མཉམ་འབྲེལ་རྒྱལ་ཚོགས་སུ་རྒྱུན་སྡོད་ཀྲུང་གོའི་འཐུས་མི་གཞོན་པ་ཏའེ་པིང་གིས་ཚེས་19ཉིན་བདེ་འཇགས་ལས་འཛིན་ལྷན་ཚོགས་ཀྱི་ལི་པི་ཡའི་གནད་དོན་སྐོར་གྱི་ཡོངས་བསྒྲགས་ཚོགས་འདུའི་ཐོག ཀྲུང་གོ་ཕྱོགས་ཀྱིས་ཨ་ཧྥེ་རི་ཁའི་བྱེད་སྟངས་ཐོག་ནས་ཨ་ཧྥེ་རི་ཁའི་གནད་དོན་ཐག་གཅོད་བྱེད་པར་རྒྱབ་སྐྱོར་བྱེད་ཀྱི་ཡོད། ལི་པི་ཡར་ཨ་ཧྥེ་རི་ཁའི་མནའ་འབྲེལ་གྱི་འདུམ་འགྲིག་ཉམས་མྱོང་ཁྲོད་ནས་ཕན་པ་ཐོབ་རྒྱུར་ཡིད་ཆེས་ཡོད། རྒྱལ་སྤྱིའི་སྤྱི་ཚོགས་ལ་འདིར་དགོས་ངེས་ཀྱི་རྒྱབ་སྐྱོར་བྱ་རྒྱུའི་འབོད་སྐུལ་བྱ་རྒྱུ་ཡིན་ཞེས་བརྗོད་པ་རེད།

ཏའེ་པིང་གིས། ཕན་ཚུན་གྲོས་མོལ་བྱེད་པ་ནི་ལི་པི་ཡའི་ཆབ་སྲིད་གནད་དོན་ཐག་གཅོད་བྱེད་པའི་ཐབས་ལམ་འབའ་ཞིག་དེ་ཡིན། ཉེ་ཆར། ལི་པི་ཡའི་རྒྱལ་དམངས་འཐུས་མིའི་ཚོགས་ཆེན་དང་ཆེས་མཐོའི་རྒྱལ་ཁབ་ཨུ་ཡོན་ལྷན་ཁང་གིས་འབྲེལ་འདྲིས་བྱེད་ཤུགས་ཆེ་རུ་བཏང་ནས་གཅིག་གྱུར་གྱི་སྲིད་གཞུང་འཛུགས་པ་དང་འདེམས་བསྐོ་བྱེད་པ་སོགས་ཀྱི་འགག་རྩའི་གནད་དོན་ཐད་གྲོས་བསྡུར་བྱས་འདུག ཀྲུང་གོ་ཕྱོགས་ཀྱིས་ལི་པི་ཡའི་འབྲེལ་ཡོད་ཕྱོགས་ཁག་གིས་ཨེ་ཅིབ་ཀྱི་རྒྱལ་ས་ཁེ་རོར་ཆབ་སྲིད་ཀྱི་གྲོས་བསྡུར་རེས་སྐོར་གཉིས་པ་བྱས་པ་དོ་སྣང་བྱུང་། ལི་པི་ཡའི་ཕྱོགས་ཁག་གིས་ཆབ་སྲིད་ཐོག་ནས་ཐག་གཅོད་བྱེད་པའི་ཁ་ཕྱོགས་ཆེ་མོ་མཐའ་འཁྱོངས་དང་ཕན་ཚུན་གྲོས་མོལ་རྒྱུན་འཁྱོངས་ཀྱིས་མི་མཐུན་ས་ལྷག་མ་གྲོས་མོལ་བྱས་ནས་ཐག་གཅོད་བྱས་ཏེ། ཆབ་སྲིད་ཀྱི་འཕེལ་རིམ་ལ་རྒྱུན་མཐུད་སྐུལ་འདེད་གཏོང་རྒྱུར་རེ་སྒུག་བྱེད་ཀྱི་ཡོད་ཅེས་བརྗོད་པ་རེད།

ཏའེ་པིང་གིས། མཉམ་འབྲེལ་རྒྱལ་ཚོགས་ནི་ལི་པི་ཡའི་གནད་དོན་འདུམ་འགྲིག་བྱེད་པའི་ཐབས་ལམ་གལ་ཆེན་ཞིག་རེད། རྒྱལ་སྤྱིའི་སྤྱི་ཚོགས་དང་མཉམ་འབྲེལ་རྒྱལ་ཚོགས་ལི་པི་ཡར་རོགས་སྐྱོར་གྱི་ཆེད་མངགས་ཚོགས་པས“ལི་པི་ཡ་བས་གཙོ་ཁྲིད་དང་ལི་པི་ཡ་བར་དབང་བའི”ཆབ་སྲིད་འཕེལ་རིམ་ལ་མུ་མཐུད་དགེ་མཚན་ལྡན་པའི་རྒྱབ་སྐྱོར་བྱེད་དགོས། ཀྲུང་གོ་ཕྱོགས་ཀྱིས་རྒྱལ་སྤྱིའི་སྤྱི་ཚོགས་ལ་ལི་པི་ཡའི་བདག་དབང་དང་མངའ་ཁོངས་ཆ་ཚང་ལ་བརྩི་འཇོག་ཧུར་ཐག་བྱས་ཐོག་ལི་པི་ཡའི་ཕྱོགས་ཁག་གི་དོ་ཁུར་ལ་བསམ་བློ་གང་ལེགས་བཏང་ནས་ཕྱི་རོལ་གྱི་ཐག་གཅོད་བྱེད་ཐབས་བཙན་གྱིས་མི་སྤྱོད་པའི་འབོད་སྐུལ་བྱ་རྒྱུ་ཡིན་ཞེས་བརྗོད་པ་རེད།

ཏའེ་པིང་གིས། མི་རིགས་ཞི་བས་མཐུན་འགྲིག་ནི་བསྐྱར་དུ་ཡིད་ཆེས་དང་དམག་འཁྲུག་འགོག་པའི་གོམ་སྟབས་གལ་ཆེན་ཞིག་ཡིན། ཁོང་ཀོ(པུའུ)ཡིས་ཨ་ཧྥེ་རི་ཁ་མནའ་འབྲེལ་གྱི་ལི་པི་ཡའི་གནད་དོན་སྐོར་གྱི་རིམ་མཐོའི་ཨུ་ཡོན་ལྷན་ཁང་གིས་ཉེ་ཆར་ལི་པི་ཡའི་ཕྱོགས་ཁག་དང་འབྲེལ་འདྲིས་བྱེད་ཤུགས་ཆེ་རུ་གཏོང་རྒྱུར་སྐུལ་འདེད་བཏང་ནས་ལི་པི་ཡའི་རྒྱལ་ཡོངས་འདུམ་འགྲིག་ཚོགས་ཆེན་འཚོག་རྒྱུར་སྐུལ་འདེད་བཏང་བར་ཀྲུང་གོ་ཕྱོགས་ཀྱིས་བསྔགས་བརྗོད་བྱེད་ཀྱི་ཡོད། ཀྲུང་གོ་ཕྱོགས་ཀྱིས་ལི་པི་ཡའི་ཕྱོགས་ཁག་ལ་རྒྱལ་ཁབ་དང་མི་དམངས་ཀྱི་ཁེ་ཕན་གཙོ་བོར་བཟུང་ཐོག་དཔྱོད་ཤེས་དང་བཟོད་སྒོམ་བྱས་ནས་གཏུམ་སྤྱོད་དོན་རྐྱེན་གཅིག་ཀྱང་མི་ཐོན་པ་བྱ་རྒྱུའི་འབོད་སྐུལ་བྱ་རྒྱུ་དང་། “5+5”མཉམ་འབྲེལ་དམག་དོན་ཨུ་ཡོན་ལྷན་ཁང་གིས་ལི་པི་ཡའི་ཕྱོགས་ཁག་གིས་དམག་མཚམས་འཇོག་པའི་གྲོས་མཐུན་མུ་མཐུད་དོན་འཁྱོལ་བྱས་ནས་གཅིག་གྱུར་གྱི་དམག་དོན་དང་ཉེན་རྟོག་པའི་དཔུང་སྡེ་འཛུགས་རྒྱུར་སྐུལ་འདེད་གཏོང་དགོས་ཞེས་བརྗོད་པ་རེད།