སྒེར་རྩེ་རྫོང་གི་རྒན་རྒོན་ཉིན་མོའི་ལྟ་སྐྱོང་ལྟེ་གནས་སུ་གསར་འགོད་པར་རྒན་རྒོན་ཚོའི་སྐྱིད་པའི་དགོད་སྒྲ་ཐོས་བྱུང་། ཐོག་སོ་དང་པོའི་རྒྱ་ཆེ་ཞིང་གཙང་སྦྲ་དོད་པའི་ཚོམས་ཆེན་དུ་རྒན་རྒོན་མང་པོ་ཞིག་ཇ་འཐུང་ཞོར་ཅི་འཕྲོས་མོལ་འཕྲོས་བྱེད་བཞིན་འདུག ཐོག་སོ་གཉིས་པའི་བྱེད་སྒོ་ཁང་དུ་རྒན་རྒོན་གསུམ་བཞི་བྱས་ནས་ཤོ་རྒྱག་བཞིན་ཡོད་པ་ལས་སྤྲོ་སྣང་ལྡན་པའི་རྣམ་པ་ཞིག་མངོན་བཞིན་མཆིས།

2023ལོའི་ཟླ་6པར། སྒེར་རྩེ་རྫོང་གི་རྒན་རྒོན་ཉིན་མོའི་ལྟ་སྐྱོང་ལྟེ་གནས་སྤྱོད་འགོ་ཚུགས་ཤིང་། དེ་གར་ཐབ་ཚང་དང་། རོལ་རྩེད་ཁང་། ངལ་གསོ་ཁང་། ལུས་སྦྱོང་ཁང་། གོས་འཁྲུད་ཁང་སོགས་བཙུགས་ནས་སྒེར་རྩེ་རྫོང་གི་ལོ་60ཡན་གྱི་རྒན་རྒོན་ལ་ལྟོ་ཆས་དང་། སྨན། གཙང་སྦྲ་སོགས་ཀྱི་ཞབས་འདེགས་ཞུ་བཞིན་ཡོད་པ་རེད།

“བུ་ཕྲུག་ཁྱིམ་དུ་བསྡད་མེད་པས། ཉིན་ལྟར་ཞོགས་པ་ང་འདི་གར་ཡོང་ནས་ཉི་མ་བསྲོ་ཞོར་རྒན་རྒོན་གཞན་དག་དང་མཉམ་དུ་ཅི་འཕྲོས་མོལ་འཕྲོས་བྱས་ནས་སྡོད་ཀྱི་ཡོད། ཉིན་གུང་གི་ལྟོ་ཆས་སྣ་ཁ་མང་བའི་ཁར་བྲོ་བ་ཞིམ་པོ་འདུག ལྟོ་ཆས་ཟས་ཚར་རྗེས་ང་འདི་གར་ངལ་གསོ་རྒྱག་གི་ཡོད། ཉིན་ལྟར་གྱི་འཚོ་བ་ཧ་ཅང་ཕུན་སུམ་ཚོགས་པོ་འདུག”ཅེས་རྒན་རྒོན་ཉིན་མོའི་ལྟ་སྐྱོང་ལྟེ་གནས་ཀྱི་སྐོར་གླེང་སྐབས་རྒན་མོ་དགའ་སྐྱིད་ཀྱིས་བསྔགས་བརྗོད་ཆེན་པོ་བྱས།

སྒེར་རྩེ་རྫོང་རྒན་རྒོན་ཉིན་མོའི་ལྟ་སྐྱོང་ལྟེ་གནས་ཀྱི་མཐོང་ཐོས་ནི་མངའ་རིས་ས་ཁུལ་གྱི་རྒན་གསོ་ཞབས་ཞུའི་མ་ལག་རྒྱ་སྐྱེད་དང་འཐུས་སྒོ་ཚང་དུ་བཏང་བའི་མཚོན་ཚུལ་ཙམ་རེད། ཉེ་བའི་ལོ་ཤས་རིང་། མངའ་རིས་ས་ཁུལ་གྱིས་གྲོང་ཁྱེར་དང་གྲོང་གསེབ་ཀྱི་རྒན་གསོ་ཞབས་ཞུའི་མ་ལག་འཛུགས་སྐྱོང་ལ་སྐུལ་འདེད་ཧུར་ཐག་བཏང་ནས་རྒན་གསོ་ཞབས་ཞུའི་རྨང་གཞིའི་སྒྲིག་བཀོད་རྒྱུན་ཆད་མེད་པར་འཐུས་སྒོ་ཚང་དུ་བཏང་བ་དང་། རྒན་གསོ་ཞབས་ཞུའི་ནུས་པ་དང་ཆུ་ཚད་རིམ་བཞིན་མཐོ་རུ་བཏང་བས། རྒན་རྒོན་ཚོགས་སྤྱིའི་སྣ་མང་ཅན་དང་རིམ་པ་མང་བའི་རྒན་གསོ་ཞབས་ཞུའི་དགོས་མཁོ་གང་ལེགས་བསྐངས་ཡོད་པ་རེད།

མངའ་རིས་ས་ཁུལ་དམངས་སྲིད་ཅུས་ཀྱི་ཅུས་ཀྲང་ཕུན་ཚོགས་ཚེ་རིང་གིས། མིག་སྔར་མངའ་རིས་ས་ཁུལ་དུ་བསྙེན་བཀུར་ཞབས་ཞུའི་སྒྲིག་གཞི་7དང་ཉིན་མོའི་ལྟ་སྐྱོང་ལྟེ་གནས་6གཉེར་སྐྱོང་བྱེད་འགོ་ཚུགས་ཡོད། ཉིན་མོའི་ལྟ་སྐྱོང་ལྟེ་གནས་ཀྱིས་སྤྱི་ཚོགས་ཡོངས་ལ་ཕྱོགས་ནས་དགོས་མཁོ་ཡོད་པའི་རྒན་རྒོན་ལ་ལྟོ་ཆས་དང་། སྨན། གཙང་སྦྲ་བཅས་ཀྱི་རོགས་རམ་གཙོ་བོར་བྱས་ཏེ་ཉིན་མོའི་ཚབ་གཉེར་ཞབས་ཞུ་དང་ཁྱིམ་སྡོད་རྒན་གསོའི་ཞབས་འདེགས་ཞུ་བཞིན་ཡོད་པ་རེད། རྒན་གསོ་ཞབས་ཞུ་རིགས་གཉིས་ཀྱི་སྒྲིག་གཞིར་ཉལ་ཁྲི་706ལྷག་ཙམ་ཟིན་པ་དང་རྒན་རྒོན་སྟོང་རེར་རྒན་གསོ་སྒྲིག་གཞིའི་ཉལ་ཁྲི་88ཡོད་པས། མི་འབོར་ན་རྒས་ཅན་ལ་དམིགས་པའི་འཆར་འགོད་ཀྱི་དམིགས་ཚད་སྤྱིར་ན་སྐོང་ཐུབ་ཀྱི་ཡོད་ཅེས་ངོ་སྤྲོད་བྱས།  

“ལོ་ལྔ་ཚན་བཅུ་བཞི་པའི”རིང་། མངའ་རིས་ས་ཁུལ་གྱིས་མ་དངུལ་སྒོར་ཁྲི་6500དཀའ་ངལ་ཧ་ཅང་ཆེ་བའི་བསྙེན་བཀུར་སྒྲིག་གཞིས་ས་ཁོངས་ཀྱི་གསོ་རླུང་མཁོ་འདོན་དང་། རིག་ལྡན་མེ་ཟོན། རིག་ལྡན་ཞབས་ཞུ་སོགས་གནས་འཕྲོད་བྱེད་ནུས་ལེགས་གཏོང་ཐད་སྤྱོད་རྒྱུ་འཆར་འགོད་བྱས་ཤིང་། མིག་སྔར་མ་དངུལ་སྒོར་ཁྲི་3400བཏང་བ་རེད། དུས་མཚུངས་སུ་ཞིང་འབྲོག་ཁུལ་གྱི་རྒན་རྒོན་ལ་ཐག་ཉེ་སར་རྒན་གསོ་ཞབས་ཞུ་ལོངས་སུ་སྤྱོད་ཐུབ་ཆེད། “ལོ་ལྔ་ཚན་བཅུ་བཞི་པའི”རིང་མངའ་རིས་ས་ཁུལ་གྱིས་མ་དངུལ་སྒོར་ཁྲི་8100བཏང་ནས་གྲོང་གསེབ་ཀྱི་བདེ་སྐྱིད་ཁང་23བསྐྲུན་རྩིས་ཡོད་ཅིང་། ད་ཆ་གྲོང་གསེབ་ཀྱི་བདེ་སྐྱིད་ཁང་16བསྐྲུན་ཟིན་པ་དང་ལྷག་མ་7འཆར་གཞི་ལྟར་སྐྲུན་བཞིན་ཡོད་པ་རེད།

སྔར་བས་དེང་རབས་ཅན་དང་སྤུས་ཚད་མཐོ་བའི་རྒན་གསོའི་ཞབས་ཞུ་མཁོ་འདོན་བྱ་ཆེད། མངའ་རིས་ས་ཁུལ་དམངས་སྲིད་ཅུས་དང་ཆེད་ལས་སྒྲིག་གཞི་དབར་གསོ་སྦྱོང་གྲོས་མཐུན་བཞག་ནས་ས་ཁུལ་་ཡོངས་ཀྱི་ད་ཡོད་རྒན་གསོ་ཞབས་ཞུའི་མི་སྣར་ལས་སྒོའི་གསོ་སྦྱོང་བྱས་ནས་རྒན་གསོ་ཞབས་ཞུའི་ཤེས་ལྡན་པའི་ཆེད་ལས་རྩལ་ནུས་ཀྱི་ཆུ་ཚད་རྒྱུན་ཆད་མེད་པར་མཐོ་རུ་བཏང་ཡོད། དེ་དང་ཆབས་ཅིག དཀའ་ངལ་ཆེ་བའི་བསྙེན་བཀུར་སྒྲིག་གཞིའི་ཞབས་ཞུ་བྱ་ཡུལ་བརྟན་པོའི་ངང་རྒྱ་ཆེར་བཏང་ཞིང་། མངའ་རིས་ས་ཁུལ་དུ་ད་ལྟ་དཔལ་འབྱོར་དཀའ་ངལ་ཡོད་པའི་ལོ་ན་མཐོ་བའི་རྒན་རྒོན་དང་ངལ་རྩོལ་ནུས་ཤུགས་མེད་པའི་རྒན་རྒོན་499ཡོད་པ་དང་འདོད་མོས་ཡོད་མཁན་རྣམས་རིམ་བཞིན་སྒྲིག་གཞིའི་འགན་ལེན་ཁྱབ་ཁོངས་སུ་འཇུག་གི་ཡོད་ཅིང་། དཀའ་ངལ་ཆེ་བའི་མི་སྣའི་འགན་ལེན་ཁྱབ་ཁོངས་ཀྱི་མི་གྲངས་406ཟིན་པ་དང་དེའི་ནང་ནས་མི་260སྒྲིག་གཞིར་གཅིག་སྡུད་བསྙེན་བཀུར་བྱེད་ཀྱི་ཡོད་ལ་གཅིག་སྡུད་བསྙེན་བཀུར་བྱེད་འདོད་ཡོད་མཁན་གཅིག་སྡུད་བྱེད་ཚད་100%ཟིན་ཡོད་པ་རེད།