ཀྲུང་གོ་དང་རི་པིན་གྱི་དཔལ་འབྱོར་ལས་རིགས་མི་སྣས་བརྗོད་དོན།
རྒྱལ་ཁབ་གཉིས་པོས་འབྱུང་འགྱུར་ལ་ཕྱོགས་ནས་དངོས་སྒྲུབ་མཉམ་ལས་ལ་སྐུལ་འདེད་གཏོང་རྒྱུའི་རེ་སྒུག་བྱེད་ཀྱི་ཡོད།
ཉེ་ཆར་ཀྲུང་གོའི་དཔལ་འབྱོར་རིག་པ་མཁས་ཅན་གྱི་འཐུས་མི་ཚོགས་པས་རི་པིན་ལ་འཚམས་འདྲི་བྱས་ནས“ཨེ་ཤེ་ཡའི་འབྱུང་འགྱུར”སྐོར་གྱི་རྒྱལ་སྤྱིའི་གླེང་སྟེགས་སྐབས་ཉེར་དགུ་པ་དང་ཀྲུང་གོ་དང་རི་པིན་གྱི་དཔལ་འབྱོར་རིག་པ་མཁས་ཅན་གྱི་སྐད་ཆ་ཤོད་རེས་ཚོགས་འདུ་སོགས་བྱེད་སྒོ་མང་པོ་ཞིག་ལ་ཞུགས་པ་རེད། ཀྲུང་གོ་དང་རི་པིན་གྱི་དཔལ་འབྱོར་ལས་རིགས་མི་སྣས་སྤེལ་རེས་བྱེད་རིང་ཀྲུང་གོ་དང་རི་པིན་རྒྱལ་ཁབ་གཉིས་ཀྱི་དཔལ་འབྱོར་གསབ་རེས་རང་བཞིན་ཅུང་ཆེ་བ་དང་དཔལ་འབྱོར་ཚོང་དོན་མཉམ་ལས་འཕེལ་རྒྱས་གཏོང་བའི་བར་མཐོངས་ཆེ་བས། འགལ་བ་དང་མི་མཐུན་པའི་ཆ་ཐག་གཅོད་འོས་འཚམ་བྱེད་པ་དང་ཆབས་ཅིག་མི་ཆོས་རིག་གནས་སྤེལ་རེས་དང་དངོས་སྒྲུབ་མཉམ་ལས་ལ་ཤུགས་སྣོན་བརྒྱབ་སྟེ་ཨེ་ཤེ་ཡའི་རྒྱལ་ཁབ་ཁག་གི་མཐུན་སྒྲིལ་དང་མཉམ་ལས་ལ་སྐུལ་འདེད་གཏོང་དགོས་པའི་ནན་བཤད་བྱས་པ་རེད།
སྐབས་འདིའི“ཨེ་ཤེ་ཡའི་འབྱུང་འགྱུར”སྐོར་གྱི་རྒྱལ་སྤྱིའི་གླེང་སྟེགས་ཀྱི་བརྗོད་དོན་གཙོ་བོ་ནི“ཡོ་ལང་གི་འཛམ་གླིང་ཁྲོད་ཨེ་ཤེ་ཡའི་འགོ་ཁྲིད་ནུས་པ”ཞེས་པ་དེ་རེད། པོ་ཨའོ་ཨེ་ཤེ་ཡའི་གླེང་སྟེགས་ཀྱི་ལས་འཛིན་དཔོན་གཞོན་པ་ཀྲོའུ་ཞའོ་ཁྲོན་གྱིས་གླེང་སྟེགས་ཐོག་ཨེ་ཤེ་ཡར་སྣ་མང་རང་བཞིན་གྱིས་ཁེངས་ཤིང་། ཁེ་ཕན་དང་མི་མཐུན་པའི་ཆ་སྣ་ཚོགས་ཡོད་མོད། འོན་ཀྱང་ཐུན་མོང་གི་ཁེ་ཕན་དང་མཉམ་ལས་ཀྱི་མི་མངོན་པའི་སྟོབས་ཤུགས་དེ་བས་མང་པོ་ཡོད། ཨེ་ཤེ་ཡས་འཕྲལ་མར་བྱ་སྤྱོད་སྤེལ་ནས་ཐཱན་འདོར་བའི་ཐད་སྣེ་ཁྲིད་ཀྱི་ནུས་པ་འདོན་སྤེལ་བྱས་ཏེ་འགྱུར་རྡོ་མིན་པའི་ནུས་རྒྱུ་འཕེལ་རྒྱས་མགྱོགས་པོ་གཏོང་དགོས། གཞན་ཡང་། ཨེ་ཤེ་ཡའི་རྒྱལ་ཁབ་ཁག་གིས་གནམ་གཤིས་དང་ནུས་རྒྱུ་ཕྱོགས་སྒྱུར་གྱི་མ་དངུལ་བསྡུ་སྒྲིལ་ལ་ཐུན་མོང་ཐོག་ཤུགས་སྣོན་རྒྱག་དགོས་པ་མ་ཟད། ད་དུང་མཐུན་སྒྲིལ་དང་མཉམ་ལས་ལ་སྐུལ་འདེད་གཏོང་དགོས་ཞེས་བརྗོད་པ་རེད།
“ཉེ་བའི་ལོ་ཤས་རིང་། རྒྱལ་སྤྱིའི་དུས་བབ་རྙོག་འཛིང་ཆེ་ལ་ཛ་དྲག་ཆེ་བས་གོ་ལ་ཧྲིལ་པོའི་དཔལ་འབྱོར་འཕེལ་རྒྱས་ཁྲོད་ཀྱི་ཉེན་ཁ་དང་གཏན་འཁེལ་མེད་པའི་རང་བཞིན་ཆེ་རུ་ཕྱིན་ཡོད། དུས་བབ་གསར་པ་འདི་འདྲའི་འོག་ང་ཚོས་ཕྱོགས་མང་རིང་ལུགས་དང་ཚོང་དོན་རང་མོས་ལ་སྐུལ་འདེད་གཏོང་རྒྱུ་མཐའ་འཁྱོངས་དང་དཔལ་འབྱོར་གོ་ལ་ཧྲིལ་པོ་ཅན་ལ་སྲུང་སྐྱོང་བྱེད་དགོས། དུས་མཚུངས་སུ་ཐུན་མོང་ཐོག་འབད་བརྩོན་བྱས་ནས་ས་ཁུལ་དེའི་ཞི་བདེ་དང་བརྟན་ལྷིང་ལ་སྲུང་སྐྱོང་བྱེད་དགོས” “རི་པིན་དང་ཀྲུང་གོར་སྤེལ་རེས་མཉམ་ལས་ཀྱི་རྨང་གཞི་ཡོད་པས་རྒྱལ་ཁབ་གཉིས་པོས་འབྱུང་འགྱུར་ལ་ཁ་ཕྱོགས་ནས་དངོས་སྒྲུབ་མཉམ་ལས་ལ་སྐུལ་འདེད་གཏོང་རྒྱུའི་རེ་སྒུག་བྱེད་ཀྱི་ཡོད”ཅེས་རི་པིན་གྱི་དེ་སྔའི་ནོར་དོན་བློན་ཆེན་གཞོན་པ་ལིང་མུའུ་ཤིན་ཡིའུ་ཡིས་སྐད་ཆ་ཤོད་རེས་བྱེད་སྐབས་དེ་ལྟར་བརྗོད་པ་རེད།
ཀྲུང་གོ་དང་རི་པིན་གྱི་མཛའ་གྲོགས་མཐུན་ཚོགས་ཀྱི་རྒྱུན་ལས་ཚོགས་གཙོ་གཞོན་པ་ཁྲེང་ཡུང་ཧྭ་ཡིས། ཀྲུང་གོས་སྤུས་ཚད་མཐོ་བའི་འཕེལ་རྒྱས་དང་ཆུ་ཚད་མཐོ་བའི་ཕྱི་ཕྱོགས་སྒོ་དབྱེར་སྐུལ་འདེད་གཏོང་བཞིན་ཡོད་པས་རི་པིན་ཚུད་པའི་ཨེ་ཤེ་ཡ་དང་འཛམ་གླིང་གི་རྒྱལ་ཁབ་གཞན་དག་ལ་སྔར་བྱུང་མྱོང་མེད་པའི་གོ་སྐབས་སྦྱིན་ཡོད། ཀྲུང་གོ་དང་རི་པིན་ཕྱོགས་གཉིས་པོས་ན་ནིང་ཟླ་11པར་རྒྱལ་ཁབ་གཉིས་པོའི་འགོ་ཁྲིད་མི་སྣ་མཇལ་འཛོམས་གནང་ནས་བྱུང་བའི་ཐུན་མོང་ངོས་འཛིན་གལ་ཆེན་གྱི་སྣེ་ཁྲིད་འོག་ཡིད་རྟོན་ལ་བརྩི་མཐོང་དང་ཁ་དན་ཚིག་གནས་ཀྱིས་ཀྲུང་གོ་དང་རི་པིན་གྱི་ཆབ་སྲིད་ཡིག་ཆ་བཞིའི་རྩ་དོན་དང་ཐུན་མོང་གི་ངོས་འཛིན་ལ་བརྩི་སྲུང་ཏན་ཏིག་ཞུས་ཏེ་འགལ་བ་དང་མི་མཐུན་པའི་ཆ་འོས་འཚམ་ངང་དོ་དམ་ཚོད་འཛིན་བྱེད་པ་དང་ཆབས་ཅིག་མི་ཆོས་རིག་གནས་སྤེལ་རེས་དང་དངོས་སྒྲུབ་མཉམ་ལས་ལ་ཤུགས་སྣོན་བརྒྱབ་ནས་རྒྱལ་ཁབ་གཉིས་པོའི་འཐབ་ཇུས་གཉིས་ཕན་གྱི་འབྲེལ་བར་ཕྱོགས་ཡོངས་ནས་སྐུལ་འདེད་གཏོང་དགོས་ཞེས་བརྗོད་པ་རེད།