“ཉེ་བའི་ལོ་ཤས་རིང་། མ་ལེ་ཞི་ཡ་དང་ཀྲུང་གོའི་མཐོ་རིམ་དབར་སྤེལ་རེས་དང་མི་སྣ་འགྲོ་འོང་བྱེད་མང་དུ་ཕྱིན་ནས་དཔལ་འབྱོར་ཚོང་དོན་དང་། རིག་གནས། སློབ་གསོ་སོགས་ཁྱབ་ཁོངས་སུ་མཉམ་ལས་དམ་ཟབ་རྒྱུན་འཁྱོངས་བྱེད་ཀྱི་ཡོད”ཅེས་མ་ལེ་ཞི་ཡའི་འགྲིམ་འགྲུལ་པུའུ་ཀྲང་ལུའུ་ཀྲའོ་ཧྥུའུ་ཡིས་ཉིན་ཤས་གོང་འདི་ག་ཚགས་པར་གྱི་གསར་འགོད་པའི་བཅར་འདྲི་དང་ལེན་བྱེད་སྐབས་བརྗོད།

ན་ནིང་ཟླ་10པར། ལུའུ་ཀྲའོ་ཧྥུའུ་ཀྲུང་གོར་ཡོང་སྟེ“རྒྱུད་གཅིག་ལམ་གཅིག”གི་རྒྱལ་སྤྱིའི་མཉམ་ལས་མཐོ་རིམ་གླེང་སྟེགས་སྐབས་གསུམ་པར་ཞུགས་ཤིང་། ཁོང་གིས“རྒྱུད་གཅིག་ལམ་གཅིག”མཉམ་སྐྲུན་གྱི་མཉམ་ལས་སྒྲོམ་གཞིའི་འོག་ཀྲུང་གོས་མཉམ་སྐྲུན་རྒྱལ་ཁབ་ལ་ལག་རྩལ་རོགས་སྐྱོར་དང་མ་དངུལ་བསྡུ་སྒྲིལ་གྱི་རྒྱབ་སྐྱོར་སོགས་བྱས་ནས་ས་གནས་དེ་གའི་རྨང་གཞིའི་སྒྲིག་བཀོད་འཛུགས་སྐྲུན་ལ་རམ་འདེགས་བྱས་ཡོད།“དེས་མཉམ་སྐྲུན་རྒྱལ་ཁབ་ཀྱི་དཔལ་འབྱོར་ཕྱོགས་སྒྱུར་འཕེལ་རྒྱས་ཡོང་བར་གོ་སྐབས་མཁོ་འདོན་བྱས་ཡོད”ཅེས་བརྗོད།

ལུའུ་ཀྲའོ་ཧྥུའུ་ཡིས“‘རྒྱུད་གཅིག་ལམ་གཅིག’མཉམ་སྐྲུན་བྱས་ནས་འགྲིམ་འགྲུལ་ཕན་ཚུན་སྦྲེལ་མཐུད་ཀྱི་དྲ་རྒྱ་འཛུགས་རྒྱུར་སྐུལ་འདེད་གཏོང་བ་དང་། ཀྲུང་གོ་དང་མཉམ་སྐྲུན་རྒྱལ་ཁབ་དབར་གྱི་ཚོང་དོན་ཤར་གཏོང་ལ་སྐུལ་འདེད་གཏོང་བ། དེའི་ནང་ཞུགས་མཁན་ཕྱོགས་ཁག་གི་ཁྲོམ་ར་རྒྱ་ཆེར་གཏོང་རྒྱུར་ཕན་ཐོགས་ཡོད”ཅེས་ཁོང་གིས་ནུབ་རྒྱུད་སྐམ་མཚོའི་བགྲོད་ལམ་གསར་པ་དཔེར་བཞག་ནས་བརྗོད་པ་དང་ད་ཆ་མ་ལེ་ཞི་ཡའི་དངོས་ཟོག་ཤར་རྒྱུད་མཚོ་ངོགས་ཀྱི་ཀོན་ཏན་གྲུ་ཁ་ནས་ཀྲུང་གོའི་ཀོང་ཤིས་ཀྱི་ཆིན་ཀྲོའུ་གྲུ་ཁའི་བར་དབོར་ཆོག་པ་དང་དེ་ནས་ཟོག་འདྲེན་མེ་འཁོར་བརྒྱུད་ཀྲུང་གོའི་ནུབ་རྒྱུད་སོགས་ས་ཁུལ་དུ་དབོར་གྱི་ཡོད་ཅེས་བཤད། “ནུབ་རྒྱུད་སྐམ་མཚོའི་བགྲོད་ལམ་གསར་པར་བརྟེན་ནས་མ་ལེ་ཞི་ཡའི་དངོས་ཟོག་ཀྲུང་གོར་འབྱོར་བའི་དུས་ཚོད་ཐུང་དུ་ཤུགས་ཆེན་ཕྱིན་པ་དང་དུས་མཚུངས་ང་ཚོར་ཀྲུང་གོའི་སྐམ་སའི་དབུས་ཁུལ་གྱི་ཁྲོམ་ར་དེ་བས་མང་བ་ཞིག་བཏོད་ཡོད”ཅེས་བརྗོད།

“ལོ་མང་རིང་། མ་ལེ་ཞི་ཡའི་ལས་གྲྭ་ཆེ་གྲས་མང་པོ་ཞིག་ནང་ཀྲུང་གོའི་ཁེ་ལས་ཞུགས་ཡོད། སྐྲུན་བཞིན་པའི་མ་ལེ་ཞི་ཡའི་ཤར་མཚོའི་ངོགས་ཀྱི་ལྕགས་ལམ་རྣམ་གྲངས་དེ་རྒྱལ་ཁབ་གཉིས་པོས‘རྒྱུད་གཅིག་ལམ་གཅིག’མཉམ་སྐྲུན་གྱི་མཚོན་རྟགས་རང་བཞིན་གྱི་རྣམ་གྲངས་ཤིག་ཏུ་གྱུར་ཡོད” ལུའུ་ཀྲའོ་ཧྥུའུ་ཡིས“ང་ཚོས‘རྒྱུད་གཅིག་ལམ་གཅིག’མཉམ་སྐྲུན་བརྒྱུད་མ་ལེ་ཞི་ཡའི་འཕེལ་རྒྱས་སྐས་རིམ་གསར་པ་ཞིག་ཏུ་སླེབས་པའི་རེ་སྒུག་བྱེད་ཀྱི་ཡོད”ཅེས་བརྗོད།

ལོ་20ལྷག་ཙམ་རིང་། ལུའུ་ཀྲའོ་ཧྥུའུ་ཡིས་ཀྲུང་གོར་འཚམས་འདྲི་ཐེངས་མང་བྱས་པས་ཀྲུང་གོའི་འཕེལ་རྒྱས་དང་འགྱུར་ལྡོག་ལ་བག་ཆགས་ཟབ་མོ་བྱུང་ཡོད།

ཁོང་གིས་ཀྲུང་གོར་གོ་ལ་ཧྲིལ་པོའི་མྱུར་བགྲོད་ལྕགས་ལམ་དྲ་བ་དང་མྱུར་བགྲོད་གཞུང་ལམ་དྲ་བ་ཆེ་ཤོས་སོགས་ཡོད་པ་དང་ཁྱབ་ཁོངས་དེ་དག་ནང་མ་ལེ་ཞི་ཡ་དང་ཀྲུང་གོར་མཉམ་ལས་ཀྱི་བར་མཐོངས་ཧ་ཅང་ཆེན་པོ་ཡོད། མིག་སྔའི་ཟང་ཟིང་ཆེ་བའི་རྒྱལ་སྤྱིའི་དུས་བབ་ལ་ཕྱོགས་སྐབས་རྒྱལ་ཁབ་གཉིས་པོས་ཞི་བདེ་དང་བརྟན་ལྷིང་སྲུང་སྐྱོང་བྱེད་པར་གཞོལ་དགོས་ཅེས་བརྗོད།