བོད་དུ་མིས་བཟོས་ནགས་ཚལ་གྱི་ཐཱན་འདུས་ཚད་ལྟ་ཞིབ་ཚད་ལེན་གྱི་དཔེ་སྟོན་རྟེན་གཞི་ཐོག་མ་དེ་བསྐྲུན་པ།
གསར་འགོད་པར་བོད་རང་སྐྱོང་ལྗོངས་ཚན་རིག་ལག་རྩལ་ཐིང་ནས་ཤེས་རྟོགས་བྱུང་བར། ཉེ་དུས་བོད་རང་སྐྱོང་ལྗོངས་ཚན་རིག་ལག་རྩལ་ཐིང་གི་ཆེད་དོན་རྣམ་གྲངས་གལ་ཆེན་གྱི་རྒྱབ་སྐྱོར་འོག་ལྷོ་ཁ་རྩེད་ཐང་གི་འགོག་སྲུང་ནགས་ཚལ་གྱི་མིས་བཟོས་ནགས་ཚལ་གྱི་ཐཱན་འདུས་ཚད་ལྟ་ཞིབ་ཚད་ལེན་ས་ཚིགས་བདེ་བླག་ངང་སྤྱོད་ཐུབ་ནས། བོད་ཀྱི་མིས་བཟོས་ནགས་ཚལ་གྱི་ཐཱན་འདུས་ཚད་ལྟ་ཞིབ་ཚད་ལེན་གྱི་དཔེ་སྟོན་རྟེན་གཞི་ཐོག་མར་གྱུར་པ་རེད།
ལྷོ་ཁ་རྩེད་ཐང་གི་འགོག་སྲུང་ནགས་ཚལ་དེ་དུས་རབས་ཉི་ཤུ་པའི་ལོ་རབས་དགུ་བཅུ་པར་སྐྲུན་འགོ་ཚུགས་པ་དང་ཡར་ཀླུང་གཙང་པོའི་དཀྱིལ་རྒྱུད་ཀྱི་ངོགས་གཉིས་སུ་ཆགས་ཡོད། པེ་ཅིང་གི་སྦྱར་པ་དང་། སྦྱར་སྔོན། རྒྱ་ལྕང་སོགས་ཀྱི་ཤིང་སྣ་བྱེ་མའི་ཁྲོད་རྩ་བ་ཚུགས་ནས་ཡལ་འདབ་རྒྱས་ཏེ་ཡར་ཀླུང་གཙང་པོའི་དཀྱིལ་རྒྱུད་ཀྱི་མཛེས་ལྗོངས་ཤིག་ཏུ་གྱུར་པ་ནི། ས་གནས་མི་སེར་གྱིས་བྱེ་རླུང་འགོག་པའི“སྐྱེ་ཁམས་སྲུང་བཅད”ཅིག་རེད།
སྤྱི་ལེ་བརྒྱ་ལྷག་ཙམ་གྱི་མིས་བཟོས་ནགས་ཚལ་ཁྲོད་ཀྲུང་གོ་ཚན་རིག་ཁང་ཁྲེང་ཏུའུ་རི་ཁུལ་གནོད་འཚེ་དང་ཁོར་ཡུག་ཞིབ་འཇུག་ཁང་གི་ཚན་ཞིབ་པས་ཚན་ཞིབ་བྱས་མཐར་ལྷོ་ཁ་གྲོང་ཁྱེར་སྣེ་གདོང་ཆུས་རྩེད་ཐང་ཁྲོམ་གཞུང་གི་འགོག་སྲུང་ནགས་ཚལ་ཞིག་བདམས་ཏེ་ཡུན་རིང་ལྟ་ཞིབ་ཚད་ལེན་བྱས་ཤིང་། ཚན་ཞིབ་ཚོགས་པས་རྒྱལ་སྤྱིའི་སྔོན་ཐོན་གྱི་གུར་ཚད་ཀྱི་འབྲེལ་ཡོད་ལག་རྩལ་སྤྱད་དེ་སྐར་ཆ་རེར་ཐེངས་གྲངས་10ཡི་ཐོག་ནས་མཐའ་འཁོར་སྤྱི་ལེ་གཉིས་ཙམ་གྱི་མིས་བཟོས་ནགས་ཚལ་ལ་གཏན་འཁེལ་ཚད་ལེན་གྱིས་རྩ་གསུམ་གྱི་རླུང་ཤུགས་དང་རླུང་ཁམས་ཆེན་པོའི་དབྱང་གཉིས་ཐཱན་འགྱུར་གྱི་གར་ཚད་གཏན་འཁེལ་བྱེད་པ་མ་ཟད། སྐབས་བསྟུན་མིས་བཟོས་ནགས་ཚལ་གྱི་ཐཱན་འདུས་ཚད་བཀོད་པ་དང་ས་འོག་བཅད་ངོས་ཀྱི་དབྱང་གཉིས་ཐཱན་འགྱུར་གྱི་གར་ཚད་ལ་ལྟ་ཞིབ་ཚད་ལེན་ཡང་བྱས་པ་རེད།
ངོ་སྤྲོད་བྱས་པར་གཞིགས་ན། ལྷོ་ཁ་རྩེད་ཐང་གི་མིས་བཟོས་ནགས་ཚལ་གྱི་ཐཱན་འདུས་ཚད་ལྟ་ཞིབ་ཚད་ལེན་ས་ཚིགས་ཀྱིས་གཙོས་པའི“བོད་ཀྱི་ཐཱན་འདུས་ཚད་ལྟ་ཞིབ་ཚད་ལེན་དྲ་བ”ཡུན་རིང་འཁོར་སྐྱོད་བྱེད་རིང་། ཀྲུང་གོ་ཚན་རིག་ཁང་ཁྲེང་ཏུའུ་རི་ཁུལ་གནོད་འཚེ་དང་ཁོར་ཡུག་སྲུང་སྐྱོང་ཞིབ་འཇུག་ཁང་གི་ཚན་ཞིབ་ཚོགས་པས་ཀྱང་ཐཱན་འདུས་ཚད་གཏན་འཁེལ་ཚད་ལེན་དང་རིམ་སྤོར་བྱེད་པར་དམིགས་ནས་ལས་དོན་སྤེལ་ཏེ། བོད་ཀྱི་སྐྱེ་ཁམས་མ་ལག་གི་ཐཱན་འདུས་ཚད་གནད་འཁེལ་ཚད་འབེབས་དང་ལེགས་གཏོང་ལ་མུ་མཐུད་ཞབས་འདེགས་ཞུ་རྒྱུ་རེད། མིག་སྔར་ཚན་ཞིབ་ཚོགས་པའི་རུ་ཁག་གིས་མིས་བཟོས་ནགས་ཚལ་གྱི་ཤིང་ཕོ་མོའི་སྦྱར་ཀའི་བསྡུར་ཚད་དང་རྩྭ་ར་བསྐྱར་གསོའི་ཡུལ་དུས་ལེགས་གཏོང་སོགས་ལ་དམིགས་ཏེ། ཞིབ་འཇུག་ཆ་ལག་ཚང་བར་བྱས་ནས་ནགས་ཚལ་དང་རྩྭ་ཐང་གི་ཐཱན་འདུས་ཚད་མཐོར་གཏོང་ཇུས་གཞི་ཞིབ་འཇུག་བྱས་ནས་བཟོ་རྒྱུ་ཡིན་པ་རེད།