འདི་ལོ་ནས་བཟུང་། ཁང་དམར་རྫོང་གྲོང་ཁྱེར་དོ་དམ་ཅུས་ཀྱིས་མི་དམངས་ལྟེ་བར་འཛིན་པའི་ཞབས་ཞུའི་འདུ་ཤེས་མཐའ་འཁྱོངས་ཀྱིས་སྤྱོད་ཚུལ་འགྱུར་ལྡོག་ཤུགས་ཆེན་དང་ལས་ཀའི་ཕན་ནུས་ཆེར་གཏོང་གི་བྱེད་སྒོ་ཏན་ཏིག་སྤེལ་བ། བྱ་སྤྱོད་དངོས་ལ་བརྟེན་ནས་གྲོང་ཁྱེར་ཞིབ་ཚགས་ཅན་དང་། ཚད་ལྡན་ཅན། ཚན་རིག་ཅན་བཅས་ཀྱི་དོ་དམ་ཆུ་ཚད་མཐོ་རུ་གཏོང་བ་བཅས་བྱས་ནས་གཙང་ཞིང་གྲལ་སྟར་འགྲིག་པའི་གྲོང་ཁྱེར་གྱི་ཁོར་ཡུག་རྒྱུན་ཆད་མེད་པར་བཏོད་ཡོད།

གྲོང་ཁྱེར་གྱི་ཕྱོགས་བསྡུས་དོ་དམ་ལས་དོན་ལ་མུ་མཐུད་ཤུགས་སྣོན་རྒྱག་ཆེད། ཁང་དམར་རྫོང་གྲོང་ཁྱེར་དོ་དམ་ཅུས་ཀྱིས“ཉམས་གསོ་ཆུང་ངུར”བརྟེན་ནས“དམངས་འཚོ་ཆེན་པོར”ཞབས་འདེགས་ཞུ་རྒྱུ་མཐའ་འཁྱོངས་བྱས་ཏེ། རང་འགུལ་ངང་གནད་དོན་ཤེས་རྟོགས་དང་མི་འདང་ས་ཡོ་བསྲང་བྱེད་པ་དང་། ཁོངས་གཏོགས་ཁུལ་གྱི་སྐོར་གཡེང་སྐོར་ཞིབ་བྱེད་ཤུགས་ཆེ་རུ་གཏོང་བ། སྐྱོན་ཤོར་བའི་ལམ་སྒྲོན་140ཉམས་བཟོ་བྱེད་པ། ས་འོག་ཆུ་འགྲོའི་ཁ་གཅོད་55དང་ཆར་ཆུ་འགྲོ་སའི་ཁ་གཅོད་11གསར་བརྗེས་བྱེད་པ། གད་སྙིགས་རིགས་དབྱེའི་ས་ཚིགས་2རིམ་སྤོར་བྱེད་པ། སྒོ་བྱང་རྙིང་པ་6གཙང་སེལ་བཅས་བྱས་ནས། གྲོང་ཁྱེར་དོ་དམ་གྱི་སྒྲིག་བཀོད་དེ་དམངས་བདེ་དམངས་ཕན་གྱི་ཞབས་ཞུའི་གཞི་རྟེན་ལ་དངོས་འབྲེལ་འགྱུར་བ་བྱས་ཡོད།

ཁང་དམར་རྫོང་གྲོང་ཁྱེར་དོ་དམ་ཅུས་ཀྱིས་དོན་དངོས་ལ་གཞི་ཚུགས་ནས་སོལ་རླངས་བདེ་འཇགས་གཙོ་གནད་དུ་བྱས་ཏེ“དབྱེར་མེད་བཞི”དོན་འཁྱོལ་ནན་པོ་བྱས་པ་དང་། སོལ་རླངས་བདེ་འཇགས་ཀྱི་མངོན་མེད་རྐྱེན་ངན་ལ་གྲལ་བཤེར་ཐེངས་23བྱས་ནས་དག་ཐེར་ཡོ་བསྲང་གི་བཀའ་རྒྱ་ཐེངས་5བཏང་ཡོད། དྲིལ་བསྒྲགས་བྱེད་སྒོ་ཐེངས་11སྤེལ་ནས་སོལ་རླངས་སྤྱོད་དུས་དོ་སྣང་བྱེད་དགོས་པའི་དོན་ཚན་དང་ཉེན་ཁའི་འཕྲལ་སྡོམ་བྱེད་ཐབས་སོགས་ཀྱི་ཤེས་བྱ་ཁྱབ་གདལ་གཏོང་བ་དང་། རྒྱ་ཆེའི་མང་ཚོགས་དང་ཚོང་དུད་ཀྱི་སོལ་རླངས་སྤྱོད་པའི་བདེ་འཇགས་འདུ་ཤེས་ཟབ་ཏུ་བཏང་ནས་ཁོངས་གཏོགས་ཁུལ་གྱི་མང་ཚོགས་ཀྱི་ཚེ་སྲོག་དང་རྒྱུ་ནོར་གྱི་བདེ་འཇགས་ནུས་ཤུགས་ཡོད་རྒུས་སྲུང་སྐྱོང་ཐུབ་ཡོད་པ་རེད།

གད་སྙིགས་རིགས་དབྱེ་ནི་གྲོང་ཁྱེར་གྱི་ཤེས་དཔལ་དང་སྐྱེ་ཁམས་ཤེས་དཔལ་འཛུགས་སྐྱོང་གི་བྱེད་ཐབས་གལ་ཆེན་ཞིག་ཡིན། ཁང་དམར་རྫོང་གྲོང་ཁྱེར་དོ་དམ་ཅུས་ཀྱིས་མིག་སྔའི་རྫོང་ཡོངས་ཀྱི་འཚོ་བའི་གད་སྙིགས་བསྡུ་རུབ་དང་ཐག་གཅོད་ཐད་གནས་པའི་ལྷུ་ཚིགས་ཞན་སར་དབྱེ་ཞིབ་ནན་ཏན་བྱས་ཏེ། དྲིལ་བསྒྲགས་དང་ཁྲིད་སྟོན་ལ་ཤུགས་སྣོན་རྒྱག་པ་དང་ཆབས་ཅིག་ཤང་དང་གྲོང་རྡལ་ཁག་དང་གྲོང་ཚོ་ཨུ་ལྷན་ཁག་གི་གད་སྙིགས་རིགས་དབྱེའི་སྒྲིག་ཆས་འཐུས་སྒོ་ཚང་དུ་བཏང་ནས་གད་སྙིགས་རིགས་དབྱེའི་བླང་བྱ་དང་ཚད་གཞི་ལྟར་འཚོ་བའི་གད་སྙིགས་ཏུན་900.2གཙང་སེལ་བྱས་པའི་ནང་རྫོང་གྲོང་གི་འཚོ་བའི་གད་སྙིགས་ཏུན་795.2དང་ཤང་དང་གྲོང་རྡལ་གྱི་འཚོ་བའི་གད་སྙིགས་ཏུན་105སྤོ་སྒྱུར་བྱས་ཡོད་པ་རེད།