འདི་ནི་ཟླ་5ཚེས་25ཉིན། ཀྲུང་ཡོའི་དུས་གཏན་མེ་འཁོར་གཏོང་ཐེངས་X8157(ཤིས་ཨན་ནས་མ་ལ་ཧྲེ་ཝེ་ཆི་བར)ཤིས་ཨན་རྒྱལ་སྤྱིའི་གྲུ་ཁའི་བབས་ཚུགས་ནས་ཐོན་ཞིང་ད་བར་ཀྲུང་ཡོའི་དུས་གཏན་མེ་འཁོར་རིམ་རྩིས་བྱས་ན་ཁྲི་9ལྷག་ཙམ་བཏང་ཡོད་པ་རེད།

འདི་ནི་ཤིས་ཨན་རྒྱལ་སྤྱིའི་གྲུ་ཁའི་བབས་ཚུགས་ཀྱི་འབྲེལ་མཐུད་མཁན་གྱིས་མེ་འཁོར་གྱི་རླུང་འགྲོའི་སྦུ་གུ་མཐུད་རྒྱག་བཞིན་པ།

འདི་ནི་ཤིས་ཨན་རྒྱལ་སྤྱིའི་གྲུ་ཁའི་བབས་ཚུགས་ཀྱི་མེ་འཁོར་གྱི་ཁ་ལོ་བས་མེ་འཁོར་བཀོད་གཏོང་བྱེད་བཞིན་པ།

འདི་ནི་ཧོར་གོ་སི་མེ་འཁོར་བབས་ཚུགས་ཀྱི་ཉེ་འགྲམ་དུ་ལས་དོན་པས་ལྕགས་ལམ་གྱི་གློག་ཤུགས་མ་ལག་ལ་ཞིབ་བཤེར་ཉམས་བཟོ་བྱེད་བཞིན་པ།

འདི་ནི་ཝུའུ་ལུའུ་མུའུ་ཆི་རྒྱལ་སྤྱིའི་སྐམ་སའི་གྲུ་ཁར་ལྕགས་ལམ་ཟོག་འདྲེན་ལས་སྒྲུབ་མི་སྣས་རྒྱལ་སྤྱིའི་མུ་འབྲེལ་སྐྱེལ་འདྲེན་གྱི་སྐྱེལ་ཐོ་བཤེར་བཞིན་པ།

འདི་ནི་ཤིས་ཨན་གྲོང་ཁྱེར་ཤིན་ཀྲུའུ་ཟོག་འགྲེམས་རྟེན་གཞིར་ལས་དོན་མི་སྣས་ཀྲུང་ཡོའི་དུས་གཏན་མེ་འཁོར་བརྒྱུད་ཕྱི་རྒྱལ་དུ་འཚོང་རྒྱུའི་རྒྱལ་ཐོན་རླངས་འཁོར་གྱི་ཆ་འཕྲིན་བཤེར་བཞིན་པ།

འདི་ནི་ཝུའུ་ལུའུ་མུའུ་ཆི་རྒྱལ་སྤྱིའི་སྐམ་སའི་གྲུ་ཁར་ལྗིད་འདེགས་འཕྲུལ་འཁོར་གྱིས་དོས་སྒམ་བླུག་བཞིན་པ།

ལོ་བཅུ་ལྷག་ཙམ་རིང་། ཀྲུང་ཡོའི་དུས་གཏན་མེ་འཁོར་གྱི་ཞབས་ཞུའི་ཁྱབ་ཁོངས་རྒྱུན་ཆད་མེད་པར་ཆེ་རུ་ཕྱིན་པ་དང་མེ་འཁོར་གཏོང་གྲངས་ཀྱང་ཇེ་མང་དུ་སོང་སྟེ་རིམ་རྩིས་བྱས་ན་ཁྲི་9ལྷག་ཙམ་ཟིན་ཡོད།

ཉེ་ཆར་འདི་ག་ཚགས་པར་གྱི་གསར་འགོད་པས་ཧྲའན་ཤིས་ཤིས་ཨན་དང་ཤིན་ཅང་ཝུའུ་ལུའུ་མུའུ་ཆི་དང་ཧོར་གོ་སི་སོགས་སུ“ངར་ལྕགས་རྔ་མོང་རུ་ཁག”དེའི་རྒྱབ་ཕྱོགས་ཀྱི་སྒེར་སེམས་མེད་པར་ལེགས་སྐྱེས་འབུལ་མཁན་ངལ་རྩོལ་པ་མང་པོ་ཞིག་མཐོང་བྱུང་།

མེ་འཁོར་བབས་ཚུགས་ཀྱི་ལས་སྒྲུབ་ཁང་དུ་མེ་འཁོར་ཞིབ་བཤེར་མཁན་གྱིས་ལག་ཏུ་ཐོ་བ་བཟུང་ནས་འཁོར་སྒྲོམ་གྱི་འགག་རྩའི་ལྷུ་ཚིགས་ཚང་མར་རྡུང་བཞིན་ཞིབ་བཤེར་བྱེད་ཀྱི་ཡོད། གྲང་ངར་ཆེ་བའི་གནམ་གཤིས་སམ་ཡང་ན་ཚ་གདུག་ཆེ་བའི་གནམ་གཤིས་གང་ཞིག་བསྟན་རུང་ཁོང་ཚོས་མེ་འཁོར་འོག་དང་འཁོར་སྒྲོམ་སོགས་ཕྱོགས་ཚང་མར་ལྷོད་གཡེང་སྤུ་ཙམ་མི་གཏོང་བར་ཞིབ་བཤེར་ཚགས་ཚུད་པོ་བྱས་ནས་མེ་འཁོར་ཚང་མ་བདེ་འཇགས་ངང་ཤར་གཏོང་ཐུབ་པའི་འགན་ལེན་བྱེད་བཞིན་ཡོད།

རྒྱལ་སྤྱིའི་སྐམ་སའི་གྲུ་ཁའི་བབས་ཚུགས་སུ་དོམ་སྒམ་འདོན་འཇུག་འཕྲུལ་འཁོར་གྱི་ཁ་ལོ་བས་མཐོ་ཚད་སྨི་20ཡོད་པའི་བཀོལ་སྤྱོད་ཁང་དུ་ལྗིད་འདེགས་འཕྲུལ་འཁོར་བཏང་ནས་ཕྱོགས་བཞི་མཚམས་བརྒྱད་ནས་དབོར་ཡོང་བའི་དོས་སྒམ་རེ་རེ་གྲལ་སྟར་སྒྲིག་པོས་འབེབས་བཞིན་ཡོད། དངོས་ཟོག་འཐེན་པ་དང་དཔྱང་བ་སོགས་བརྒྱུད་རིམ་ཚང་མ་ཧ་ཅང་བྱང་ཆུབ་པོ་ཡོད་པ་རེད།

རྒྱལ་སྤྱིའི་སྐམ་སའི་གྲུ་ཁའི་ཕྱོགས་བསྡུས་ཞབས་ཞུའི་ཚོམས་ཆེན་དུ་ལྕགས་ལམ་ཟོག་འདྲེན་ལས་སྒྲུབ་མཁན་གྱི་མདུན་དུ་ཞིབ་བཤེར་རྩིས་ལེན་བྱ་རྒྱུར་སྒུག་ནས་བསྡད་པའི་སྤ་སེ་མང་པོ་ཞིག་བཞག་ཡོད། ཟོག་འདྲེན་ཁེ་ལས་མགྱོགས་མྱུར་འགག་སྒོ་ལས་སྒྲོལ་ཆེད་ཞབས་ཞུའི་ཚོམས་ཆེན་གྱིས་ཆུ་ཚོད་24ཡི་རིང་ལས་རེས་བྱེད་ཀྱི་ཡོད། གྲངས་འཛིན་འགག་སྒོ་འཛུགས་སྐྲུན་རིམ་སྤོར་བྱས་པ་དང་སྦྲགས། ཀྲུང་ཡོའི་དུས་གཏན་མེ་འཁོར་གྱི་སྤ་སེའི་ཆ་འཕྲིན་ཞིབ་དཔྱད་ཀྱི་མྱུར་ཚད་ཀྱང་རྒྱུན་ཆད་མེད་པར་མགྱོགས་སུ་ཕྱིན་ནས་སྐར་མ་20ཙམ་ནང་མེ་འཁོར་ཆ་ཚང་གཅིག་གི་སྐྱེལ་ཐོར་ཞིབ་དཔྱད་ཐུབ་ཀྱི་ཡོད་པ་རེད།

ལྕགས་ལམ་བརྒྱུད་དངོས་ཟོག་ཕྱིར་གཏོང་ནང་འདྲེན་གྱི་ཞིབ་བཤེར་ཁང་དུ་འགག་སྒོ་ལས་ཁུངས་ཀྱི་ལས་མིས་དངོས་ཟོག་གི་སྤ་སེ་དང་ཁྲིམས་སྒྱུར་ཟིན་འགོད་ཡོ་ཆས་འཁྱེར་ནས་ངང་རྒྱུད་རིང་པོས་ཁེ་ལས་ཀྱི་ལས་མི་དང་འབྲེལ་མཐུད་བྱེད་ཀྱི་ཡོད། དོས་སྒམ་ཁ་ཕྱེ་བ་དང་། ཞིབ་བཤེར་བྱེད་པ། པར་རྒྱག་པ། ཆ་འཕྲིན་ཞིབ་བསྡུར་བྱེད་པ་སོགས་འགག་སྒོའི་ཞིབ་བཤེར་བརྒྱུད་རིམ་ཚང་མ་ནན་ལ་ནུས་པ་ཆེ་བས་ཀྲུང་ཡོའི་དུས་གཏན་མེ་འཁོར་བདེ་བླག་ངང་འཁོར་སྐྱོད་ཐུབ་པར་གཡས་གཞོགས་གཡོན་འདེགས་བྱས་ཡོད་པ་རེད།

ཀྲུང་ཡོའི་དུས་གཏན་མེ་འཁོར་ཤར་གཏོང་ཐུབ་པ་དེ་ས་གནས་ཁག་གི་གཞོགས་འདེགས་བྱས་པ་དང་ཁ་འབྲལ་ཐབས་མེད། ལྕགས་ལམ་དང་། འགག་སྒོ མཐའ་མཚམས་ཞིབ་བཤེར། མེ་ཟོན། ཟོག་འདྲེན་ཁེ་ལས་སོགས་ཀྱི་ངལ་རྩོལ་པ་ཁྲི་སྟོང་མང་པོས་ཀྲུང་ཡོའི་དུས་གཏན་མེ་འཁོར་ལ་དཀའ་སྤྱད་ལས་སྒྲུབ་བྱས་ནས“རྒྱུད་གཅིག་ལམ་གཅིག”མཉམ་སྐྲུན་ལ་རང་ཉིད་ཀྱི་སྟོབས་ཤུགས་ལེགས་སྐྱེས་སུ་ཕུལ་ཡོད་པ་རེད།