ཀྲུང་གོའི་ནུས་རྒྱུ་གསར་པའི་ཐོན་ལས་ཀྱིས་གོ་ལ་ཧྲིལ་པོའི་ལྗང་མདོག་འཕེལ་རྒྱས་ལ་སྐུལ་འདེད་བཏང་བ།
ཏན་ཉི་སི·ཤིས་མོང་།
ཀྲུང་གོའི་ནུས་རྒྱུ་གསར་པའི་ཐོན་ལས་ལ་རྒྱུན་ཆད་མེད་པར་གྲུབ་འབྲས་ཐོབ་པ་ནི་རྒྱལ་སྤྱིའི་སྤྱི་ཚོགས་ཀྱིས་ལག་གདང་སྦྲེལ་ནས་གནམ་གཤིས་འགྱུར་ལྡོག་ལ་ཁ་གཏད་གཅོག་པ་དང་རྒྱུན་མཐུད་ཆོག་པའི་འཕེལ་རྒྱས་ལ་སྐུལ་འདེད་བཏང་བའི་མཐུན་རྐྱེན་གལ་ཆེན་ཞིག་རེད།
མིག་སྔར་གོ་ལ་ཧྲིལ་པོའི་ནུས་རྒྱུ་གཙང་མའི་གསར་བརྗེའི་ཁྲོད་ཀྲུང་གོས་སྔོན་སྐྱོད་གནས་བབ་བཟུང་བ་དང་ཀྲུང་གོའི་ཁེ་ལས་ལ་གློག་སྒུལ་རླངས་འཁོར་དང་། ལིས་གློག་རྫས། འོད་ཤུགས་ཐོན་རྫས་སོགས་ཁྱབ་ཁོངས་སུ་རྒྱལ་སྤྱིའི་འགྲན་རྩོད་ཀྱི་ལེགས་ཆ་ལྡན་ཡོད། ཀྲུང་གོའི་ནུས་རྒྱུ་གཙང་མའི་ལག་རྩལ་འཕེལ་རྒྱས་ཀྱིས་གོ་ལ་ཧྲིལ་པོས་གནམ་གཤིས་འགྱུར་ལྡོག་ལ་ཁ་གཏད་གཅོག་པར་དོན་སྙིང་གལ་ཆེན་ལྡན་པ་དང་གོ་ལ་ཧྲིལ་པོའི་རྒྱུན་མཐུད་ཆོག་པའི་འཕེལ་རྒྱས་ལ་ལེགས་སྐྱེས་ཧ་ཅང་ཆེན་པོ་ཕུལ་ཡོད།
མིག་སྔར་ཀྲུང་གོར་གོ་ལ་ཧྲིལ་པོའི་སྔོན་ཐོན་གྱི་ཉི་ནུས་གློག་རྫས་ལེབ་མོ་དང་། ལིས་གློག་རྫས། གློག་སྒུལ་རླངས་འཁོར་སོགས་ནུས་རྒྱུ་གསར་པའི་ཐོན་རྫས་བཟོ་བའི་ནུས་པ་ལྡན་ཡོད་པས་ལས་རིགས་དེ་དག་ཁྲོད་གསོན་ཤུགས་ཀྱིས་ཁེངས་པའི་མཁོ་སྤྲོད་འཁོར་འབྲེལ་གྱི་མ་ལག་ཅིག་བཙུགས་ཡོད། ཀྲུང་གོའི་ཁེ་ལས་ཀྱིས་ལག་རྩལ་གསར་གཏོད་ལ་རྒྱུན་ཆད་མེད་པར་སྐུལ་འདེད་གཏོང་བ་དང་། གཞི་ཁྱོན་གྱི་ཕན་འབྲས་མངོན་འགྱུར་ཧུར་ཐག་བྱེད་པ། ཐོན་སྐྱེད་ཀྱི་མ་གནས་དམའ་རུ་གཏོང་བ་བཅས་ཚང་མ་ནི་དེར་ཁྲོམ་རའི་འགྲན་རྩོད་ལྡན་པའི་རྒྱུ་རྐྱེན་གལ་ཆེན་ཞིག་རེད། ཀྲུང་གོར་ནུས་རྒྱུ་གསར་པའི་ཁྱབ་ཁོངས་ཀྱི་གསར་གཏོད་དེ་ཁྲོམ་རར་ཁྱབ་གདལ་གཏོང་ཆོག་པའི་ཐོན་རྫས་ལ་མགྱོགས་མྱུར་སྒྱུར་ཐུབ་པའི་ནུས་པ་ལྡན་ཡོད། དཔེར་ན། པི་ཡ་ཏི་དང་ཉིང་ཏེ་དུས་རབས་སོགས་ཀྲུང་གོའི་ཁེ་ལས་ཀྱིས་ནུས་རྒྱུ་གསར་པའི་གློག་རྫས་གསར་སྤེལ་བྱེད་པའི་ཐད་ལེགས་ཆ་མངོན་གསལ་དོད་པོ་ཡོད་པ་དང་ཀྲུང་གོ་འདི་ཉིད་གོ་ལ་ཧྲིལ་པོའི་ལིས་གློག་རྫས་དང་སྲ་གཟུགས་གློག་རྫས་ཁྱབ་ཁོངས་ཀྱི་ལག་རྩལ་འབྱུང་ཁུངས་ཀྱི་རྒྱལ་ཁབ་གཙོ་བོའི་གྲས་ཤིག་ཏུ་གྱུར་ཡོད། ཀྲུང་གོའི་ནུས་རྒྱུ་གསར་པའི་ཁེ་ལས་ལ་གྲུབ་འབྲས་ཐོབ་དོན་ནི་གཙོ་བོ་ཤེས་ལྡན་པ་གསོ་སྐྱོང་དང་། ཞིབ་འཇུག་གསར་སྤེལ་ལ་མ་འཇོག མ་ལག་འདུས་གྲུབ་ནུས་པ་ཆེར་གཏོང་སོགས་ཐད་འབད་བརྩོན་བྱས་པ་ལས་བྱུང་བ་ཞིག་རེད།
ཀྲུང་གོའི་ལས་ཕྱོད་ཆེ་བའི་ཐོན་སྐྱེད་ནུས་པ་ལས་གནད་འགག་ཆེ་བའི་ལྗང་མདོག་ལག་རྩལ་གྱི་བཀོལ་སྤྱོད་མ་གནས་དམའ་རུ་ཕྱིན་པ་དེས་གོ་ལ་ཧྲིལ་པོ་ནུས་རྒྱུ་གཙང་མའི་ཕྱོགས་སུ་མགྱོགས་མྱུར་ཕྱོགས་སྒྱུར་བྱེད་པར་ཕན་ཐོགས་ཡོད། ཀྲུང་གོའི་ནུས་རྒྱུ་གསར་པའི་ཐོན་རྫས་ལ་རིན་གོང་གི་ལེགས་ཆ་ལྡན་པ་མ་ཟད། ལག་རྩལ་ཡང་བློས་འགེལ་ཆོག་པ་ཞིག་ཡོད་པས་བསྐྱར་སྐྱེས་ཐུབ་པའི་ནུས་རྒྱུ་དེ་གོ་ལ་ཧྲིལ་པོའི་ཁྱབ་ཁོངས་སུ་དེ་བས་ཐོབ་སླ་པོ་ཡོད། དཔེར་ན། ཀྲུང་གོས་ཕྱིར་གཏོང་བྱས་པའི་ཉི་ནུས་གློག་རྫས་ལེབ་མོས་ཉི་ནུས་བཀོལ་སྤྱོད་ལ་སྐུལ་འདེད་གཏོང་བའི་ཐད་མུ་མཐུད་ནུས་པ་གལ་ཆེན་ཐོན་བཞིན་ཡོད། ཀྲེང་ཐའེ་ཚོགས་པ་དང་ཅིང་ཨའོ་ཉི་ནུས་སོགས་ཀྲུང་གོའི་ཁེ་ལས་ཀྱི་ལག་རྩལ་ཡར་ཐོན་བྱུང་བས་གོ་ལ་ཧྲིལ་པོའི་ཁྱབ་ཁོངས་སུ་ཉི་ནུས་སྒྲིག་ཆས་ཀྱི་ཁྱབ་ནུས་རང་བཞིན་ཆེ་རུ་ཕྱིན་ཡོད། ཀྲུང་གོའི་གློག་སྒུལ་རླངས་འཁོར་ཐོན་ལས་མགྱོགས་མྱུར་འཕེལ་རྒྱས་ཕྱིན་པ་དེས་འགྲིམ་འགྲུལ་ཁྱབ་ཁོངས་སུ་འགྱུར་རྡོའི་སྣུམ་བརྟེན་ཤུགས་ཆུང་དུ་འགྲོ་རྒྱུར་ཕན་པ་ཡོད་ལ། ཐཱན་འབུད་ཚད་ཉུང་དུ་གཏོང་བ་དང་གོ་ལ་ཧྲིལ་པོའི་ཁོར་ཡུག་གནད་དོན་ལ་ཁ་གཏད་གཅོག་པར་དགེ་མཚན་ལྡན་པའི་དོན་སྙིང་ལྡན་ཡོད། ཀྲུང་གོའི་གློག་སྒུལ་རླངས་འཁོར་ཐོན་ལས་ལ་གྲུབ་འབྲས་ཐོབ་པ་དེས་ད་དུང་སྐུལ་འདེད་ཀྱི་ནུས་པ་ཐོན་ནས་ས་ཁུལ་དང་གོ་ལ་ཧྲིལ་པོའི་ངོས་ནས་གློག་སྒུལ་རླངས་འཁོར་ཐོན་ལས་འཕེལ་རྒྱས་ལ་སྐུལ་མ་གཏོང་རྒྱུར་ཕན་ཐོགས་ཡོད།
ཀྲུང་གོས་ཕྱིར་གཏོང་བྱས་པའི་ནུས་རྒྱུ་གསར་པའི་ཐོན་རྫས་ཀྱིས་ནུས་རྒྱུ་གཙང་མའི་ཐེག་ནུས་དང་། ཐོབ་ནུས། ལག་རྩལ་གྱི་ཆུ་ཚད་བཅས་མཐོ་རུ་ཕྱིན་ནས་གོ་ལ་ཧྲིལ་པོའི་ལྗང་མདོག་འཕེལ་རྒྱས་ལ་ལེགས་སྐྱེས་གལ་ཆེན་ཕུལ་ཡོད། ཀྲུང་གོའི་ནུས་རྒྱུ་གསར་པའི་ཐོན་ལས་ལ་རྒྱུན་ཆད་མེད་པར་གྲུབ་འབྲས་ཐོབ་པ་ནི་རྒྱལ་སྤྱིའི་སྤྱི་ཚོགས་ཀྱིས་ལག་གདང་སྦྲེལ་ནས་གནམ་གཤིས་འགྱུར་ལྡོག་ལ་ཁ་གཏད་གཅོག་པ་དང་རྒྱུན་མཐུད་ཆོག་པའི་འཕེལ་རྒྱས་ལ་སྐུལ་འདེད་བཏང་བའི་མཐུན་རྐྱེན་གལ་ཆེན་ཞིག་རེད།
(རྩོམ་པ་པོ་ནི་ཨ་རིའི་ཀྲུང་ཨ་ཞིབ་འཇུག་ལྟེ་གནས་ཀྱི་ཆེད་མངགས་གདན་ཞུས་ཞིབ་འཇུག་པ་ཡིན)