བོད་རང་སྐྱོང་ལྗོངས་ཀྱིས་ནེ་པ་ལར་རོགས་སྐྱོར་བྱས་པའི་ཡོམ་འགོག་གེགས་སེལ་དངོས་ཟོག་རྩིས་སྤྲོད་རྩིས་ལེན་གྱི་མཛད་སྒོ་ལྷ་སར་འཚོགས་པ།
ཁྲེན་ཡུང་ཆི་དང་ནཱ་ཝ་ལ་ཅེ·ཏ་ཁར་ཚོགས་འདུར་ཞུགས་ནས་ཤིས་ཚིག་བསྒྲོན་པ།
ཟླ་6ཚེས་13ཉིན། བོད་རང་སྐྱོང་ལྗོངས་མི་དམངས་སྲིད་གཞུང་གིས་ནེ་པ་ལའི་སྲིད་གཞུང་ལ་རོགས་སྐྱོར་བྱས་པའི་ཡོམ་འགོག་གེགས་སེལ་དངོས་ཟོག་རྩིས་སྤྲོད་རྩིས་ལེན་གྱི་མཛད་སྒོ་ལྷ་སར་བཅའ་སྡོད་ནེ་པ་ལའི་སྤྱི་ཁྱབ་ཁེ་སྐྱོང་ལས་ཤག་ཏུ་འཚོགས་པ་རེད། རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་གཞོན་པ་དང་རང་སྐྱོང་ལྗོངས་ཀྱི་རྒྱུན་ལས་ཀྲུའུ་ཞི་གཞོན་པ་ཁྲེན་ཡུང་ཆི་དང་ལྷ་སར་བཅའ་སྡོད་ནེ་པ་ལའི་སྤྱི་ཁྱབ་ཁེ་སྐྱོང་བ་ནཱ་ཝ་ལ་ཅེ·ཏ་ཁར་རྩིས་སྤྲོད་རྩིས་ལེན་མཛད་སྒོར་མཉམ་དུ་ཞུགས་པ་རེད།
ཁྲེན་ཡུང་ཆིས་རང་སྐྱོང་ལྗོངས་ཏང་ཨུད་དང་སྲིད་གཞུང་དང་། ཧྲུའུ་ཅི་ཝང་ཅུན་ཀྲེང་། ཀྲུའུ་ཞི་ཡན་ཅིན་ཧའེ་བཅས་ཀྱི་ཚབ་ཞུས་ཏེ་རྩིས་སྤྲོད་རྩིས་ལེན་མཛད་སྒོ་འཚོགས་པར་རྟེན་འབྲེལ་ཞུས་པ་རེད། ཁོང་གིས་ཉེ་བའི་ལོ་ཤས་རིང་བོད་རང་སྐྱོང་ལྗོངས་དང་ནེ་པ་ལའི་འགྲོ་འོང་སྤེལ་རེས་དང་དཔལ་འབྱོར་ཚོང་དོན་མཉམ་ལས་ཉིན་རེ་བཞིན་ཟབ་ཏུ་ཕྱིན་ནས་ཙུང་ལི་ཕུའུ་ལཱ་ཁྲང་ཏ་དང་ཙུང་ལི་གཞོན་པ་དང་ཕྱི་འབྲེལ་པུའུ་ཀྲང་གཅིག་ལྕོགས་ཡིན་པའི་ཧྲི་ལེ་སི་ཐཱ་སོ་སོས་བོད་དུ་འཚམས་འདྲིར་ཕེབས་པ་དང་ཧྲུའུ་ཅི་ཝང་ཅུན་ཀྲེང་གིས་ནེ་པ་ལར་བདེ་བླག་ངང་འཚམས་འདྲི་གནང་བས། ཕྱོགས་གཉིས་པོའི་དམིགས་བསལ་མཛའ་གྲོགས་འབྲེལ་བ་ལོ་རྒྱུས་ཀྱི་འགོ་འཛུགས་ས་གསར་པར་སླེབས་པ་དང་འཕེལ་རྒྱས་ཀྱི་གོ་སྐབས་གསར་པ་བསུ་རྒྱུར་སྐུལ་མ་ཐེབས་ཡོད། ད་ཐེངས་ཡོམ་འགོག་གེགས་སེལ་གྱི་དངོས་ཟོག་ཞལ་འདེབས་ཕུལ་བ་ནི་ཧྲུའུ་ཅི་ཝང་ཅུན་ཀྲེང་གིས་ནེ་པ་ལར་འཚམས་འདྲི་གནང་བའི་གྲུབ་འབྲས་དོན་འཁྱོལ་བྱེད་པའི་ཞིབ་ཕྲའི་བྱེད་ཐབས་ཤིག་ཡིན་པས། ཀྲུང་གོའི་བོད་ལྗོངས་ནས་བསྐུར་བའི་དངོས་ཟོག་དེ་དག་གིས་ནེ་པ་ལའི་གྲོགས་པོ་རྣམས་དཀའ་ངལ་ལས་སྒྲོལ་ཆེད་ནུས་ཤུགས་ཕྲན་བུ་འདོན་ཐུབ་པའི་རེ་བ་ཡོད། གོམ་སྟབས་རྗེས་མར་བོད་རང་སྐྱོང་ལྗོངས་ཀྱིས་སྔར་རྒྱུན་བཞིན་ནེ་པ་ལའི་དཔལ་འབྱོར་འཕེལ་རྒྱས་དང་དམངས་འཚོ་འཕེལ་རྒྱས་ལ་རྒྱབ་སྐྱོར་བྱ་རྒྱུ་དང་ནེ་པ་ལའི་ཕྱོགས་དང་མཉམ་དུ་རྒྱལ་ཁབ་གཉིས་པོའི་འགོ་ཁྲིད་པའི་ཐུན་མོང་གི་ངོས་འཛིན་གལ་ཆེན་དོན་འཁྱོལ་ཡག་པོ་བྱས་ཏེ་ཀྲུང་ནེའི་ཁྱབ་ཁོངས་ཁག་གི་གཉིས་ཕན་མཉམ་ལས་ལ་མགྱོགས་མྱུར་སྐུལ་འདེད་བཏང་ནས། ཀྲུང་ནེའི་ལས་དབང་གཅིག་མཐུན་ཚོགས་པ་སྔར་བས་ཟབ་ཏུ་བཏང་སྟེ་ཀྲུང་ནེས་འཕེལ་རྒྱས་དང་དར་རྒྱས་ལ་ཕྱོགས་པའི་མི་རབས་ནས་མི་རབས་བར་གྱི་མཛའ་གྲོགས་ཀྱི་འཐབ་ཇུས་མཉམ་ལས་རོགས་ཟླའི་འབྲེལ་བ་ཆུ་ཚད་གསར་པ་དེ་བས་མཐོ་བའི་ཕྱོགས་སུ་སླེབས་པར་སྐུལ་འདེད་གཏོང་འདོད་ཡོད་ཅེས་གསུངས་པ་རེད།
ནཱ་ཝ་ལ་ཅེ·ཏ་ཁར་གྱིས་ནེ་པ་ལའི་སྲིད་གཞུང་གི་ཚབ་ཞུས་ནས་བོད་རང་སྐྱོང་ལྗོངས་མི་དམངས་སྲིད་གཞུང་གིས་དུས་ཡུན་རིང་པོའི་ནང་ནེ་པ་ལའི་དཔལ་འབྱོར་དང་སྤྱི་ཚོགས་འཕེལ་རྒྱས་དང་རང་བྱུང་གནོད་འཚེ་འགོག་པ་སོགས་ཐད་རྒྱབ་སྐྱོར་དང་རོགས་རམ་གནང་བར་སྙིང་དབུས་ནས་ཐུགས་རྗེ་ཆེ་ཞུས་ཤིང་། ཁོང་གིས་ད་ཐེངས་བོད་རང་སྐྱོང་ལྗོངས་མི་དམངས་སྲིད་གཞུང་གིས་འབྲེལ་ཡོད་དངོས་ཟོག་ཞལ་འདེབས་བརྒྱབ་པ་དེ་ནི་མིག་སྔའི་ཀྲུང་ནེའི་མཛའ་གྲོགས་འབྲེལ་བའི་གསོན་ཉམས་དོད་པའི་མཚོན་ཚུལ་ཞིག་རེད་ཅེས་གསུངས་པ་དང་། ཁོང་གིས་ནེ་པ་ལ་ཕྱོགས་ཀྱིས་ཀྲུང་གོ་གཅིག་གི་སྲིད་ཇུས་བློ་བརྟན་འགྱུར་མེད་ངང་ལག་བསྟར་བྱ་རྒྱུ་དང་ཕྱོགས་གཏོགས་གང་རུང་ཞིག་གིས་ཀྱང་ནེ་པ་ལའི་མངའ་ཁོངས་སྤྱད་དེ་ཀྲུང་གོར་ངོ་རྒོལ་བྱེད་པའི་ཁ་ཕྲལ་གྱི་བྱེད་སྤྱོད་གཏན་ནས་སྤེལ་དུ་འཇུག་གི་མིན་པའི་བསྐྱར་བསྒྲགས་གནང་བ་རེད། ནེ་པ་ལ་ཕྱོགས་ཀྱིས་ཀྲུང་གོ་ཕྱོགས་དང་མཉམ་དུ་འབད་བརྩོན་བྱས་ཏེ་རྒྱལ་ཁབ་གཉིས་པོའི་སྲོལ་རྒྱུན་མཛའ་གྲོགས་ཟབ་ཏུ་གཏོང་བ་དང་དངོས་སྒྲུབ་མཉམ་ལས་ལ་ཤུགས་སྣོན་རྒྱག་ཆེད་ལེགས་སྐྱེས་ཧུར་ཐག་འབུལ་འདོད་ཡོད་ཅེས་གསུངས་པ་རེད།