2023ལོའི་ཟླ་དང་པོར་ཀྲུའུ་ཞི་ཞི་ཅིན་ཕིང་དང་ཏུར་མེན་སི་ཐན་གྱི་ཙུང་ཐུང་ཤེ་ཨེར་ཏ་ཨེར·པེ་ཨེར་ཏེ་མུའུ་ཧ་མེ་ཏུའོ་ཧྥུའུ་རྣམ་གཉིས་ཀྱིས་རྒྱལ་ཁབ་གཉིས་པོའི་འབྲེལ་བ་དེ་ཕྱོགས་ཡོངས་ཀྱི་འཐབ་ཇུས་རོགས་ཟླའི་འབྲེལ་བར་རིམ་སྤོར་བྱ་རྒྱུ་མ་ཟད། ཕྱོགས་གཉིས་ཀྱི་རིམ་ངོས་ནས་ལས་དབང་གཅིག་མཐུན་ཚོགས་པ་ལག་ལེན་བསྟར་ཏེ་རྒྱལ་ཁབ་གཉིས་པོའི་འབྲེལ་བའི་འཕེལ་རྒྱས་ཀྱི་ལེའུ་གསར་པ་རྩོམ་རྒྱུ་ཡིན་ཞེས་མཉམ་དུ་ཁྱབ་བསྒྲགས་གནང་ཡོད། ཀྲུང་ཏུར་རྒྱལ་ཁབ་གཉིས་ཀྱི་ལས་དབང་གཅིག་མཐུན་ཚོགས་པ་གཏོད་པ་ནི་ཕན་ཚུན་བརྩི་འཇོག་དང་། ཟོལ་མེད་ཡིད་ཆེས། གཉིས་ཁེ་གཉིས་ཕན་བཅས་ཀྱི་རྨང་གཞིའི་ཐོག་གཉིས་ཕན་མཉམ་ལས་སྔར་བས་གཏིང་ཟབ་ཏུ་གཏོང་བ་དང་། ཕན་ཚུན་གྱི་དོ་ཁུར་ལ་ལྟ་རྟོག་བྱེད་པ། མི་རབས་ནས་མི་རབས་བར་གྱི་མཛའ་གྲོགས་འབྲེལ་བ་ཟབ་ཏུ་གཏོང་བ་བཅས་བྱ་ཆེད་རེད། རྒྱལ་ཁབ་གཉིས་པོའི་གཙོ་བདག་གི་འཐབ་ཇུས་སྣེ་ཁྲིད་འོག་ཀྲུང་ཏུར་རྒྱལ་ཁབ་གཉིས་ཀྱི་འབྲེལ་བ་ཆུ་ཚད་མཐོ་བའི་འཕེལ་རྒྱས་རྒྱུན་འཁྱོངས་ཐུབ་ཡོད།

ཕན་ཚུན་རྒྱབ་སྐྱོར་བྱེད་པ་ནི་ཀྲུང་ཏུར་རྒྱལ་ཁབ་གཉིས་པོའི་ལས་དབང་གཅིག་མཐུན་ཚོགས་པའི་ལྟེ་བའི་དོན་སྙིང་ཡིན། ཀྲུང་གོ་ནི་ཏུར་མེན་སི་ཐན་གྱི་ཡིད་ཆེས་རུང་བའི་གྲོགས་པོ་དང་རོགས་ཟླ་རེད། ཕྱོགས་གཉིས་པོས་མཐོ་རིམ་འགྲོ་འོང་དམ་ཟབ་རྒྱུན་འཁྱོངས་དང་རྒྱལ་སྲིད་སྐྱོང་ལུགས་ཀྱི་ཉམས་མྱོང་སྤེལ་རེས་གཏིང་ཟབ་ཏུ་བཏང་སྟེ་འཐབ་ཇུས་དང་ཆབ་སྲིད་ཐད་ཕན་ཚུན་ཡིད་ཆེས་བྱེད་ཤུགས་ཆེ་རུ་གཏོང་དགོས། ཀྲུང་གོ་ཕྱོགས་ཀྱིས་ཏུར་མེན་སི་ཐན་ཕྱོགས་ཀྱིས་བདག་དབང་དང་། རང་བཙན། མངའ་ཁོངས་ཆ་ཚང་བཅས་སྲུང་སྐྱོང་དང་རང་རྒྱལ་ཁབ་ཀྱི་རྒྱལ་བབ་དང་འཚམ་པའི་འཕེལ་རྒྱས་ལམ་བུར་བསྐྱོད་པར་རྒྱབ་སྐྱོར་མཐའ་གཅིག་ཏུ་ཞུ་གི་ཡིན། ཏུར་མེན་སི་ཐན་ཕྱོགས་ཀྱིས་ཀྲུང་གོའི་ལྟེ་བའི་ཁེ་ཕན་དང་དོ་ཁུར་གལ་ཆེན་དང་འབྲེལ་བ་ཡོད་པའི་གནད་དོན་ཐད་ཐོག་མཐའ་བར་གསུམ་དུ་ཀྲུང་གོ་ཕྱོགས་ལ་རྒྱབ་སྐྱོར་ནུས་ལྡན་བྱེད་པ་དང་། ཀྲུང་གོ་གཅིག་གི་རྩ་དོན་བློ་བརྟན་འགྱུར་མེད་ཀྱིས་ལག་ལེན་བསྟར་བ། རྣམ་པ་གང་རུང་གི“ཐའེ་དབན་རང་བཙན”ལ་ངོ་རྒོལ་མཐའ་གཅིག་ཏུ་བྱེད་པ། ངོགས་གཉིས་ཀྱི་འབྲེལ་བ་ཞི་བའི་ངང་འཕེལ་རྒྱས་འགྲོ་བ་དང་ཀྲུང་གོ་སྲིད་གཞུང་གིས་རྒྱལ་ཁབ་གཅིག་གྱུར་མངོན་འགྱུར་ཡོང་ཆེད་འབད་བརྩོན་བྱས་པར་རྒྱབ་སྐྱོར་བྱེད་ཀྱི་ཡོད།

ཀྲུང་གོ་དང་ཏུར་མེན་སི་ཐན་དབར་གྱི་མཉམ་ལས་ཀྱི་གསབ་རེས་རང་བཞིན་ཆེ་བ་དང་གཏིང་ཤུགས་ཧ་ཅང་ཆེན་པོ་ཡོད། ཕྱོགས་གཉིས་པོས་ཀྲུང་ཏུར་མཉམ་ལས་ཨུ་ཡོན་ལྷན་ཁང་གི་སྤྱི་འདོམས་འཆར་འགོད་དང་མཐུན་སྦྱོར་གྱི་ནུས་པ་འདོན་སྤེལ་གང་ལེགས་བྱས་ཏེ“རྒྱུད་གཅིག་ལམ་གཅིག”གི་གྲོས་འགོ་དང“དར་གོས་ལམ་བུ་བསྐྱར་དར”གྱི་འཐབ་ཇུས་སྦྲེལ་མཐུད་ལ་སྐུལ་འདེད་ཧུར་ཐག་གཏོང་བ་དང་། ཀྲུང་ཏུར་རྒྱལ་ཁབ་གཉིས་པོའི་སྲིད་གཞུང་གི་ལོ་5ཡི་མཉམ་ལས་འཆར་འགོད(2021ལོ་ནས་2025ལོ་བར)ནུས་ཤུགས་ཡོད་རྒུས་དོན་འཁྱོལ་ཡག་པོ་བྱས་ཏེ་ཀྲུང་ཏུར་རྒྱལ་ཁབ་གཉིས་པོའི་ཁྱབ་ཁོངས་ཁག་གི་མཉམ་ལས་དཔུང་གཤིབ་མཉམ་སྐྱོད་དང་ཕྱོགས་ཡོངས་ནས་འཕེལ་རྒྱས་འགྲོ་བར་སྐུལ་འདེད་བཏང་ཡོད། ཀྲུང་གོ་འདི་ཉིད་ལོ་10ལྷག་ཙམ་བསྟུད་མར་ཏུར་མེན་སི་ཐན་གྱི་ཚོང་དོན་རོགས་ཟླ་ཆེ་ཤོས་སུ་གྱུར་ཡོད། རང་བྱུང་སོལ་རླངས་ཀྱི་མཉམ་ལས་ནི་ཀྲུང་ཏུར་རྒྱལ་ཁབ་གཉིས་པོའི་འབྲེལ་བའི་རྨང་རྡོ་ལྟ་བུ་ཡིན་པ་དང་། ཀྲུང་གོ་དང་ཨེ་ཤེ་ཡ་དབུས་མའི་རང་བྱུང་སོལ་རླངས་གདོང་ལམ་གྱིས་ཀྲུང་གོའི་དུད་ཚང་ཁྲི་སྟོང་མང་པོར་ཕན་པ་ཐོབ་པ་མ་ཟད། ཏུར་མེན་སི་ཐན་གྱི་དཔལ་འབྱོར་དང་སྤྱི་ཚོགས་འཕེལ་རྒྱས་ལ་ཡང་རམ་འདེགས་ཐུབ་ཡོད། ཕན་ཚུན་དབར་གྱི་འབྲེལ་མཐུད་ཁྱབ་ཁོངས་ནི་རྒྱལ་ཁབ་གཉིས་པོའི་མཉམ་ལས་ཀྱི་འཕར་གཞི་གསར་པ་ཞིག་ཡིན་པས་ཕྱོགས་གཉིས་པོས་ཀྲུང་ཏུར་རྒྱལ་ཁབ་གཉིས་པོའི་འགྲོ་ལམ་འབྲེལ་མཐུད་དང་རྒྱལ་སྒྲོལ་སྐྱེལ་འདྲེན་མཉམ་ལས་ལ་སྐུལ་འདེད་ཧུར་ཐག་གཏོང་རྒྱུ་ཡིན་པ་རེད། ཀྲུང་ཏུར་མཉམ་ལས་བྱས་ནས་དམངས་སེམས་ལས་གྲྭ་བཏོད་ཡོད། ཀྲུང་གོའི་ཁེ་ལས་ཀྱིས་ལེ་པ་ཕུའུ་ཀྲོའུ་སྨི་ཀན་གྲོང་ཚོར་སྐྲུན་རོགས་བྱས་པའི་དེང་རབས་ཅན་གྱི་ཆུ་གཙང་གསིང་བཟོ་གྲྭ་དེས་ས་གནས་དེ་གའི་མི་5000ལྷག་ཙམ་གྱི་འཐུང་ཆུའི་ཆ་རྐྱེན་ལེགས་སུ་ནུས་ལྡན་བཏང་ཡོད། འགྲོ་ལམ་སྣ་ཚོགས་སྤྱི་ལེ་1000ལྷག་ཙམ་བསྐྲུན་ནས་ས་གནས་དེ་གའི་དམངས་ཚོགས་ཀྱི་འགྲོ་སྐྱོད་སྟབས་བདེ་བསྐྲུན་ཡོད། ཀྲུང་ཏུར་ཕྱོགས་གཉིས་ཀྱིས་གསབ་རེས་ཀྱི་ལེགས་ཆ་འདོན་སྤེལ་གང་ལེགས་བྱས་ནས་མཉམ་ལས་ཀྱི་གཏིང་ཤུགས་མངོན་པར་བྱ་རྒྱུ་དང་། མཉམ་ལས་ཀྱི་ཟབ་ཚད་དང་། ཁྱབ་རྒྱ། གཞི་ཁྱོན་བཅས་ཕྱོགས་ཡོངས་ནས་ཆེ་རུ་གཏོང་རྒྱུ་རེད། ཀྲུང་གོ་དང་ཏུར་མེན་སི་ཐན་དབར་མི་ཆོས་རིག་གནས་སྤེལ་རེས་བྱས་པས་མི་དམངས་ཀྱི་མཛའ་གྲོགས་ཟབ་ཏུ་ཕྱིན་ཡོད། ཀྲུང་ཏུར་རྒྱལ་ཁབ་གཉིས་པོའི་མི་དམངས་དབར་གྱི་མཛའ་གྲོགས་འགྲོ་འོང་ལ་ལོ་རྒྱུས་ཡུན་རིང་ལྡན་པས་ལོ་རྒྱུས་ནང་ཆགས་པའི་སྤུན་ཟླའི་བརྩེ་བར་ཕན་ཚུན་གཅེས་སྤྲས་བྱེད་ཀྱི་ཡོད། ཕྱོགས་གཉིས་པོས་2023ལོ་དང་2024ལོར་ཕན་ཚུན་རིག་གནས་ལོའི་བྱེད་སྒོ་གཉེར་བ་གོ་སྐབས་སུ་བྱས་ནས་དམངས་སེམས་འབྲེལ་མཐུད་དང་མཛའ་གྲོགས་མཉམ་ལས་སྔར་བས་ཟབ་ཏུ་གཏོང་བཞིན་ཡོད། རྒྱལ་ཁབ་གཉིས་པོས་སློབ་གསོ་དང་། རིག་གནས། ཚན་རྩལ། འཕྲོད་བསྟེན། ལུས་རྩལ། ས་གནས་སོགས་ཁྱབ་ཁོངས་ཀྱི་སྤེལ་རེས་མཉམ་ལས་ལ་རྒྱུན་མཐུད་སྐུལ་འདེད་བཏང་ནས་གཞོན་ནུ་མི་རབས་རྣམས་ཀྲུང་ཏུར་རྒྱལ་ཁབ་གཉིས་པོའི་མཛའ་གྲོགས་རྒྱུན་འཛིན་བྱེད་མཁན་སྟོབས་ཤུགས་གསར་པར་གྱུར་ཡོད། ཏུར་མེན་སི་ཐན་གྱི་གཞོན་ནུ་ཚོས། མཛའ་གྲོགས་ཟབ་པའི་ཀྲུང་གོའི་གཞོན་ནུ་གྲོགས་པོ་དང་ཕན་ཚུན་སློབ་སྦྱོང་དང་དཔྱད་གཞིར་འཛིན་ནས་སྲོལ་རྒྱུན་གྱི་མཛའ་གྲོགས་ཟབ་ཏུ་བཏང་སྟེ་ཏུར་ཀྲུང་རྒྱལ་ཁབ་གཉིས་པོའི་ཕྱོགས་ཡོངས་ཀྱི་འཐབ་ཇུས་རོགས་ཟླའི་འབྲེལ་བ་སྤུས་ཚད་མཐོ་བའི་འཕེལ་རྒྱས་ལ་སྟོབས་ཤུགས་སྐྱེས་སུ་འབུལ་འདོད་ཡོད་ཅེས་བརྗོད། ཀྲུང་ཏུར་རྒྱལ་ཁབ་གཉིས་པོའི་མི་ཆོས་རིག་གནས་མཉམ་ལས་ཀྱིས་དམངས་སེམས་ཀྱི་སྦྲེལ་ཟམ་བསྐྲུན་ནས་ཀྲུང་ཏུར་རྒྱལ་ཁབ་གཉིས་པོའི་ལས་དབང་གཅིག་མཐུན་ཚོགས་པའི་དམངས་འདོད་དང་སྤྱི་ཚོགས་ཀྱི་རྨང་གཞི་མུ་མཐུད་བརྟན་དུ་གཏོང་བཞིན་ཡོད།

འབྱུང་འགྱུར་ཀྲུང་གོ་ཕྱོགས་ཀྱིས་ཏུར་མེན་སི་ཐན་ཕྱོགས་དང་ལག་གདང་སྦྲེལ་ནས་མདུན་སྐྱོད་བྱས་ཏེ། རྒྱལ་ཁབ་གཉིས་པོའི་གཙོ་བདག་གི་ཐུན་མོང་ངོས་འཛིན་གལ་ཆེན་ཕྱོགས་ཡོངས་ནས་དོན་འཁྱོལ་དང་། ཀྲུང་ཏུར་རྒྱལ་ཁབ་གཉིས་པོའི་ཕྱོགས་ཡོངས་ཀྱི་འཐབ་ཇུས་རོགས་ཟླའི་འབྲེལ་བའི་ནང་དོན་གསར་པ་རྒྱུན་ཆད་མེད་པར་ཕུན་སུམ་ཚོགས་སུ་བཏང་ནས་ཀྲུང་ཏུར་རྒྱལ་ཁབ་གཉིས་པོའི་ལས་དབང་གཅིག་མཐུན་ཚོགས་པ་གཏོད་རྒྱུར་སྒུལ་ཤུགས་གསར་པ་རྒྱུན་མཐུད་ངང་སྣོན་རྒྱུ་ཡིན།

(རྩོམ་པ་པོ་ནི་ཏུར་མེན་སི་ཐན་དུ་བཅའ་སྡོད་ཀྲུང་གོའི་གཞུང་ཚབ་ཆེ་མོ་བ་ཡིན)