོས་འཛིན་སྔར་བས་གཏིང་ཟབ་ཏུ་གཏོང་བ་དང་། ཏང་གི་སྒྲིག་ཁྲིམས་སྲུང་སྐྱོང་བྱེད་པའི་བློ་རྩ་སྔར་བས་བརྟན་དུ་གཏོང་བ། རང་རྟོགས་ངང་སྒྲིག་སྲོལ་སྦྱོང་བ་དང་སྒྲིག་ཁྲིམས་སྲུང་བ་བཅས་བྱས་ཏེ། སྒྲིག་ཁྲིམས་འཛུགས་སྐྱོང་གི་གྲུབ་འབྲས་གསར་པར་བརྟེན་ནས་ཕྱོགས་ཡོངས་ནས་ཏང་ནན་པོས་སྐྱོང་བ་གཏིང་ཟབ་ཕྱོགས་སུ་འཕེལ་རྒྱས་འགྲོ་རྒྱུར་སྐུལ་འདེད་གཏོང་བ་དང་གཞིས་རྩེའི་བྱ་གཞག་ཁག་སྤུས་ཚད་མཐོ་བའི་འཕེལ་རྒྱས་ཀྱི་གྲུབ་འབྲས་དངོས་ལ་བརྟེན་ནས་ཏང་གི་སྒྲིག་ཁྲིམས་སློབ་སྦྱོང་སློབ་གསོའི་གྲུབ་འབྲས་ལ་ཞིབ་བཤེར་བྱས་ཏེ“ལྟེ་བའི་གྲོང་ཁྱེར་གཉིས”འཛུགས་སྐྲུན་ལ་འགན་ལེན་བརྟན་པོ་བྱ་རྒྱུ་ཡིན་པ་རེད།